གཏམ་བཤད་ཅིག་ལ་ཉན་རྗེས།

    བདག་ཉིད་ཆེན་པོ་གྷན་དྷིས་ དབྱིན་ཇི་ཡིས་རྒྱ་གར་ཕྲོགས་པ་དེ་འདྲ་གང་ཡང་མིན་པ་མ་ཟད། ང་ཚོས་ཕུལ་བ་ཞིག་རེད་ཅེས་པ་ལྟར། དབྱིན་ཇི་ཡི་མི་རྒྱ་གར་ལ་ཚོང་བྱེད་དུ་ཡོང་བ་དང༌། རྒྱ་གར་གྱི་བཟོ་ཚོང་བདག་པོ་རྒྱུ་རྔམ་ཅན་ཚོས་དགའ་བསུ་དང་རོགས་འདེགས་བྱས། སྐབས་དེར་རྒྱ་གར་ནང་བརྟན་ལྷིང་མེད་པར་རྒྱལ་པོ་ཕན་ཚུན་འཁྲུག་རྩོད་ལ་དབྱིན་ཇིའི་མི་རོགས་འདེགས་སུ་བཀུར་བ་སོགས་རྒྱུ་རྐྱེན་མང་པོ་ཞིག་གིས་མཐར་རྒྱ་གར་དེ་དབྱིན་ཇིའི་དབང་བསྒྱུར་འོག་གནས་དགོས་བྱུང་ཡང༌། དབྱིན་ཇི་བས་རྒྱ་གར་གྱི་མི་རྒྱུ་སྲོག་གསུམ་ལ་དེ་ཙམ་གྱིས་གྱོང་བསྐུར་མེད་པ་ཡང་འདས་པའི་ལོ་རྒྱུས་ཀྱིས་བདེན་དཔང་བྱས་ཡོད། ཡིན་ནའང་དུས་རབས་སྔ་མའི་ལོ་རབས་བཞི་བཅུའི་མཇུག་ཏུ་རྒྱ་དམར་འདིས་མེ་སྒྱོགས་དང་མེ་མདའི་སོ་ཁ་བོད་མིར་གཏད་པ་དང༌། བོད་མི་འབུམ་བཅུ་གཉིས་ལྷག་གི་ཚེ་སྲོག་ཧྲིལ་གྱིས་བཅད་ནས། དུས་ད་ལྟ་ལ་ཐུག་གི་བར་གཞིས་ལུས་བོད་མི་ཚོར་ཆབ་སྲིད་དང༌། ཆོས་ལུགས་ཀྱི་མནར་གཅོད་ཅི་ཙམ་ཞིག་བཏང་དང་གཏོང་མུས་ཡིན་པ་ཚང་མར་རྒྱུས་མངའ་ཡོད། ཆེས་ཉེན་ཚབས་ཅན་དེ་འཛམ་གླིང་གི་སྤྱིའི་མི་འབོར་གྱི་བཞི་ཆ་གཅིག་ཟིན་པའི་རྒྱ་མི་རིགས་དུང་ཕྱུར་བཅུ་གཉིས་དང༌། བོད་མི་ས་ཡ་དྲུག་བར་གྱི་བསྡུར་ཚད་དེ་ནི་ཇི་འདྲའི་འཇིགས་རྔམ་ཅན་ཞིག་མ་རེད་ཨང༌། ད་ལྟ་བོད་ཁམས་སུ་རྒྱ་རིགས་ས་ཡ་བརྒྱད་ནས་དགུ་བར་ཡོད་པ་དངོས་འབྲེལ་དང༌། བར་ལམ་རྒྱ་དམར་གཞུང་གིས་འཆར་གཞི་ལྡན་པའི་ཐོག་བོད་ཀྱི་ཆོས་རིག་རྩ་མེད་གཏོང་ཐབས། བོད་ཡུལ་རྒྱ་ཡུལ་ཅན་དུ་བསྒྱུར་ཐབས་བཅས་ལ་སྒོ་ཀུན་ན་བརྩོན་བཞིན་པ་དང༌། ནུབ་བརྒྱུད་གསར་སྤེལ་ལ་བསྙད་པའི་ལྕགས་ལམ་འཛུགས་སྐྲུན་ཟིན་མཚམས་རྒྱ་རིགས་མང་པོ་བོད་ཁུལ་དུ་སླེབས་ཡོད་ལ། ལྕགས་ལམ་གྱི་གཞི་རྩའི་རྒྱབ་ལྗོངས་གཞན་ཞིག་བོད་ཁུལ་དུ་རྒྱ་རིགས་གནས་སྤོ་བྱེད་བདེ་བ་དང༌། ས་ཁོངས་བརྟན་སྲུང༌། དམག་འཁྲུག་གི་ཐབས་ཇུས་བཅས་ཀྱི་དམིགས་ཚད་བཟུང་ཡོད་པ་ཡང་ཤོད་ཅི་ལ་དགོས། འདི་ལྟར་གཞིགས་ཚེ། རྒྱ་ནག་དམར་ཤོག་གིས་བོད་ལ་དབང་བསྒྱུར་བྱས་ནས་ལོ་དྲུག་ཅུ་དང༌། བོད་མི་སྐྱབས་བཅོལ་བ་ཆགས་ནས་མི་ལོ་ལྔ་བཅུ་ཕྱིན་པའི་མཐའ་འབྲས་འདི་ནི་བོད་མི་རིགས་ལ་རྫོགས་ཚིག་འགོད་རྒྱུའི་དུས་ཚིག་ཤིག་མ་ཡིན་ནམ།།