བོད་རྒྱ་གཉིས་ཀས་མྱ་ངན་གུས་འདུད་ཐོབ་པའི་ང་ཕོད།

ཕྱི་ཚེས་༢༨ ཉིན་སྐུ་ཕུང་ཞུགས་འབུལ་སྐབས་སྲིད་འཛིན་ཧུའུ་ཅིན་ཐའོ་དང་སྲིད་བློན་ཝིན་ཅཱ་པའོ་སོགས་རྒྱ་ནག་དབུས་ཆབ་སྲིད་ཅུས་ཀྱི་རྒྱུན་ལས་མི་དགུ་ཕལ་ཆེ་བ་དང་སྲིད་འཛིན་ཟུར་པ་ཅང་ཙེ་མིན་སོགས་ཡོང་ནས་མྱ་ངན་གུས་འདུད་ཞུས་ཡོད་པ་རེད།  བཙན་བྱོལ་བོད་གཞུང་བཀའ་ཤག་གི་ངོས་ནས་ཀྱང་ཁོང་གི་མཛད་སྤྱོད་ལ་གུས་འདུད་དང་མྱ་ངན་རྗེས་དྲན་གྱི་གསལ་བསྒྲགས་ཤིག་སྤེལ་བའི་ནང་ཧ་ཅང་གུས་བཀུར་གྱིས་བསྔགས་བརྗོད་གནང་འདུག ང་ཕོད་ནི་མི་ལོ་༡༠༠ ཙམ་འཇིག་རྟེན་དཀར་ངོགས་སུ་འཚོ་བ་རོལ་མྱོང་བའི་བོད་ཀྱི་གནད་ཡོད་མི་སྣ་ཞིག་དང། བོད་གསར་རྙིང་གཉིས་ཀྱི་སྐབས་སུ་ངོ་སོ་དང་གོ་གནས་གལ་ཆེན་བཟུང་མྱོང་བའི་མི་སྣ་ཞིག་ཀྱང་ཡིན། ཁོང་ལྟ་བུ་རྒྱ་ནག་གཞུང་དང་བཙན་བྱོལ་གཞུང་གཉིས་ཀས་ཐུན་མོང་གིས་བསྟོད་བསྔགས་ཐོབ་པའི་མི་སྣ་སུ་གང་ཡང་ད་བར་བྱུང་མེད་ཚོད་རེད། བསམ་སྡིང་རྡོ་རྗེ་ཕག་མོས་༧གོང་ས་མཆོག་དང་བཙན་བྱོལ་བོད་གཞུང་ལ་ཁ་རྡུང་དང་བཅས་རྒྱ་ནག་གཞུང་ལ་མགོ་འདོགས་ཞུས་པའི་སྐབས་ལོ་ཁ་ཤས་ལ་རྒྱ་གཞུང་གིས་བསྔགས་བརྗོད་བྱས་ཡོད་ཀྱང། རིག་གནས་གསར་བརྗེའི་སྐབས་ཁོང་ལ་ཚད་ལས་བརྒལ་བའི་མནར་གཅོད་བཏང་ཡོད་པ་རེད། དེ་བཞིན་པཎ་ཆེན་རིན་པོ་ཆེ་མཆོག་ལ་མཚོན་ན་རྒྱ་གཞུང་གི་བཙོན་ཁང་དུ་ལོ་དགུ་ལྷག་བཞུགས་དགོས་བྱུང་ཡོད་པ་དང། བོད་མི་གུང་ཁྲན་ཏང་གི་ཚོགས་མི་སྔ་ཤོས་ཀྱི་གྲས་དང་རྒྱ་དམར་ལ་ཡིད་ཆེས་བྱེད་མཁན། ལྷོ་ནུབ་དམག་ཁུལ་ཁང་གི་རུ་སྣ་བོད་དུ་འདྲེན་མཁན་འབའ་པ་ཕུན་ཚོགས་དབང་རྒྱལ་ལ་མཚོན་ན་རིག་གནས་གསར་བརྗེ་ཟེར་བའི་སྒྲ་ཙམ་ཡང་མེད་པའི་དུས་ནས་བཙོན་འཇུག་གིས་མི་ལོ་༡༨ རིང་ནག་བཙོན་དུ་བཅུག་པ་རེད། འཕགས་པ་ལྷ་དགེ་ལེགས་རྣམ་རྒྱལ་ལ་མཚོན་ནའང་རིག་གནས་གསར་བརྗེའི་སྐབས་འཐབ་རྩོད་དང་རྡུང་རྡེག་རག་མྱོང་བ་འོད་ཟེར་གྱིས་བྲིས་པའི་གསར་བརྗེའི་དེབ་ཏུ་གསལ་ཡོད། དེ་དག་དང་མི་འདྲ་བར་ང་ཕོད་ངག་དབང་འཇིགས་མེད་ནི་རིག་གནས་གསར་བརྗེའི་སྐབས་སོགས་དུས་འགྱུར་བདེ་གཟར་ཇི་འདྲ་ཞིག་བྱུང་ཡང་རྒྱ་ནག་གཞུང་གིས་ང་ཕོད་ནི་ཨ་མས་བུ་ཕྲུག་བཞིན་གཅེས་སྐྱོང་བྱས་ཡོད།
