རྒྱ་ནག་ནང་བཅིངས་འགྲོལ་གཏོང་དགོས་ངེས་རེད།

    ཕྱིའི་རྒྱལ་ཁབ་ཁག་ལ་བརྟན་ལྷིང་གི་བོད་ལྗོངས་དང༌། ཞི་བདེའི་བོད་ལྗོངས། འཆམ་མཐུན་གྱི་བོད་ལྗོངས་ཟེར་བའི་རྫུན་གཏམ་གྱི་འུར་སྒྲོགས་བཤད་པ་ཚོད་མ་ཟིན་པའི་ཉེར་ལེན་གྱིས། ཉེ་ཆར་དབྱིན་ཇིའི་མཐོ་རིམ་སློབ་གྲྭ་ཞིག་གི་ནང་ཝིན་ཅཱ་པའོ་ལ་སློབ་མ་ཞིག་གིས་ལྷམ་གཞུས་པ་དེ་རྫུན་གཏམ་ཚོད་མ་བྱས་པས་རྒྱལ་སྤྱིའི་མདུན་དུ་ངོ་གནོང་དགོས་པ་ཞིག་ཆགས་པ་རེད། དེ་ནི་དཔེ་མཚོན་ཙམ་ཞིག་རེད། ཁྱེད་ཅག་དམར་པོའི་གཞུང་ནས་བཅིངས་འགྲོལ་བཏང་བ་ཡིན་ཟེར་གྱི་ཡོད་ཀྱང་བཅིངས་འགྲོལ་ཐོབ་སའི་མི་དམངས་རྣམས་ལ་ཞི་བདེ་དང་འགྲོ་འདུག སྨྲ་བརྗོད་སོགས་ལ་རང་དབང་རྩ་བྲལ་དུ་སོང་རྐྱེན་རང་ལུས་ལ་མྱོང་བའི་སྡུག་བསྡལ་མུ་མཐུད་བཟོད་བསྲན་བྱ་ཐབས་བྲལ་བས། བོད་མི་ཚོའི་སེམས་ཚོར་དམར་རྗེན་ཕྱིར་མངོན་ཏེ་ཞི་བའི་ལས་འགུལ་འུ་ཐུག་སྟེ་སྤེལ་དགོས་བྱུང་བ་ཞིག་རེད། ཁྱེད་ཚོས་བོད་གངས་ཅན་ལྗོངས་སུ་མིང་དོན་མཚུངས་པའི་བཅིངས་འགྲོལ་བཏང་ཡོད་ཟེར་ན་སུས་ཀྱང་ཡིད་ཆེས་པར་དཀའ། འོན་ཀྱང་འབྱུང་འགྱུར་རྒྱ་ནག་ནང་བཅིངས་འགྲོལ་གཏོང་འཆར་ཡོད་ཟེར་ན་གཏོང་དགོས་ངེས་རེད། རྒྱ་ནག་མི་མང་རྣམས་ལྟ་རྒྱ་ཐོས་རྒྱ་མེད་པའི་ཁྲོན་པའི་སྦལ་པ་བཞིན་མུན་ནག་ཏུ་གདུག་རྩུབ་ཆེ་བའི་ཁྲིམས་ཀྱིས་གནོན་བཞིན་ཡོད་པ་ནི་འཛམ་གླིང་གང་སར་ཀུན་གྱིས་ཁ་གཅིག་གྲགས་ཡིན། རང་གིས་རང་ལ་མགོ་སྐོར་བ་བཞིན་སོ་སོའི་མི་རིགས་ལ་སོ་སོས་མགོ་སྐོར་བ་ནི་ཆེས་གདུག་རྩུབ་ཀྱི་ཆབ་སྲིད་སྐྱོང་སྟངས་ཤིག་ཡིན་པ་བརྗོད་ཆོག ཆུང་ས་ཞིག་ནས་དཔེ་མཚོན་ཙམ་ཞིག་བརྗོད་ན། རྒྱལ་སྤྱིའི་སྟེང་སྟོབས་ཆེན་རྒྱལ་ཁབ་ཨ་རི་ལྟ་བུའི་དཔལ་འབྱོར་གྱི་མ་དངུལ་ཆག་པར་བརྟེན་རྒྱ་ནག་སོགས་རྒྱལ་ཁབ་གཞན་རྣམས་རང་བཞིན་གྱིས་ཆག་ཡོང་བ་དང༌། བཟོ་གྲྭ་མང་པོ་སྒོ་རྒྱག་དགོས་བྱུང་སྟེ་དཀའ་ངལ་ཆེ་བའི་ལས་མེད་མི་མང་ས་ཡ་ཉི་ཤུ་བརྒལ་བ་ཞིག་ཡོད་ལ། མི་མང་གིས་གཞུང་ལ་ངོ་རྒོལ་བྱེད་མཁན་ཡང་ཉིན་རེ་ནས་ཉིན་རེ་ཇེ་མང་དུ་འགྱུར་བཞིན་ཡོད་ན་ཡང་རྒྱ་ནག་གིས་ལྡོག་ཕྱོགས་ཀྱིས་ང་ཚོའི་ཚོང་རའི་མ་རྩ་ཆག་པར་བརྟེན། ཕྱིའི་རྒྱལ་ཁབ་ཁག་དཀའ་ངལ་གྱི་གནས་སུ་ལྷུང་བཞིན་ཡོད་ཟེར་ནས་རྒྱ་ནག་གི་གསར་འགྱུར་ཐོག་རྫུན་ཕུགས་ཐུང་བའི་མགོ་སྐོར་གྱི་གཏམ་ཞིག་ཁྱབ་བསྒྲགས་བྱེད་བཞིན་ཡོད། རྒྱ་གཞུང་ནས་ཕྱིའི་རྒྱལ་ཁབ་ཁག་གི་གསར་འགྱུར་བརྒྱུད་ལམ་རྣམས་བཀག་ནས་རྒྱ་ནག་མི་མང་རྣམས་ལྟ་རྒྱ་ཐོས་རྒྱ་མེད་པ་རྨོངས་པའི་དྲ་བ་ཞིག་ཏུ་མུ་མཐུད་བཅུག་འདོད་ཡོད་ནའང་མི་མང་རྣམས་ཉིན་རེ་བཞིན་རྨོངས་གཉིད་ལས་སད་དེ་རྒྱལ་ཁབ་ཀྱིས་རྒྱུན་དུ་བསྒྲགས་པ་རྣམས་མགོ་སྐོར་དང་རྫུན་གཏམ་ཁོ་ན་ཡིན་པ་ཤེས་ཏེ། ངོ་རྒོལ་གྱི་རྣམ་པ་ཇེ་མང་དུ་འགྲོ་བ་དང༌། རྒྱ་གཞུང་གིས་སྔར་གྱི་དྲག་གནོན་གྱི་ལམ་ལུགས་དུས་རབས་ཉི་ཤུ་རྩ་གཅིག་པའི་ནང་མུ་མཐུད་གནས་ཐབས་མེད་པ་ཤེས་ཀྱི་ཡོད་ལ། རྒྱ་ནག་གི་དབང་འཛིན་པ་ཚོ་ཉེན་ཁ་ཆེན་པོ་ཞིག་དང་ཐག་ཇེ་ཉེར་འགྲོ་བཞིན་ཡོད། བོད་རང་སྐྱོང་ལྗོངས་ནང་ལ་ཆ་བཞག་ན། རང་སྐྱོང་ལྗོངས་ཀྱི་བོད་རིགས་དཔོན་པོ་ཕལ་ཆེ་བས་མིང་སྟོང་པ་ཞིག་ཁྱེར་ཏེ་བོད་ཀྱི་དགོན་སྡེ་ཁག་དང་མི་མང་དཀྱུས་མ་རྣམས་ལ་དམ་དྲག་ཆེ་བའི་ལས་འགུལ་ཞིག་དང་ཕྱི་རྒྱལ་ལ་ཡོད་པའི་བཙན་བྱོལ་གཞུང་དང་ྋགོང་ས་མཆོག་ལ་དམའ་འབེབས་དང་མཚན་སྨད་ཞུ་དགོས་པའི་ལས་འགུལ་སྤེལ་བ་ཙམ་ལས་གཞན་ཁོང་ཚོར་དབང་ཆ་ཆུང༌། ཁོ་ཚོ་ནི་ཕྱིའི་རྒྱལ་ཁབ་མདུན་བོད་རིགས་རང་ནས་ལས་འགུལ་གྱི་རྣམ་པ་མཚོན་བྱེད་དུ་ཟློས་གར་འཁྲབ་མཁན་གྱི་འཁྲབ་སྟོན་པ་ཞིག་དང་ཅི་ཁྱད། གཏམ་རྒྱུད་གང་ཞིག་འཁྲབ་དགོས་མིན་ནི་འཁྲབ་ཁྲིད་པ་ལ་བལྟ་དགོས་པ་བཞིན། རང་སྐྱོང་ལྗོངས་ཀྱི་དཔོན་པོ་རྒྱ་རིགས་ཀྲང་ཆི་ལི་ཡི་བཀའ་བཀོད་སྒུག་ནས་སྡོད་དགོས། རེ་འགའ་ནི་འཁྲབ་ཁྲིད་པས་བསླབས་པ་གཞིར་བཟུང་དོ་སྣང་དང་འབད་བརྩོན་ཆེན་པོ་བྱས་པ་ཙམ་གྱིས་གོ་གནས་ཆེ་རུ་འགྲོ་བཞིན་ཡོད། མཐའ་འཇུག་ཏུ་བཅིངས་འགྲོལ་ཟེར་བའི་མིང་སྙན་པོ་དེ་དོན་དངོས་འདོད་བློ་ཡོད་ན་རྒྱ་ནག་མི་མང་ལ་བཏང་ན་ད་ལྟའི་ཆར་དགོས་མཁོ་ཆེ་ཤོས་ཤིག་ཏུ་སེམས། ང་ཚོའི་བོད་ཀྱི་ཡུལ་ལ་བཅིངས་འགྲོལ་བཏང་ཡོད་ཟེར་ན་འཛམ་གླིང་པ་ཀུན་གྱིས་ཁྲེལ་དགོད་བྱས་ཏེ་རྫུན་གྱི་དབང་པོའི་མཚན་སྙན་དེ་རྒྱལ་སྤྱིའི་ནང་ནས་རྒྱ་ནག་གི་སྲིད་འཛིན་ལས་འོས་པ་སུ་ཞིག་ལ་མེད་པས་ཁྱེད་ལ་འབུལ་ངེས