ཆུ་དཀྲོགས་ནས་མར་ཐོན་སྲིད་དམ།

། བཀའ་ཤག་གི་དབུ་མའི་ལམ་ཞེས་ལོག་འགྲེལ་རྒྱག་མཁན་སྤྱི་འཐུས་ཁ་ཤས་ཀྱིས་གྲོས་ཚོགས་ནང་དུ་ལན་མང་བཤད་ཡོད་པ་དང། སྤྱི་ཚོགས་ནང་དུའང་དེ་ལྟར་བཤད་མཁན་རེ་ཟུང་ཡོད་པ་རེད། དེ་བཞིན་ཉེ་ཆར་བཀའ་ཟུར་ཞིག་གིས་སྐུ་ཚབ་རྣམ་གཉིས་ཀྱིས་རྒྱ་ནག་གཞུང་ལ་སྤྲད་པ་མི་རིགས་ས་གནས་རང་སྐྱོང་ཡོང་ཐབས་སྐོར་གྱི་བསམ་འཆར་དེ་གྲོས་ཚོགས་ལ་མ་བསྟན་པའི་ཡིག་ཆ་ཡིན་ཚུལ་བཤད་པ་གསར་འགྱུར་གྱི་བརྒྱུད་ལམ་དུ་ཐོན་པ་ཙམ་ལ་བརྟེན་ནས་༧གོང་ས་མཆོག་གིས་གྲོས་ཚོགས་སུ་གསུང་འཕྲིན་དེ་བསྩལ་བ་རེད་དམ། ཞེས་སོགས་དྲི་བ་ཧ་ཅང་མང་པོ་ཞིག་གིས་འཚང་ཁ་བརྒྱབ་ནས་སླེབས་ཡོང་གི་འདུག དངོས་ཡོད་གནས་ཚུལ་ཐོག་བཀའ་ཟུར་ཞིག་གིས་དེ་ལྟར་བཤད་པ་དེ་ཡང་དོན་ལ་མི་གནས་པ་ཞིག་གང་ཡང་མིན་པ་དང། བཀའ་བློན་ཁྲི་པ་མཆོག་གིས་ཡིག་ཆ་དེ་གྲོས་ཚོགས་ལ་མ་བསྟན་པ་དངོས་ཡོད་གནས་ཚུལ་རེད། མ་བསྟན་པ་དེ་འགྲིག་པ་ཞིག་རེད་དམ་མི་འགྲིག་པ་ཞིག་རེད། དེ་གྲོས་ཚོགས་ནས་ཐག་གཅོད་གནང་དགོས་པ་ཞིག་རེད་ཅེས་སོགས་གསུངས་ཡོད་པ་རེད།
དངོས་ཡོད་གནས་ཚུལ་གཞི་ལ་བཞག་ནས་བཤད་ན་བོད་རྒྱ་ཞི་མོལ་གྱི་གནད་དོན་ཐོག་བོད་ཕྱི་ནང་གཉིས་སུ་ཁ་གཏོང་མཁན་མང་པོ་བྱུང་ཡོད་ཀྱང་ད་ལྟའི་བར་འདི་ལྟ་བུའི་ཛ་དྲག་གི་ངོ་བོར་བརྩི་མྱོང་མེད་ལ། དོན་དངོས་ཀྱི་ཐོག་ནས་བརྩི་དགོས་པ་ཞིག་ཀྱང་མ་རེད། མང་གཙོའི་སྤྱི་ཚོགས་ནང་བསམ་ཚུལ་འདྲ་མིན་ཡོང་སྲིད་པ་ལྟར་བཙན་བྱོལ་བོད་མིའི་སྤྱི་ཚོགས་སུའང་དེ་ལྟ་བུའི་བསམ་ཚུལ་ཤོད་མཁན་གང་མང་བྱུང་ཡང། འདི་ལྟ་བུའི་དོན་དག་གལ་ཆེན་དུ་བཟུང་ནས་སྤྱི་འཐུས་དང་བཀའ་ཟུར་རྣམས་མཉམ་དུ་བསྐོངས་ནས་ཉན་ཞིབ་གནང་བ་ལྟ་བུ་བྱུང་མ་མྱོང་བ་རེད། བཀའ་ཟུར་རྣམ་