མདུན་དུ་དོན་ཐུབ་མཁན་ཞིག་དགོས།

སྤྱིར་ལས་རྒྱུན་ཚང་བར་ལོ་གཉིས་དང་ཕྱེད་ཙམ་ཡོད་པའི་སྐབས་འདིར་བཀའ་ཤག་གིས་དགོངས་པ་ཞུས་པ་ལྟར་ྋགོང་ས་མཆོག་གིས་ཀྱང་བཀའ་འཁྲོལ་བསྩལ་ཡོད་ན་མི་མང་ལ་དོན་མེད་ཀྱི་བརྡབ་གསིག་ཆེན་པོ་ཞིག་ཏུ་འགྱུར་ངེས་པ་དང༌། མི་མང་གི་ངོས་ནས་བརྒྱ་ཆ་དགུ་བཅུ་ལྷག་གིས་ཡིད་ཆེས་བློས་གཏད་ཀྱིས་བདམ་པའི་བཀའ་ཁྲིས་ལས་དུས་ཕྱེད་ཙམ་ལས་མ་གནང་བར་དགོངས་པ་ཞུས་ན་མི་མང་གི་བསམ་ཚུལ་ལ་རྩིས་མེད་དང༌། བོད་དོན་ཛ་དྲག་གཉན་འཕྲང་གི་དུས་ཚོད་འདིར་སྣང་མེད་བཏང་བ་ལྟ་བུར་གྱུར་ཡོད། གལ་སྲིད་བཞུགས་འདོད་མེད་པའམ་ནུས་པ་ཐོན་ཐབས་མེད་པའི་གནས་ཚུལ་དེ་འདས་པའི་བཀའ་ཁྲི་ལོ་ལྔའི་ལས་དུས་གཙང་བའི་སྐབས། ལས་དུས་རྗེས་མའི་གནས་སྟངས་དང་གྲུབ་འབྲས་ལ་རོབ་ཚོད་བྱེད་མི་ཐུབ་པ་ཞིག་གཏན་ནས་མིན་པས། སྐབས་དེ་དུས་འོས་གཞིའི་ཁོངས་ནས་དགོངས་པ་ཞུ་དགོས་པ་རེད། གང་ལྟར་ད་ལྟའི་ཆར་བཀའ་ཤག་མུ་མཐུད་བཞུགས་ནས་ཕྱག་ལས་གནང་རྒྱུ་གཏན་འཁེལ་ཡོད་པ་རེད་འདུག་ལ། དེ་ལྟར་མི་གནང་ཐབས་མེད་ཀྱི་གནས་ཚུལ་ཞིག་ཀྱང་རེད།
    མ་འོངས་པར་བཀའ་ཁྲི་ག་འདྲ་ཞིག་དགོས་མིན་སྐོར་བསམ་ཚུལ་འདོན་མཁན་ཧ་ཅང་པོ་ཡོང་བཞིན་ཡོད་པ་འདི་མང་གཙོའི་འཕེལ་རིམ་གསར་པ་ཞིག་ཏུ་ངོས་འཛིན་བྱེད་ཆོག་པ་དང༌། ད་དུང་ང་ཚོའི་སྤྱི་ཚོགས་ནང་དོན་དངོས་བཀའ་ཁྲི་གནང་ནས་མི་མང་ལ་ཞབས་འདེབས་ཞུ་འདོད་ཡོད་མཁན་ཡོད་ངེས་ཀྱང༌། མདུན་དུ་དོན་ནས་སྐབས་རྗེས་མའི་བཀའ་ཁྲི་ངས་བྱེད་ཀྱི་ཡིན། མི་མང་གིས་རྒྱབ་སྐྱོར་གནང་རོགས། ལས་འཆར་འདི་དང་འདི་ལྟ་བུ་ཡོད་ཅེས་ཕྱོགས་མང་པོ་ནས་འཆར་གཞི་བསྒྲིགས་ཏེ་བོད་མི་གནས་སྡོད་བྱེད་ཡུལ་ཁག་ཏུ་ཆེད་བསྐྱོད་ཀྱིས་དྲིལ་བསྒྲགས་བྱེད་རྒྱུའི་བསམ་བློ་གསར་པ་ཡོད་མཁན་ཞིག་དོན་ཐུབ་ན་མི་མང་གི་ངོས་ནས་ཀྱང་ལས་འཆར་ཁག་ལ་དོ་སྣང་དང་དབྱེ་ཞིབ་ཀྱི་ཐོག་ནས་རྒྱབ་སྐྱོར་གནང་དགོས་མིན་ཐག་གཅོད་བྱེད་དགོས་པ་ལས། ད་ལྟ་བཙན་བྱོལ་བོད་པའི་སྤྱི་ཚོགས་ནང་རུས་སྦལ་སྐོགས་ཤུན་གྱི་ནང་དུ་འཛུལ་ནས་ཕྱི་ལོག་ལ་མིག་བརྡ་སྟོན་པ་ལས་ཕྱི་རུ་མི་དོན་པ་ལྟ་བུ་འདི་བོད་པའི་ངོས་ནས་ཡ་རབས་ཤིག་ལ་ངོས་འཛིན་བྱེད་བཞིན་ཡོད་མོད། དོན་དངོས་མི་འདི་ལྟ་བུ་ཞིག་བཀའ་ཁྲི་ལྟ་བུར་སླེབས་རྗེས་ལས་དོན་མ་འགྲུབ་པ་ཞིག་དང་འཕྲད་སྐབས། ཐོག་མ་ནས་ང་ལ་བཀའ་ཁྲི་བྱེད་འདོད་མེད་ཀྱང༌། མི་མང་གི་ངོས་ནས་བདམ་པ་རེད་ཅེས་པ་ལྟ་བུ་ཁ་གཡར་ས་མང་པོ་ཞིག་འཚོལ་བ་སོགས་མདོར་ན་རུས་སྦལ་སྐོགས་ཤུན་ལ་རེ་བ་ལྟར་རང་སྲུང་ཁོ་ན་ལས་རང་ཉིད་བློས་གཏོང་མཁན་ཡོང་རྒྱུ་ཧ་ཅང་ཁག་པར་སྣང༌། སྔོན་ཐོན་གྱི་སྤྱི་ཚོགས་ཁག་ལ་མིག་ལྟོས་བྱས་ནས་སྐབས་རྗེས་མའི་བཀའ་ཁྲིའི་འོས་གཞིར་དང་བླངས་ཀྱིས་རང་ཉིད་ཀྱི་ལས་འཆར་དང་རང་ཉིད་ཀྱི་ལྟ་གྲུབ་སྤྱི་ཚོགས་ཁྲོད་ཁྱབ་བསྒྲགས་བྱེད་ཐུབ་མཁན་ཞིག་འབྱུང་དགོས་པ་ཧ་ཅང་གལ་ཆེན་པོ་ཡིན་པ་ལས། བཞུགས་འདོད་མེད་མཁན་ཞིག་ཨུ་ཚུགས་ཀྱིས་བདམ་ཡང་དེ་ཙམ་གྱིས་གྲུབ་འབྲས་ཡོང་མི་སྲིད་པར་མཐོང༌།།