ཡོས་ལ་འབབ་རྒྱུའི་རྩམ་པ་ཞིག་ཡོད་དམ།

དང་བླངས་དཔྱ་ཁྲལ་ལག་དེབ་དང་འབྲེལ་བའི་དཀའ་ངལ་སེལ་སླད་ཞིབ་འཇུག་ཚོགས་ཆུང་ཞིག་འཛུགས་དགོས་པའི་གཞུང་འབྲེལ་གྲོས་འཆར་ཞིག་ཀྱང་གྲོས་ཚོགས་སུ་སླེབས་ཡོད་པ་དང༌། གནད་དོན་དེའི་ཐད་དཔལ་འབྱོར་བཀའ་བློན་ཚེ་རིང་དོན་གྲུབ་མཆོག་གིས་ཕྱི་ཚེས་༡༥ ཉིན་གྲོས་ཚོགས་སུ་གསལ་བཤད་ལན་འདེབས་གསལ་པོ་གནང་ཡོད་པ་རེད། གང་ལྟར་ད་ལྟའི་ཆར་བཙན་བྱོལ་བོད་པའི་སྤྱི་ཚོགས་ནང་དང་བླངས་དཔྱ་ཁྲལ་དང་ལག་དེབ་དང་འབྲེལ་བའི་ཁེ་ཕན་ཇེ་ཆེར་འགྲོ་བཞིན་པ་དང་དུས་མཚུངས་སུ་དཀའ་རྙོག་ཀྱང་མང་དུ་འགྲོ་བཞིན་ཡོད་པ་རེད། བཙན་བྱོལ་བོད་པའི་སྤྱི་ཚོགས་ཀྱི་གནས་སྟངས་ཐད་ནས་བཤད་ན་ཕྱི་རྒྱལ་དུ་འགྲོ་རྒྱུའི་དར་སྲོལ་དེ་ཤུགས་ཆེན་པོ་ཡོད་པ་དང༌། དེ་དང་འབྲེལ་བའི་ཡིག་ཆ་རྫུན་མ་འདྲ་མིན་བཟོ་རྒྱུའི་གོམས་གཤིས་ཤིག་ཀྱང་དར་ཁྱབ་ཏུ་སོང་ཡོད་པ་དང༌། ཕ་གཅིག་མ་གཅིག་གི་གཅེན་གཅུང་ཁྲིམས་ཐོག་ནས་གཉེན་སྒྲིག་བྱས་ནས་ཕྱི་རྒྱལ་དུ་ཐར་ཐབས་བྱེད་མཁན་ཡང་གཅིག་མིན་གཉིས་མིན་དུ་ཐོན་བཞིན་ཡོད་ལ། དེ་བཞིན་གཞན་གྱི་བུ་ཕྲུག་རང་ཉིད་ཀྱིས་ཡིན་མདོག་བྱེད་པ་དང༌། རང་ཉིད་ཀྱི་བུ་ཕྲུག་གཞན་གྱིས་ཡིན་མདོག་བྱེད་པ། ཐ་ན་རང་གི་ཆུང་མའང་གཞན་གྱི་ཆུང་མ་ཡིན་ཚུལ་བྱེད་མཁན་མང་པོ་བྱུང་ཡོད་པ་རེད། དེ་དག་སོ་སོའི་ལོ་རྒྱུས་རྫུན་སྒྲིག་གི་རྒྱབ་ལྗོངས་མི་འདྲ་བ་ཇི་སྙེད་ཅིག་ཡོད་པར་བརྟེན་ད་ལྟའི་ཆར་བོད་གཞུང་བཀའ་ཤག་གིས་དང་བླངས་དཔྱ་ཁྲལ་ལག་དེབ་གསར་བཟོ་དང༌། ནོར་བཅོས་བྱེད་རྒྱུ་གཉིས་ཀར་ཆ་རྐྱེན་དང་དོ་དམ་ཤུགས་ཆེ་གནང་དགོས་བྱུང་བ་ཞིག་ཡིན་ཞིང༌། དངོས་ཡོད་གནས་ཚུལ་གྱི་ཐོག་ནས་ཀྱང་དེ་ལྟར་བྱེད་དགོས་པའི་རྒྱུ་མཚན་ཡང་དག་ཡིན་པ་གང་མང་ཞིག་བགྲང་རྒྱུ་ཡོད་པ་རེད།
