དགག་སྒྲུབ་རྩོམ་རིག་དང་མཐུན་སྒྲིལ་གཏོར་བཤིག

བསམ་བློའི་རྒྱབ་ལྗོངས་འདི་ལྟར་བཟུང་ནས་དཔྱད་ཞིབ་ཀྱི་ལས་ལ་ཞུགས་སྐབས་ང་ཚོར་ཚོར་སྣང་སྐྱུར་མོ་ཞིག་དབང་མེད་དུ་སྐྱེ་འོང། དེ་ནི་མཐུན་སྒྲིལ་གྱི་སྟོབས་ཤུགས་ཉམས་པས་ང་ཚོ་རྒུད་པའི་གནས་སུ་ཡང་དང་བསྐྱར་དུ་ལྷུང་བའི་གནས་སྟངས་ཡིད་མི་སྤྲོ་བ་དག་རེད། ཉག་ཕྲ་བའི་སྐབས་འདིར་ང་ཚོས་ཡང་བསྐྱར་བསམ་གཞིག་བྱེད་དགོས་པ་ནི་སྔོན་མའི་ནོར་འཁྲུལ་གྱི་གནས་སུ་བསྐྱར་ལོག་མི་བྱེད་པར་བགྲོད་ལམ་གསར་པ་ཞིག་ལ་ཤུགས་ཀྱིས་སྙེག་དགོས། དབང་འཛིན་པ། ཤེས་ཡོན་ཅན། གོ་ས་ཅན་སོགས་ཀྱིས་ངེས་པར་དུ་སྔོན་མའི་གནས་ལས་བསླབ་བྱ་བླངས་ཏེ་མཐུན་སྒྲིལ་ལ་གཅེས་སྤྲས་བྱེད་དགོས། འདི་དག་བསམ་ཐེངས་རེར་ཆེས་གནད་འགག་ཆེ་བའི་ཆོས་སྲིད་མི་སྣའི་བར་གྱི་མཐུན་སྒྲིལ་དང་འཇིག་རྟེན་པ་དང་ཆོས་པའི་བར་གྱི་མཐུན་སྒྲིལ་ལ་དུས་ནམ་ཡང་གཏོར་བཤིག་གཏོང་མི་འོས་སྙམ་པའི་ཚོར་ཤེས་ཤིག་གིས་དབང་མེད་དུ་དེད་ཡོང་ལ། དེ་ནི་དོན་དངོས་ལ་བརྙབས་པའི་ལྟ་ཚུལ་ཞིག་ཡིན་པའི་ངེས་ཤེས་ཀྱང་རྙེད་ཐུབ། ང་ཚོའི་དོན་གྱི་བདག་པོ་གཞིས་ལུས་རྒྱ་ཆེའི་མི་མང་གི་ཕྱོགས་ལ་ཉན་ཐེངས་རེར་ཧང་སང་ཞིང་ཡིད་སྐྱོ་བའི་གནས་ཚུལ་འགའ་ཞིག་ཐོས་ཡོང་གི་འདུག གངས་ཅན་ལྗོངས་ཀྱི་ཡུལ་ལུང་ཆེ་གེ་མོར་ནང་བསྟན་ཆོས་ལུགས་ཀྱིས་མཚོན་པའི་སྲོལ་རྒྱུན་རིག་གཞུང་རྩ་གཏོར་དགོས་པའི་དཔའ་སྐད་མཐོན་པོར་སྒྲོག་མཁན་གྱི་གཞོན་སྐྱེས་སྐོར་ཞིག་མཚར་ལོངས་བྱུང་ཞིང། དེ་དག་གི་ཤུགས་རྐྱེན་འོག་སྲོལ་རྒྱུན་རིག་གཞུང་དང་དེ་འཛིན་མཁན་གྱི་སེར་མོ་བའི་སྡེར་ངན་སྨྲས་དང་ཡང་དག་པ་མ་ཡིན