༤་༡༤ ས་ཡོམ་ཆེན་པོ།

གཅིག
སྐྱེ་རྒུ་མདོ་རུ་ས་ཡོམ་གྱི་གནས་ཚུལ་ཚབས་ཆེན་བྱུང་མ་ཐག་མི་མང་གིས་རང་ཉིད་རང་གིས་སྐྱོབ་པ་ལས་གཞུང་གི་མྱུར་སྐྱོབ་ལས་དོན་ཆུ་ཚོད་བདུན་གྱི་འཕྱི་འགྱངས་བྱུང་ཡོད། དོན་དངོས་སུ་ཁང་རྩེག་བརྡིབས་པ་དང་རྩིག་པ་ཉིལ་བའི་འོག་གི་ཚེ་སྲོག་རེ་རེ་ཡིས་སྐར་ཆ་ཙམ་ཡང་སྒུག་ལོང་མེད་པར་འཆི་ལམ་དུ་གཤར་བཞིན་ཡོད། སྟབས་ལེགས་པ་ཞིག་ལ་རྫ་སེར་ཤུལ་དགོན་གྱི་གྲྭ་ལྔ་བརྒྱ་དང་ས་གནས་ཀྱི་མང་ཚོགས་ལྷག་འཕྲོ་ཞིག་གིས་ས་འོག་གི་གཉེན་མི་རྣམས་སྔོག་འདོན་བྱེད་འགོ་ཚུགས་ཡོད། དུས་ཚོད་འདི་ནི་ཇི་འདྲའི་ཛ་དྲག་ཅིག་དང་བྲེལ་འཚུབ་ཅིག་རེད་ཨང༌། ཁ་ཟས་དང་གྱོན་གོས་མེད་པའི་ཡུལ་མི་ཚོས་གནམ་གཤིས་གྲང་མོ་དང་ཁོར་ཡུག་ཉམ་ང་བའི་ཁྲོད་དུ་རང་ཉིད་ཀྱི་ཟུངས་ཤུགས་ལྷག་འཕྲོ་སྤྱད་དེ་ཚེ་སྲོག་གི་རེ་བ་ས་འོག་ནས་ཡང་བསྐྱར་འབྱུང་བའི་རྨི་ལམ་དང་བོ་བྱུང༌། གཞུང་གི་མྱུར་སྐྱོབ་ཚོགས་པ་ག་ལེར་སླེབས། སླེབས་ནས་ཀྱང་གྲལ་བསྒྲིགས་ཏེ་གསར་འགྱུར་ཁྱབ་བསྒྲགས་ཀྱི་རྣམ་པ་ཞིག་ཏུ་སྤྱོད་ཀྱི་ཡོད། ས་རྡུལ་རྔུབ་ཀྱིན་པའི་ཚེ་སྲོག་རེ་རེ་ཡིས་ཁོ་ཚོའི་ཆེས་ལྷོད་ཅིང་བག་ཕབ་པའི་སྣང་ཚུལ་དེ་ལ་སྒུག་ལོང་ཡོད་དམ།

གཉིས་པ།
བོད་མི་རིགས་ཀྱི་ཤ་རུས་ལ་འཐིམ་པའི་ཆོས་ལུགས་ཀྱི་ཆོ་ག་དག་གསར་འགྱུར་གྱི་བརྒྱུད་ལམ་ནས་བྱེད་ཐབས་གང་མང་གི་ཁྲོད་དུ་བོར་བརླགས་འགྲོ་འགོ་བརྩམས་པར་མ་ཟད། མཆོད་མེ་འབུལ་བའི་རྐོང་བུ་དག་གི་འོད་སྣང་ཡང་དུས་ཡུན་གང་འཚམ་ཞིག་ལ་སྦས་སྐུང་བྱས་ཏེ། གཞུང་གི་བོད་རིགས་ལས་བྱེད་ཚོས་ཀྱང་དང་ཐོག་ནང་ཆོས་ཀྱི་རིན་ཐང་མང་བོ་ཞིག་རང་གི་ལྟ་བ་མིན་པར་སྲོལ་རྒྱུན་རིག་གནས་ཀྱི་བཤད་ཚུལ་ཞིག་གི་ངག་སྒྲོས་ཀྱིས་བྱམས་སྙིང་རྗེ་དང་ལྷག་བསམ། སྙིང་སྟོབས་སོགས་གླེང་གི་ཡོད་ཀྱང༌། མི་རིགས་གང་ཞིག་ཡིན་ཡང་རང་གི་རིག་གནས་ནི་གནད་འགག་གི་སྐབས་སུ་རང་ཉིད་ཀྱི་སྟོབས་ཤུགས་དང་ལྷན་དུ་མངོན་ཞིང་མཆེད་པ་ནི་ཆོས་ཉིད་ཀྱི་སྣང་ཚུལ་ཞིག་ཡིན་པས། ཐེངས་འདིའི་གོད་ཆག་ཁྲོད་དུའང་ཕྲེང་བ་དང་མ་ཎི་འཁོར་ལོ། སྨོན་ལམ་གྱི་དབྱངས་རྟ། ཐ་ན་གསོལ་འདེབས་ཀྱི་སྐད་སྒྲ་ཡང་འཇགས་པ་མེད་པར་མྱ་ངན་ཁྲོད་ཀྱི་རང་བྱུང་གི་སྣང་ཚུལ་སྤྱིར་བཏང་བ་ཞིག་ཏུ་གྱུར་བས། ཆོས་ལུགས་དུག་ཏུ་ལྟ་བའི་སྲིད་གཞུང་གི་སེང་རས་ཀྱིས་ཀྱང་སྒྲིབ་ཐབས་མེད་པའི་སྤྱིར་བཏང་བའི་སྣང་ཚུལ་འདིས་དམིགས་བསལ་གྱི་གནས་ལུགས་ཅིག་འགྲེལ་བཤད་ཅིག་ཆུ་ལོག་བཞིན་འགོག་ཏུ་མེད་པར་བརྡོལ། མང་ཚོགས་ཀྱི་ཤ་རུས་ལས་བྱུང་བའི་རང་བྱུང་གི་བདེན་པ་དག་ལ་སུས་ཀྱང་རྒོལ་དུ་མེད་པས། ཆེས་མི་འདོད་བཞིན་དུ་གནས་ལུགས་ཤིག་རྟོགས་ཀྱང་མ་རྟོགས་པའི་རྣམ་འགྱུར་ཞིག་དང་དུ་ལེན་དགོས་པ་སྲིད་གཞུང་འདིའི་འུ་ཐུག་གི་གདམ་ག་ཞིག་ཀྱང་ཡིན། དེ་ཡང་དགོས་མཁོ་ཞིག་ཅིས་ཀྱང་ཡིན་སྲིད།

གསུམ་པ།
སྤྱིར་གསར་འགྱུར་བརྒྱུད་ལམ་ནི་མི་མང་དང་སྤྱི་ཚོགས་ཀྱི་ཁ་ཐག་ཉེ་ས་དང༌། དུས་ཚོད་དང་དོན་དངོས་ལ་བར་ཐག་ཆུང་ས་ནས་མངོན་ལྐོག་ཅི་ཡང་མེད་པའི་ཁྱབ་བསྒྲགས་ཀྱི་བྱེད་ཐབས་ལ་བརྟེན་ཏེ་ཕན་ནུས་ཆེས་ཆེར་འདོན་འོས་ནའང༌། ཡུལ་ཤུལ་གྱི་གསར་འགྱུར་དག་ནི་གཞུང་གི་སྟངས་འཛིན་གྱིས་ཆབ་སྲིད་ཀྱི་རྣམ་པར་བསྒྱུར་བའི་ཟློས་གར་འཁྲབ་གཞུང་ཞིག་ཏུ་གྱུར་བར་མ་ཟད། ད་སྔ་དབུས་གཞུང་སྟེ་སི་སི་ཏྲེ་བེ་ཞེས་པའི་བརྙན་འཕྲིན་ལེ་ཚན་དུ་གྲྭ་བ་དང་བོད་མི་མང་གིས་ནུས་ཤུགས་ཡོད་དགུ་བཏོན་ནས་ཚེ་སྲོག་སྐྱོབ་པའི་ཕྱིར་དུ་རང་སྲོག་ཀྱང་འདོར་བཞིན་པའི་ཡིད་འགུལ་ཐེབས་པའི་གནས་ཚུལ་