རང་ཉིད་ཁོ་ནར་བརྟེན་ནས་ཐོབ་པའི་གོ་ས།

འབྲོག་རི་བོ་དགེ་ལྡན་པའི་ཤིང་རྟའི་སྲོལ་འབྱེད་ཆེན་མོ་ཤར་རྒྱལ་བ་ཙོང་ཁ་པ་བློ་བཟང་གྲགས་པ་མཆོག་གིས་ཕྱི་ལོ་༡༤༡༠ ནས་༡༤༡༩ བར་དགའ་ལྡན་གསེར་ཁྲི་པའི་མཛད་ཁུར་བཞེས་པ་དང༌། དེའི་རྗེས་སུ་༡༤༡༩ ལོར་རྒྱལ་ཚབ་དར་མ་རིན་ཆེན་གྱིས་དགའ་ལྡན་གསེར་ཁྲིའི་མཛད་འགན་བཞེས། དེ་ནས་རིམ་པ་མཁས་གྲུབ་དགེ་ལེགས་དཔལ་བཟང་པོ་ནས་དགའ་ལྡན་ཁྲི་ཐོག་༡༠༡ པ་ཤར་པ་ལུང་རིགས་རྣམ་རྒྱལ་རིན་པོ་མཆོག་གི་དབར་མི་ལོ་དྲུག་བརྒྱ་ཙམ་གྱི་ལོ་རྒྱུས་ཡོད་པ་དང༌། ཟླ་འདིའི་ཕྱི་ཚེས་༢༦ ཉིན་བཞུགས་སྒར་དྷ་སའི་ཉེ་འགྲམ་ནོར་གླིང་བདེ་ལྡན་གཙུག་ལག་ཁང་དུ་ྋགོང་ས་ྋསྐྱབས་མགོན་ཆེན་པོ་མཆོག་ལ་གསར་མཇལ་ཞུས་ནས་བྱང་རྩེ་ཆོས་རྗེ་རི་རྫོང་རིན་པོ་ཆེ་མཆོག་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་ཐོག་༡༠༢ པར་མངའ་གསོལ་དང་འབྲེལ་ྋགོང་ས་སྐྱབས་མགོན་ཆེན་པོ་མཆོག་གིས་དགའ་ལྡན་ཁྲི་རིན་པོ་ཆེ་མཆོག་ལ་བསྔགས་བརྗོད་དང་གསུང་གིས་དབུགས་དབྱུང་ཡང་མཛད་ཡོད་པ་རེད། རྗེ་མཉམ་མེད་ཙོང་ཁ་པ་ཆེན་པོའི་རྒྱལ་ཚབ་དགའ་ལྡན་ཁྲི་རིན་པོ་ཆེ་རིམ་བྱོན་ནི་རི་བོ་དགེ་ལྡན་པའི་གདན་ས་ཆེན་པོ་སེ་འབྲས་དགེ་གསུམ་གྱི་དགེ་འདུན་པ་ཞིག་གིས་མི་ལོ་ཉི་ཤུ་ལྷག་གི་རིང་གཞུང་ལུགས་རབ་འབྱམས་ལ་ཐོས་བསམ་སློབ་གཉེར་གནང་བའི་འབྲས་རྟགས་སུ་དགེ་བཤེས་ལྷ་རམས་པའི་མཚན་རྟགས་བཞེས་པ་དང༌། དེའི་རྗེས་སུ་རྒྱུད་གྲྭ་སྟོད་སྨད་གང་རུང་དུ་ཞུགས་ནས་བླ་མ་རྒྱུད་པའི་དགེ་སྐོས་དང༌། དབུ་མཛད། མཁན་པོ། མཁན་ཟུར་བཅས་རིམ་བཞིན་གནང་ནས་དགའ་ལྡན་ཤར་རྩེ་དང་བྱང་རྩེ་གང་རུང་གི་ཆོས་རྗེ་གནང་དགོས་པ་དང༌། དེ་ནས་དགའ་ཁྲི་ལས་ཐོག་པས་དགོངས་པ་ཞུས་པའམ། སྐུ་གཤེགས་པ་ལྟ་བུའི་མཚམས་སུ་གཞི་ནས་དགའ་ལྡན་གསེར་ཁྲི་རིན་པོ་ཆེར་མངའ་གསོལ་ཞུ་རྒྱུའི་ལུགས་སྲོལ་འདི་ཉིད་མ་ཉམས་པར་གནས་ཡོད། ད་ལྟའི་དགའ་ལྡན་ཁྲི་ཐོག་༡༠༢ པར་མངའ་གསོལ་བའི་བྱང་རྩེ་ཆོས་རྗེ་རི་རྫོང་རིན་པོ་མཆོག་ལ་མཚོན་ན། འཁྲུངས་ཡུལ་ལ་དྭགས་ནས་ཡིན་པ་དང༌། བོད་ས་མ་ཤོར་གོང་ནས་གདན་ས་ཆེན་པོ་འབྲས་སྤུངས་བློ་གསལ་གླིང་དུ་ཆོས་ཞུགས་གནང་ཡོད་པ་དང༌། བོད་ས་ཤོར་བའི་རྗེས་སུའང་རྒྱ་གར་ལྷོ་ཕྱོགས་སུ་ཡོད་པའི་འབྲས་བློ་གླིང་གྲྭ་ཚང་གི་མཁན་པོའི་མཛད་འགན་བཞེས་པ་སོགས་ད་ལྟའི་བར་གདན་ས་རུ་བཞུགས་ནས་སྐུ་ཚེ་གང་ལ་ཐོས་བསམ་སློབ་གཉེར་དང་འཆད་རྩོད་རྩོམ་གསུམ་གྱི་བྱ་བ་ཁོ་ནས་འདའ་བར་མཛད་ཡོད། དགའ་ལྡན་ཁྲི་པ་རིམ་པའི་བྱུང་རིམ་ལོ་རྒྱུས་ལ་གཞིག་ན། དོན་དངོས་ཐོག་སངས་རྒྱས་ཐུགས་རྗེ་ཅན་གྱིས་ང་ཡི་བསྟན་པ་ལ་རིགས་དང་རུས་མི་གཙོ་བསླབ་པ་རིན་པོ་ཆེ་ཁོ་ན་གཙོ་ཞེས་གསུངས་པ་བཞིན། སྔོན་བྱོན་དམ་པའི་རྣམ་ཐར་རྗེས་འཇུག་གདུལ་བྱའི་ཉམས་ལེན་དུ་གྱུར་ཡོད། གནད་དོན་འདི་ནི་བོད་ཀྱི་ལོ་རྒྱུས་ཀྱི་ཐོག་ནས་བཀས་བཀོད་རྒྱུད་འཛིན་གྱི་ལམ་ལུགས་ཙམ་མ་ཡིན་པར་སྐྱེ་ཁུངས་དང་རིགས་རུས་དབུལ་ཕྱུག་གི་ཁྱད་པར་མེད་པར་ཆོས་ཕྱོགས་ཀྱི་གོ་གནས་མཐོ་ཤོས་སུ་སླེབས་ཐུབ་པའི་ར་སྤྲོད་ལྟ་བུར་གྱུར་ཡོད་པ་དང༌། ཆོས་ཕྱོགས་ཀྱི་གོ་གནས་གལ་ཆེན་པོ་འདི་ནི་རྒྱུ་ཆེན་གྱིས་ཉོ་རྒྱུ་དང༌། དབང་ཆེན་གྱིས་འཕྲོག་རྒྱུ། ངོ་ཆེན་གྱིས་བསླུ་རྒྱུ་ཡང་མེད་པར། རང་ཉིད་ཀྱི་ཤེས་རབ་དང་ཡོན་ཏན་བརྩོན་འགྲུས་བཅས་ལ་རག་ལས་པ་ཞིག་ཡིན་པ་ལས། གོ་གནས་འདི་སྐྱེས་དུས་ནས་གཏན་ཁེལ་བ་ཞིག་དང་ཐོད་རྒལ་གྱིས་སླེབས་ཐུབ་པ་ཞིག་གཏན་ནས་མ་ཡིན་པར་བརྟེན་ཨ་མའི་བུ་ལ་ཡོན་ཏན་ཡོད་ན་དགའ་ལྡན་ཁྲི་ལ་བདག་པོ་མེད་ཅེས་པའི་སྡོམ་ཚིག་དེ་ཡང་དོན་ལ་གནས་པ་ཞིག་ཏུ་གྱུར་ཡོད།།