སྤྱང་ཀིར་རྣ་ཚར་དང་རྐུན་མར་དཔའ་དར།

དེ་བཞིན་ཕྱི་ཟླ་༡༢ ཚེས་༡༤ ཉིན་དྷ་རམ་ས་ལ་ནས་རྒྱ་མི་ཞིག་རྒྱ་གར་ཉེན་རྟོག་པས་འཛིན་བཟུང་བྱས་པ་དང༌། དེ་ལ་རྒྱ་གར་གཞུང་གིས་འདྲི་རྩད་བྱས་པའི་སྐབས་དེ་ལ་རོགས་པ་བྱེད་མཁན་བོད་པ་ཁག་ཅིག་བྱུང་ཡོད་ཚུལ་རྒྱ་གར་གསར་ལམ་ནས་ཕྱིར་བསྒྲགས་བྱས་ཡོད་པ་དང༌། རྗེས་སུ་ཤེས་རྟོགས་བྱུང་དུས་རྒྱ་ནག་གཞུང་གི་གསང་མྱུལ་བའི་དོགས་གཞི་ཡོད་པའི་མི་དེར་ལྡི་ལི་ནས་རོགས་པ་བྱེད་མཁན་གྲས་སུ་སྤྱི་འཐུས་ཁག་ཅིག་ཀྱང་ཚུད་ཡོད་འདུག་ལ། བདེན་མིན་མི་ཤེས་ཀྱང་རོགས་རམ་དེ་ཡང་བོད་གཞུང་མང་ཛ་དྲག་ལས་འགུལ་ཚོགས་པའི་མིང་ཐོག་ནས་བྱས་མེད་དམ་བསམ་པ་ལྟ་བུའང་ཡོད་པ་དང༌། རྒྱ་གར་གཞུང་གིས་ཀྱང་འབྲེལ་ཡོད་ལ་འདྲི་རྩད་བྱས་ཡོད་ཚུལ་འདུག རྒྱ་མི་དེའི་རྒྱབ་ལྗོངས་དང་གནས་ཚུལ་ལ་ཞིབ་འཇུག་གཏན་ནས་མ་གནང་བར་ཧིན་སྒོར་ཆིག་ཁྲི་ལྷག་སྤྲད་པ་འདི་དཔལ་འབྱོར་གྱི་ཐོག་ནས་ཆེན་པོ་ཞིག་གང་ཡང་མིན་ནའང༌། བོད་རིགས་ངོ་མི་ཤེས་པ་རྒྱུ་མཚན་དང་རྒྱབ་ལྗོངས་གང་ཡང་མི་ཤེས་པ་ཞིག་གིས་ང་ལ་དཀའ་ངལ་འཕྲད་སོང་རོགས་པ་བྱེད་རོགས་ཞེས་ཞུ་བ་འཐེན་ན་རོགས་པ་གནང་གི་རེད་ཅེས་བཤད་ཁག་པོ་རེད།
    གནད་དོན་འདི་དག་གི་ཐོག་ནས་ཤེས་ཐུབ་པ་ཞིག་ལ་བཙན་བྱོལ་བོད་པའི་སྤྱི་ཚོགས་ནང་གི་མཐོ་རིམ་དཔོན་རིགས་ཁག་ཅིག་གིས་རྒྱ་གཞུང་དང་རྒྱ་མི་ལ་སྤྲེལ་ལད་འཁྲབ་ནས་བོད་དོན་བདེན་མཐའ་གསལ་ཐབས་ཡོད་པ་ལྟ་བུ་ཞིག་ཏུ་ངོས་འཛིན་གནང་བཞིན་ཡོད་པ་ལྟ་བུར་མཐོང་ཞིང༌། འཚེ་མེད་ཞི་བའི་ལྟ་གྲུབ་དང་སྙིང་རྗེ་བཟོད་བསྲན་སོགས་ཁ་གཏད་གཅོག་མི་ཐུབ་ས་དང་གླགས་མི་འཁེལ་སའི་བཙན་པོ་དབང་ཡོད་རྣམས་ལ་ལག་བསྟར་བྱེད་དགོས་པ་ཙམ་ལས། བོད་པ་ནང་ཁུལ་དུ་སྟག་ངར་གཡག་ངར་ཤ་སྟག་ཡིན་པས། འགྲོ་ས་ལ་སྟག་དང༌། མི་འགྲོ་ས་ལ་ཝ་ལྟ་བུ་བྱས་ནས། གུ་ཡངས་དང་བཟོད་བསྲན་ཟེར་བ་འདི་བོད་པ་ནང་ཁུལ་དུ་མི་དགོས་པར་རྒྱ་གཞུང་དང་རྒྱ་མི་རིགས་གཅིག་པུའི་ཐོག་ལ་བེད་སྤྱོད་བྱེད་དགོས་