མང་བོ་ཞིག་བག་ལ་ཞ་བར་གྱུར་ཡོད། ད་དུང་གསར་འགྱུར་འདི་ཡང་མདོ་དབུས་ཁམས་གསུམ་ཡོངས་ཁྱབ་རང་བཞིན་ལྡན་པར་གནས་ཚུལ་མཁོ་འདོན་བྱེད་ཀྱི་མེད་པར་མ་ཟད། ལྷ་སའི་བརྙན་འཕྲིན་ལེ་ཚན་དུ་སྐབས་སྐབས་སུ་ཞོར་འཕྲོས་ཀྱི་རྣམ་པར་སྟོན་པ་ཙམ་ལས་བརྗོད་དོན་གཙོ་བོར་བཟུང་ནས་སྟོན་གྱི་མེད་པ་ནི། རྒྱ་གཞུང་གིས་ཛ་དྲག་གི་དཀའ་ངལ་འདི་ལྟ་བུའི་ཁྲོད་དུའང་ཆབ་སྲིད་ཀྱི་གདོང་འབག་སྤྱད་ནས་མི་མང་གི་མིག་ཟུང་མུན་ནག་གི་ཕྱོགས་སུ་བསྐོར་གྱི་ཡོད། དངོས་ཡོད་གནས་ཚུལ་གྱི་དཀའ་སྡུག་ལ་གཞིགས་ན། སྤྱི་ཚོགས་འཆམ་མཐུན་དང་སྐྱིད་སྡུག་མཉམ་མྱོང་ནི་ཤིན་ཏུ་གལ་ཆེ་ནའང༌། སྟོད་དབུས་གཙང་ནས་ཆོལ་ཁ་གསུམ་སྐྱིད་སྡུག་མཉམ་མྱོང་བྱེད་པར་ཆེད་དུ་བཀག་པར་མ་ཟད། མངའ་སྡེ་མི་གཅིག་པའི་བོད་པ་དག་ཀྱང་ས་ཡོམ་བྱུང་བའི་ས་གནས་སུ་ཆེད་བསྐྱོད་བྱེད་མི་ཆོག་པའི་བཀག་སྡོམ་ཡང་ཡང་བྱེད་ཀྱི་ཡོད། ད་ལྟ་དངོས་སུ་མཐོང་ཐུབ་པའི་མཚོ་སྔོན་གྱི་བོད་སྐད་གསར་འགྱུར་དང་རྒྱ་སྐད་གསར་འགྱུར་གཉིས་ཀྱང་ཧེ་བག་ཤིན་ཏུ་ཆེ་བ་ནི་ལུང་བ་ཞིག་གི་ཉིན་སྲིབ་བཞིན་གཅིག་ལ་ཉི་འོད་ཕོག་པ་དང་ཅིག་ཤོས་དེ་ལས་ལྡོག་སྟེ་གྲིབ་སོ་ཆེ་བའི་སྣང་ཚུལ་ཞིག་མངོན་ལ། གནས་ཚུལ་འདི་ལས་ཀྱང་རྒྱ་ཕྱོགས་དང་བོད་ཕྱོགས་ཞེས་པའི་ལུགས་སྲོལ་རྙིང་བ་ཞིག་བསྐྱར་ལོག་བྱེད་དུ་འཇུག་བཞིན་པའི་ཚོར་བ་ངང་གིས་སྟེར། འདི་ནི་གསར་འགྱུར་བརྒྱུད་ལམ་གྱིས་བཟོས་པའི་མ་འོངས་པའི་བདེ་འཇགས་ལ་བཏབ་པའི་ཉེན་ཁའི་ས་བོན་དང་ད་ལྟའི་དཀའ་ངལ་ཁྲོད་དུ་ཞུགས་པའི་མང་ཚོགས་ཀྱི་སེམས་ཁམས་ལ་བཟོས་པའི་རྨ་ཁ་གསར་བ་ཞིག་ཀྱང་ཡིན།

བཞི་བ།
