གནམ་གཤིས་འཕོ་འགྱུར་གྱི་དཀའ་ངལ།

དེ་སྔ་མཉམ་འབྲེལ་རྒྱལ་ཚོགས་ཀྱིས་འགྲོ་གྲོན་ཕོན་ཆེན་བཏང་ནས་གནམ་གཤིས་སྒྱུར་བཅོས་ཀྱི་ཚོགས་ཆེན་ཐེངས་༡༥ ཙམ་སྐོང་ཚོགས་བྱེད་དགོས་བྱུང་ཞིང། གནམ་གཤིས་སྒྱུར་བཅོས་ཀྱི་ཚོགས་ཆེན་ཞེས་པ་ནི་སའི་གོ་ལའི་ཚ་གྲང་སླར་གསོ་བྱེད་ཐབས་སྐོར་གྱི་རྒྱལ་སྤྱིའི་གཞུང་འབྲེལ་ཚོགས་ཆེན་ཞིག་ཡིན་པ་རེད། ད་ལྟའི་གནམ་གཤིས་ཀྱི་འགྱུར་བ་ནི་རང་བྱུང་གི་འགྱུར་འགྲོས་ཤིག་མིན་པར༌། འགྲོ་བ་མིའི་འབྱུང་བ་ཁམས་ཀྱི་རང་གཤིས་དང་མི་མཐུན་པའི་བསམ་སྦྱོར་ཕྱིན་ཅི་ལོག་པའི་མཇུག་འབྲས་ངན་པ་ཞིག་སྟེ། འཕྲལ་དུ་ཡོ་བསྲང་མ་བྱས་ན་མི་ཙམ་མ་ཟད། སྐྱེ་ཁམས་ཀྱི་ཚེ་སྲོག་ཡོངས་ལ་གནོད་འཚེ་ཚབས་ཆེན་ཕོག་གཏན་ཁེལ་བའི་དཀའ་ངལ་ཞིག་ཡིན་པ་རེད།
མིས་བཟོས་པའི་འཇུག་འབྲས་ངན་པ་ཞིག་ཅེས་བརྗོད་དུས་འགྲོ་བ་མི་སྤྱི་ལ་བརྗོད་ན་“རྒྱུགས་པ་ལེབ་རྡུང་”གི་དཔེ་ལྟ་བུ་ལས། དོན་དངོས་སུ་དཀའ་ངལ་བཟོ་མཁན་གྱི་བྱེད་གཏེ་གཙོ་བོ་ཁག་བཟོ་ལས་རྒྱ་སྐྱེད་བྱེད་མཁན་གྱི་རྒྱལ་ཁབ་དག་རེད། དབྱིན་ཇི་གཙོ་བོར་གྱུར་པའི་ནུབ་ཕྱོགས་རྒྱལ་ཁབ་ཀྱི་བཟོ་གྲྭའི་བདག་པོ་དག་གིས་འདོད་རྔམ་གྱིས་ཕུགས་ལ་བསམ་བློ་མ་བཏང་བར་རང་བྱུང་གི་གཏེར་མཛོད་རྣམས་ལ་བག་མེད་ལོངས་སྦྱོད་བྱས་པ་དང༌། བཟོ་ལས་འཛུགས་སྐྲུན་གྱིས་བར་སྣང་དུ་དུག་རླངས་ཚད་མེད་བཏང་བས། ས་ཁམས་དང་རླུང་ཁམས་གཉིས་ལ་བཙོག་སྐྱོན་ཤུགས་ཆེར་བྱུང་ནས་མཐར་རང་ཉིད་ཉེན་ཁའི་གནས་སུ་ལྷུང་དགོས་པ་ཞིག་ཏུ་གྱུར་པ་རེད།
དེ་ཡང་ཁ་གསལ་པོར་བརྗོད་ན་བཟོ་གྲྭ་ནས་ཐོན་པའི་དུ་བ་ནམ་མཁའ་ལ་ཡུན་རིང་བསགས་པའིརྐྱེན་གྱིས་གོ་ལའི་བར་སྣང་ཁམས་ཀྱི་མཁའ་དབུགས་འབག་བཙོག་བཟོས་པ་དང༌། ལྷག་པར་དུ་རླུང་ཁམས་དཀྱིལ་འཁོར་ནང་དུ་རླངས་ཀྱིས་ཉི་དྲོད་བཀག་ནས་གོ་ལའི་ཚ་དྲོད་ཤུགས་ཆེར་རྒྱས་ཏེ་འཛམ་གླིང་སྣོད་བཅུད་ལ་མི་འདོད་པའི་དཀའ་ངལ་སླེབས་པ་རེད། སྐབས་འབྲེལ་བཟོ་གྲྭས་གནམ་གཤིས་ལ་འགྱུར་ལྡོག་བཟོ་སྟངས་ནི་བཟོ་ལས་པ་དག་གིས་རང་བྱུང་ཁམས་ཀྱི་གཏེར་ཁ་སྔོག་འདོན་བྱེད་སྐབས། སོལ་རླུང་སོགས་དུག་རླངས་མང་དུ་འབྱུང་བ་དང༌། བཟོ་གྲྭ་ནས་ཐོན་རྫས་བཟོ་སྐབས་སུའང་དུ་བ་ཤུགས་ཆེར་བཏང་ནས་བར་སྣང་དུ་རླངས་རྫས་རིགས་མང་དུ་བསགས་པས་སའི་གོ་ལའི་རླུང་གི་དཀྱིལ་འཁོར་ལ་ཚ་དྲོད་བསམ་ཡུལ་ལས་འདས་པ་རྒྱས་ནས། བཟོ་གྲྭའི་གད་རྙིགས་ཀྱིས་ས་ཆུ་སོགས་ཁོར་ཡུག་རྫོད་པ་དང༌། བཟོ་གྲྭའི་ཐོན་རྫས་ལས་དེ་དང་དེ་བཞིན་གྱི་ཁོར་ཡུག་ལ་ཉེན་ཚབས་ཀྱི་འཕོ་འགྱུར་གསར་པ་བྱུང་དང་འབྱུང་བཞིན་ཡོད།
ཉེ་རབས་ཀྱི་ལོ་རྒྱུས་སུ་བཟོ་གྲྭའི་གནོད་སྐྱོན་ལ་བརྟེན་ནས་གོ་ལའི་གནམ་གཤིས་ལ་ཚ་དྲོད་རྒྱས་པའི་དཀའ་ངལ་འདིར་ཚན་རིག་པས་གོ་ལའི་དྲོད་ཁོལ་ཞེས་བརྗོད་པ་རེད། གོ་ལའི་དྲོད་ཁོལ་ཟེར་བ་འདི་གོང་དུ་གསལ་བ་ལྟར་དུས་རབས་ཉེར་གཅིག་པའི་ནང་འཛམ་གླིང་གི་དམག་ཆེན་ལྟ་བུར་གྱུར་ཟིན་ཡོད། གོ་ལའི་ཚ་དྲོད་འབྱུང་སྟངས་ནི་ཚན་རིག་པས་བཤད་ན། གོ་ལའི་སྟེང་འཕྲོས་པའི་ཉི་མའི་འོད་ཟེར་ལྡོག་འཕྲོ་བྱེད་ཀྱི་ཡོད་ཀྱང༌། བཟོ་གྲྭའི་དུ་རླངས་དག་བར་སྣང་ཁམས་ལ་རིམ་གྱིས་བསགས་པས་རྐྱེན་ངན་གཉིས་བཟོ་ཡི་ཡོད། དང་པོ་དེས་ཉི་འོད་ལྡོག་འཕྲོ་འགོག་པ་དང༌། གཉིས་པ་ནི་སའི་གོ་ལའི་རླུང་ཁམས་ཀྱྀ་བང་རིམ་དག་བརྡོལ་གྱི་ཡོད། དོན་རྐྱེན་དང་པོ་ནི་བཟོ་གྲྭའི་རླངས་རྫས་དག་གིས་ཉི་འོད་ལྡོག་འཕྲོ་དག་བཀག་ནས་བསགས་པས། ཉི་འོད་ཀྱི་ཚ་དྲོད་རླུང་གི་དཀྱིལ་འཁོར་ནས་ཕྱི་རོལ་དུ་ཐོན་མ་ཐུབ་པར་ནམ་ཟླའི་འགྲོས་དང་མི་མཐུན་པའི་གོ་ལའི་ཚ་ཚད་ཡུན་རིང་རྒྱས་པའི་ཉེན་ཁ་འཕྲད་ཀྱི་ཡོད། སྤྱིར་ཚ་དྲོད་གསོ་ཉར་གྱི་རིག་པ་འདིར་གནམ་གཤིས་དཔྱད་ཞིབ་པས་དྲོད་ཁང་ནུས་ཅན་ཟེར་བ་དང༌། དུག་རླངས་དེ་དག་ལ་དྲོད་ཁང་རླངས་རྫས་ཟེར་གྱི་ཡོད། དོན་རྐྱེན་གཉིས་པ་ནི། ཉི་མའི་འོད་ཟེར་བརྒྱུད་རྫས་ནུས