འབྱུང་འགྱུར་གྱི་བཀའ་ཁྲི་ནི་གཞུང་ཞབས་ཤིག་ངེས་པར་དུ་དགོས།

དེས་ན་འབྱུང་འགྱུར་མི་མང་གིས་ཐད་ཀར་འོས་འདེམས་བྱས་པའི་སྐབས་གསུམ་པའི་བཀའ་ཁྲིའི་འོས་བསྡུ་བྱེད་ལ་ཉེ་བའི་ལོ་ངོ་གཉིས་ཙམ་གྱི་སྔོན་ནས་སྐབས་གསུམ་པའི་བཀའ་ཁྲི་སུ་འདེམས་མིན་གྱི་བགྲོ་གླེང་དང་དཔྱད་གཏམ་སོགས་ཚགས་པར་དང་དྲ་རྒྱ་ཅི་རིགས་ནས་ཚ་ཚ་འུར་འུར་ངང་ཐོན་དང་འཐོན་བཞིན་པ་རེད། སུ་ཞིག་འདེམས་མིན་ནི་གནད་དོན་གྱི་གཙོ་བོ་ཡིན་པས་མང་པོ་ཞིག་གིས་ཟམ་གདོང་བླ་མ་ཉིད་བསྐྱར་དུ་འདེམས་དགོས་གསུངས་པ་དང། ད་དུང་ཁ་ཤས་ཀྱིས་རྒན་གཞོན་གཉིས་ལས་གཞོན་སྐྱེས་དང་སེར་སྐྱ་གཉིས་ལས་སྐྱ་བོ་དགོས་ཚུལ་གྱི་དགོངས་ཚུལ་མང་དག་ཅིག་འདོན་བཞིན་པ་རེད། ཟམ་གདོང་བླ་མ་ནི་ཤེས་འཇོན་ལྷག་བསམ་གང་ཐད་ནས་གཞན་ལས་ཁྱད་དུ་འཕགས་པ་ཞིག་ཡིན་པར་འདས་པའི་བྱས་རྗེས་ལ་བལྟས་ན་གསལ་པོ་ཤེས་ཐུབ་ཀྱང། བཀའ་ཁྲི་ནི་མི་མང་གིས་བདམས་ནས་དུས་ཡུན་རྫོགས་མཚམས་སུ་མི་མང་གིས་གསར་པ་འདེམས་དགོས་པ་ལས་སྔོན་གྱི་རྒྱལ་པོའི་རིང་ལུགས་དང་སྐུ་དྲག་རིང་ལུགས་བཞིན་ཚེ་གང་སྲིད་དབང་སྒེར་འཛིན་བྱས་ནས་སྡོད་ས་མེད་ལ། བཙན་བྱོལ་བོད་མིའི་བཅའ་ཁྲིམས་རིན་པོ་ཆེའི་དབང་དུ་བྱས་ན་ཡང་གང་ཟག་གཅིག་ཐེངས་གསུམ་བསྟུད་མར་འདེམས་མི་ཆོག་པ་གསལ་བས་གང་ཟག་གཅིག་ལ་ལྟོས་ཏེ་བཅའ་ཁྲིམས་འགྱུར་བ་གཏོང་ཐབས་མེད་ཅིང། གལ་ཏེ་བཅའ་ཁྲིམས་ལ་འགྱུར་བ་བཏང་ནས་ཟམ་གདོང་བླ་མ་བསྐྱར་དུ་བདམས་པའི་དབང་དུ་གཏང་ཡང་འབྱུང་འགྱུར་གྱི་ལོ་ལྔའི་ནང་བོད་དོན་བདེན་མཐའ་གསལ་བའི་ངེས་པ་མེད་པས་སླར་ཡང་སྐབས་བཞི་པ་ཡང་ཟམ་གདོང་ཉིད་འདེམས་དགོས་བྱུང་ཚེ་ཕྱོགས་གང་ནས་བལྟས་ཀྱང་འོས་ཤིང་འཚམས་པ་ཞིག་གཏན་ནས་མིན།
