དྲང་ངེས་ཟིན་བྲིས་བློ་བཟང་རྒྱལ་བའི་དགོངས་རྒྱན་ལུང་རིགས་གསེར་གྱི་ཐང་མ།
སེར་བྱེས་ལྷ་རམས་པ་རོང་བོ་བློ་བཟང་སྙན་གྲགས་ལགས་ཀྱིས་བརྩམས་པའི་༼དྲང་ངེས་ཟིན་བྲིས་བློ་བཟང་རྒྱལ་བའི་དགོངས་རྒྱན་ལུང་རིགས་གསེར་གྱི་ཐང་མ་༽ཞེས་པའི་དེབ་ཅིག རྗེ་རིན་པོ་ཆེས་དྲང་ངེས་ལེགས་བཤད་སྙིང་པོ་བརྩམས་ནས་ལོ་ངོ་༦༠༠ འཁོར་བ་དང་སྟབས་བསྟུན་ནས་དཔར་སྐྲུན་འགྲེམས་སྤེལ་བྱས་ཡོད་པ་དང༌། དེབ་དེ་ནི་སེར་བྱེས་མཁན་ཟུར་གཙང་པ་ྋརྗེ་བཙུན་བློ་བཟང་ཚེ་རིང་མཆོག་གི་བཤད་ཁྲིད་གཞིར་བཟུང་ཟིན་བྲིས་སུ་བཀོད་པ་ཞིག་ཡིན་པ་དང༌། དེ་ཡང་མདོ་སྡེ་དགོངས་འགྲེལ་ལ་བརྟེན་ནས་སེམས་ཙམ་པའི་ལྟ་གྲུབ་གཏན་ལ་འབེབས་ལུགས། བློ་གྲོས་མི་ཟད་པའི་མདོ་ལ་བརྟེན་ནས་མགོན་པོ་ཀླུ་སྒྲུབ་ཀྱི་དབུ་མའི་ལྟ་བ་གསུང་ཚུལ་དེ་ལ་ལེགས་ལྡན་འབྱེད་དང༌། ཞི་བ་མཚོ་ཡབ་སྲས་ཀྱིས་རང་རྒྱུད་པའི་ལུགས་སུ་འགྲེལ་ལུགས་དང༌། སློབ་དཔོན་ཟླ་བ་གྲགས་པ་ཡབ་སྲས་ཀྱིས་ཐལ་འགྱུར་བའི་ལུགས་སུ་འགྲེལ་ལུགས་བཅས་མདོར་ན་སེམས་ཙམ་པ་དང༌། རང་རྒྱུད་པ། ཐལ་འགྱུར་པའི་ལྟ་བ་བཅས་རྒྱ་གར་མཁས་པའི་གཞུང་རྗེ་ཙོང་ཁ་པའི་ལེགས་བཤད་ལ་བརྟེན་ནས་གཏན་ལ་འབེབས་ཚུལ། དངོས་ཤུགས་ཀྱི་གོ་བབ་དང༌། ལུང་རིགས་ཀྱི་དོགས་དཔྱོད་བཅས་བྲིས་འདུག་ལ། ད་དུང་དེའི་ནང་དུ་རྗེ་རིན་པོ་ཆེ་ནས་ད་ལྟའི་བར་ལོ་ངོ་༦༠༠ རིང་བྱུང་བའི་དྲང་ངེས་ཀྱི་བསྟན་བཅོས་ཁག་གི་རྩོམ་པ་པོའི་འཁྲུངས་འདས་ལོ་ཚིགས་དང་བཅས་པའི་མཚན་བྱང་ཡང་བཀོད་ཡོད་པ་རེད།།
