དགེ་ལུགས་རྒྱུགས་སྤྲོད་ཆེན་མོ་དང་འབྲེལ་བའི་དཔྱད་ཞིབ།

    ཉེ་ཆར་སེར་སྨད་བློ་དགའ་ཡིས་དགེ་ལྡན་རྒྱུགས་སྤྲོད་ཆེན་མོ་དང་འབྲེལ་བའི་རྩོམ་ཐུང་ཞིག་བང་ཆེན་ཚགས་ཤོག་སྟེང་འགྲེམས་སྤེལ་བྱས་པ་དེར་དཔྱད་ཞིབ་བྱ་རྒྱུ་ཡིན། དེར་ཁྱེད་ཀྱིས་གླེང་བརྗོད་དུ་བཀོད་པ་རྒྱུགས་སྤྲོད་ཆེན་མོའི་བྱེད་སྟངས་ནི་དུས་རབས་དང་དགོས་མཁོ་ལ་ལྟོས་པའི་ཕམ་ཁ་ཡིན་ཞེས་བཤད་པ་ནི། དཀར་ནག་གོ་ལྡོག་གི་བཤད་པ་འབའ་ཞིག་སྟེ། རྒྱ་ཆེ་གཏིང་ཟབ་ལྡན་པའི་གཞུང་ལུགས་སྤྱི་དང་ལྷག་པར་རྒྱ་གར་པཎ་གྲུབ་ཀྱི་གཞུང་ལུགས་དག་ལ་ཕྱོགས་རེས་ཙམ་མ་ཡིན་པ་རྒྱུན་བསྲིངས་ཏེ་ཞིབ་ཚགས་ངང་སྦྱང་རྒྱུའི་ལས་ཅན་འདི་ནི། དེང་དུས་མི་རྣམས་ཀྱིས་གདེང་ཚོད་ཆེན་པོས་ཆེས་ཆ་འཇོག་དང་ཆེས་གོང་དུ་བཀུར་བའི་ཚན་རིག་པ་དག་དང། དཔུང་པ་མཉམ་གཤིབ་ཀྱིས་མདུན་བསྐྱོད་བྱ་ཐུབ་པའི་བླ་ན་མཐོ་བའི་བྱ་གཞག་གལ་ཆེན་ཞིག་ཏུ་གྱུར་ཡོད། གང་ཡིན་ཞེ་ན། དེང་དུས་མི་རྣམས་ཞི་བདེ་དང་དྲང་བདེན། འཚེ་བ་མེད་པའི་ལྟ་གྲུབ་བཅས་ལ་དངོས་དོན་རག་མིན་ཇི་ལྟར་ཡང༌། ཉིན་རེ་ནས་ཉིན་རེར་དགའ་མོས་བྱེད་མཁན་མང་ནས་མང་དུ་འགྲོ་བ་དང། ལྷག་པར་རིག་གསར་སྨྲ་བ་ཚོས་ཀྱང་འཚེ་བ་མེད་པའི་ལྟ་གྲུབ་གཞི་ལ་བཅོལ་བའི་ནང་པའི་གྲུབ་མཐའ་ཁག་ལ་མངོན་འདོད་ཆེན་པོས་གུས་བཀུར་དང་གཙིགས་ཆེན་བྱེད་བཞིན་པ་དེས། ང་ཚོས་ཞིབ་ཚགས་སྦྱང་པའི་གྲུབ་འབྲས་དང་དགེ་མཚན་གང་ཡིན་གསལ་པོ་མཚོན་བཞིན་ཡོད། དེས་ང་ཚོར་ལོ་ཉུང་ཤས་ཤིག་ནང་དགེ་བཤེས་ལྷ་རམས་པའི་ཆོ་ལོ་བཙལ་ཏེ། སྒྲོ་ལོས་བཞེངས་སྐྲུན་བྱས་པའི་འཇིག་རྟེན་པའི་བྱ་གཞག་སྒྲུབ་རྒྱུའི་བསམ་པ་ཙམ་མ་ཡིན་པར། ྋགོང་ས་མཆོག་གིས་དུས་ཡུན་བསྲིངས་ཏེ་སློབ་སྦྱོང་བྱེད་དགོས་པའི་བཀའ་སློབ་སྤྱི་བོར་བཀུར་ཏེ། གཞུང་ལུགས་མཐའ་དག་ལ་སྦྱང་རྒྱུའི་འདུ་ཤེས་འཛིན་དགོས་པ་ནི་དུས་ཀྱིས་སྦྱིན་པའི་བསླབ་བྱ་དང། བོད་མིའི་ངོ་བོ་སྲུང་བྱེད་ཀྱི་དགོས་མཁོ་ངོ་མ་དེ་ཡིན།
