ནང་ཆོས་ནི་དོ་སྣང་བྱེད་ཡུལ་ཞིག་ཆགས་ཡོད།
ཉ་མཚོའི་ཚུལ་ཁྲིམས་སྦྱིན་པ། (སེར་བྱེས་ལྡན་མ་ཁམས་ཚན།)
འཛམ་གླིང་གོ་ལའི་མཐོ་སྒང་དུ་ཆགས་པའི་གངས་ཅན་གྱི་བོད་པ་ཟེར་བ་འདི། མི་ལོ་སྟོང་ཕྲག་མང་པོའི་ལོ་རྒྱུས་ལྡན་པའི་མི་རིགས་ཤིག་ཡིན་ན་ཡང༌། བློ་ཕམ་པ་ཞིག་ལ་དམ་ཆོས་བདུད་རྩིའི་སྨན་མཆོག་ལ་དུག་ཏུ་ལྟ་བའི་ཀླ་ཀློ་དྲག་སྤྱོད་པ་རྣམས་ཀྱིས། ལོ་རྒྱུས་ནག་བསུབ་དང། མི་རིགས་ལ་ཁྱད་གསོད་སོགས་བསམ་ངན་གྱི་སྤྱོད་པ་ཚབས་ཆེན་བཏང་བ་མ་ཟད། བོད་མི་རྣམས་ཀྱི་ཁོག་པའི་སྙིང་དང༌། དཔྲལ་བའི་མིག་ལྟ་བུའི་ྋསྤྱི་ནོར་གོང་ས་སྐྱབས་མགོན་ཆེན་པོ་མཆོག་རང་ཡུལ་ནས་མི་ཡུལ་ལ་བཙན་བྱོལ་དུ་ཕེབས་དགོས་བྱུང་བ་སོགས་གདོང་དམར་བོད་མིའི་སྙིང་ལ་བཟོད་པར་དཀའ་ཞིང་ནམ་ཡང་བརྗེད་ཐབས་མེད་པའི་ལོ་རྒྱུས་ལྕི་མོ་ཞིག་བྱུང་ཡོད། འོན་ཀྱང། གངས་ཅན་བོད་འབངས་ཡོངས་ཀྱི་ལྷ་སྐལ་ྋའཛམ་གླིང་ཞི་བདེའི་དེད་དཔོན་ཆེན་པོ་མཆོག་གིས་རྨད་དུ་བྱུང་བའི་ཐུགས་བསྐྱེད་སྙིང་སྟོབས་ཀྱི་གོ་ཆ་བཙན་པོས་བཙན་བྱོལ་དུ་བོད་མིའི་ཤེས་ཡོན་བསྟི་གནས་གཞི་རིམ་སློབ་གྲྭ་དང། རིས་སུ་མ་ཆད་པའི་དགོན་སྡེ་ཁག་འཛུགས་སྐྲུན་དང་བྱམས་བརྩེའི་གཟིགས་སྐྱོང་ཚད་མེད་གནང་བའི་ཐུགས་རྗེ་བཀའ་དྲིན་ཉག་གཅིག་ལ་བརྟེན་ནས།
ད་ཆ་འཛམ་བུ་གླིང་དུ་རང་རེ་བོད་ཀྱི་ཐུན་མོང་མ་ཡིན་པའི་ནང་བསྟན་ཆོས་ལུགས་འདི་ཉིད་ཀྱིས་རྣམ་དཔྱོད་ལྡན་པའི་ཚན་རིག་པ་དང་མཁས་པ་མང་པོའི་ཡིད་དབང་ཕྲོགས་ཏེ། དོ་སྣང་བྱ་ཡུལ་གལ་ཆེན་ཞིག་ཏུ་ཆགས་ཡོད་པ་ནི་དགའ་སྤོབས་སྐྱེ་འོས་པའི་གནས་སུ་མཆིས། ཡིན་ན་ཡང། ད་ལྟའི་ཆར་བོད་པའི་སྤྱི་ཚོགས་ཀྱི་ནང་ལ། ནང་པ་སངས་རྒྱས་པའི་ཆོས་ལ་ལོག་ལྟ་སྐུར་འདེབས་བྱེད་མཁན་རེ་གཉིས་ཡོད་པ་འདི་དག་ནི་ཆོས་ཀྱི་སྙིང་དོན་མ་གོ་བའམ། གཞན་གྱི་རྗེས་སུ་འབྲངས་ནས་ཁས་ལེན་ཙམ་ཡིན་མོད། ཡང་འགའ་རེས་ལུས་ལ་གྲྭ་ཆས་གྱོན་ནས་ཧམ་བཤད་དང་རྫུན་གཏམ་གྱི་འཁོར་ལོ་བསྐོར་ནས། རྩ་ཆེན་གྱི་བོད་པའི་ཆོས་དང་རིག་གཞུང་ལ་ཁྱད་གསོད་དང༌། ཆོས་ཉམས་ལེན་བྱེད་མཁན་གྱི་དགེ་འདུན་གྱི་སྡེ་ལ་སྐུར་འདེབས་བྱེད་པ་སོགས་སྤྱི་ཚོགས་ཀྱི་ནང་ལ་དཀྲུག་ཤིང་གི་རྣམ་པ་སྣ་ཚོགས་པ་ནི་རྒྱ་ནག་བཙན་རྒྱལ་རིང་ལུགས་ཀྱི་རྒྱུག་ཁྱི་ཡིན་པ་མངོན་དུ་གསལ། བྱ་སྤྱོད་འདི་དག་གི་རིགས་ལ་བོད་མི་ཡོངས་ཀྱིས་གཟབ་གཟབ་བྱེད་དགོས་པ་ནི་ཤིན་ཏུ་གལ་ཆེན་ཞིག་ཡིན་པར་སྣང།།
