བཞུར་བཞིན་པའི་ལོ་ཟླ།

ངའི་ཟ་རྒྱུ་རྩམ་པ་དང་ཟུངས་ཁྲག་བོད་མི་རིགས་ཀྱི་དར་རྒུད་དང་འདྲེས་ཡོད་པའི་ཆ་ནས་མཚམས་འདིར་གུས་པས་གོ་མེད་ཚོར་མེད་ཐོག་དུས་ཚིགས་འདི་ནམ་ཡང་གཏོང་ན་མི་འདོད་པས། ཉིས་སྟོང་བཅུ་གཅིག་ལོའི་བཀའ་བློན་ཁྲི་པ་གསར་དུ་བསྐོ་བཞག་བྱ་རྒྱུའི་ཐད་ལ་ཚིག་ཕྲེང་ཁ་ཤས་ཤིག་འདི་ལྟར་གླེང་ན་འདོད།ད་ལྟའི་ཆར་ང་ཚོ་བཙན་བྱོལ་སྤྱི་ཚོགས་ཁྲོད་དུ་ན་གཞོན་བྱིས་པ་ལོ་བཅུ་ཡན་ཆད་དང་བགྲེས་སོང་རྒས་གོག་ལོ་བརྒྱད་ཅུར་སོན་པའི་རྒན་པོ་རྒན་མོ་དག་མན་ཆད་ཀྱི་ངག་ལམ་ན་འུར་འུར་དུ་གྲག་བཞིན་པ་འདི་ནི་ཉིས་སྟོང་བཅུ་གཅིག་གི་བཀའ་བློན་ཁྲི་པ་འོས་འདེམས་བྱེད་ཕྱོགས་ཀྱི་སྐོར་ཡིན་པ་རེད། འོན་ཀྱང་དེ་ལས་ཀྱང་གལ་ཆེ་བ་ནི་གོང་དུ་བཤད་པ་ལྟར་དུས་ཚོད་ཀྱི་བཞུར་རྒྱུན་ནི་ནམ་ཡང་ང་ཚཽས་འཛིན་མི་ཐུབ་པ་འདིས་ནམ་ཞིག་ང་ཚོ་ལ་གློ་མེད་བྱེད་པར་ངེས་པས་ང་ཚོས་ཉི་མ་དེ་རིང་ནས་བཟུང་དུས་ཚོད་འདི་སྟངས་འཛིན་བྱས་ཏེ། ཆོས་ལུགས་དང་ཆོལ་ཁའི་ཕྱོགས་ལྷུང་མེད་པར་རྒྱ་གར་གཙོས་པའི་ཕྱི་རྒྱལ་གྱི་ཡུལ་གྲུ་མང་པོ་ཞིག་ཏུ་ཁ་འཐོར་ལ་སོང་བའི་བོད་མི་ཤེས་ཡོན་དང་ལྷག་བསམ་ཅན་དེ་དག་གི་ཁྲོད་ནས་མ་ནོར་བར་ང་ཚོ་ཡང་རྒྱལ་ཁབ་གཞན་དག་དང་མཉམ་དུ་ཆེས་འཁྲུགས་ཆ་ཆེ་བའི་དུས་རབས་འདིར་གོམ་པ་མཉམ་སྤོ་དང་དཔུང་པ་མཉམ་གཤིབ་ཀྱི་འགྲོ་ས་ཞིག་དང་ལམ་ཁ་དེ་ནས་ནམ་ཡང་ཡིད་ཆད་དང་འཁང་ར་བྱེད་མི་དགོས་སའི་མི་སྣ་ཞིག་ང་ཚོ་མི་རེའི་ངོས་ནས་མཚམས་འདི་ནས་འགོ་བརྩམས་ཏེ་འཚོལ་སྒྲུབ་བྱེད་དགོས་པ་འདི་རེད། ཡང་ཕྱོགས་གཞན་ཞིག་ནས་བཤད་ན་ཆོས་ལུགས་དང་ཆོལ་ཁའི་བར་གྱི་ལྟ་ཚུལ་རྙིང་པ་དེ་ནི་མི་རབས་སྔ་མའི་ལྟ་བ་མཁྲེགས་པོ་གྱེན་ལ་འཕྱར་བའི་བླ་སྤྲུལ་ཁག་དང་མི་དྲག་དག་གི་ལྟ་ཚུལ་ཞིག་ཡིན་པས། ད་ལྟ་ང་ཚོ་བོད་མི་རིགས་ཀྱི་ན་གཞོན་འདི་དག་གི་བསམ་བློ་ལ་འདི་འདྲའི་ལྟ་ཚུལ་རྙིང་པ་ཞིག་ཕལ་ཆེར་ལྷག་ཡོད་ཚོད་མེད། འོན་ཀྱང་གུས་པས་གལ་པོ་ཆེ་ལ་ནན་ཏན་ཞེས་པའི་དཔེ་ལྟར་བསམ་འཆར་འདི་བཏོན་པ་ཡིན།
    མདོར་བསྡུས་ན། གལ་ཏེ་ཁྱེད་ཀྱིས་ཀྱང་ཟ་རྒྱུ་རྩམ་པ་དང་ཟུངས་ཁྲག་བོད་མི་རིགས་ཀྱི་དར་རྒུད་དང་འབྲེལ་ཡོད་ཚེ་བོད་མི་ཞིག་ཡིན་པའི་ཚོར་བ་མ་བརླག་པའི་ཐོག་ནས་ད་ལྟ་བཞུར་བཞིན་པ་འདིའི་དུས་ཚིགས་ཀྱི་རྒྱུ་བ་དང་མཉམ་དུ་རང་འཚོ་དགོས་སའི་ཁྱིམ་གཞིས་འདིའི་གནས་བབས་ལ་གཞིགས་ཏེ། མ་འོངས་པར་བོད་མི་རིགས་ཀྱི་འགོ་ཁྲིད་ཐུབ་མཁན་གྱི་མི་སྣ་ཞིག་ལ་མནོ་བསམ་གཏོང་ས་རག་མིན་ལ་སྐབས་འདི་ནས་འབད་བརྩོན་བྱེད་དགོས་པ་ཤིན་ཏུ་གལ་ཆེ་བ་མ་གཏོགས་ཉིས་སྟོང་བཅུ་གཅིག་གི་བཀའ་བློན་ཁྲི་པ་འོས་འདེམས་གནང་བའི་ཉིན་མོ་དེར་གཞི་ནས་ཁྱེད་ཀྱིས་རང་གི་གདེངས་འཇོག་ཡོད་སའི་བཀའ་བློན་ཁྲི་པ་དེ་མི་གཞན་ཞིག་གི་བརྒྱུད་ནས་འོས་འདེམས་བྱེད་དགོས་ཚེ་དེ་ནི་ཤིན་ཏུ་ཕངས་པའི་གནས་ཡིན་པས། གདོང་དམར་བོད་པ་ཚང་གི་རིགས་སུ་གཏོགས་པ་ཡོད་དོ་ཅོག་གིས་རང་རང་གི་རྣམ་དཔྱོད་བེད་སྤྱད་དེ། ཚུལ་འདི་ལྟ་བུའི་ལམ་ཁ་ནས་བོད་མི་རྐང་གཅིག་ཀྱང་མི་ལྷག་པའི་ངལ་བར་མཚམས་འདི་ནས་ང་ཚོ་མཉམ་དུ་འཇུག་རྒྱུ་ཡིན་ཞེས་གུས་པས་ཨ་ན་ཨུ་ཚུགས་ཀྱིས་ལག་གཉིས་ཐལ་མོ་སྦྱར་ཏེ། ཞུ་བཞིན་ཡོད་ན་ཚང་མས་འདི་ལ་ཐུགས་ཁུར་ཆེར་བཞེས་ཀྱིས་༢༠༡༡ ལོའི་བཀའ་བློན་ཁྲི་པའི་འོས་འདེམས་ཀྱི་སྐོར་ལ་ཉིན་དེ་རིང་ནས་བཟུང་ཐུགས་ཁུར་བཞེས་རོགས།།