དྷ་སའི་ཕ་མ་རྣམས་ཀྱི་འཐུས་ཤོར་དང་ལྷོད་གཡེང༌།

དེ་ལྟ་བུའི་ལས་གཞི་ལ་སྙིང་དབུས་ནས་རྗེས་སུ་ཡི་རངས་སྐྱེ་བ་ཞིག་རེད། རྒྱུ་མཚན་ནི་ད་ལྟ་སློབ་ཕྲུག་རྣམས་གུང་སེང་དུ་འབྱོར་ཅིང༌། དེ་དང་སྦྲགས་ནས་ལས་གཞི་དེ་ལྟ་བུ་གོ་སྒྲིག་བྱས་པ་ནི་ལ་རྒྱ་དང་ཕུགས་བསམ་ཅན་གྱི་བསམ་བློ་ཞིག་རེད། སྤྱིར་སློབ་དུས་ནི་གསེར་ལས་རིན་ཐང་ཆེ་བ་ཞིག་སྟེ། ལོ་ན་གཞོན་པའི་སྐབས་སུ་ནང་རིག་གནས་དང་ཕྱིའི་སྒྱུ་རྩལ་གྱི་གནས་གང་ཞིག་ལ་སྦྱང་ནའང་ཤེས་སླ་བའི་དུས་བབ་ཅིག་རེད། ལྷག་པར་དུ་སློབ་གྲྭ་བ་རྣམས་རང་བཞིན་གྱིས་གཞན་ལ་མིག་དཔེ་བལྟ་རྒྱུ་དང༌། བྱ་བ་གསར་པ་རྩོམ་རྒྱུར་བསམ་ཡུལ་ལས་འདས་པའི་གྲུང་པོ་རེད།  ཀུན་གྱིས་གསལ་པོར་རྟོགས་པ་ནི་དྷ་རམ་ས་ལ་འཁྱམས་ཉུལ་བས་ཁེངས་པའི་ས་ཆ་འཁྲུག་པོ་འདི་རེད། དམིགས་བསལ་དུ་ད་ལྟའི་མ་འོངས་བོད་ཀྱི་རེ་བའམ་སོན་རྩ་རྣམས་ལ་མཚོན་ན་ཡུལ་དུས་གཉིས་ལ་བོད་མི་རྒན་རབས་སུས་ཀྱང་བསམ་གཞིག་བྱེད་དགོས་པའི་གནས་སྐབས་ཤིག་རེད་སྙམ། རོལ་དབྱངས་སློབ་པའི་གླ་ཆ་ཆེ་ཆུང་ཇི་ལྟར་ཡང༌། འདི་ལྟ་བུའི་ལས་གཞི་བརྒྱ་ཕྲག་ཅིག་ཡོད་ཀྱང༌། ཉུང་མ་དྲགས་ནའང༌། མང་དྲགས་ཡོད་པ་མ་རེད། དགུན་ཁའི་གུང་སེང་ནི་སློབ་ཕྲུག་ཚོ་ལ་མཚོན་ན་ཕ་མ་སྤུན་གྲོགས་དང་ཐུག་འཕྲད་ཀྱིས་མཉམ་དུ་སྤྲོ་པོའི་ངང་འདུག་རྒྱུ་དང༌། སྦྱང་ཟིན་པ་དག་ལ་བསྐྱར་སྦྱོང་དང༌། འབྱུང་འགྱུར་སྦྱོང་རྒྱུ་ཡིན་པ་དག་ལ་གྲ་སྒྲིག་བྱེད་པ། རིག་རྩལ་གསར་པ་སྦྱོང་རྒྱུ་སོགས་ཀྱི་གོ་སྐབས་བཟང་ཤོས་ཤིག་རེད། འོན་ཀྱང་འདིར་ངས་མཐོང་ཡོང་བ་ནི་ཕྲུ་གུ་རྣམས་སློབ་གྲྭའི་རེ་བ་དང་དམིགས་