དུས་ཚེས་ནོར་མི་རུང་བའི་འོས་བསྡུ་ཆེན་མོ།

ས་གནས་འོས་བསྡུའི་འགན་འཛིན་རྣམས་ལ་ཟབ་སྦྱོང་སྤྲོད་དགོས་པ་ཧ་ཅང་གལ་ཆེ་བ་བཞིན། དེ་བས་ཀྱང་གལ་ཆེ་བ་ནི་དབུས་འོས་བསྡུ་ལས་ཁང་ནས་སྔོན་འགྲོ་དང་དངོས་གཞིའི་འོས་བསྡུའི་དུས་ཚེས་གཏན་འབེབས་གནང་ཕྱོགས་ནོར་མི་རུང་བ་དེ་རེད། སྐབས་བཅུ་བཞི་པའི་སྤྱི་འཐུས་ཀྱི་སྔོན་འགྲོའི་འོས་བསྡུ་འགོ་འཛུགས་དེ་ཕྱི་ཟླ་དགུ་པའི་ཟླ་མཇུག་ཏུ་འཁེལ་ཡོད་པས། བལ་གོས་ཚོང་པ་རྣམས་ཀྱིས་ཚོང་ལེན་པ་སོགས་དགུན་ཚོང་གི་སྟ་གོན་ལ་བྲེལ་བཞིན་པའི་སྐབས་ཡིན་པ་དང། ཕྱི་འཐུས་ཀྱི་དངོས་གཞི་དང་བཀའ་ཁྲིའི་སྔོན་འགྲོའི་འོས་བསྡུ་དེ་ཕྱི་ཟླ་གསུམ་པའི་ནང་བཞུགས་སྒར་གྱི་དཔྱིད་ཆོས་ཆེན་མོ་དང་བསྟུན་ཡོད་པས། གསུང་ཆོས་ཞུ་མཁན་རྣམས་ཀྱིས་དང་བླངས་དཔྱ་ཁྲལ་ལག་དེབ་མཉམ་འཁྱེར་བྱེད་དགོས་པའི་དྲིལ་བསྒྲགས་དང། མི་མང་གི་དོ་སྣང་གིས་མ་འདེང་བ་སོགས་ཀྱིས་ཕྱོགས་ཡོངས་ནས་འོས་བསྡུའི་ནང་མཉམ་ཞུགས་བྱེད་མཁན་ཉུང་དུ་སོང་ཡོད། དེར་བརྟེན་སྐབས་འདིར་དབུས་འོས་བསྡུ་ལས་ཁང་ནས་སྔོན་འགྲོ་དང་དངོས་གཞིའི་འོས་བསྡུའི་དུས་ཚེས་མི་མང་འཛོམས་ཆེ་བའི་དུས་སྐབས་དང། མང་ཆེ་བ་འགྲིམ་འགྲུལ་བྱེད་བཞིན་པའི་དུས་སྐབས་ལྟ་བུར་མི་འཁེལ་བར་བརྟག་དཔྱད་ཞིབ་འཇུག་གཏིང་ཟབ་གནང་དགོས་པ་ནི། ཟབ་སྦྱོང་སྤྲད་པ་ལས་ཀྱང་དོན་དངོས་ལག་ལེན་ཐོག་ཧ་ཅང་གལ་ཆེ་བར་གྱུར་ཡོད།
བཀའ་ཁྲིའི་འོས་བསྡུའི་སྐོར་གླེང་མཁན་རྣམས་ཀྱིས་འོས་བསྡུ་སྐབས་དང་པོ་ལས་གཉིས་པར་འོས་འཕེན་པ་ཉུང་དུ་སོང་ཡོད་པ་དང། སྔོན་འགྲོ་ལས་དངོས་གཞི་ཉུང་དུ་སོང་བ་སོགས་མི་མང་གིས་ཐུགས་སྣང་མ་གནང་བའམ། མང་གཙོའི་གོ་རྟོགས་ཀྱིས་མ་འདེང་བའི་སྐྱོན་དུ་ངོས་འཛིན་བྱེད་མཁན་ཡོད་ཀྱང། དོན་དངོས་དེ་ལྟར་མ་ཡིན་པར་བཀའ་ཁྲི་མི་མང་གིས་ཐད་ཀར་འོས་འདེམས་ཐེངས་གཉིས་བྱས་པའི་བརྒྱུད་རིམ་ནང། མཁས་དབང་སློབ་དཔོན་ཟམ་གདོང་རིན་པོ་ཆེ་མཆོག་ལ་འགྲན་སྡུར་བྱས་ནས་འོས་ཐོབ་པའི་རེ་བའམ་སྤོབས་པ་ཡོད་མཁན་བཙན་བྱོལ་བོད་མི་སུ་གཅིག་མེད་པ་དང་། ཐེངས་གཉིས་འོས་གཞིའི་ཁྲོད་ཞུགས་མཁན་གཞན་གྱིས་ཀྱང་འོས་བསྡུའི་ལས་རིམ་མི་འཁྲུག་པ་དང། བོད་གཞུང་གི་དཔལ་འབྱོར་བསྲི་ཚགས་ཀྱི་ཆེད་དུ་དངོས་གཞིའི་འོས་ཁོངས་སུ་ཞུགས་པ་ཡིན་པའི་ཁྱབ་བསྒྲགས་གནང་བ་མ་ཟད། ཉེ་ཆར་གྲོས་ཚོགས་ནང་གི་གླེང་ཕྱོགས་ལ་བལྟས་ན་སྐབས་གཉིས་ཀར་བཀའ་བློན་ཁྲི་ཟུར་འཇུ་ཆེན་ཐུབ་བསྟན་རྣམ་རྒྱལ་ལ་འོས་བསྡུ་ལས་ཁང་ནས་ལས་རིམ་མི་འཁྲུག་པའི་ཆེད་དུ་བཞུགས་རོགས་ཞེས་ཞུ་བ་འཐེན་པའི་གནས་ཚུལ་ཡང་ཐོས་རྒྱུ་ཡོད་པ་རེད། གང་ལྟར་མི་མང་གི་ངོས་ནས་ཀྱང་སྐབས་དང་པོའི་སྔོན་འགྲོའི་སྐབས་ཅུང་ཙམ་ཤུགས་བརྒྱབ་ཀྱང། དངོས་གཞིའི་སྐབས་འགྲན་སྡུར་གྱིས་འོས་བླུག་མི་དགོས་པར་ཟམ་གདོང་རིན་པོ་ཆེ་བཀའ་ཁྲིར་གཏན་འཁེལ་ཟིན་པ་ཀུན་གསལ་ཡོངས་གྲགས་སུ་གྱུར་ཟིན་པ་རེད། སྐབས་གཉིས་པའི་སྐབས་དེ་བས་ཀྱང་སྨྲོས་མ་དགོས་པས་མི་མང་གིས་གནས་ལུགས་དང་རྒྱུ་མཚན་ཤེས་ནས་འོས་འཕེན་ནང་མཉམ་ཞུགས་བྱེད་མཁན་ཉུང་ཙམ་ཆགས་པ་ཞིག་ཡིན་མོད། ཐེངས་འདིའི་བཀའ་ཁྲིའི་འོས་བསྡུ་ནི་འགྲན་སྡུར་ཆེན་པོ་ཞིག་གི་ཐོག་ནས་འགྲོ་དགོས་པས་མི་མང་གི་ངོས་ནས་རང་ཉིད་ཀྱི་ཐོབ་ཐང་དེ་ཆུད་ཟོས་སུ་མ་སོང་བར་ལོངས་སྤྱོད་བྱེད་དགོས་པ་ད་ལྟ་ནས་གྲ་སྒྲིག་བྱེད་བཞིན་ཡོད་ཚོད་རེད། དེ་ཙམ་དུ་མ་ཟད་མི་མང་གི་ནང་དུ་སྤྱི་འཐུས་དང་བཀའ་ཤག་གིས་མ་འགྲིག་པའི་སྐྱོན་བརྗོད་བྱེད་མཁན་ཡོད་བཞིན་པ་ལྟར། འོས་བསྡུ་ཆེན་མོའི་སྐབས་སུ་མི་སུ་ལ་རྒྱབ་སྐྱོར་བྱེད་དགོས་པ་དང་སུ་ལ་རྒྱབ་སྐྱོར་བྱེད་མི་འོས་པའི་ཐོག་བསམ་ཞིབ་ནན་པོ་བྱས་ནས་འོས་བསྡུའི་གོ་སྐབས་ལེན་དགོས་པ་ལས། འོས་འཕེན་སྐབས་དོ་སྣང་མ་བྱས་པར་འོས་ཐོབ་ཟིན་པའི་རྗེས་སུ་ལོ་ལྔ་ལ་འགྱུར་བ་གཏོང་རྒྱུ་ཁྲིམས་སྒྲིག་གི་ལམ་དུ་གསལ་མེད་པ་མིན་ཡང། ལག་བསྟར་ཡོང་རྒྱུ་ནི་ཧ་ཅང་དཀའ་ངལ་གྱི་རང་བཞིན་དུ་གྱུར་ཡོད་སྟབས། འོས་འཕེན་སྐབས་ཡར་གཏོང་མར་འཇོག་གང་བྱེད་མི་མང་གི་ལག་ཏུ་ཡོད་པས་གལ་ཆེ་བའི་གོ་སྐབས་སམ། ཐོབ་ཐང་དེ་ཆུད་ཟོས་སུ་མ་སོང་བ་ཞིག་བྱེད་དགོས་པ་ནི་མང་གཙོའི་སྤྱི་ཚོགས་ཀྱི་གལ་འགངས་ཆེས་ཆེ་བའི་དོན་གནད་ཅིག་ཏུ་གྱུར་ཡོད།།