ཟམ་གདོང་བླ་མས་སྐབས་གཉིས་ཀྱི་རིང་དཔལ་འབྱོར་གྱི་གྱོང་གུད་གསབ་ཅིང་འཛུགས་བསྐྲུན་ཡར་རྒྱས་བཏང་བ། ཤེས་ཡོན་སྲིད་ཇུས་གཏན་ལ་ཕབ་ནས་བོད་ཀྱི་སྲོལ་རྒྱུན་དང་དེང་རབས་ཀྱི་ཤེས་ཡོན་ཡར་རྒྱས་བཏང་བ། བཅའ་ཁྲིམས་ཚུལ་བཞིན་དུ་ཕྱག་བསྟར་གནང་ནས་གཞུང་གི་ལས་ཁུངས་མ་ལག་དང་བཅས་པ་ཚགས་ཚུད་དུ་བཏང་བ། བོད་རྒྱ་འབྲེལ་མོལ་གྱི་ལས་རིམ་བསྐྱར་མཐུད་གནང་བ་སོགས་ཕྱི་རབས་པ་དག་གིས་གཞལ་དཀའ་བའི་མཛད་རྗེས་བཞག་ཡོད་པས་སྐབས་གསུམ་པའི་བཀའ་ཁྲིས་དེ་བཞིན་དུ་ཕྱག་བསྟར་གནང་ན་རིན་པོ་ཆེ་ཁོང་བསྐྱར་དུ་འདེམས་དགོས་ཀྱི་མ་རེད་སྙམ།
སུ་ཞིག་གིས་དེ་ལྟར་མཇུག་སྐྱོང་གནང་ཐུབ་བམ་ཞེ་ན་མང་པོ་ཞིག་གིས་བཙན་བྱོལ་ནང་ཅུང་སྐད་གྲགས་ཡོད་པའི་མཁས་དབང་དང་འཐབ་རྩོད་པ་ཆེ་གེ་མོ་སོགས་འདེམས་པར་འདོད་ན་ཡང། དེ་དག་ནི་རྒྱལ་སྤྱིའི་གནས་ལུགས་སོགས་ལ་མཁྱེན་རྒྱ་ཆེ་ན་ཡང་དེ་ཙམ་གྱི་བོད་ཀྱི་བཀའ་ཁྲིར་འོས་ཤིང་འཚམས་པ་ཞིག་མིན། དེས་ན་འབྱུང་འགྱུར་གྱི་བཀའ་ཁྲི་ནི་རྒན་གཞོན་དང་སྐྱེས་པ། བུད་མེད། སྐྱ་སེར་སོགས་ཀྱི་ཁྱད་པར་གང་ཡང་མེད་པར་བཙན་བྱོལ་གྱི་མཐར་ཐུག་དམིགས་ཡུལ་ནི་བོད་དོན་བདེན་མཐའ་གསལ་རྒྱུ་དེ་ཡིན་པ་དང་དེའི་ཆེད་དུ་གཞུང་གི་ལས་ཁུངས་མ་ལག་དང་བཅས་པ་འཛིན་སྐྱོང་ཚུལ་བཞིན་དུ་བྱེད་དགོས་པས་བོད་རྒྱ་འབྲེལ་མོལ་གྱི་ལས་རིམ་ལ་ཐུགས་རྒྱུས་ཚང་མ་ཡོད་མཁན་ཞིག་དང། གཞུང་གི་འཛྀན་སྐྱོང་ལ་ཉམས་མྱོང་ཚད་ལྡན་ཡོད་མཁན་ཞིག་དགོས་པས་འབྱུང་འགྱུར་གྱི་བཀའ་ཁྲི་ནི་ངེས་པར་དུ་བོད་རྒྱའི་འབྲེལ་ལམ་གནང་ཐུབ་མཁན་ཞིག་དང་གཞུང་ཞབས་གནང་མྱོང་བ་ཞིག་ངེས་པར་དུ་དགོས་སྙམ་མོ། །