བོད་དང༌། ཤར་ཏུར་ཀི་སི་ཐན། ད་དུང་རྒྱ་ནག་གཞུང༌།

    དེ་ཡང་ད་ལོ་ཤར་ཏུར་ཀི་སི་ཐན་ནང་མི་མང་གིས་སྒེར་ལངས་བྱེད་དུས་གསར་འགྱུར་བརྒྱུད་ལམ་ཁག་ཚང་མས་ཤིན་ཅང་གི་ཟིང་འཁྲུག་ཅེས་བཤད་སོང༌།  ཡིན་ཡང་ཤིན་ཅང་ཞེས་པའི་མིང་ཚིག་འདི་གཉིས་ནི་ཡུ་གུར་མི་རིགས་ཀྱི་ཆེས་གསན་མི་འདོད་པའི་ཐ་སྙད་ཅིག་ཡིན་པ་ཚང་མས་མཁྱེན་མེད་པ་འདྲ། ཤིན་ཅང་ནི་རྒྱ་སྐད་དེ་མངའ་ཁོངས་གསར་པའི་(New Territory)དོན་ཡིན།  ཡིན་ཡང་ཤར་ཏུར་ཀི་སི་ཐན་ནི་ཡུ་གུར་མི་རིགས་ཀྱི་ཕ་མེས་ཡང་མེས་ནས་བཟུང་མི་ལོ་སྟོང་ཕྲག་མང་པོར་འཚོ་བ་སྐྱེལ་སའི་ཕ་ཡུལ་ཡིན་པས། ས་ཆ་དེ་བཙན་འཛུལ་པར་མཚོན་ན་ཤིན་ཅང་༼མངའ་ཁོངས་གསར་པ་༽ཡིན་པ་ལས། ཡུ་གུར་མི་རིགས་ལ་ཤིན་ཅང་གཏན་ནས་མིན། དེར་བརྟེན་ང་ཚོས་ས་ཆ་དེར་ཤར་ཏུར་ཀི་སི་ཐན་ཞེས་མ་བརྗོད་པར་ཤིན་ཅང་ཞེས་བརྗོད་པ་ཡིན་ན། དེ་ནི་ང་ཚོས་ས་ཁུལ་དེའི་མི་མང་གི་གཞི་རྩའི་ཐོབ་ཐང་ལ་བརྩི་བཀུར་མ་བྱས་པ་དང་གཅིག་མཚུངས་ཡིན་པས། དེ་ཚང་མས་ངེས་པར་དུ་སེམས་ལ་འཇོག་དགོས།
    བོད་དང་ཤར་ཏུར་ཀི་སི་ཐན་གཉིས་ནི་ཆོས་ལུགས་དང་རིག་གཞུང༌། གོམས་གཤིས་སོགས་གང་གི་ཐད་ནས་གླེང་ཡང་རྒྱ་མི་རིགས་དང་ཡོངས་སུ་ཐ་དད་ཡིན་མོད། འོན་ཀྱང་གཡོ་སྒྱུ་འཕྲུལ་གྱིས་བསླུས་པའི་རྒྱ་འདྲེ་དམར་པོས་བཙན་འཛུལ་བྱས་ནས་མི་ལོ་༥༠ འགོར་བའི་དེ་རིང༌།  མི་འབོར་སྤོ་ཤུགས་ཀྱི་ལས་གཞིའི་ཁྲོད་དུ་མི་རིགས་འདི་གཉིས་ཀྱིས་རང་ཉིད་ཀྱི་ཕ་ཡུལ་དུ་གྲངས་ཉུང་མི་རིགས་ཀྱི་མིང་བྱང་ཁུར་ནས་བཙན་དབང་དང་གདུག་རྩུབ་ཁོ་ནའི་ཁྲོད་དུ་མུན་ནག་གི་འཚོ་བ་སྐྱེལ་བཞིན་ཡོད།
ཆེས་ཛ་དྲག་དང་ཤི་གསོན་གྱི་སོ་ཁར་གནས་པའི་མི་རིགས་འདི་གཉིས་ལ་མཚོན་ན། དུས་རྟག་ཏུ་བསམ་གཞིག་གི་མཁའ་དབྱིངས་ན་འཕྱོ་བ་ནི་རེ་སྨོན་གྱིས་ལྟེམ་པའི་རང་དབང་གི་ཁ་བཏགས་ཁོ་ན་ཡིན།