་རིགས་སྣ་ཚོགས་གོ་ལའི་ངོགས་སུ་ཡོང་གི་ཡོད་ཀྱང༌། རླུང་ཁམས་དཀྱིལ་འཁོར་གྱི་རིམ་པ་དུ་མ་ཡོད་པས་རྫས་རིགས་རྣམས་བཀག་པའམ་རྫས་འགྱུར་གྱི་ལམ་ནས་འཚོ་གནས་སུ་ཕན་པའི་ནུས་རྫས་སུ་སྒྱུར་གྱི་ཡོད་མོད། བཟོ་གྲྭའི་དུག་རྫས་གཏོང་དྲག་པས་རླུང་ཁམས་ཀྱི་བང་རིམ་རྣམས་གཏོར་ནས་གནོད་འཚེ་ཅན་གྱི་ནུས་རྫས་རིགས་ཉི་འོད་དང་ལྷན་དུ་གོ་ལར་ཐད་ཀར་སླེབས་ཤིང༌། མི་དང་བཅས་པའི་སེམས་ཅན་རིགས་ལ་པགས་ནད་སོགས་ན་ཚ་འབྱུང་བ་དང་རྩི་ཤིང་གི་སྐྱེ་སྟོབས་ཉམས་པ་སོགས་གནོད་འཚེ་ཡོང་གི་ཡོད་པ་རེད།
བཟོ་གྲྭ་ནས་ཐོན་པའི་དུ་རླངས་ཇི་ཙམ་ཇེ་མང་དུ་ཕྱིན་ནའང༌། དེ་ཙམ་གྱིས་གོ་ལའི་ཚ་དྲོད་རྒྱས་ནས་འཛམ་གླིང་གི་ཚ་ཚད་ཇེ་རྒྱས་སུ་སོང་སྟེ་གངས་དང་འཁྱག་རོམ་རྣམས་རིམ་གྱིས་ཞུ་བ་དང༌། འབྱུང་འགྱུར་ས་ཆ་མཐོ་སའི་ནགས་ཀླུང་སོགས་ལ་འབྱུང་བ་མེ་ཡི་འཇིགས་པ་དང་དམའ་སའི་རྒྱ་མཚོའི་ངོགས་སུ་ཆགས་པའི་གླིང་ཕྲན་དང་མཚོ་འགྲམ་དུ་ཆགས་པའི་མི་སྡེ་སོགས་ལ་མཚོ་ལུད་ནས་ཆུའི་འཇིགས་པ་འབྱུང་བའི་ཉེན་ཁ་ཇེ་ཆེར་འགྲོ་རྒྱུ་ཡིན་པ་རེད།
ད་ལྟའི་ཆར་ཉེན་ཚབས་དང་ཞེད་སྣང་བྱེད་ཡུལ་གཙོ་བོ་ནི། འཛམ་གླིང་ལྷོ་སྣེ་དང་བྱང་སྣེ་གཉིས་སུ་ཆགས་པའི་འཁྱག་རོམ་དག་ཞུ་ནས་རྒྱ་མཚོར་འགྱུར་བཞིན་པ་དང༌། འཁྱག་རོམ་དུ་གནས་པའི་སེམས་ཅན་དག་མཚོ་ཀླུང་དུ་ཐིམ་ནས་འཆི་བཞིན་ཡོད་པ་རེད། དེ་བཞིན་གླིང་ཕྲན་གྱྀ་རྒྱལ་ཁབ་དག་ལ་མཚོ་འཕེལ་ནས་སྐམ་ས་ཆུས་འཛིན་པའི་ཉེན་ཁ་འཕྲད་བཞིན་པ་དང། ནམ་རྒྱུན་ས་ཆ་དྲོད་སར་གནས་པའི་སེམས་ཅན་རིགས་མང་པོ་ཞིག་གནས་མི་ཐུབ་པར་ས་ཆ་གྲང་སར་སྐྱབས་བཅོལ་དུ་འགྲོ་བ་དང༌། དྲོད་སར་གནས་པའི་སེམས་ཅན་རྣམས་མེད་པ་ཆགས་ནས་རྩ་སྟོང་དུ་འགྲོ་ཡི་ཡོད།
