གྲོས་ཚོགས་ནང་གི་གླེང་རྙོག་ལ་བལྟས་པ།

སྤྱི་འཐུས་ཆགས་ཚར་བའི་རྗེས་ལ་སྤྱི་མི་ཞིག་ཡིན་བསམ་དགོས་པ་ལས། ཕྱོགས་ཞེན་བྱེད་མི་ཉན་ཚུལ་ཕེབས་ཡོད་པ་མ་ཟད། འདི་ལོའི་ཕྱི་ཟླ་༣ ཚེས་༡༧ ཉིན་གྲོས་ཚོགས་ཚོགས་དུས་བདུན་པའི་ཐོག་གསུང་འཕྲིན་ཕེབས་པའི་ནང་དུ་ཡང་ཁྲིམས་ཀྱི་དབང་བསྒྱུར་ལ་སྙིང་ནས་བརྩི་བཀུར་ཐོག གུ་ཡངས་དཀྱེལ་ཆེའི་བློ་གྲོས་ཀྱིས་རྟོན་བཞིའི་འཇུག་ལྡོག་མ་འཆོལ་བའི་སྒོ་ནས་སྤྱི་སྨན་འདུན་གྲོས་ལྷུག་པོར་གནང་དགོས་ཞེས་གསུང་འཕྲིན་ལམ་སྟོན་ཕེབས་པ་རྣམས་སྤྱི་འཐུས་ཁག་ཅིག་གིས་རྣ་རྒྱབ་ཏུ་བསྐྱུར་ནས། མང་ཚོགས་སར་ཕྱོགས་འཐེན་དང་དཀྲོག་གཏམ་བཟོ་མཁན་གྱི་འབྱུང་རྩ་གཙོ་བོ་སྤྱི་འཐུས་ཚོས་བྱེད་ཀྱི་ཡོད་འདུག ད་དུང་ནམ་རྒྱུན་༧གོང་ས་མཆོག་གི་དགོངས་གཞི་གཉིས་སྨན་དབུ་མའི་ཐབས་ལམ་ལ་ཧ་ཅང་གིས་ཡིད་ཆེས་དང་རྒྱབ་སྐྱོར་ཡོད་ཁུལ་གྱིས་དེ་ཚོའི་ཐོག་ལས་འགུལ་ཀྱང་སྤེལ་མཁན་གྱི་སྤྱི་འཐུས་ཁག་ཅིག་གྲོས་ཚོགས་ནང་དུ་བོད་པ་ནང་ཁུལ་ཕྱོགས་འཐེན་གྱི་སྐད་ཆ་བཤད་པར་སླེབས་སྐབས། ཕན་ཚུན་དགྲ་ཟླའི་རྣམ་འགྱུར་གྱི་ཚིག་ངན་གང་ཡོད་བེད་སྤྱོད་བྱེད་ཀྱི་ཡོད་པ་ནི། ནམ་རྒྱུན་དབུ་མའི་ལམ་ལ་ཡིད་ཆེས་དང་རྒྱབ་སྐྱོར་ཡོད་ཚུལ་བརྗོད་པ་དེ་རང་ཉིད་ཀྱི་གཏམ་སྙན་གྲགས་ཁོ་ནའི་ཆེད་དུ་མང་ཚོགས་སར་མགོ་སྐོར་དང་སྐྱག་རྫུན་བཤད་ཀྱི་ཡོད་པ་གསལ་པོ་གསལ་རྐྱང་ཆགས་སོང། མི་གསོད་ལག་དམར་བ་རྒྱ་དམར་གཞུང་ལ་ཚིག་ཟ་དང་འཁོན་འཛིན་སྤངས་ནས་དབུ་མའི་སྲིད་བྱུས་འཛིན་ཐུབ་པར། བོད་མི་ནང་ཁུལ་གནད་དོན་ཅུང་ཙག་དེ་ཚོའི་རིགས་ལ་བཟོད་སྒོམ་མི་ཐུབ་པ་ཅི་ཡོད། གྲོས་འཆར་འདོན་མཁན་གྱི་སྤྱི་འཐུས་སྒྲོལ་མ་མཚོ་མོ་སོགས་ནམ་རྒྱུན་དབུ་མའི་ལམ་ལ་རྒྱབ་སྐྱོར་མཐའ་གཅིག་ཏུ་ཡོད་ཁུལ་གནང་མཁན་ཚོས་གདོང་རིས་ངོ་མ་དེ་ད་རེས་གསལ་པོ་བསྟན་སོང། ངན་པའི་གཞུག་ལ་རྒྱག་རྡུང་དང། བཟང་པོའི་གཞུག་ལ་ཇ་ཆང་གི་དཔེ་ལྟར། སྤྱི་འཐུས་ཟླ་བ་ཚེ་རིང་གི་ཕྱོགས་གཏོགས་ཚོར་ག་དུས་ཡིན་ཡང་ངོ་ཚ་དང། ཁ་སྐྱེངས་ཀྱི་ཕམ་ཉེས་ཤིག་ཡོང་བཞིན་ཡོད། སྤྱི་འཐུས་ཟླ་བ་ཚེ་རིང་དང་ཤོག་ཁག་ཚོས་གྲོས་ཆོད་གྲོས་འཆར་གང་ཞིག་བཏོན་ཡང། དེ་ལ་ཁ་གཏད་ཚོས་ལམ་སེང་ཆེས་མཐོའི་