ལྷ་སའི་དངོས་བྱུང་བདེན་དཔང།
རྣམ་རྒྱལ་གྲྭ་ཚང་གི་གྲྭ་ཐུབ་བསྟན་ཡར་འཕེལ་ལགས་ཀྱིས་བརྩམས་པའི་<<ལྷ་སའི་དངོས་བྱུང་བདེན་དཔང་>>ཞེས་པ་དེ་རྒྱལ་ས་ལྷ་སའི་མཐུན་གྲོགས་ནས་པར་སྐྲུན་དང་འགྲེམས་སྤེལ་བྱས་ཡོད་པ་དང། དེབ་དེའི་ནང་དུ་རྩོམ་པ་པོ་བོད་ནང་དུ་བསྐྱོད་དེ་ལྷ་སའི་སྣོད་བཅུད་ཀྱི་བྱུང་རིམ་དང། ཁྱད་ཡོན་སོགས་ཇི་ཡོད་ཀྱི་དཔྱད་གཞིའི་ཡིག་ཆ་མཁོ་སྒྲུབ་གནང་བ་མ་ཟད།
ད་ཡོད་ཀྱི་རྒན་རབས་མྱོང་ཅན་མི་ཉུང་བ་ཞིག་ལ་བཀའ་འདྲི་ཞུས་པ་དང་ཆབས་ཅིག་གནད་ཡོད་ས་གནས་སོ་སོར་རང་ཉིད་ཆེད་ཕེབས་ཀྱིས་ཞིབ་དཔྱད་ལེགས་པར་གནང་ནས་ལོ་རྒྱུས་ཀྱི་དོན་སྙིང་ཤིན་ཏུ་ཟབ་པའི་བོད་རྒྱལ་ཁབ་ཆེན་པོའི་རྒྱལ་ས་ལྷ་ས་དང་དེའི་ཉེ་འཁོར་བཅས་ཀྱི་ས་བབས་ཆགས་དབྱིབས་དང། རྩ་ཆེའི་དགོན་སྡེ། ཕོ་བྲང། རི་ཁྲོད། གནས་རི་རྡོ་རིང། ༸རྒྱལ་བའི་ཡབ་གཞིས། ཆུ་མིག་ལ་སོགས་པའི་སྐོར་ས་བཅད་དྲུག་ཅུ་རེ་ལྔ་དང། དམིགས་བསལ་ཞོལ་གྱི་ལྕགས་རིའི་ནང་གི་གནའ་ཤུལ་ཁག་བཞི་བཅུ་ཞེ་དྲུག་ཙམ་གྱི་སྐོར་ལེའུ་བཅུ་དང་དུམ་མཚམས་ཆེན་པོ་གསུམ་ལ་ཕྱེ་སྟེ། འཕེལ་གྲིབ་ཇི་བྱུང་གྲ་རྒྱས་ཙམ་ཞིག་བྲིས་ཡོད་པ་རེད། དེ་བཞིན་དེབ་དེ་དང་འབྲེལ་བའི་འདྲ་པར་མི་ཉུང་བ་ཙམ་འཁོད་ཡོད་པ་དང། དེབ་དེར་ཤོག་ངོས་༣༧༣ ཙམ་ཡོད་པ་ཞིག་རེད།།