་པའི་གླེང་ཕྱོགས་སྤེལ་ཏེ་ཚང་མ་འདྲོག་འགོ་བསླངས་ཤིང་འུར་ཟིང་བཟོས་པའི་འབྲས་བུར་ཕ་མ་གཅིག་པའི་སྤུན་མཆེད་ཡིན་ཡང་སྐྱ་སེར་བར་གྱི་འགལ་ཟླ་དང་འདུན་ལམ་མི་གཅིག་པར་བརྩིས་ཏེ། ཅོག་ཙེ་གཅིག་ཏུ་ཁ་ལག་མཉམ་དུ་མི་ཟ་བའི་ལྟ་ཚུལ་ཁྱབ་བཞིན་པ་དང་ད་དུང་སེར་མོ་བའི་ཕྱོགས་སུ་འཁོན་འཛིན་དང་སྡང་སེམས་ཀྱི་རྣམ་འགྱུར་ཆེ་རུ་འགྲོ་བཞིན་ཡོད་སྐད་འདུག འདི་དག་ནི་སྲོལ་རྒྱུན་རིག་གཞུང་རྩ་གཏོར་མ་བཏང་བར་བོད་ཡར་རྒྱས་ཀྱི་ལམ་དུ་སྐྱོད་ཐབས་མེད་པར་འདོད་པའི་ཤེས་ཡོན་ཅན་སྐོར་ཞིག་གི་བྱས་རྗེས་རེད་ལ། དགག་སྒྲུབ་རྩོམ་རིག་ལ་ཁ་ཕྱོགས་པའི་ཐོབ་འབྲས་ཀྱང་མེད། དགག་སྒྲུབ་རྩོམ་རིག་སྤྱི་ཚོགས་སུ་མཁོ་དགོས་མེད་པ་གཏན་ནས་མིན་ཡང་དགག་སྒྲུབ་རྩོམ་རིག་གི་ཁོར་ཡུག་ཆེས་ཡངས་ཤིང་རྒྱ་ཆེ་བ་ཞིག་མིན་ན་དགག་སྒྲུབ་རྩོམ་རིག་ནི་ཡར་རྒྱས་ཀྱི་སྣེ་འཁྲིད་ལས་ལྡོག་སྟེ་གཏོར་བཤིག་དང་རྒུད་མཐར་འཁྲིད་པའི་རྐྱེན་དུ་མི་འགྱུར་བའི་ངེས་པ་མེད།

དུས་རབས་ཉེར་གཅིག་པའི་དུས་ཀྱི་རླབས་རྒྱུན་ཁྲོད་དགག་སྒྲུབ་དང་། སྐྱོན་བརྗོད། འདྲ་མཉམ་སོགས་ཀྱི་ཁེ་དབང་མངོན་པར་བསྟོད་དེ་ཡོད་ཚད་འུར་ལངས་བཞིན་འདུག་མོད། སྐྱོན་ཡོན་དབྱེ་ཞིབ་མ་བྱས་པར་ཕྱོགས་གཅིག་གི་མཐོང་ཚུལ་ཁོ་ནས་དབྱུག་པ་ལེབ་རྡུང་གིས་དགག་པ་དང་། གང་ཟག་བྱེ་བྲག་པ་ཞིག་གི་སྒེར་སྐྱོན་གྱིས་སྤྱི་ཡོངས་ལ་སྐྱོན་བརྗོད། སློབ་མས་བླ་མ་དང་དད་ལྡན་གྱིས་སྐྱབས་ཡུལ་ལ་མོས་གུས་བྱས་པས་འདྲ་མཉམ་མེད་པར་བརྗོད་པའི་སྤྱོད་ཚུལ་འདི་དག་ཕྱོགས་ཡོངས་ལ་བསམ་གཞིག་མ་བྱས་པའི་གློ་བུར་གྱི་འཆར་སྣང་ཡི་གེར་བྲིས་པ་ཞིག་ཏུ་མཐོང