ང་ཕོད་ནི་གྲོས་མཐུན་དོན་ཚན་བཅུ་བདུན་ལ་ས་ཡིག་རྒྱག་མཁན་གྱི་མི་སྣ་གཙོ་བོ་ཡིན་པ་དང། དེ་ནས་བཟུང་རྒྱ་ནག་གཞུང་གི་དྲོ་སྐྱིད་འོག་མི་ཚེ་སྐྱེལ་མཁན་ཞིག་ཀྱང་ཡིན། ༧གོང་ས་མཆོག་བཙན་བྱོལ་དུ་མ་ཕེབས་ཙམ་ལ་བོད་རྒྱའི་གནས་སྟངས་སྡུག་ཏུ་འགྲོ་བཞིན་པའི་སྐབས་ང་ཕོད་རྒྱ་ནག་གི་དམག་སྒར་དུ་ཡོད་བཞིན་པར་ནང་གི་གནས་ཚུལ་ལྟ་བུར་༧གོང་ས་མཆོག་གང་དུ་བཞུགས་ཡོད་མེད་ས་ཁྲ་བཀོད་ནས་ཕུལ་ན་སྐུ་ཕྱྭ་ལ་ཉེན་ཁ་མི་ཡོང་བའི་ལམ་སྟོན་བྱས་པ་དེ་སྐབས་དེའི་ལོ་རྒྱུས་ནང་ང་ཕོད་ཀྱི་བོད་ཞེན་དུ་བརྩིས་ཡོད་ཀྱང། དོན་དངོས་རྒྱ་དམག་གིས་ནོར་བུ་གླིང་ག་མེ་སྒྱོགས་ཀྱི་ཁ་གཏད་ས་གཙོ་བོ་དང། སྐྲ་མེད་པའི་ཕུང་པོ་རྣམས་༧གོང་ས་མཆོག་གི་སྐུ་ཕུང་ཡིན་མིན་བརྟག་དཔྱད་བྱས་པའི་ལོ་རྒྱུས་སོགས་ལ་བལྟས་ན་སྐབས་དེ་དུས་ང་ཕོད་ཀྱི་གསང་གནས་དེ་སྐུ་ཕྱྭ་ལ་ཕན་གནོད་ག་རེའི་ཆེད་དུ་ཡིན་མིན་ཡང་ཤེས་ཐུབ་པ་ལྟ་བུར་གྱུར་འདུག དེ་བཞིན་ཆབ་མདོ་རུ་ཡོད་པའི་བོད་གཞུང་གི་གོ་མཛོད་མེ་སྲེག་བཏང་བ་དེ་ཡང་ཧ་ཅང་གིས་བྱས་རྗེས་སུ་བགྲང་མཁན་ཡོད་ཀྱང། རྒྱ་གཞུང་ལ་སྐབས་དེ་དུས་མཚོན་ཆས་དཀའ་ངལ་གང་ཡང་མེད་པས་གོ་མཛོད་དེ་ལག་པར་རག་པས་ཕན་ཐོགས་མེད་ཀྱང། གྲི་དང་རྒྱུག་པ་ལས་ལག་ཆ་མེད་པའི་ཡུལ་དམག་རྣམས་ལ་གོ་མཛོད་དེ་ཐོབ་ན་སྐབས་དེ་དུས་རྒྱ་དམག་ལ་གནོན་སྐྱོན་ཅུང་ཙམ་རེ་བཟོ་ཐུབ་མོད། ང་ཕོད་ཀྱིས་བོད་གཞུང་གི་གོ་མཛོད་མེ་སྲེག་བཏང་བ་དེ་ཡང་སྙིང་རྒྱ་བོད་སུ་ལ་ཕན་ཡོད་མེད་ཀྱང་ཟུར་བལྟས་ལེབ་མཐོང་ལྟ་བུར་འདུག གྲོས་མཐུན་དོན་ཚན་བཅུ་བདུན་གྱི་སྐོར་ནས་བཤད་ཀྱང་བོད་གཞུང་ལ་གྲོས་བསྡུར་ཙམ་བྱེད་དགོས་ཀྱང་མཐར་ཐུག་འབྲེལ་བ་བྱས་མེད་པ་སོགས་མདོར་ན་ང་ཕོད་ནི་རང་དང་རང་གི་ནང་མི་ཁོ་ནའི་ཁེ་ཕན་ཙམ་ལས། བོད་མི་རིགས་དང་རྒྱལ་ཁབ་ལ་དགོངས་པ་བཞེས་ཕོད་པ་དང་བཞེས་ཐུབ་པའི་བློ་ཁོག་དང་ཤེས་རྒྱ་ཅན་ཞིག་མིན་པ་ཧ་ཅང་གསལ་པོ་རེད།།