བཅུ་གསུམ་པ་ཆེན་པོ་དང་བོད་རང་བཙན།

བཙན་བྱོལ་བོད་གཞུང་གི་ངོས་ནས་༧གོང་ས་སྐུ་ཕྲེང་བཅུ་གསུམ་པ་ཆེན་པོ་མཆོག་རྒྱ་གར་ལ་བཙན་བྱོལ་དུ་ཕེབས་ནས་ལོ་༡༠༠ འཁོར་བའི་དུས་དྲན་སྲུང་རྩི་ཞུས་པ་དེ་ལ་བཀའ་དྲིན་རྗེས་དྲན་ཁོ་ན་ཙམ་མ་ཡིན་པར། ཆབ་སྲིད་ཀྱི་ཐོག་ནས་ཀྱང་རླབས་ཆེན་གྱི་དོན་སྙིང་ལྡན་ཡོད་པ་སྨོས་མ་དགོས་པ་རེད། བོད་དང་རྒྱ་ནག་དབར་གྱི་འབྲེལ་བ་དེ་ད་ལྟའི་ཆར་ཧ་ཅང་ཛ་དྲག་གི་གནས་སྟངས་ཤིག་ཏུ་གྱུར་ཡོད་པ་དང། གཞིས་བྱེས་རྒྱ་ཆེའི་མི་མང་གི་ཚབ་མཚོན་རང་བཞིན་༢༠༠༨ ལོའི་དམིགས་བསལ་ཚོགས་ཆེན་གྱི་རྒྱབ་གཉེར་སྙན་ཐོའི་ནང་“སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ནས་ཡེ་ཤེས་དབྱིངས་དཔྱད་ཀྱིས་དུས་ནས་དུས་སུ་སྲིད་བྱུས་ལམ་སྟོན་ཅི་བསྩལ་ལ་ཤར་བསྐྱོད་བྱ་རྒྱུར་སྤྱི་མོས་དང། མུ་མཐུད་དབུ་མའི་ལམ་དུ་བསྐྱོད་རྒྱུར་མང་མོས། ལྷག་པར་འདས་པའི་རྒྱ་གཞུང་གི་བྱེད་བབ་ལ་གཞིགས་ཏེ་ད་ཡོད་འབྲེལ་མོལ་སྐུ་ཚབ་གཏོང་རྒྱུ་མཚམས་འཇོག་བྱ་རྒྱུ་དང།  དུས་ཐུང་ནང་གྲུབ་འབྲས་མ་སོན་ཚེ་རང་བཙན་དང་རང་ཐག་རང་གཅོད་རྩོད་ལེན་གྱི་སྲིད་བྱུས་འཛིན་དགོས་པའི་བསམ་འཆར་ཡང་ཤུགས་ཆེ་བྱུང།”ཞེས་འཁོད་པ་ལྟར་རྒྱ་གཞུང་གི་བྱེད་བབ་ལ་གཞིགས་ནས་དོན་འབྲས་མེད་པའི་འབྲེལ་མོལ་མཚམས་འཇོག་གནང་འོས་པ་དང། དུས་ཐུང་ཞེས་པ་ལས་དུས་ཡུན་ལ་རྒྱས་བཅད་གང་ཡང་མེད་ཀྱང་ལོ་གཉིས་ཙམ་གྱི་དུས་ཡུན་འགོར་ལ་ཉེ་བས་དམིགས་བསལ་ཚོགས་ཆེན་སྐབས་ཀྱི་ཐག་གཅོད་ལག་བསྟར་གནང་རྒྱུའི་དུས་ལ་བབ་པར་ངོས་འཛིན་བྱེད་འོས་པ་ཞིག་ཏུ་གྱུར་ཡོད།

སྤྱིར་བོད་ཀྱི་ལོ་རྒྱུས་ལ་བལྟས་ན་བོད་རང་བཙན་བསྙོན་མེད་དུ་གནས་ཡོད་ཀྱང། བར་ལམ་ནས་ཕྱི་ཕྱོགས་ལ་འབྲེལ་ལམ་དང་དོ་སྣང་བྱེད་མ་ཐུབ་པ་དང། ནང་ཁུལ་སྲིད་དབང་གི་གོ་ས་ལ་མགོ་འཁོར་ནས་བོད་ཀྱི་གནས་སྟངས་དེ་གསལ་ཁ་མེད་པར་རབ་རིབ་ལྟ་བུར་གྱུར་པའི་སྐབས། ༧གོང་ས་སྐུ་ཕྲེང་བཅུ་གསུམ་པ་ཆེན་པོ་མཆོག་གིས་བོད་རང་བཙན་གྱི་ཆེད་དུ་སྐུ་ལས་ཚད་མེད་བསྐྱོན་ནས་བོད་རང་བཙན་གྱི་གནས་བབས་བསྐྱར་བསྒྲགས་གནང་བ་སོགས་ཕྱི་ཡོངས་ཀྱི་ཆ་ནས་༧གོང་ས་སྐུ་ཕྲེང་བཅུ་གསུམ་པ་ཐུབ་བསྟན་རྒྱ་མཚོ་མཆོག་ནི་སྐུ་ཕྲེང་ན་རིམ་གྱི་ནང་ནས་དམིགས་བསལ་གྱིས་རྗེས་དྲན་ཞུ་དགོས་པ་ཞིག་ཏུ་གྱུར་ཡོད། བོད་གཞུང་གི་ངོས་ནས་དུས་དྲན་སྲུང་རྩི་ཞུས་པ་འདི་ཡང་བོད་མི་མང་གི་བསམ་ཚུལ་དང་གོང་གསལ་རྒྱུ་མཚན་དང་འབྲེལ་བའི་ཐོག་ནས་ཞུས་པ་ནི་སྨྲོས་མ་དགོས་པ་ལྟ་བུར་གྱུར་འདུག ཕྱི་ལོ་༢༠༡༢ ལོའི་ནང་༧གོང་ས་སྐུ་ཕྲེང་བཅུ་གསུམ་པ་ཆེན་པོ་མཆོག་གིས་བོད་རང་བཙན་གསལ་བསྒྲགས་གནང་ནས་ལོ་༡༠༠ འཁོར་བའི་དུན་དྲན་ཡང་བཙན་བྱོལ་བོད་གཞུང་གི་གཞུང་འབྲེལ་གྱི་ཐོག་ནས་སྲུང་རྩི་ཞུ་འོས་པ་ཞིག་ཏུ་གྱུར་ཡོད། ད་ལྟ་བོད་གཞུང་གི་འཛིན་པའི་སྲིད་བྱུས་ལ་འགྱུར་བ་གཏན་ནས་མི་འགྲོ་བའི་དབང་དུ་བཏང་ཡང་འདས་པའི་བྱུང་རབས་ནང་གི་གལ་ཆེ་བའི་ལེའུ་དེ་དག་ནག་བསུབ་གཏོང་ཐབས་གཏན་ནས་མེད་པ་མ་ཟད། གལ་ཆེའི་དོན་སྙིང་ལྡན་པའི་མཛད་རྗེས་དེ་དག་ཕྱིར་དྲན་ཞུ་དགོས་པ་ནི་སྐབས་སུ་བབས་པའི་བོད་གཞུང་གི་འགན་ཁུར་ཉག་གཅིག་ཏུ་གྱུར་ཡོད།།