མི་ཉག་ནགས་ཕྲན་སྡེ་བར་གྲོང་སྡེ་གསར་འཛུགས།

ཐོག་མར་འཆར་གཞི་འདི་བཞག་པ་ནས་བཟུང་ནགས་ཕྲན་སྡེ་བའི་མང་ཚོགས་རྣམས་ཀྱི་མཐའ་གཅིག་དུ་ངོ་རྒོལ་བྱས་ཏེ། ས་གནས་སྲིད་གཞུང་གི་དཔོན་པོ་རྣམས་ལ་ཞུ་གཏུགས་ཐེངས་མང་བྱས་ཀྱང་གྲུབ་འབྲས་གང་ཡང་ཐོན་མེད། དེ་ནས་ནགས་ཕྲན་སྡེ་བའི་མི་རྒན་ཁ་ཤས་རྟའུ་རྫོང་དུ་སོང་ནས་རྫོང་དཔོན་ལ་དཀའ་ངལ་དང་གནས་ཚུལ་རྣམས་ཞུས་ཚེ་རྫོང་དཔོན་གྱིས་“ཁྱོད་ཚོས་ཕག་གིས་སྐྱག་པ་ཟོས་ན་རང་དོན་ཡིན་པ་ཤེས་ཀྱི་ཨེ་འདུག་གམ་”ཞེས་སྡིགས་མོ་བྱེད་པ་ཙམ་ལས་མང་ཚོགས་ཀྱི་རེ་འདོད་ཁེངས་བའི་ལན་གང་ཡང་གནང་མིི་འདུག  དེ་ནས་རྫོང་དཔོན་གྱི་ཁོ་རང་གི་ལག་གཡོག་ཞིག་ལ་ཁོ་ཚོར་སྣེ་ལེན་ཡག་པོ་བྱོས། ང་ལ་དུས་ཚོད་མེད་ཟེར་ནས་ཕྱིན་འདུག

དེའི་རྗེས་ཡུལ་མི་རྣམས་ཀྱི་རེ་བ་སྟོང་ཟད་དུ་གྱུར་ནས་ཕྱིར་མི་ལོག་ཐབས་མེད་དུ་གྱུར་འདུག ད་ལོར་གྲོང་ཁང་ཉི་ཤུ་ལྷག་ཙམ་གྲུབ་ཟིན་ཡོད་མོད། ད་སྐབས་ནང་དུ་སྡོད་མི་མེད་པའི་དཀའ་ངལ་འཕྲད་བཞིན་ཡོད་པ་དང། ཁ་སང་དམར་དམག་རླངས་འཁོར་གསུམ་ཡོང་ནས་ཁོར་ཡུག་ལ་གཙང་སྦྲ་བྱེད་ཁུལ་བྱེད་པ་དང་མང་ཚོགས་ལ་ཁང་པའི་ནང་དུ་སྤོ་དགོས་པའི་བཙན་བཀའ་བཏང་བ་དང་། གལ་ཏེ་ཁྱིམ་ཚང་སུ་ལ་དགེ་འདུན་པའི་རིགས་ཡོད་ཚེ་ངེས་པར་དུ་ཁ་པར་ཨང་གྲངས་སོགས་ཐོ་འགོད་བྱེད་དགོས། ཁང་པའི་སྟེང་དུ་རྒྱ་ནག་གི་དར་དམར་བསྒྲེངས་དགོས་ཞེས་བཙན་བཀའ་བཏང་བ་དང་།  གལ་ཏེ་ཁང་པའི་ནང་དུ་སྤོས་ན་ཁྱིམ་ཚང་རེ་ལ་རྒྱ་སྒོར་ཁྲི་གཉིས་རེའི་དངུལ་སྐྱེད་གཏོང་རྒྱུ་ཡིན་ཞེས་བཤད་སོང། ཕྱིར་ཁང་པའི་ནང་གི་གློག་གི་ཡོ་བྱད་དང་གོ་སྒྲིག་སོགས་འབྲོག་པའི་ཁྱིམ་ཚང་ཞིག་ལ་མཚོན་ན་མི་ཆོག་པ་ཆེར་མི་འདུག་མོད། འོན་ཀྱང་ཁང་པའི་རྒྱུ་ཆ་དང་བཟོ་འགོད་སོགས་ཤིན་དུ་སྐྱོ་བས་ས་འགུལ་སོགས་རང་བྱུང་གི་འཇིགས་པ་ཅུང་ཙམ་བྱུང་ཡང་འགྱེལ་འགྲོ་བ་ནི་སྨྲོས་མ་དགོས།