་ལ། འདི་ལྟ་བུས་བོད་ཡར་རྒྱས་ཀྱི་ཕྱོགས་སུ་སྐུལ་དེད་བྱེད་བཞིན་ཡོད་མེད་མི་ཤེས་ཀྱང་སྐྱ་སེར་བར་གྱི་མཐུན་སྒྲིལ་ལ་གཏོར་བཤིག་བྱེད་བཞིན་ཡོད་པ་གསལ་པོ་རེད། བོད་རྒྱལ་ཁབ་ཆེན་པོའི་ལོ་རྒྱུས་བྱུང་རབས་ལ་ལྟ་སྐབས་གནའ་ནས་ད་བར་བྱས་རྗེས་ཅན་གྱི་མི་སྣའི་བརྒྱ་ཆ་མང་ཤོས་སེར་མོ་བས་བཟུང་ཡོད་ལ་ད་ལྟའང་དེ་བཞིན། བོད་ཅེས་པའི་མིང་གི་དར་ཆ་ཤར་ལྷོ་ནུབ་བྱང་གི་རྒྱལ་ཁབ་སོ་སོར་བསྒྲེངས་འཛུགས་དང་འཛམ་གླིང་གི་ཕྱོགས་གང་སར་བོད་གངས་ཅན་གྱི་ཡང་དག་པའི་རིག་གཞུང་ཁྱབ་སྤེལ་བྱས་ཏེ་བོད་པར་ཡང་དག་པའི་ཆོས་དང་རིག་གཞུང་གི་སྙིང་བཅུད་ཡོད་པ་འཛམ་གླིང་རྒྱ་ཆེའི་མི་མང་ལ་གསལ་སྟོན་བྱེད་མཁན་ཡང་སེར་མོ་བ་ཡིན། འོན་ཀྱང་ཡ་མཚན་པ་ཞིག་ལ་བོད་གངས་ཅན་གྱི་བདེ་སྡུག་ལ་སེམས་ཁུར་བྱེད་པའི་མི་བུ་རྣམ་དཔྱོད་ཅན་དག་གིས་འདི་དག་ཅིའི་ཕྱིར་མ་ཤེས་པ་ཡིན་ནམ། ཡང་ན་ཤེས་ཀྱང་མ་ཤེས་ཁུལ་བྱས་པ་ཡིན། གང་ལྟར་ཡང་བོད་གངས་ཅན་གྱི་བདེ་སྡུག་ལ་སེམས་ཁུར་དང་ལ་རྒྱ་སེར་སྐྱ་ཚང་མར་ཡོད་ལ་ཡོད་ཀྱང་དགོས་མོད། ལ་རྒྱ་དང་སེམས་ཤུགས་ཀྱི་ཤུན་སྐོགས་གྱོན་ནས་ནང་ཁུལ་མཐུན་སྒྲིལ་ལ་གཏོར་བཤིག་བྱེད་པ་ནི་དོགས་ཟོན་དགོས་པའི་གནས་སུ་མཆིས། ལར་ནས་བོད་གངས་ཅན་གྱི་གཟི་བརྗིད་དང་དབང་ཐང་ཡོད་ཚད་བོད་གངས་ཅན་གྱི་ཤེས་ཡོན་པས་བཏེགས་ཡོད་པས་སྐྱ་སེར་གཉིས་ཀྱི་ཤེས་ཡོན་པའི་སྡེ་ཁག་ལ་འགལ་ཟླ་བྱུང་ཚེ་བོད་གངས་ཅན་གྱི་ཤེས་རིག་དང་མངའ་ཐང་གོང་མཐོར་སྤེལ་བར་གཏོར་བཤིག་ཐེབས་པ་སྨོས་མེད་རེད། རྒྱུན་མཚན་འདི་དག་ནི་གངས་ཅན་པའི་ཤེས་ཡོན་པའི་མིང་འཛིན་དག་གིས་ངེས་པར་དུ་ཤེས་དགོས་སྙམ།།