སྤྲང་པོའི་གཤིས་ཀ

གཞན་གྱི་ངོ་སོ་སྲུང་ཅི་ཐུབ་བྱེད་ཅིང༌། གང་ན་ནུབ་ཕྱོགས་པའི་ལྟ་གྲུབ་རྙིང་ཞིང་གོག་པ། རྒས་ཤིང་འཁོགས་པ། འཁྱོག་ཅིང་འཁྱོལ་བ། དེང་གི་དུས་རབས་དང་ཆེས་མི་མཐུན་པ་དང༌། ཆེས་ཚད་གཞི་ལྷུང་བ་རྣམས་ལས་ལུང་འདྲེན་དང༌། ཚིག་འདྲེན་བྱས་ཏེ་ཡོད་ཚད་བསྟུན་ཅི་ཐུབ་བྱེད། ད་དུང་དེང་རབས་ཀྱི་རྫས་འགྱུར་བྱེ་བྲག་པ་རེ་ཟུང་ཐོག་གྲུབ་འབྲས་ཅུང་ཙམ་བྱུང་བ་རྣམས་ལ་ཚན་རིག་དང་ཚན་རིག་སྨྲ་བ་ཞེས་ཁྱིའི་མིང་ལ་སེང་གེ་བཏགས་ནས། དེ་ཚོའི་ངོ་སོ་དང་མདུན་ས་སྲུང་ཅི་ཐུབ་བྱེད་པ་ནི་དེང་གི་གཡམ་ལ་རྒྱུག་མཁན་ཚོའི་གཟི་བརྗིད་ཅིག་ཏུ་བརྩི་ལ། འདིས་རང་ཚུགས་དང་རང་ཉིད་སྔོན་མ་ནས་བོར་བརླགས་སུ་སོང་བའི་ཐན་རྟགས་ཤིག་རེད། སྤྱིར་ན་འཇིག་རྟེན་གྱི་སྐྱེ་དངོས་རྫས་གསུམ་ལ་དཔྱད་ཞིབ་ཀྱི་བསམ་བློ་ཡན་གར་ཞིག་ཐོབ་ཀྱང་རྗེས་སུ་ཡི་རངས་བྱེད་འོས་མོད། སྤྱི་ཚོགས་དང་དངོས་བྱུང་ཚན་རིག་གི་དགོངས་བཅུད་མ་ལུས་པ་གཅིག་སྡུད་ཐུབ་པའི་ནང་པའི་ལྟ་གྲུབ་གཞུང་ལུགས་དང་དེས་དྲངས་པའི་གཏན་ཚིག་རིག་པའི་གཞུང་ལུགས་དང༌། རྩ་བ་ནང་སེམས་ཀྱི་འཇིག་རྟེན་ཏེ་སེམས་དང་སེམས་ཁམས་ཀྱི་རིག་པའི་གཞུང་ལུགས་རྒྱ་ཆེ་ཞིང་གཏིང་ཟབ་པ་ཡོད་པ་ལ། ང་ཚོས་བློ་སྦྱོང་དང་ཡིད་དཔྱོད་ཙམ་ཡང་མི་བྱེད་པར། གཞན་གྱི་སྤྱི་ཚོགས་རྫས་འགྱུར་བ་ཚོས་བཤད་པའི་ཚོར་རྟོགས་ཉག་ཆུང་བ་ལ་ཚན་རིག་པ་ཞེས་ཡིད་ཆེས་དང་གདེངས་འཇོག་ཚད་མེད་བྱེད་ཅིང༌། གང་ཞིག་ཚན་རིག་པས་ལྟ་བ་དང་འགྲེལ་བཤད་ཡོད་ཚེ་དེ་ཚད་ལྡན་དང༌། གང་ཞིག་ལ་དེ་མེད་ཚེ་ཚད་གཞི་མེད་པར་ངོས་འཛིན་བྱེད། ཞིབ་ཏུ་བསམས་ན་ང་ཚོས་རང་ཉིད་ཀྱི་གཞུང་ལུགས་ཡོད་ཚད་བོར་ཏེ་གཞན་གྱི་ཟེར་སྒྲོས་ཙམ་ལ་ཁུངས་གཏུགས་ཅི་ཐུབ་བྱེད་ལ། དེ་ཚོ་ནི་བྱེ་མའི་ཁུང་བུ་འདྲ་བར་ཟེར་སྒྲོས་ཀྱི