ཡིད་སྐྱོའི་གནས་ཚུལ།

དེ་ནས་༡༩༦༣ ལོར་བཙན་རྒོལ་རྒྱལ་སྐྱོབ་ཀྱི་གོ་སྐབས་ཡོང་རེས་ཌས་ཌོན་དྭང་སློབ་དམག་སྒར་དུ་སྒྲིག་ཞུགས་དམག་དཀྱུས་ནས་ཐེམ་པ་རིམ་འཛེགས་བརྒྱ་དཔོན་གྱི་གོ་གནས་ཐོག། ༡༩༧༢ ལོར་བྷང་ལའི་དམག་འཁྲུགས་ཀྱིས་གཙོས་མཐའ་མཚམས་སྲུང་སྐྱོབ་གདོང་ལེན་རིམ་པར་ཞུས་པ་མ་ཟད། ༡༩༨༣ ལོ་དྭང་སློབ་དབུས་ལས་ཁུངས་ཀྱི་བཀའ་འབྲེལ་ལྷོ་གཞིས་ཁག་ནང་ཡོད་དྭང་ཟུར་རྣམས་ལ་གཞིས་ཆགས་ས་ཁང་གོ་སྒྲིག་འགན་ཁུར་ཞུས་པ་བཅས་ཁྱོན་དྭང་སློབ་ནང་ལོ་༢༥ ཧྲིལ་པོ་ཞབས་འདེགས་ཞུ་བཞིན་པའི་སྐབས་ཕྱི་ལོ་༡༩༨༧ ལོར་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་ནས་ཡེ་ཤེས་དབྱིངས་དཔྱད་ཀྱིས་བོད་མི་མང་སྤྱི་འཐུས་སྐབས་༩ པའི་དབུས་གཙང་སྤྱི་འཐུས་སུ་ཐད་བསྐོ་བསྐྱངས་དོན་སྐབས་དགུ་པའི་ལས་འགན་གཙོ་བོ་སྤྱི་འཐུས་སྐབས་བཅུ་པ་མང་གཙོའི་ལམ་ནས་འོས་བསྡུ་ཚད་ལྡན་ཡོང་ཐབས་སུ་འགན་ཁུར་སྩལ་དོན་ལས་འགན་འཐུས་ཚང་ཞུས། དེ་རྗེས་༡༩༩༡ ལོར་བོད་མི་མང་སྤྱི་འཐུས་སྐབས་༡༠ པར་དབུས་གཙང་སྤྱི་འཐུས་མང་མོས་འོས་ཐོབ་སྤྱི་འཐུས་སྐབས་༩།༡༠ གཉིས་ཀྱི་འགན་ཁུར་བཞེས། དེ་རྗེས་ལྷོ་གཞིས་ཁག་ལྔའི་སྤྱི་ཁྱབ་ཚོགས་གཙོ་དང༌། ལུགས་བསམ་གཞིས་གྲོང་༦ པའི་སྤྱི་མི། དབུས་གཙང་དམ་པ་ཆོས་ཀྱི་ཆོལ་ཁའི་དབུས་རྒྱུན་སྐབས་༥། ༨། ༩ བཅས་ལོ་༩ གནང་རིང་ཞི་བའི་གོམ་བགྲོད་ཐེངས་དང་པོ་ནས་གསུམ་པ་བར་ལས་འགུལ་སྔ་ཕྱི་གསུམ་གྱི་སྣེ་ཁྲིད་ཚོགས་གཙོའི་ལས་འགན་བཞེས། དེ་རྗེས་རྡ་ས་བཞུགས་སྒར་གངས་ཅན་ཆིག་སྒྲིལ་ཚོགས་པའི་ཚོགས་གཙོར་བདམས་ཐོན་འགན་ཁུར་གནང་རིང་དི་ལཱིར་རྟེན་གཞི་བཅས་པའི་དོལ་རྒྱལ་རྗེས་འབྲངས་ལྷ་མི་སྲུང་སྐྱོབ་ཚོགས་པ་ཟེར་བསྋགོང་ས་མཆོག་དང༌། བོད་གཞུང་ལ་གྱེན་རྒོལ་སྐབས་བཙན་བྱོལ་བོད་མིའི་དབུས་ཚོགས་པ་༨ ཐུན་མོང་ནས་ཛ་དྲག་ཆེ་བའི་གདོང་ལེན་ཆེད་རྡ་སར་བསྟན་སྲིད་སྲུང་སྐྱོབ་ཚོགས་ཆུང་ཟུར་འཛུགས་གནང་བའི་སྤྱི་ཁྱབ་ཚོགས་གཙོའི་འགན་ཁུར་འཛེམས་ཟོན་མེད་པ་གནད་འདྲོངས་དོན་འཁྱོལ་སོགས་དོན་སྙིང་སྐུ་ཚེ་ཧྲིལ་པོ་བོད་གཞུང་དང་ྋགོང་ས་མཆོག་ལ་བློ་རྩེ་གཅིག་གཏོད་གཞུང་མང་སྤྱི་སྨན་ཞབས་ཞུ་གནང་མུར༌། ད་ལམ་༢༠༠༩ ཕྱི་ཟླ་༥ ཚེས་༣ ཉིན་དགུང་གྲངས་༦༥ ཐོག་སྐུ་ཚེའི་འདུ་བྱེད་སྟོངས་འདུག་པར་རང་རིགས་ལྷག་བསམ་ཅན་ཚང་མས་དམ་པ་དེ་ཉིད་ཀྱི་མཛད་རྗེས་ལ་རྗེས་སུ་ཡིད་རང་གི་སྒོ་ནས་མཆོག་གསུམ་ྋརྒྱལ་བ་རྒྱ་མཚོར་ཐུགས་སྨོན་གསོལ་འདེབས་རྒྱ་གང་ཆེ་གནང་སྐྱོངས་ཞུ་རྒྱུར། རྡ་ས་བཞུགས་སྒར་རྒྱལ་རྩེ་གཞིས་བྱེས་མཉམ་སྦྲེལ་སྒྲིག་འཛུགས་ཀྱི་རྒྱུན་ལས་ཐོུང་ནས། ༢༠༠༩ ཕྱི་ཟླ་༧ ཚེས་༡༠ ལ།