གཡོ་རྒྱུའི་དབང་འོག་ཏུ་མ་ཚུད་པ་ཞིག་བྱ་དགོས།

ཉམ་ཆུང་མི་མང་དཀྱུས་མ་གང་མང་ཞིག་གི་སེམས་སུ་རྒྱ་ནག་དམར་གཞུང་ལ་དགའ་ཞེན་གྱི་ཤུགས་རྐྱེན་གང་འཚམས་ཤིག་ཐེབས་ཡོད། དེ་ནི་རྒྱ་ནག་དམར་པོའི་གཞུང་གིས་ལོ་དེའི་ནང་གི་རྒྱལ་ཁ་ཆེན་པོ་ཞིག་དང་རླབས་ཆེ་ལ་གཟི་བརྗིད་ལྡན་པའི་བྱ་གཞག་ཅིག་ཏུ་ངོས་འཛིན་བྱས་ཡོད། ཡིན་ནའང་དོན་ངོ་མ་མི་མང་བྱིངས་ལ་མཚོན་ན་དེ་ལྟ་བུའི་བག་ཆགས་དེས་སྔར་གྱི་རྨོངས་པ་ལས་སླར་ཡང་རྨོངས་སུ་བཅུག་ཡོད་ལ། རྒྱ་ནག་མི་མང་གི་གཞི་རྩའི་འགྲོ་བ་མིའི་ཐོབ་ཐང་དང་རང་དབང། མང་གཙོ་བཅས་ལས་བསྐྱར་དུ་ཁ་ཐག་ཇེ་རིང་དུ་བཏང་སྟེ་མུན་ནག་ནས་མུན་དུ་བསྐྱལ་ཡོད་རེད། གཡོ་སྒྱུའི་བྱེད་སྟངས་དེ་དག་ནི་དམར་གཞུང་གི་རྫུན་འཕྲུལ་གྱི་བྱ་སྤྱོད་ངན་པ་ཞིག་སོང། སྐྱེ་བོ་མང་དག་ཅིག་མགོ་འཐོམས་སུ་བཅུག

ཉེ་ཆར་རང་གི་ཕ་ཡུལ་སྐྱེ་རྒུ་མདོར་ལོ་རྒྱུས་སྟེང་བྱུང་མ་མྱོང་བའི་ས་ཡོམ་གྱི་ཆག་སྒོ་ཆེན་པོ་དེས་མི་རྒྱུ། མི་རིགས་དང་བཅས་པར་གྱོང་གུད་ཚད་མེད་ཕོག་པའི་ཆེས་ཡ་ང་བའི་གནས་སྟངས་དེ། རང་རེ་བོད་མི་རྣམས་ཀྱི་ངོས་ནས་བཤད་ན། ཡོད་ཚད་ནས་ཡོད་ཚད་དར་རྒུད་དང་འཇིག་བཞིན་པའི་སྐབས་འདིར་སྡུག་ཐོག་སྡུག་གིས་ཁེངས་པའི་ཧ་ཅང་བློ་ཕམ་བྱེད་དགོས་པའི་གནས་བབས་ཤིག་ཏུ་ལྷུང་ཡོད་མོད། ངོ་ཚ་དང་ཁྲེལ་གཞུང་མེད་ལ། བྱམས་སྙིང་རྗེ་དང་བྲལ་བ། དྲང་བདེན་དང་དངོས་ཡོད་ལས་ཡོངས་སུ་འཁྱོག་པའི་ཕ་རོལ་དགྲ་བོ་ལ་མཚོན་ན། སླར་ཡང་ཤིན་ཏུ་རྙེད་པར་དཀའ་བའི་གོ་སྐབས་བཟང་པོ་ཞིག་དང་འཐོབ་པར་དཀོན་པའི་ལག་ཆ་ཞིག་ཐོབ་ཡོད་པར་འདོད། ཉིན་འདི་དག་གི་རིང་ཁོང་ཚོས་གོ་སྐབས་འདི་དང་ལག་ཆ་དེ་ཕྱི་བཤོལ་མེད་པར་ཐབས་བརྒྱ་ཇུས་སྟོང་གི་སྒོ་ནས་ཕྱོགས་ཡོངས་ལ་ནུས་ཤུགས་གང་ཡོད་སྟོན་བཞིན་ཡོད། ཚ་ཚ་འུར་འུར་ཅན་གྱི་ལས་འགུལ་འདི་དག་ནི་རྒྱལ་ཁབ་གོང་བུ་གཅིག་གྱུར་དང། དེ་ཡང་མཐར་གཏུགས་ན་གུང་ཁྲན་ཏང་དང་དེའི་སྲིད་དབང་སྒེར་གཅོད་རིང་ལུགས་པ་རྣམས་ནད་མེད་ཚེ་རིང་ངང་གསོན་ཐབས་བྱ་རྒྱུ་ཁོ་ནའི་ཆེད་དུ་ཡིན་པ་ལས། ངེད་ཅག་བོད་མི་མང་ལ་ཁ་ཞེ་གཉིས་མེད་ཀྱིས་དགའ་ཞེན་དང་ཤ་ཚའི་འོག་ནས་རྒྱབ་སྐྱོར་དང་རོགས་རམ་བྱེད་བཞིན་པ་ཞིག་གཏན་ནས་མིན། དེར་བརྟེན་གཞིས་བྱེས་གཉིས་སུ་གྱེས་པའི་བོད་མི་ཡོངས་དང་ཁྱད་པར་དུ་ད་ཐེངས་གནོད་འཚེ་ཕོག་ཡུལ་གྱི་འབྲེལ་ཡོད་སྤུན་ཟླ་རྣམས་རྒྱ་ནག་དམར་གཞུང་གིས་ཕྱོགས་ལྷུང་ཅན་གྱི་ཆབ་སྲིད་དྲིལ་བསྒྲགས་ཁག་དང། དཔལ་འབྱོར་གྱི་བསླུ་བྲིད་སོགས་མདོར་དོན་སྙིང་པོ་ཤིན་ཏུ་གདུག་རྩུབ་ཅན་གྱི་ཆབ་སྲིད་ཀྱི་གཡོ་རྒྱུའི་དབང་འོག་ཏུ་མ་ཚུད་པ་ཞིག་བྱ་རྒྱུ་སྐབས་ཐོག་གལ་ཆེན་ནང་གི་དོན་ཆེན་ཞིག་ཏུ་ངོས་འཛིན་བྱ་དགོས་པར་སེམས། །