    ༢༠༠༨ ལོར་བོད་ཀྱི་གསུམ་བཅུའི་དུས་དྲན་གྱི་སྐབས་དང་བསྟུན་ནས་རྒྱལ་ས་ལྷ་ས་གཙོ་བྱས་པའི་བོད་ཀྱི་ས་ཁུལ་གང་སར་བོད་མི་ཚོས་སོ་སོའི་རང་དབང་དང་ཐོབ་ཐང་གི་ཕྱིར་དུ་དགྲ་བོའི་མེ་མདའི་སོ་ཁ་རུ་རང་སྲོག་དམར་པོ་འབེན་ལ་བཙུགས་ནས་སྒེར་ལངས་བྱས་ཤིང༌།  དེ་བཞིན་ད་ལོའི་ཕྱི་ཟླ་༧ བའི་ཚེས་༥ ཉིན་ཤར་ཏུར་ཀི་སི་ཐན་གྱི་རྒྱལ་ས་ཝུའུ་ལུ་མུ་ཆིའི་ནང་དུ་ཡུ་གུར་མི་མང་ཚོས་སྒེར་ལངས་བྱས་པ་དེ་ལ་རྒྱ་ནག་གཞུང་གིས་“རྡུང་གཅོག་འཕྲོག་བསྲེག་”གི་དོན་རྐྱེན་ཞེས་མིང་བཏགས་ཤིང༌། དོན་རྐྱེན་དེ་ྋགོང་ས་མཆོག་དང། ལྕམ་རཱ་བྷེ་ཡ་ཁེ་ཌར་གཉིས་ཀྱིས་བཤམས་པའི་ཁ་བྲལ་རིང་ལུགས་ཀྱི་གྱེན་ལོག་ཡིན་ཚུལ་བརྗོད་དེ་མཐའ་གཅིག་ཏུ་དྲག་པོའི་དམག་དཔུང་གིས་གནད་དོན་ཡོད་ཚད་ཐག་གཅོད་བྱས་ཡོད་ལ། ཕྱོགས་གཞན་ཞིག་ནས་གྱེན་ལངས་ཀྱི་ཁྲོད་དཔལ་འབྱོར་ཐོག་གྱོང་གུད་ཕོག་པའི་བོད་པ་དང་ཡུ་གུར་མི་རིགས་གཉིས་ལ་སྐྱོབ་གསོ་སྤྲོད་ཀྱི་ཡོད་པའི་རྣམ་པ་རླུང་འཕྲིན་དང༌། བརྙན་འཕྲིན།  དྲ་རྒྱ་སོགས་བརྒྱུད་ནས་ཤུགས་ཆེར་ཁྱབ་བསྒྲགས་བྱས་ཡོད།  ཡིན་ཡང༌། རྒྱ་ནག་གཞུང་གིས་བོད་དང་ཡུ་གུར་མི་རིགས་གཉིས་ལ་ཚེ་སྲོག་གི་གྱོང་གུད་ག་ཚོད་ཐེབས་ཡོད་མེད་ཁྱོན་ནས་མ་གླེང་བ་དེ་ནི། རྒྱ་ནག་གཞུང་གིས་རང་ཉིད་ཀྱི་སྐྱུག་བྲོ་བའི་གདོང་མདོག་ངོ་མ་དེ་འཛམ་གླིང་མི་མང་ལ་བསྟན་པ་དང་གཅིག་མཚུངས་རེད།
    རྒྱ་ནག་གཞུང་གིས་མཚམས་རེར་བོད་དང་ཤར་ཏུར་ཀི་སི་ཐན་གཉིས་གནའ་དུས་རིང་མོ་ནས་རྒྱ་ནག་སྐམ་ས་ཆེན་མོའི་ཆ་ཤས་ཡིན་ཚུལ་དང༌། ཡང་མཚམས་རེར་གནའ་བོའི་ཀྲུང་གོའི་ས་ཁྱོན་ཕྱིར་མེས་རྒྱལ་གྱི་པང་དུ་ལོག་པ་རེད་སོགས་དགོད་བྲོ་བའི་འཆལ་གཏམ་རྐྱང་རྐྱང་སྤེལ་ནས། ས་ཁུལ་འདི་གཉིས་རྒྱ་ནག་གི་མངའ་ཁོངས་ཡིན་པ་ཨུ་ཚུགས་ཁོ་ནས་སྒྲུབ་བཞིན་ཡོད། ཡིན་ཡང་མི་རིགས་འདི་གཉིས་ཀྱི་རིག་གཞུང་དང༌། གོམས་གཤིས། ལོ་རྒྱུས་བཅས་ཀྱིས་མི་རིགས་སོ་སོའི་ངོ་བོ་གསལ་སྟོན་བྱེད་བཞིན་ཡོད་པ་མ་ཟད། དྲི་བ་མང་པོ་ཞིག་ལ་རང་བཞིན་གྱིས་ལན་འདེབས་བྱེད་ཀྱི་ཡོད་པས། རང་དབང་གི་སྐྱ་རེངས་མ་ཤར་བར་དུ། མི་རིགས་འདི་གཉིས་ཀྱི་འཐབ་རྩོད་ཀྱི་འབོད་སྒྲ་ནམ་ཡང་ཡལ་མི་སྲིད་ལ།  རྒྱ་ནག་གཞུང་གིས་སྤྱི་ཚོགས་བདེ་འཇགས་དང༌། མི་རིགས་འཆམ་མཐུན། མེས་རྒྱལ་གོང་བུ་གཅིག་གྱུར་ཞེས་ག་ཚོད་བཤད་རུང༌། མེས་རྒྱལ་གྱི་ཁྱིམ་གཞི་ཆེན་པོར་འབོད་པའི་ཀྲུང་གོ་གསར་པ་ཉིན་ཞིག་ཁ་འཐོར་འགྲོ་རྒྱུ་ཉག་གཅིག་རེད།།