ལྷག་པར་དུ་འབྲོག་པའི་ཁྱིམ་ཚང་ཉི་ཤུ་ཙམ་ཞིག་ས་ཁྱོན་རྒྱང་གྲགས་གཅིག་ལྷག་ཙམ་གྱི་ཐོག་ནོར་ལུག་རྣམས་འཚོ་སྐྱོང་བྱས་ནས་མཉམ་དུ་འཚོ་བ་སྐྱེལ་དགོས་ན་གཏན་ནས་ཡོང་ཐབས་མེད་པ་ཞིག་དང། གལ་ཏེ་ནོར་ལུག་རྣམས་བཙོང་ནས་གྲོང་སྡེ་གསར་པ་དེར་གནས་སྤོ་བྱེད་རྒྱུའི་དབང་དུ་བྱས་ཀྱང་། དེང་དུས་ཤེས་ཡོན་གྱི་དབུལ་ཞིང་སྤྱི་ཚོགས་ཁྲོད་གྱི་འཚོ་བ་ལ་ཉམས་མྱོང་གི་ཆ་སྐྱེན་མི་ཚང་བའི་འབྲོག་པ་དེ་དག་ཅི་ལྟར་འཚོ། གལ་དེ་ཆ་རྐྱེན་དེ་ཚང་བའི་དབང་དུ་བཏང་ན་ཡང་ཉེ་འཁོར་ན་གྲོང་ཁྱེར་སོགས་དཔལ་འབྱོར་གྱི་ཐོན་ཁུངས་གང་ཡང་མེད་པའི་ལུང་སྟོང་ནང་གི་གྲོང་གསར་ཞིག་གིས་འཚོ་བ་ཅི་ལྟར་སྐྱེལ།  མ་ཟད་གནད་དོན་འདིའི་རྐྱེན་གྱིས་ནགས་ཕྲན་སྡེ་བའི་མི་མང་ནང་ཁུལ་ཡང་མི་མཐུན་པའི་དཀྲུག་གཞི་མང་པོ་ཞིག་བྱུང་སོང་།  རྒྱ་ནག་གཞུང་ནས་དེ་ལྟར་བྱེད་པའི་དམིགས་ཡུལ་ནི། གནད་དོན་རྣམ་པ་གསུམ་གྱི་ཁོངས་སུ་ཕལ་ཆེར་འདུས་ཡོད། འབྲོག་མི་རྣམས་ནི་དད་སེམས་དང་ཤ་ཞེན་གྱི་ལྟ་བ་ཤིན་ཏུ་མཁྲེགས་པའི་གདོང་དམར་བའི་ཚོགས་པ་ཞིག་ཡིན་ཕྱིར་དེ་རྩ་མེད་དུ་གཏོང་རྒྱུའི་དམིགས་ཡུལ་དང་གཅིག  སྒེར་གཅོད་དབང་འཛིན་གཞུང་ལ་ངོ་རྒོལ་བྱེད་མཁན་རྣམས་དྲག་གནོད་བྱེད་སླ་བ་དང་དམར་པོའི་གཞུང་གི་ལྟ་བ་སོགས་སློབ་གསོ་གཏོང་སླ་བའི་ཐབས་ཤེས་དང་གཉིས། ཕྱིའི་རྒྱལ་ཁབ་ཁག་གི་མིག་སྔར་བོད་ལ་ཡར་རྒྱས་གཏོང་གི་ཡོད་པའི་རྣམ་པ་སྟོན་བྱེད་བཅས་ཡིན་པ་རེད།

ལྷ་རི་ལུང་གི་ལུང་མདོ་ན་ཁྲོན་བོད་གཞུང་ལམ་ཆེན་མོ་བསྐྲུནཡོད་ལ། ལམ་འགྲོ་བ་དག་གིས་ཡར་བལྟས་ན་འདྲ་ཆགས་མདོག་ཁ་པོ་ཞིག་མཐོང་གི་ཡོད་ཀྱང་དོན་ལ་སྒེར་གཅོད་དབང་འཛིན་གཞུང་ནས་བཙན་དབང་གིས་བཙུགས་པའི་གྲོང་སྡེ་ཆུང་ཆུང་ཞིག་དང་། ནགས་ཕྲན་སྡེ་བའི་འབྲོག་ཁྱིམ་འགའི་གཉའ་བར་དབང་མེད་དུ་བཞག་པའི་སེམས་སྡུག་དང་རེ་དོགས་ཀྱི་ཁུར་པོ་ཆེན་པོ་ཞིག་ཏུ་གྱུར་ཡོད། འདི་ནི་བོད་མདོ་དབུས་ཁམས་གསུམ་གྱི་བོད་རིགས་རྣམས་ལ་རྒྱ་གཞུང་གིས་རོགས་སྐྱོར་བྱེད་མདོག་བྱེད་བཞིན་ཡོད་པ་དོན་དངོས་ཐོག་ནས་མང་ཚོགས་ལ་ཕན་ཐོགས་མེད་པའི་གནོད་པར་འགྱུར་བཞིན་ཡོད་པ་དག་གི་མཚན་གཞི་ཙམ་ཞིག་ཡིན།  །