    ཁ་སང་དེ་རིང་འུར་འུར་ཟང་ཟིང་གིས་དུས་རབས་ཉེར་གཅིག་པའི་ནང་པ་ཞིག་བྱ་དགོས་ཞེས་པའི་གདམས་ངག་དེ་གླེང་བརྗོད་བྱེད་གཞིན་ཡོད། ཁོང་ཚོས་དེའི་དགོངས་དོན་ཕྱི་གླིང་པའི་སྤྱོད་ཚུལ་ལ་སྒྱུར་གང་ཐུབ་དང་ཕྱི་ཡི་སྐད་ཡིག་ངེས་པར་སྦྱང་དགོས་པ་ཞིག་ལ་ངོས་འཛིན་ཡོད་ཚོད་འདུག ངས་བལྟས་ན་དེ་འདྲ་གཏན་ནས་མ་ཡིན་པར་སངས་རྒྱས་པའི་ཆོས་ཚུལ་ལ་ངེས་ཤེས་རྙེད་པའི་ཐོག་མཆོག་གསུམ་རང་གི་བློ་ངོར་ངོས་འཛིན་བྱ་ཐུབ་པ་ཞིག་ལ་འདོད་དོ། ཡང་ཁྱེད་ཀྱིས་སྐུ་རྒྱབ་བྲག་ལ་བརྟེན་ཏེ། ལྟོ་གོས་གཏམ་གསུམ་ལ་གྱོང་བཏང། དཀའ་སྤྱད་དང་དུ་བླངས་པའི་སྤྱོད་པ་རླབས་པོ་ཆེ་དེ་འདྲ་ལ་ཆོས་རྙིང་དང་ལུགས་སྲོལ་རྙིང་པ་ཞེས་ཟེར་བ་དང༌། དེས་ད་དུང་ཆེས་ཕམ་ཁ་དང་ཆེས་ཉེན་ཁ་ལ་འཁྲིད་དོགས་ཀྱི་དངངས་འཚབ་ཡོད་ཅེས་ལྷ་ཡིས་ཐོས་ན་ཞེ་ཁྲེལ་བ་དང༌། འདྲེ་ཡིས་ཐོས་ན་དགོད་བྲོ་བའི་སྐད་ཆ་འདི་འདྲ་ཤོད་ཕོད་པ་ནི། ཆོས་གསར་དང་ལུགས་གསར་ཅན། དེར་རབས་ཅན་གྱི་རྣལ་འབྱོར་པ་ཁྱེད་མ་གཏོགས་གཞུང་ཆེན་ལ་སྦྱང་པའི་སྐྱེ་བོ་སུ་ཞིག་གིས་སྨྲ་བ་སྤོབས། ངས་ཐ་མ་འདིར་རེ་སྐུལ་ཞིག་དང་སྦྲགས་མཇུག་བསྡུ་བྱ་རྒྱུ་ཡིན། དེང་སང་སློབ་གཉེར་བ་གང་མང་ཞིག་གིས་ཁྱེད་ཀྱི་བསམ་ཚུལ་དང་གཅིག་མཚུངས་སུ་སློབ་གཉེར་རིང་དྲགས་པའི་རྐྱེན་གྱིས་སྤྱི་ཚོགས་ལ་ཞབས་འདེབས་བསྒྲུབ་མི་ནུས་སྙམ་པའི་སེམས་འཚབ་བྱེད་ཀྱི་ཡོད། སྤྱི་ཚོགས་ཀྱི་བདེ་དོན་ལ་འགན་ཁུར་བྱེད་པ་ནི་ཧ་ཅང་གི་རླབས་ཆེན་ཞིག་རེད་དེ། སེམས་ཁྲལ་དེ་ནི་གནས་མ་ཡིན་པ་ཞིག་ཡིན། ཁྱེད་ཀྱིས་སྤྱི་ཚོགས་ལ་བཅངས་པའི་ལྷག་བསམ་གྱིས་མ་འཕྱུགས་ན་གཞུང་ཆེན་ལ་ཇི་ཙམ་སྦྱངས་པ་དེའི་ཚོད་ཀྱིས་གཞན་དོན་བསྒྲུབ་པར་རླབས་ཆེ་བ་དང་ངོ་ལྐོག་རྒྱབ་མདུན་མེད་པ་ཞིག་ཡོང་བ་ངེས་པས་ཁྱེད་རྣམ་པས་ཐུགས་ཁྲལ་གནང་མི་དགོས།།