གཏམ་ཚོགས།
གཏམ་ཚོགས་ནི་བོད་ཀྱི་དཔེ་མཛོད་ཁང་གིས་བོད་འབྲེལ་ཤེས་ཡོན་གོ་རྟོགས་གོང་སྤེལ་ཆེད་དུ་འདོན་བཞིན་པ་དང། ད་ཐེངས་དེབ་གཉིས་པར་སྐྲུན་བྱས་འདུག གཏམ་ཚོགས་དེབ་གཅིག་གི་ནང་དུ། བློ་བཟང་ཤཱསྟྲཱིས་བརྩམས་པའི་ཆབ་སྲིད་ཆོས་བཞིན་སྐྱོང་དགོས་པའི་སྐོར་གྱི་དཔྱད་པ་དང། ཁང་དཀར་ཚུལ་ཁྲིམས་སྐལ་བཟང་གིས་བརྩམས་པའི་སྒྲ་སྙན་ངག་གི་འཕེལ་རྒྱས་ལོ་རྒྱུས་རགས་བསྡུས།
ལྷ་སྐྱབས་ཀྱིས་བརྩམས་པའི་ཀླུ་ཁྲི་བསོད་ནམས་གྲགས་པའི་དངོས་བྱུང་ལོ་རྒྱུས། ངག་དབང་ཚེ་དཔག་གིས་བརྩམས་པའི་བོད་ཀྱི་དཀར་ཆག་རིག་པའི་འཕེལ་རིམ་སྐོར་རགས་ཙམ་བརྗོད་པ། དེབ་དེའི་རྩོམ་སྒྲིག་པ་ན་ག་སངས་རྒྱས་བསྟན་དར་གྱིས་བརྩམས་པའི་སྐུ་ངོ་རྒྱ་མཚོ་ཚེ་རིང་མཆོག་ལ་རྗེས་དྲན་དང་མྱ་ངན་གུས་འདུད་བཅས་འཁོད་ཡོད་པ་རེད། དེབ་གཅིག་གི་ནང་དུ་༡ བོད་ཀྱི་གནས་ཆེན་རྣམས་ཀྱི་མདོ་བྱང་དཀར་ཆག་ཨོ་རྒྱན་གྱི་མཁས་པ་པདྨ་འབྱུང་གནས་ཀྱིས་བཀོད་པ་དང། ༢ མདོ་ཁམས་གནས་ཆེན་ཉེར་ལྔ་ཡན་ལག་དང་བཅས་པའི་མདོ་བྱང་གི་གསལ་བྱེད་ཟིན་ཐུན་ཉུང་ངུ༌། ༣ ལྕི་སྟོད་ར་ཚ་རྫོང་མགོའི་གཙོས་གནས་ཆེན་ཉེར་ལྔའི་མདོ་བྱང་ཟིན་བྲིས། ༤ ཡོན་ཏན་གྱི་གནས་གཙོ་རུ་དམ་གངས་ཀྱི་ར་བའི་སྦས་གནས་ཆེན་པོའི་ལོ་རྒྱུས་འགྲོ་དོན་མཐའ་ཡས༔ ༥ དམ་ཆོས་རྫོགས་པ་ཆེན་པོ་སྡེ་གསུམ་ལས༔ དབང་གི་གནས་མཆོག་པདྨ་ཤེལ་ཕུག་གི་དཀར་ཆག༔ ༦ གསང་ཐིག་སྙིང་པོའི་སྐོར་ལས། ཐུགས་ཀྱི་གནས་མཆོག་ཙཱ་འདྲ་རིན་ཆེན་བྲག་གི་དཀར་ཆག ༧ ཧེ་རུ་ཀ་དགྱེས་པའི་ཡང་བྱང་འོད་གསལ་ཐིག་ལེ།༔ ༨ ཡོན་ཏན་ཡོངས་རྫོགས་རྫོང་ཤོད་བདེ་གཤེགས་འདུས་པའི་གནས་ཆེན་གཙོ་བོ་རྣམས་ཀྱི་དཀར་ཆག་མདོ་བྱང་འོད་ཀྱི་སྙིང་པོ༔བཅས་འཁོད་ཡོད་པ་རེད།།
