གསལ་བསྒྲགས།
བྱེས་བཞུགས་མདོ་ཁམས་རྫ་ཆུ་ཁ་བའི་ཁོངས་གཏོགས་ཀྱི་མཁྱེན་ལྡན་ཡོངས་ནས་ཐུགས་ངེས་གནང་རྒྱུར། སྤྱིར་དགོངས་མངའ་བཞིན་རང་རེ་རྫ་ཆུ་ཁ་བའི་རྡ་ས་སྐྱིད་སྡུག་ཁོངས་ནས་གཞི་རྩའི་ཚོགས་པའི་དམིགས་ཡུལ་གྱི་ཆ་ཤས་སུ་ལོ་ལྟར་རྡ་སར་གནས་སྡོད་དང་དེའི་གཡས་གཡོན་གྱི་དགོན་པ་དང་སློབ་གྲྭའི་རང་མི། དེ་བཞིན་ལྷོ་ཕྱོགས་གྲྭ་བ་ཁག་དང་བོད་ནས་ཕེབས་པ་བཅས་མཉམ་འཛོམས་ཀྱི་ལོ་སར་ཐུགས་སྤྲོ་ཞིག་གཏོང་སྲོལ་ཡོད་ལ། གཞི་རྩའི་ཆ་ནས་འདི་ནི་རྒྱ་ཆེ་བའི་ཞབས་ཏོག་ཅིག་མིན་ཡང་འགྲོ་བ་སྤྱི་ཚོགས་ཅན་ཡོངས་ཀྱི་རྩ་བའི་ཆོས་ཉིད་དང་ཤིན་ཏུ་འཚམས་པའི་མཉམ་འཛོམས་ཞིག་སྟེ། མཉམ་འཛོམ་འདི་རིགས་བརྒྱུད་ནས་ཕུགས་བསམ་དང་མཐུན་སྒྲིལ། སྟོབས་ཤུགས་དང་སྤྲོ་སྣང་སོགས་ཐོབ་ཀྱི་ཡོད་པའི་ངོས་འཛིན་ཞུ་བཞིན་ཡོད།
འོན་ཀྱང་རྣམ་པའི་ཆ་ནས་སྤྲོ་སྐྱིད་ཀྱི་བྱེད་སྒོར་གཏོགས་ཤིང་འདས་པའི་ལོ་འདིར་རྒྱ་མིས་ཕ་ཡུལ་ཁ་བ་ཅན་ལ་མནར་གཅོད་སྡུག་བསྔལ་ཚད་ལས་འདས་པ་བཏང་དང་གཏོང་བཞིན་པ་དང༌། དཔའ་བོ་དཔའ་མོ་མང་པོ་ཞིག་གི་ཚེ་སྲོག་ཤོར་བ། དེ་ལས་མང་བ་ཞིག་ཡ་ང་བའི་བཙོན་ཁང་ནང་དུ་ཡོད་པ། ཁྱད་པར་རྫ་ཆུ་ཁའི་ངོས་ནས་ཀྱང་ས་བྱི་ཞི་རྒོལ་ཆེན་མོའི་རང་དབང་གི་མི་སོན་ཆེས་ཐོག་མར་རྒྱལ་ས་ལྷ་སའི་མདུན་ཐང་ནས་དར་འཕྱར་མཁན་རྣམས་དང༌། མཆོག་སྤྲུལ་ཨ་དྲིས་རིན་པོ་ཆེ། རྒན་དགྲ་ལྷ་སོགས་ཉེས་མེད་ཉེས་འཛུགས་ཀྱིས་ཁྲིམས་ལ་སྤྱར་ཡོད་པ་སོགས་ལ་གདུང་སེམས་མཉམ་སྐྱེད་མཚོན་ཆེད་དང༌། གཞི་བྱེས་བོད་མིའི་རྡོག་རྩ་གཅིག་སྒྲིལ་གྱི་སེམས་པ་མཚོན་བྱེད་དུ་ད་ལོའི་ལོ་གསར་ཐུགས་སྤྲོ་གནས་སྐབས་གཏོང་རྒྱུ་མིན་པས་དེ་ལུགས་མཁྱེན་ཆུབ་ཡོང་པ་ཞུ་ཞུ།
བོད་རྒྱལ་ལོ་ ༢༡༣༥ ཟླ་ ༡༢ ཚེས་ ༡ ལ། རྫ་ཆུ་ཁའི་རྡ་ས་སྐྱིད་སྡུག་རྒྱུན་ལས་ཐུན་མོང་ནས།