་རླུང་ཡན་དེ་གཡུག་ཚར་དུས་རྗེས་ཤུལ་ཙམ་ཡང་མཐོང་རྒྱུ་མེད། དཔེར་ན། ཨ་རི་དང་འཇར་པན་སོགས་ཀྱི་མཁའ་སྤྱོད་པ་སྐོར་ཞིག་ཟླ་བའི་ཐོག་སོང་སྟེ་ཟླ་བའི་ངོས་ཀྱི་ས་ཁུགས་གཅིག་གི་ས་རྡུལ་ཞིག་ཁྱེར་ཡོང་ནས། དེས་ཟླ་བའི་གོ་ལ་ཡོངས་རྫོགས་ལ་ཚོད་དཔྱོད་བྱས་ཏེ་ཟླ་བའི་གོ་ལའི་ནང་དུ་ཆུ་སོགས་གཤེར་རྫས་ཀྱི་རིགས་འབྱུང་མི་སྲིད་པ་རེད་ཅེས་གཏན་ཁེལ་བ་རེད། དུས་རབས་ཉི་ཤུ་པའི་ལོ་རབས་དྲུག་ཅུའི་ནང་འབའ་བ་ཕུན་ཚོགས་དབང་རྒྱལ་གྱིས་སྨྱཟླ་བའི་གོ་ལའི་སླ་གཟུགས་ཀྱི་རྣམ་བཞག་བཤད་པ་ཡཅེས་པའི་དེབ་བྲིས་པ་རེད། དེའི་ནང་དུ་ཁོང་གིས་མ་ཁེ་སི་དང་ལེ་ཉིན་གྱི་དངོས་གཙོ་རྩོད་སྒྲུབ་ཀྱི་གཏན་ཚིགས་རིག་པའི་ཐོག་ཟླ་བའི་ནང་ཆུ་ཡོད་པ་བསྒྲུབས་ཏེ་ཟླ་བའི་གོ་ལའི་ནང་ཆུ་ཡོད་པ་གསལ་བར་བསྒྲགས་ཏེ་ཡ་གླིང་རྒྱལ་ཁབ་ཁག་གི་ཚན་རིག་པ་མང་པོ་ཧ་ལས་སུ་བཅུག་པ་རེད། འདིས་ང་ཚོ་བོད་མི་ཚོའི་ཁྲོད་དུའང་རང་བྱུང་ཚན་རིག་པ་ཚད་ལྡན་ཡོད་པ་གསལ་བཤད་བྱས་ཡོད་ལ། འུ་ཚོའི་མི་རིགས་འདིའི་ཁྲོད་ཀྱི་བསམ་བློ་བ་ནི་རྫས་འགྱུར་སྨྲ་བ་ཚོ་ལས་ལྡབ་འགྱུར་གྱིས་བསམ་བློའི་ཁྱབ་རྒྱ་ཆེ་བ་བསྟན་ཡོད་ལ། དེང་རབས་ཀྱི་སྤྲང་གཤིས་ཅན་གྱི་བོད་རིགས་རྩོམ་པ་པོ་མང་པོ་ཞིག་ལ་དྲན་སྐུལ་ཐེངས་གཅིག་ཐེབས་སུ་བཅུག་པ་རེད། འོན་ཀྱང་ཡིད་སྐྱོ་བ་ཞིག་ལ་དེང་རབས་ཀྱི་སྙན་ངག་པ་དེ་ཚོར་དེབ་འདི་འདྲ་ཀློག་པའི་བསམ་བློ་མེད་པ་མ་ཟད་ད་དུང་མུ་མཐུད་དེ་སྔོན་གྱི་ཕྱི་གླིང་བ་ཚོའི་རྩོམ་རིག་ཆེས་རྙིང་ཞིང་འཁོགས་པ་དག་ལས་ཚིག་ཐན་ཐུན་རེ་རྐུན་མ་བརྒྱབ་སྟེ་ཉི་མ་གཏོང་ཐབས་བྱེད་རྒྱུ་ཡིན་ངེས་ལ། སྤྲང་པོའི་གཤིས་ཀ་ལྡན་པའི་དེང་རབས་ཀྱི་ན་གཞོན་རྩོམ་པ་པོ་འདི་དག་གིས་ནམ་ཡང་ཨང་གཉིས་པ་ཞིག་དང་ལད་ཟློས་རྩོམ་རིག་ཞིག་ལས་རེ་བ་རྒྱག་མི་སྲིད་དོ།།