འཚམས་འདྲིའི་ཤིས་ཚིག
༄༅། །ཡིད་ཅན་འགྲོ་བའི་མ་མ་བྱམས་མགོན་ཐུགས་རྗེའི་མངའ་བདག ལྷ་མིའི་རྣམ་འདྲེན་དམ་པ་ཐམས་ཅད་མཁྱེན་ཅིང་གཟིགས་པ་ཆེན་པོ་ཕྱོགས་ཐམས་ཅད་ལས་རྣམ་པར་རྒྱལ་བ་གང་ཉིད། དེང་དགེ་ལེགས་རྫོགས་ལྡན་གསར་བའི་དཔལ་ཡོན་རབ་ཏུ་འབར་བའི་དུས་ཀྱི་ཆར། གང་གི་གསང་གསུམ་ཉིན་བྱེད་དབང་པོ་མཐའ་ཀླས་འགྲོ་བའི་མཁའ་ལ་ལྷང་ངེར་གསལ་ཞིང༌། བྱམས་བརྩེའི་དྲི་བསུང་མངར་པོས་མུ་མེད་འགྲོ་བ་ཀུན་གྱི་ཕན་བདེའི་གསོས་སྨན་གྱུར་ཏེ། ཕྲིན་ལས་དོན་ཡོད་ཞགས་པས་ཡངས་པའི་ས་ཆེན་ཀུན་བཅིང་བའི་མཚོན་བྱེད་དུ།
ནོ་སྦེལ་ཞི་བདེའི་གཟེངས་རྟགས་བདག་གིར་བཞེས་ནས་བགྲང་བྱ་ཉི་ཤུ་འཁོར་བའི་དུས་ཁྱད་པར་ཅན་དང་འབྲེལ། མགོན་པོ་གང་ཉིད་སྔར་བཞིན་ཇི་སྲིད་འགྲོ་རྣམས་རྫོགས་བྱང་མ་ཐོབ་བར་དེ་སྲིད་དུ་བརྩེ་ཆེན་ཐུགས་རྗེའི་འཛུམ་དཀར་འགྲོ་ལ་རབ་ཏུ་གཡོ་ཞིང། གསང་གསུམ་རྡོ་རྗེའི་ངོ་བོར་འཚོ་ཞིང་བཞེས་ནས་རླབས་ཆེན་ཐུགས་ཀྱི་དགོངས་བཞེད་མཐའ་དག་ཡོངས་སུ་འགྲུབ་པའི་སྨོན་གསོལ་ཁྲི་ཕྲག་ནས་ཁྲི་ཕྲག་དང། སྒོ་གསུམ་རབ་ཏུ་གུས་པས་ལྷ་ཕྱག་གྲངས་མེད་སྔོན་དུ་བཏང་སྟེ། ཞབས་སེན་གསེར་གྱི་འཁོར་ལོ་སྤྱི་བོར་བསྟེན་ནས་བླ་ན་མེད་པའི་བཀའ་དྲིན་རྗེས་དྲན་དང་བཀྲ་ཤིས་བདེ་ལེགས་ཀྱི་འཚམས་འདྲི་བཅས། ཐེག་མཆོག་རྣམ་གྲོལ་གླིང་ནས་གུས་ལྷ་འབངས་སྡེ་དགེ་བསོད་ནམས་རྒྱལ་མཚན་པས།