པའི་ཚོགས་འདུའི་ནང་༧གོང་ས་མཆོག་དང་བཀའ་ཤག་གི་དགོངས་གཞི་མི་མཐུན་པ་ཡིན་པའི་བསམ་ཚུལ་འཁོད་པའི་གྲོས་ཆོད་ཡིག་ཆ་ལོ་གཉིས་མ་ཟིན་ཙམ་ནས་ཡོངས་གྲགས་ཆགས་ཟིན་ཀྱང། རྩད་གཅོད་བརྡ་འདེད་ད་ལྟའི་བར་མི་གནང་བའི་རྒྱུ་མཚན་འདི་གང་ལ་ཐུག་པ་རེད། གནད་དོན་འདི་ལ་ཕྱི་ནང་གི་གནས་སྟངས་གང་ཐད་ནས་བལྟས་ཀྱང་ཡང་ན་དབང་ཆ་འཐབ་རྩོད་ལྟ་བུའི་གནད་དོན་ཞིག་ལྷགས་པའམ། ཡང་ན་ལས་དོན་མ་འགྲུབ་པར་བརྟེན་ཁག་འཇོག་སའམ་ལག་པ་འཕྱི་ས་གཞན་ཞིག་འཚོལ་བ་མིན་ནམ་བསམ་པ་ལྟ་བུའི་བསམ་ཚུལ་ཞིག་རང་བཞིན་གྱིས་ཡོང་གི་འདུག གཞན་མང་གཙོའི་སྤྱི་ཚོགས་ནང་མི་ཚང་མའི་བསམ་ཚུལ་གཅིག་མཚུངས་ཡོང་མི་སྲིད་པ་དངོས་ཡོད་གནས་ཚུལ་ཡིན་པས། མང་ཕྱོགས་ཀྱི་འདོད་པ་གང་ཡོད་པ་དེའི་ཐོག་ལ་གོམ་པ་སྤོ་དགོས་པ་བཤད་མི་དགོས་པ་ལྟ་བུར་གྱུར་ཡོད། བོད་རྒྱའི་འབྲེལ་མོལ་ཐད་ནས་ཀྱང་གནས་ཚུལ་མང་པོ་ཞིག་བོད་གཞུང་གིས་མ་གསུངས་གོང་ནས་རྒྱ་དམར་གཞུང་གིས་ཁྱབ་བསྒྲགས་བྱས་སོང་བས་ཆུ་དཀྲོགས་ནས་མར་མི་ཐོན་བཞིན་ཉན་ཞིབ་བྱས་ནས་གནས་ཚུལ་གསར་པ་གང་ཡང་ཐོན་མི་སྲིད་པས། དེ་བས་བཀའ་ཤག་གིས་སྐབས་རེ་གྲོས་ཆོད་གང་ཡིན་ཡང་ཁྲིམས་ཡིག་མ་ཡིན་པས་འཛིན་སྐྱོང་གིས་ལག་ལེན་བསྟར་དགོས་པའི་ངེས་པ་མེད་ཚུལ་དང། སྐབས་རེ་ལམ་དབུ་མ་གྲོས་ཆོད་ཀྱི་དགོངས་དོན་ཡིན་ཚུལ་ལྟ་བུ་འཆར་ཅན་གྱི་བརྗོད་ཚིག་ཁག་བསྐྱར་ཟློས་དང། གྲོས་ཚོགས་ཀྱི་ངོས་ནས་ཀྱང་འགན་ཁུར་ཡོངས་རྫོགས་༧གོང་ས་མཆོག་སྐུ་རྐྱང་གིས་བཞེས་རོགས་ཞེས་འཆར་ཅན་འགན་གཡོལ་ཐབས་ཀྱི་གྲོས་ཆོད་དེ་སླར་ཡང་ཆོ་ག་ཕྱག་ལེན་ལྟ་བུའི་ངོ་བོར་བསྐྱར་ཟློས་ཤིག་མི་བྱེད་པར་ད་ལྟ་དམིགས་བསལ་རྔ་རྡུང་དར་འཕྱར་བྱེད་དགོས་པའི་རྒྱུ་མཚན་འདི་གང་ལ་ཐུག་པ་རེད་དམ།།