ཁྲིམས་ཞིབ་ཁང་གི་བཅད་ཁྲ་དང། འཛིན་སྐྱོང་བཀའ་ཤག་གིས་འབོད་སྐུལ་ལ་རྩིས་མེད་ཀྱིས་སྤྱི་རྒྱུ་སྒེར་བདག་བྱས་པ་དེར་མ་ཤེས་མ་གོ་མདོག་མདོག་བྱེད་དོན་ཅི་ཡིན་ཟེར་དུས། དབུ་མའི་ལམ་ལ་ཡིད་ཆེས་དང་རྒྱབ་སྐྱོར་རྩེ་གཅིག་ཏུ་ཡོད་གསུང་མཁན་སྤྱི་འཐུས་ཟླ་བ་ཚེ་རིང་གིས་སོ་སོའི་ཁེ་ཕན་གྱི་ཐོག་ཏུ་བབ་དུས་ཕུ་ཐུང་གཡས་བརྫེས་གཡོན་བརྫེས་ཀྱིས། ཁྱོད་ཤི་ང་གསོན་གྱི་འཐབ་རྩོད་བྱེད་རྒྱུའི་སྐད་གསེང་མཐོན་པོར་བསྒྲགས་པ་དེ་ཡིས་དོན་དངོས་གཉིས་སྨན་དབུ་མའི་ལམ་ཐབས་ལམ་ནི་ཆབ་སྲིད་སྣེ་མོ་བ་ཚོས་ཤོ་པའི་ལག་སྐྱིད་བཞིན་རྩེད་ཆས་ལྟ་བུ་རེད་འདུག དེ་བཞིན་མི་ཚེ་གཅིག་གི་དབང་དུ་བྱས་ན་བྱེད་འདོད་པའི་བྱ་བ་མང་པོ་ཞིག་སྡོམ་ཁྲིམས་དམ་པོས་བརྟན་སྲུང་གིས་བྱང་ཆུབ་སེམས་དཔའི་ལྟ་སྤྱོད་ལ་སྦྱང་བརྩོན་ལྷོད་མེད་གནང་ནས་དགེ་བཤེས་ཐོན་པའི་སྟོད་འགག་སེར་པོ་བཞེས་པ་ཆོས་བརྒྱུད་ཀྱི་སྤྱི་འཐུས་མཚན་འཁྱེར་བ་ཚོས་ཀྱང། སོ་སོའི་ཕྱོགས་ཞེན་གྱི་ཐོག་ལ་བབས་དུས་རང་ཉིད་ཀྱི་གནས་བབས་གཏིང་བརྗེད་ཀྱིས་ཁ་ཆུ་གནམ་ལ་འཐོར་བཞིན་ཚིག་མཚོན་འདེབས་བཞིན་པ་མཐོང་སྐབས་དེ་བས་སེམས་སྐྱོ་བའི་གནས་ཚུལ་ཞིག་མ་ཡིན་ནམ། གཞན་ཡང་སྤྱི་འཐུས་དཀོན་མཆོག་ཆོས་སྒྲོན་སོགས་སྤྱི་འཐུས་ཁག་ཅིག་གིས་གསུང་བཤད་གནང་སྟངས་དེ་ཚོ་ནི་བཤད་མཁན་ངོ་ཚ་མེད་ཀྱང། ཉན་མཁན་ངོ་ཚ་བའི་གནས་ཚུལ་ཞིག་རེད་འདུག མདོ་དོན་འབྱུང་འགྱུར་བློ་གཟུ་བོར་གནས་པའི་མང་ཚོགས་རྣམས་རྨོངས་གཉིད་ནས་སད་དེ། ནམ་རྒྱུན་ཆོལ་ཁ་དང་ཆོས་བརྒྱུད་སོ་སོར་ཞེན་ཁོག་ཡོད་མདོག་བྱེད་མཁན་ཚོ་དང། ལྷག་པར་དུ་སྤྱི་འཐུས་ཁག་ཅིག་གིས་ཧ་ཅང་སེམས་ཤུགས་ཡོད་མདོག་གིས་རང་བཙན་རྩོད་ལེན་བྱེད་དགོས་ལུགས་བརྗོད་མཁན་དང། ཡང་ཁག་ཅིག་གིས་༧གོང་ས་མཆོག་ལ་དད་གུས་ཆེ་མདོག་གིས་དབུ་མའི་ལམ་ལ་ཡིད་ཆེས་དང་རྒྱབ་སྐྱོར་ཧ་ཅང་ཡོད་ཁུལ་བྱེད་མཁན་སོགས་ཀྱིས་དོན་དངོས་དམིགས་ཡུལ་དང་བྱ་སྤྱོད་ངོ་མ་གང་ཡིན་དབྱེ་ཞིབ་ནན་ཏན་གྱི་སྒོ་ནས། སྐབས་བཅོ་ལྔ་པའི་སྤྱི་འཐུས་འོས་འདེམས་བྱེད་རྒྱུར་ད་རེས་གནས་ཚུལ་དེས་ཐོབ་པའི་བསླབ་བྱ་དང། བསགས་པའི་ཉམས་མྱོང་ཞིག་ལ་ངོས་འཛིན་གྱིས་འཇུག་ལྡོག་མ་ནོར་བ་གནང་དགོས།།