དུས་དྲན་གཅིག་ལ་མིང་གཉིས།

     དེ་བཞིན་དེང་སྐབས་བོད་དུ་མི་མང་པོ་ཞིག་གིས་ཉིས་སྟོང་བརྒྱད་ཀྱི་གསུམ་བཅུའི་དུས་དྲན་གྱི་སྐབས་སུ་བོད་རིགས་མང་པོའི་ཚེ་སྲོག་ཤོར་ཡོད་པ་དང༌། བོད་མི་ཕོན་ཆེན་གྱིས་ད་དུང་ཡང་བཙོན་ཁང་དུ་མནར་གཅོད་མྱོང་ནས་བསྡད་ཡོད་པས། བཀྲིས་རྟེན་འབྲེལ་གྱི་ལོ་གསར་བོད་མི་ཚོར་འོས་བབས་མིན་ཚུལ་ཡིག་ངག་གཉིས་ཐོག་ནས་བསྒྲགས་པས། བཙན་བྱོལ་དུའང་བསམ་ཚུལ་འདི་གལ་ཆེན་དུ་བརྩིས་ནས་གཞུང་འབྲེལ་མ་ཡིན་པའི་ཚོགས་པ་ཁག་གི་ཚོགས་མི་དང༌། ནམ་རྒྱུན་བོད་དོན་ལ་དོ་སྣང་ཡོད་མཁན་སོགས་ཀྱིས་བགྲོ་གླེང་དང་གྲོས་བསྡུར་བརྒྱུད། དེང་སྐབས་བཙན་བྱོལ་སྤྱི་ཚོགས་ཁྲོད་ལོ་གསར་དེ་མྱ་ངན་གྱི་དུས་དྲན་དུ་སྒྱུར་འདོད་བྱེད་མཁན་མང་དུ་འགྲོ་བཞིན་ཡོད།
    ཁྱད་མཚར་བ་ཞིག་ནི་འཆར་ལ་ཉེ་བའི་ལོ་གསར་གྱི་སྤྲོ་སྐྱིད་འདི་རྒྱ་གཞུང་གིས་ངེས་པར་དུ་གཏོང་དགོས་པའི་བཙན་ཤེད་བྱས་པ་དང༌། ས་ཁུལ་མང་པོ་ཞིག་གི་གྲོང་གསེབ་ཁག་ཏུ་ནང་མིར་གཞིགས་ཏེ་ལོ་གསར་གྱི་འགྲོ་གྲོན་ཟེར་བ་སྤྲོད་བཞིན་ཡོད་འདུག འདི་ལོ་མ་གཏོགས་རྒྱུན་ལྡན་གྱི་ལོ་གསར་སྐབས་ཤང་དང་རྫོང་གི་དཔོན་རིགས་ཚོའི་ཆེད་དུ་གྲོང་གསེབ་ཁག་ཏུ་ཤ་མར་གྱི་ཁྲལ་བསྡུ་སྲོལ་ཡོད་པ་ལས་མི་མང་ལ་ཚུར་འགྲོ་གྲོན་ཟེར་བ་རག་མྱོང་མེད་པ་ཞིག་རེད། དེས་ན་ང་ཚོར་བསླུ་ཐབས་དང་བཙན་ཤེད་ཀྱིས་དུས་དྲན་གཏོང་འཇུག་གི་ཡོད་པའི་གནས་ཚུལ་འདི་ཁོ་ནས་དཔང་པོ་བྱེད་ཐུབ། མདོར་ན་རྒྱ་གཞུང་གིས་གོ་སྒྲིག་བྱེད་བཞིན་པའི་ཞིང་བྲན་ལམ་ལུགས་དང་བཀས་བཀོད་རྒྱུད་འཛིན་གྱི་དཀའ་སྡུག་འོག་ནས་བཅིངས་གྲོལ་ཐོབ་སྟེ་མི་ལོ་༥༠ འཁོར་བའི་དུས་དྲན་ཟེར་བ་འདི་ཡང༌། བཙན་བྱོལ་གཞུང་གིས་བོད་རང་བཙན་ཤོར་ནས་མི་ལོ་༥༠ འཁོར་བའི་དུས་དྲན་གོ་སྒྲིག་བྱེད་བཞིན་ཡོད་པ་འདིའི་ཁ་གཏད་རང་ཡིན་ལ། དེས་ན་དུས་དྲན་གཅིག་ལ་མིང་མི་འདྲ་བ་གཉིས་ཀྱིས་བདེན་རྫུན་གཉིས་ཀྱི་འགྲེལ་བཤད་རེ་རེ་ཁྱེར་ཏེ། གོ་ལའི་སྟེང་ལ་བོད་དོན་ཁྱབ་བསྒྲགས་བྱེད་ངེས་ཡིན་པས་བོད་མི་ཚང་མས་རིག་པ་དྭང་གསལ་ཐོག་ནས་བདེན་རྫུན་གྱིས་ཁྱད་པར་འབྱེད་དགོས་སོ།།