གཞིས་ཆགས་སྲ་བརྟན་དུ་ཇི་ལྟར་གཏོང་ཐུབ།

དོན་དངོས་ཐོག་མི་ལོ་ལྔ་བཅུ་ཙམ་གྱི་རིང་གནས་སྡོད་བྱས་པའི་བཙན་བྱོལ་བོད་མིའི་གཞིས་ཆགས་ཁག་ལ་མཚོན་ན་ད་བར་རྒྱ་གར་གཞུང་གི་བཀའ་དྲིན་དང། བཙན་བྱོལ་བོད་གཞུང་དང་གཞིས་ཆགས་ཁག་ཏུ་བཞུགས་པའི་མི་མང་གི་འབད་བརྩོན་ལ་བརྟེན་ནས་གང་ལ་གང་འཚམས་ཀྱིས་སྲ་བརྟན་དུ་གནས་ཐུབ་ཡོད་ཀྱང། དེང་སྐབས་ན་གཞོན་མང་པོ་ཞིག་གཞིས་ཆགས་སུ་སྡོད་མཁན་ཧ་ཅང་དཀོན་པོར་གྱུར་ཡོད་པས། རྒྱུན་རིང་མི་དགོས་པར་གཞིས་ཆགས་ཁག་སྲ་བརྟན་དུ་གནས་རྒྱུར་དཀའ་ངལ་འཕྲད་ངེས་པ་ལྟ་བུར་གྱུར་ཡོད། ཕྱོགས་གཅིག་ནས་རྒྱ་གར་གཞུང་གིས་༡༩༥༩ ལོར་༧གོང་ས་མཆོག་གིས་དབུས་བོད་མི་རྣམས་བཙན་བྱོལ་དུ་འབྱོར་བའི་སྐབས་བླ་ན་མེད་པའི་རོགས་རམ་གནང་ཡོད་ཀྱང། གཞིས་ཆགས་ཡུལ་གྱི་ས་ཆ་གནང་བའི་སྐབས་རྒྱ་གར་གྱི་ཤར་ལྷོ་ནུབ་བྱང་གི་ས་ཁུལ་མང་པོ་ཞིག་ཏུ་བགོས་འགྲེམས་གནང་ཡོད་པས། བཙན་བྱོལ་བོད་མིའི་གཞིས་ཆགས་ཁག་གི་བར་ཕན་ཚུན་ས་ཐག་རིང་བ་དང་མང་ཆེ་བ་ཁུག་ཀྱོག་ཏུ་ཆགས་ཡོད། ད་ལྟའི་ཆར་འཛམ་གླིང་སྤྱི་ཡོངས་ཁྲ་ཁྲ་ཟིང་ཟིང་གི་དུས་རབས་ཤིག་ཏུ་གྱུར་ཟིན་པས་ན་གཞོན་རྣམས་ཁ་ཁུ་སིམ་པའི་གཞིས་ཆགས་ཤིག་ཏུ་སྡོད་འདོད་ཡོད་མཁན་ཡང་ཉུང་ཉུང་ལས་མེད། དེར་བརྟེན་གཞིས་ཆགས་ཁག་གི་ཐོབ་ཐང་དང་མཐུན་རྐྱེན་དེ་དག་འཕྲོ་བརླག་ཏུ་མི་འགྲོ་བ་དང། བོད་པའི་རིག་གཞུང་དང་མི་རིགས་ཀྱི་ངོ་བོ་མ་བརླགས་པའི་ཐོག་ནས་དེང་དུས་དང་མཐུན་པའི་ཕྱོགས་སུ་བསྐྱོད་ཐུབ་ཐབས་སུ་གཞུང་སྒེར་གཉིས་ངོས་ནས་ལས་འཆར་སྒྲིག་མ་ཐུབ་ན་གཞིས་ཆགས་སྲ་བརྟན་གྱི་ལས་འཆར་དེ་དག་ལ་གྲུབ་འབྲས་ཡོང་རྒྱུ་ཧ་ཅང་དཀའ་ངལ་གྱི་རང་བཞིན་དུ་གྱུར་ཡོད། དགོན་སྡེ་ཆེ་ཁག་ཡོད་སའི་གཞིས་ཆགས་རྣམས་ལ་མཚོན་ན་དུས་ཚོད་ཐུང་ཐུང་གི་ནང་དུ་དཀའ་ངལ་མི་འཕྲད་ཀྱང། གཞིས་ཆགས་ཆུང་ཁག་གང་མང་ཞིག་གི་གནས་སྟངས་བློ་འཚབ་ཀྱི་རང་བཞིན་གྱུར་ཉེན་ཡོད། བོད་གཞུང་གི་ངོས་ནས་གཞིས་ཆགས་སྲ་བརྟན་གྱི་ཆེད་དུ་ལས་འཆར་སྒྲིག་པའི་སྐབས་དེང་སྐབས་དྷ་ས་དང་ལྡི་ལི་སོགས་སུ་གནས་སྡོད་བྱེད་མཁན་གྱི་གསར་འབྱོར་ལས་མེད་མང་པོ་ཡོད་པ་དེ་དག་ལ་གཞིས་ཆགས་སུ་འགྲོ་འདོད་ཡོད་མེད་ཀྱི་བསམ་ཚུལ་བསྡུ་ལེན་ཞིག་ངེས་པར་དུ་གནང་དགོས་པ་དང། ད་ལྟའི་ཆར་གཞིས་ཆགས་ཁག་ཅིག་ཏུ་སྡོད་མཁན་མེད་པའི་དཀའ་ངལ་འཕྲད་བཞིན་ཡོད་ཀྱང། གསར་འབྱོར་མང་པོ་ཞིག་ལ་སྡོད་ས་མེད་པའི་དཀའ་ངལ་འཕྲད་བཞིན་ཡོད་པས་དཀའ་ངལ་འདི་གཉིས་གཞི་གཅིག་ཏུ་བསྡོམས་ནས་དབྱེ་ཞིབ་དང་ལས་འཆར་ཞིག་སྒྲིག་ཐུབ་ན་གཞིས་ཆགས་སྲ་བརྟན་དུ་འགྲོ་བར་ཅུང་ཙམ་ཕན་ཐོགས་ཡོད་པ་ལྟ་བུར་མངོན་ཡོད།།