ཡུལ་དང་འགལ་བའི་དོན་མེད་ཀྱི་བྱ་བར་གཡེང་བཞིན་པའོ། རྒྱལ་ཁབ་གཞན་གྱི་སློབ་ཕྲུག་ལ་མཚོན་ན། གུང་སེང་སྐབས་ས་ཆ་གཞན་དུ་སྤྲོ་འཆམ་ལ་འགྲོ་བའམ། ལས་འཆར་གསར་པ་བཟོ་རྒྱུ། དང་བླང་གི་ལས་ཀ་བྱེད་པ། རྩོམ་ཡིག་འབྲི་བ། ལག་རྩལ་གསར་པ་སྦྱོང་པ། ལུས་རྩལ་སྦྱོང་བ། གཞན་ཡང་ཉམས་མྱོང་གསར་པ་དང་འབྲེལ་བའི་ལས་གཞི་གསར་པ་ཅི་ཡང་རྩོམ་པའི་དུས་ཚོད་གལ་ཆེན་ཞིག་རེད། འོན་ཀྱང་བཙན་བྱོལ་ནང་གི་བོད་ཕྲུག་རྣམས་ལ་ཕྱི་རྒྱལ་གྱི་སློབ་ཕྲུག་ནང་བཞིན་མཐུན་རྐྱེན་མེད་ཀྱང༌། མ་འོངས་པའི་བོད་ཀྱི་རྒྱལ་ཁབ་འཛུགས་སྐྲུན་བྱེད་མཁན་ཡིན་པའི་འགན་འཕར་མ་ཞིག་ཡོད་པ་རེད། མ་ཟད་འུ་ཚོའི་སྲོག་ཤིང་ལྟ་བུའི་དབུ་ཁྲིད་ྋགོང་ས་ཆེན་པོ་མཆོག་གིས་བོད་ཀྱི་སློབ་ཕྲུག་རྣམས་མ་འོངས་བོད་ཀྱི་ཆོས་སྤྱོད་ཞི་བའི་ས་བོན་ཡིན་ཞེས་ངོས་འཛིན་གནང་ཡོད་པ་རླུང་ལྟར་གྲགས་ནས་ཡོད་ཀྱང༌། སེམས་པ་སྐྱོ་བ་ཞིག་ལ་རྡ་རམ་ས་ལའི་སློབ་ཕྲུག་ཚོའི་ཕ་མ་རྣམས་ཤེས་ཡོན་སློབ་གསོའི་ཐད་རྗེས་ལུས་ཡིན་ནམ། ཡང་ན་ཡར་ཐོན་ཆེ་དྲགས་པ་ཡིན་ངས་མི་ཤེས། གང་ལྟར་གུང་སེང་དུ་སླེབས་པའི་ཕྲུ་གུ་རྣམས་ལ་ལག་རྩལ་གསར་པ་སྦྱོང་དུ་འཇུག་རྒྱུའི་གོམས་གཤིས་མེད་པ་རེད། ཐ་ན་སློབ་ཕྲུག་རྣམས་ལས་མེད་འཁྱམས་ཉུལ་བ་དག་གི་ཁྲོད་རི་དྭགས་ལྟར་བདག་སྐྱོང་མེད་པར་གང་སར་འཁྱམ་དུ་འཇུག་གི་འདུག དེ་ནི་ཕ་མའམ་སྤུན་མཆེད་རྣམས་ཀྱིས་འགན་མ་ཁུར་བ་དང༌། ལྷག་པར་དུ་གཞན་ཕན་ལྷག་བསམ་ཅན་གྱི་དགེ་རྒན་རྣམས་ཀྱིས་ལོ་ཟླར་འབད་པའི་ངལ་རྩོལ་དང༌། རེ་འདུན་ཆུ་ལ་བསྐྱུར་བ་ཞིག་རེད།།
ཀུན་ཁྱབ་དཔལ་བཟང་ནས།
peaceseed@gmail.com