དུས་རྒྱུན་བརྗེད་མི་རུང་བའི་བཀའ་དྲིན།
བོད་ཀྱི་བང་ཆེན་སྤྱིའི་འདོན་ཐེངས་ ༢༢༢
ཕྱི་ཟླ་༣ ཚེས་༣༡ ཉིན་བཙན་བྱོལ་བོད་མིའི་ས་གནས་གང་སར་ྋགོང་ས་མཆོག་དང་བོད་རིགས་གང་མང་ཞིག་སྐྱབས་བཅོལ་དུ་འབྱོར་ནས་མི་ལོ་ལྔ་བཅུ་འཁོར་བའི་དུས་དྲན་དང་སྟབས་བསྟུན། རྒྱ་གར་གཞུང་མང་གཉིས་ལ་ཐུགས་རྗེ་ཆེ་ཞུ་བའི་དུས་ཆེན་ཞིག་སྲུང་བརྩི་ཞུས་ཡོད་པ་རེད། གནད་དོན་འདིའི་ཐོག་ནས་ཕྱི་འདང་ཞིག་བརྒྱབ་ན་ཧིན་བོད་མི་མང་གི་མཛའ་འབྲེལ་དེར་ཆོས་རྒྱལ་མེས་དབོན་རྣམ་གསུམ་གྱི་དུས་ནས་བཟུང་ལོ་ཆིག་སྟོང་ལྷག་གི་ལོ་རྒྱུས་ཡོད་པ་དང༌། བོད་མི་རིགས་ཀྱི་བསམ་བློའི་ནང་དུ་རྒྱ་གར་འཕགས་པའི་ཡུལ་ཞེས་རྒྱ་གར་གྱི་ས་ཆ་དང་རྒྱ་གར་མི་རིགས་དེ་ཉིད་གཞན་ལས་ཁྱད་དུ་འཕགས་པའི་བག་ཆགས་སམ་ལྟ་ཚུལ་ཞིག་རང་བཞིན་གྱིས་ཡོད་པ་བཞིན། རྒྱ་དམར་པེ་ཅིང་གཞུང་གིས་བོད་བཙན་བཟུང་བྱས་པར་བརྟེན་ྋགོང་ས་མཆོག་གིས་དབུས་བོད་རིགས་གང་མང་ཞིག་བཙན་བྱོལ་དུ་གྱར་ནས་ངོ་ཤེས་པ་ས་དང་གནམ་ལས་མེད་པའི་སྐབས། རྒྱ་གར་གཞུང་གིས་སྣེ་ལེན་ཡག་པོ་གནང་བ་ཙམ་དུ་མ་ཟད། བོད་པའི་གཞིས་ཆགས་ཁག་གསར་འཛུགས་དང༌། བོད་པའི་བུ་ཕྲུག་རྣམས་ཀྱི་ཆེད་ཟུར་དུ་སློབ་གྲྭ་གང་མང་ཞིག་གསར་འཛུགས་གནང་ནས་ད་ལྟའི་ཆར་ཡང་སློབ་གྲྭ་དེ་དག་འཛིན་སྐྱོང་དང་འགྲོ་གྲོན་ཡོངས་རྫོགས་རྒྱ་གར་གཞུང་གིས་གནང་བཞིན་ཡོད་པ་རེད།
དེ་ཙམ་དུ་མ་ཟད་ཝ་ཎ་མཐོ་སློབ་དང༌། བོད་ཀྱི་དཔེ་མཛོད་ཁང་གིས་གཙོས་ཤེས་ཡོན་གྱི་སྡེ་ཚན་གལ་ཆེན་པོ་ཁག་ཅིག་ཆེད་འཛུགས་ཀྱིས་མཐུན་འགྱུར་གནང་དང་གནང་བཞིན་པ་སོགས་བོད་མི་རིགས་རིག་གཞུང་དང་བཅས་ལ་ཕན་པའི་རོགས་རམ་བླ་མེད་གནང་ཡོད། དེང་སྐབས་འཛམ་གླིང་གི་རྒྱལ་ཁབ་གང་མང་ཞིག་ལ་རྒྱ་ནག་གཞུང་གིས་ྋགོང་ས་མཆོག་གདན་འདྲེན་ཞུ་མི་ཆོག་པའི་གནོན་ཤུགས་ལ་བརྟེན་ནས་ཤུགས་རྐྱེན་འཕྲད་པའང་བྱུང་ཡོད་པ་དང༌། རྒྱལ་ཁབ་རེ་ཟུང་གི་དཔོན་རིགས་དང་ྋགོང་ས་མཆོག་མཇལ་འཕྲད་གནང་བར་ཡང་རྒྱ་གཞུང་གིས་བཀག་འགོག་བྱས་པ་སོགས་ཀྱི་གནས་ཚུལ་བྱུང་ཡོད། འོན་ཀྱང་རྒྱ་གར་གཞུང་གིས་དུས་རྒྱུན་རྒྱ་གར་དུ་ྋགོང་ས་མཆོག་གི་མཛད་པ་འཕྲིན་ལས་ལ་ཚད་བཀག་གཏན་ནས་མེད་པར་རང་དབང་གུ་ཡངས་ཀྱི་གནས་བབས་རྒྱ་ཆེ་ཞིག་བསྐྲུན་གནང་མཛད་ཡོད་པ་མ་ཟད། རྒྱ་གར་དུ་ཡོད་པའི་བོད་རིགས་སྐྱབས་བཅོལ་བ་རྣམས་ལ་རང་དབང་གི་ཁོར་ཡུག་ཧ་ཅང་རྒྱ་ཆེན་པོ་ཞིག་གནང་ཡོད་པ་རེད།
བོད་མི་རིགས་ལ་མཚོན་ན་རྒྱ་གར་གཞུང་མང་གཉིས་ཀྱི་བཀའ་དྲིན་དང་མཛའ་སེམས་ནི་ཤར་ནུབ་ཀྱི་རྒྱལ་ཁབ་སུ་དང་ཟུར་ཙམ་ཡང་བསྡུར་ཐབས་མེད་པ་དང༌། ཕྱི་དངོས་པོའི་རོགས་རམ་གྱི་ཐོག་ནས་བཤད་ཀྱང་བཙན་བྱོལ་གཞུང་དམངས་གཉིས་ལ་བཀའ་དྲིན་ཆེ་ཤོས་ཤིག་རྒྱ་གར་གཞུང་ཡིན་པ་རེ་རེ་བཞིན་བཤད་མི་དགོས་པར་ཧ་ཅང་གསལ་པོར་གྱུར་ཡོད། ཧིན་བོད་མི་མང་གི་མཛའ་འབྲེལ་ནི་བོད་རིགས་རྣམས་བཙན་བྱོལ་དུ་འབྱོར་ནས་མི་ལོ་ལྔ་བཅུའི་རིང་ཙམ་མ་ཡིན་པར་གོང་དུ་བརྗོད་པ་བཞིན། མི་ལོ་སྟོང་ཕྲག་བརྒལ་བའི་བཟང་འབྲེལ་གྱི་ལོ་རྒྱུས་ཡོད་པ་བཅས་ཕྱོགས་གང་ཐད་ནས་ཕྱིར་དྲན་བྱེད་འོས་པ་ཞིག་ཡིན་ཞིང༌། བོད་པའི་ངོས་ནས་ཀྱང་མི་ལོ་ལྔ་བཅུ་རྒྱ་གར་དུ་བསྡད་པའི་རིང་རྒྱ་གར་གཞུང་ལ་ངོ་གནོངས་དགོས་པའི་བྱ་བ་ཞིག་གང་ཡང་བྱས་མེད་ཅེས་བརྗོད་ཆོག་པ་ལྟ་བུར་གྱུར་ཡོད་ལ། གནད་དོན་འདིའི་ཐོག་ནས་བསམ་བློ་བཏང་ན་རྒྱ་གར་གཞུང་དམངས་གཉིས་དང་བོད་རིགས་སྤྱི། ལྷག་པར་དུ་ྋགོང་ས་མཆོག་གིས་དབུ་ཁྲིད་པའི་བཙན་བྱོལ་བོད་མི་རྣམས་ཀྱི་མཛའ་མཐུན་གྱི་འབྲེལ་ལམ་ནི་དུས་ནམ་ཡང་བསུབ་ཐབས་མེད་པར་རྡོ་ལ་བརྐོས་པའི་རི་མོ་བཞིན་དུ་གྱུར་ཡོད། མ་འོངས་པར་བོད་ལ་རང་དབང་གི་ཉི་མ་ཞིག་ཤར་ནས་གཞིས་བྱེས་མཉམ་འཛོམས་ཡོང་བའི་སྐབས། བོད་པའི་མཛའ་འབྲེལ་གྱི་རྒྱལ་ཁབ་གལ་ཆེ་ཤོས་དེ་རྒྱ་གར་གཞུང་ཡིན་པ་དང༌། ཆོས་དང་རིག་གཞུང་གཅིག་ཕན་གཅིག་གྲོགས་སོགས་འཕགས་བོད་ཀྱི་འཛའ་འབྲེལ་ཧ་ཅང་དམ་པོར་གནས་ཡོད་པ་འདི་ཡང་དུས་རྒྱུན་དུ་མི་ནུབ་པར་བྱེད་དགོས་པ་དང༌། རྒྱ་གར་གཞུང་མང་གཉིས་ཀྱི་བཀའ་དྲིན་དང་བརྩེ་སེམས་ནི་བོད་མི་རིགས་ཀྱི་སེམས་ནང་དུ་དུས་ནམ་ཡང་བརྗེད་ཐབས་མེད་པའི་ལེའུ་གལ་ཆེན་ཞིག་ཏུ་གྱུར་ཡོད།།