དེར་བརྟེན་བོད་གཞུང་བཀའ་ཤག་གིས་ཐག་གཅོད་ཀྱི་ཐིག་ཤིང་དེའི་འོག་ཏུ་ཚང་མ་གཅིག་མཚུངས་ཀྱིས་དྲངས་ཡོང་བའི་སྐབས། མགོ་བདེ་དྲན་འཕྲུལ་དང་ཡིག་ཆ་རྫུན་མ་བཟོ་ཆེད་དུ་མ་ཡིན་པར་དངོས་ཡོད་གནས་ཚུལ་གྱི་ཐོག་ནས་གསར་བཟོ་དང་ནོར་བཅོས་དགོས་ངེས་རིགས་ལའང༌། ཡིག་ཆ་རྫུན་མ་བཟོ་མཁན་དེ་དག་གི་བྱེད་སྟངས་ལ་བརྟེན་ནས། ཕོ་རོག་ནག་པོའི་སྡིག་སྒྲིབ་ཀྱིས་ངང་པ་སེར་པོ་འདམ་ལ་ཚུད་པའི་དཔེ་ལྟར་ཆ་རྐྱེན་ཚང་མིན་ལ་བརྟེན་ནས་དཀའ་ངལ་གང་མང་ཞིག་འཕྲད་ཡོད་པ་རེད། གནད་དོན་འདིའི་ཐད་གྲོས་ཚོགས་ནང་བགྲོ་གླེང་གནང་བར་མི་མང་གི་ནང་ནས་དོ་སྣང་ཆེན་པོ་བྱུང་ཡོད་པ་དང༌། མི་མང་པོ་ཞིག་གིས་བརྒྱ་བཤད་སྟོང་བཤད་ཇི་ལྟར་བཤད་ཀྱང༌། མི་མང་གི་དཀའ་ངལ་སེལ་ཐུབ་པ་ཡོས་ལ་འབབ་རྒྱུའི་རྩམ་པ་ཞིག་ཡོང་སྲིད་དམ་ཞེས་དོགས་འདྲི་དང་རེ་བ་སྣ་ཚོགས་བྱེད་བཞིན་ཡོད་པ་རེད། མགོ་བདེ་དྲན་འཕྲུལ་དང་གཡོ་ཚོང་གི་ལས་ཀ་བྱེད་མཁན་རྣམས་ལ་དམ་དྲག་ཤུགས་ཆེན་པོ་བྱེད་དགོས་ངེས་ཀྱང༌། དེ་ལྟར་མ་ཡིན་པར་དངོས་ཡོད་གནས་ཚུལ་ཐོག་དཀའ་ངལ་འཕྲད་རིགས་རྣམས་ལ་ད་ཕན་གྱི་གནས་སྟངས་ལ་གཞིགས་ཏེ། དངོས་ཡོད་དཀའ་ངལ་འཕྲད་པ་རྣམས་ལ་ལམ་སྟོན་གསར་པ་ཞིག་གི་འོག་ནས་དུས་ཚོད་རྒྱས་བཅད་ཀྱི་ནང་དུ་གནད་དོན་ཐག་གཅོད་གནང་ཐུབ་དགོས་པ་དང༌། དེ་ནས་བཟུང་སྔར་ལྷག་དམ་དྲག་གི་གནས་སྟངས་དེ་མུ་མཐུད་མཇུག་སྐྱོང་གནང་ན་རྙོག་གླེང་ཉུང་བ་དང༌། ཕུགས་འཕེར་སྲ་བརྟན་ཡོང་ཐབས་བཅས་སྤྱི་ཡོངས་ལ་ཕན་ཐོགས་ཆེ་བར་མངོན། ད་ལྟའི་དང་བླངས་དཔྱ་ཁྲལ་ལག་དེབ་དོ་དམ་བྱེད་སྟངས་འདི་ལ་བརྟེན་ནས་དངོས་ཡོད་གནས་ཚུལ་ཐོག་ལག་དེབ་ལ་མཐོང་དང་ཆ་འཇོག་སྔར་དང་མི་འདྲ་བ་ཞིག་སླེབས་ཡོད་ལ། མགོ་བདེ་དྲན་འཕྲུལ་ཅན་རྣམས་ལ་སྟངས་འཛིན་ཡང་གང་ལེགས་གནང་ཐུབ་ཡོད། ནམ་རྒྱུན་མི་མང་ནང་ལག་དེབ་ལ་དོ་སྣང་དེ་ཙམ་མེད་ནའང་ད་ཆ་དོ་སྣང་གསར་པ་ཞིག་སླེབས་ཐུབ་ཡོད་པ་སོགས་ཀྱང་དངོས་ཡོད་ཀྱི་གྲུབ་འབྲས་ཤིག་ཏུ་ངོས་འཛིན་བྱེད་ཆོག་པ་ཞིག་རེད།།