པ་ལྟ་བུར་འགྱུར་བཞིན་ཡོད་པའི་ཚོར་སྣང་བྱུང༌། ད་ལྟའི་རྒྱ་མི་འདི་ལ་མཚོན་ན་རྒྱ་གར་གཞུང་གིས་གསང་མྱུལ་བའི་དོགས་གཞིའི་འོག་ནས་འཛིན་བཟུང་བྱས་པ་དང༌། བརྟག་དཔྱད་བྱས་པ་ལྟར་ན་ཁོ་རང་སྔོན་མ་རྒྱ་གཞུང་གི་དམག་མི་ཞིག་ཡིན་པ་མ་ཟད། རྒྱ་གར་དུ་སླེབས་རྗེས་ཀྱང་བོད་རང་སྐྱོང་ལྗོངས་ཟེར་བའི་དམག་དཔོན་མཐོ་གྲས་ཁག་ཅིག་དང་འབྲེལ་བ་བྱུང་ཡོད་ཚུལ་ཡང་བརྗོད་བཞིན་ཡོད་པ་རེད། པེ་ཅིང་ཨོ་ལིམ་པིག་རྩེད་འགྲན་གྱི་དཔལ་འབར་རྒྱ་གར་གྱི་རྒྱལ་ས་ལྡི་ལིར་སླེབས་པའི་དུས་ཚོད་ཕྱི་ཟླ་༤ ཚེས་༡༧ ཡས་མས་སུ་རྒྱ་མི་དེ་ལྡི་ལིར་སླེབས་ཡོད་པ་དང༌། སྐབས་དེར་བོད་ནང་དུ་ཛ་དྲག་ཆེ་བའི་དུས་སྐབས་ཤིག་ཡིན་པ་མ་ཟད། རྒྱ་རིགས་མང་པོ་ཞིག་གིས་ྋགོང་ས་མཆོག་དང་བོད་མི་རིགས་ལ་ཚ་ཚ་འུར་འུར་གྱིས་ཁ་རྡུང་གཏོང་བཞིན་པའི་སྐབས་དེར་རྒྱ་མི་ཞིག་ལ་རྒྱ་གར་གྱི་རྒྱལ་ས་ལྡི་ལི་ནས་དཀའ་ངལ་འཕྲད་པའི་དབང་དུ་བཏང་ཡང༌། རྒྱ་ནག་གཞུང་ཚབ་ཁང་མི་འཚོལ་བར་བོད་པ་འཚོལ་མི་སྲིད་པ་ལྟ་བུ་ཡིན། འོན་ཀྱང་བོད་པའི་ངོས་ནས་བརྟག་དཔྱད་ཞིབ་འཇུག་གང་ཡང་མ་བྱས་པར་རོགས་རམ་བྱས་པ་དང༌། ད་ཆ་མི་དེ་རྒྱ་གར་གཞུང་གིས་འཛིན་བཟུང་བྱས་པའི་སྐབས་བོད་པ་འདི་དང་འདིས་ནས་རོགས་རམ་བྱས་ཚུལ་ཉེན་རྟོག་པ་ལ་བཤད་ཡོད་པ་རེད། དངོས་ཡོད་གནས་ཚུལ་གྱི་ཐོག་ནས་རྗེས་སུ་མཐོ་རིམ་དཔོན་རིགས་དང་མི་མང་སུ་ཡིན་ནའང་རྒྱ་མི་ཞིག་ཡིན་པ་ཙམ་གྱིས་དེ་ལ་ངོ་དགའ་བྱས་ནས་བོད་མི་རིགས་ཀྱི་གནད་དོན་འདི་ཉིད་ཐག་གཅོད་ཡོང་བར་ཕན་པ་ཞིག་གཏན་ནས་མིན་པས་ཚང་མས་གཟབ་གཟབ་བྱེད་དགོས་པ་ཧ་ཅང་གལ་ཆེ་བར་མཐོང༌། སླད་ཀྱི་ཆར་བཞུགས་སྒར་དུ་ཡོང་བའི་རྒྱ་རིགས་རྣམས་ྋགོང་ས་མཆོག་གི་མཇལ་ཁ་དང༌། དེ་བཞིན་དཔོན་རིགས་ཁག་དང་ཐུག་འཕྲད་སོགས་ལ་འབྲེལ་ཡོད་ཁག་ནས་སྟངས་འཛིན་དང་བརྟག་དཔྱད་ཡག་པོ་མ་གནང་བར། སྤྱང་ཀི་ལ་རྣ་ཚར་དང་རྐུན་མ་ལ་དཔའ་དར་འདི་ལྟ་བུ་བྱས་ནས་ནམ་ཞིག་འགྱོད་པ་རྟས་མི་ཟིན་པའི་དུས་ཤིག་ཡོང་སྲིད།།