རང་རེ་བོད་ལ་མཚོན་ནའང་དཀའ་ངལ་དེ་འཕྲད་ཟིན་པ་དང༌། རྩ་ཆེའི་སྲོག་ཆགས་དུ་མ་ཞིག་སྟོང་བཞིན་ཡོད། ཉེ་ཆར་རྒྱ་ནག་གི་ཚན་རིག་པ་གཙོ་བོ་གྱུར་པའི་གནམ་གཤིས་རིག་པ་བ་དག་གིས་གནས་ཚུལ་གསར་པ་ཞིག་རྙེད་པ་ནི། བོད་ཀྱི་མཐོ་སྒང་འདྀ་ས་གཞིའི་ལྷོ་བྱང་གི་སྣེ་མོ་གཉིས་ཀྱི་མཚམས་སུ་འཁྱག་རོམ་མང་ཤོས་དང་གངས་མཐུག་ཤོས་ཡིན་པའི་རྒྱུ་མཚན་གྱིས་གོ་ལའི་“གླིང་སྣེ་གསུམ་པར་”ངོས་འཛིན་བྱས་ཡོད་མོད། ད་ལྟ་སྟབས་མ་ལེགས་པ་ཞིག་ལ་མཐོ་སྒང་དུ་ཆགས་པའི་གངས་རི་༤༦༠༠༠ ཙམ་རིམ་གྱིས་ཞུ་ནས་ཤར་ཨེ་ཤ་ཡའི་ནང་ཆུ་ལོག་དང༌། ཐན་པའི་དཀའ་ངལ་འཕྲད་རྒྱུ་ཡིན་པར་ངོས་འཛིན་བྱས་ཡོད་པས། དེས་དངོས་ཤུགས་བརྒྱུད་གསུམ་ནས་འཛམ་བུ་གླིང་སྤྱིའི་དཔལ་ཡོན་ཉམས་རྒུད་དུ་འགྱུར་ཉེན་ལ་གནོན་ཤུགས་ཡོད་པ་ཁ་གསལ་གཏིང་གསལ་རེད།
དེ་ལྟར་འཛམ་གླིང་གི་ནམ་ཟླ་ལ་འགྱུར་བ་ཆེན་པོ་ཞིག་གིས་གྲང་སའི་སེམས་ཅན་དང་རྩི་ཤིང་རིགས་རྩ་སྟོང་འགྲོ་ཉེན་དུ་གྱུར་པ་དང༌། སྐམ་ས་ཆུང་དུ་འགྲོ་བའི་ཞེད་སྣང་ཆེ་རུ་འགྲོ་ཡི་ཡོད་ཀྱང༌། མཉམ་འབྲེལ་རྒྱལ་ཚོགས་ཀྱི་རེ་བ་བཞིན་མཛམ་བུ་གླིང་གི་སྲིད་གཞུང་ཚོ་མཉམ་ལས་ཀྱིས། མི་འབོར་ཇེ་མང་དང་ཚ་བ་ཇེ་ཆེ་རུ་འགྲོ་བའི་དཀའ་ངལ་འདི་སེལ་ཐུབ་པའི་ཐབས་ཤེས་ཤིག་དང་ལངས་ཕྱོགས་གཅིག་ད་དུང་གཏན་འབེབས་ཀྱིས་མཉམ་སྐྱོད་བྱེད་ཐུབ་མེད་པ་རེད། ད་ལྟའི་གནམ་གཤིས་འཕོ་འགྱུར་གྱི་ཚད་གཞི་འདི་ལོ་རབས་གཅིག་ལ་མུ་འཐུད་ན། འཛམ་གླིང་ཆུས་ཁེངས་ཀྱང་འཐུང་ཆུ་མི་རག་པ་ཞེས་པའི་དཔེ་ལྟར་འཐུང་ཆུའི་དོན་དུ་དམག་ཆེན་ཡོང་བ་དང། ཕྱོགས་གཞན་ཞིག་ནས་སྐབས་དེར་སྲིན་འབུ་དག་ཧ་ཅང་འཕེལ་ནས་བཅོས་ཐབས་མི་ཤེས་པའི་ནད་རིགས་དུ་མ་འཕེལ་རྒྱུའི་ཉེན་ཁ་ཧ་ཅང་ཆེ།
མདོར་ན་ང་ཚོ་འགྲོ་བ་མིས་བཟོས་པའི་རང་བྱུང་ཁམས་ཀྱི་ས་རླུང་ཆུ་སོགས་རྒུད་པའི་ལམ་དུ་དྲངས་པའི་ནོར་འཁྲུལ་འདི། ངེས་པར་དུ་ཁ་གསབ་དང་སྔོན་འགོག་འཕྲལ་དུ་བྱེད་དགོས་པ་དང༌། དེ་ནི་ྋགོང་ས་མཆོག་གི་ཀུན་ཁྱབ་སེམས་འཁུར་ཞེས་པའི་དགོངས་གཞི་དེ་འགྲོ་བ་ཡོངས་ལ་ལམ་སྟོན་བླ་ན་མེད་པ་ཞིག་ཡིན་པར་ཤེས་དགོས་སྙམ།།