སྲིད་གཞུང་གིས་མགོ་སྐོར་བཏང་ཡང་རུང༌། མང་ཚོགས་ཀྱི་མིག་ཟུང་བསྒྲིབས་ཀྱང་ཆོག ངེད་ཅག་གི་ཤ་ཚ་དང་དུང་ཞེན་ལ་ལྡོག་ཏུ་ག་ལ་ཡོད། བར་ཐག་ཅི་ཙམ་རིང་ན་གནས་ཚུལ་དེ་ལྟར་གསལ་བོ་ཐོས་ཐུབ་པ་ནི་སེམས་ཀྱིས་བསྐྲུན་པ་ཞིག་ཡིན། སེམས་ཀྱི་ཁ་ཐག་འདིས་སྤུན་ཟླ་མི་མང་གི་སྟོབས་ཤུགས་ཀྱང་མྱ་ངན་མི་མང་ཁྲོད་དུ་ཡོད་ཚད་གཏོང་ཐུབ་པར་མ་ཟད། གྲྭ་བ་སྟོང་ཕྲག་མང་བོ་དང་མི་མང་གི་ལག་ཟུང་ས་རྡོ་ཁྲོད་ཀྱི་ཚེ་སྲོག་གི་མཐའ་འཁོར་དུ་འཚང་ག་རྒྱག་བཞིན་ཡོད། འཚང་ག་འདིས་དམག་མི་དག་གི་སྟོབས་ཤུགས་ཀྱང་ཁ་སྐྱེངས་དགོས་པར་བགྱིས་པས། ནང་སེམས་ཀྱི་དུང་སེམས་ཀྱི་སྟོབས་ཤུགས་དང་ཕྱི་རོལ་གྱི་བཀོད་སྒྲིག་གི་སྟོབས་ཤུགས་ཀྱི་བར་ཁྱད་ཞིག་ཀྱང་མཐོང་ཐུབ་པར་མ་ཟད། གནས་སྟངས་འདིའི་ཁྲོད་ནས་ཚོ་ཁག་འདི་གཉིས་བར་དུ་འགལ་ཟླ་ཡང་ཡང་འབྱུང་བཞིན་ཡོད། ཡིད་སྐྱོ་བ་ཞིག་ལ་དགེ་འདུན་པའི་ངལ་རྩོལ་གྱི་སྟོབས་ཤུགས་དག་ནི་མཚོ་སྔོན་བོད་སྐད་བརྙན་འཕྲིན་གྱི་ལེ་ཚན་དུ་པར་རིས་ཀྱི་ཆ་ཕྲ་མོ་ཙམ་ལས་བརྒྱུད་ལམ་གཞན་དག་ཏུ་ཤིན་ཏུ་མཐོང་དཀའ་བར་གྱུར། དགེ་འདུན་པ་ཚོས་ས་འོག་ཏུ་བེམ་པོ་བཏོན་མ་ཐག་དམག་མི་དག་གིས་ཧབ་ཐོབ་བརྒྱབ་ནས་ཁྱེར་ཏེ་ཁྱབ་བསྒྲགས་ཀྱི་རྣམ་པར་བརྟེན་གྱི་ཡོད་ཚུལ་བརྗོད་ཀྱི་འདུག སྐབས་སྐབས་སུ་འཕྲུལ་ཆས་སྤྱད་དེ་སྔོག་པས་ས་འོག་གསོན་པོའི་ཚེ་སྲོག་འཕྲོག་བཞིན་པའི་ཡིད་སྐྱོ་བའི་གནས་ཚུལ་དག་གིས་གྲྭ་བ་དང་དམག་མིའི་བར་གྱི་འགལ་ཟླ་ནི་མི་མངོན་པ་ནས་མངོན་གྱུར། དེ་ལས་ལྡོག་ཏུ་མེད་པའི་ཛ་དྲག་གི་རང་བཞིན་དུ་འགྱུར་བཞིན་པའི་གནས་ཚུལ་ཡང་ཡང་ཐོས། ཡ་མཚན་པ་ཞིག་ལ་ཕུང་བོ་སྦྱིན་སྲེག་བྱེད་པའི་ཉིན་འགའི་སྔོན་དུའང་དམག་མི་ཚོས་འདས་པོ་དག་གི་ཕུང་བོ་གྱོན་གོས་བཤུ་བར་འཛེམ་བག་བྱེད་པ་དང་བེམ་རོ་རྨ་ཁ་མང་བར་ལག་པ་མི་འཆང་བའི་གནས་ཚུལ་ཡང་རྒྱུན་དུ་འབྱུང་བཞིན་མཆིས། གྲྭ་བ་ཚོས་ཕྱོགས་གཅིག་ནས་སྨོན་ལམ་གསུང་བ་དང་ཕྱོགས་གཅིག་ནས་བེམ་རོའི་འཁུར་བའི་ལས་དོན་ཡོད་ཚད་དང་དུ་ལེན་གྱི་ཡོད་ལ། དགེ་འདུན་པའི་རླབས་ཆེ་བའི་གཞན་ཕན་དང་བླང་གི་ཕྱག་ལས་དེས་སྲིད་བློན་ཝིན་ཅ་པོ་ཡང་ཡིད་འགུལ་ཐེབས་ཏེ་རང་དབང་མེད་པར་ངག་ནས་བསྔགས་བརྗོད་ཐལ་ཡོད་ཀྱང༌། གསར་འགྱུར་དུ་དགེ་འདུན་པའི་དོན་དངོས་ཀྱི་གནས་ཚུལ་བཀོད་པ་ནི་ཤིན་ཏུ་ཉུང་ཉུང་ཡིན་པས། འདི་ཡང་བོད་རིགས་མི་མང་ཁོང་ཁྲོ་ལངས་པའི་གཞི་རྩ་ཞིག་ཏུ་གྱུར་ཡོད་པ་མ་ཟད། འདྲ་མཉམ་མ་ཡིན་པའི་ཐོབ་ཐང་ཞིག་ཀྱང་ཆེས་མི་མངོན་པ་ནས་མངོན་པར་གྱུར་བའི་སྣང་ཚུལ་ཞིག་ཏུ་གྱུར་ཡོད།

ལྔ་བ།
ངོས་གཞན་ཞིག་ནས་བལྟས་ན་ས་ཡོམ་གྱི་གོད་ཆག་གི་འཇིག་པ་འདི་ཡང་སྡོད་ཁང་གི་ཆ་རྐྱེན་དང་སྤུས་ཚད་དག་ལ་འབྲེལ་བའང་ཤིན་ཏུ་ཆེ་སྟེ། རྒྱ་གཞུང་གིས་ནུབ་ཕྱོགས་དར་སྤེལ་གྱི་ལས་འགུལ་གྱི་ཁྲོད་དུ་འབྲོག་ཁུལ་ཚོང་ལས་ཀྱི་ངོ་བོའམ་དེང་རབས་ཀྱི་རྣམ་པར་བསྒྱུར་ཆེད་དུ་འབྲོག་པ་མང་བོ་གྲོང་ཁྱེར་གྱི་མཐའ་འཁོར་དུ་གནས་སྤོ་བྱས་པས། ཡ་ང་བའི་ཆག་འཇིག་གི་གྱོང་གུད་ཚབས་ཆེན་ཡང་རྒྱུ་སྤུས་མི་ལེགས་པའི་སྡོད་ཁང་འདི་དག་ལས་བྱུང་བ་ནི་ཧ་ཅང་གསལ་བོ་ར་འཕྲོད་པར་མ་ཟད། མི་འབོར་ཤི་རྐྱེན་མང་ཤོས་དང་རྒྱུ་ནོར་གྱི་ཕམ་ཁ་ཆེ་ཤོས་ཀྱང་གནས་ཚུལ་འདི་ལས་བྱུང་ཡོད།  བོད་མི་མང་ལ་འདོད་པ་མེད་བཞིན་དུ་བཙན་གྱི་བདའ་ཞིང་དེད་པའི་དེ་རིང་གི་འཆི་ལམ་འདི་ཡང་དོན་ངོ་མ་ཆབ་སྲིད་དགོས་མཁོ་ཞིག་གི་ཕྱིར་དུ་ཚེ་སྲོག་གི་རིན་ཐང་གིས་རོལ་རྩེད་བགྱིས་པའི་དཔང་རྟགས་ཤིག་ཀྱང་ཡིན། བོད་མི་དག་ཆེས་སྐྱིད་པའི་སྡོད་ཁང་གསར་བ་རུ་གནས་སྤོ་བྱས་ཏེ་འཚོ་བ་སྐྱིད་པོ་རོལ་བཞིན་ཡོད་ཚུལ་སོགས་བརྗོད་དེ། རྒྱ་གཞུང་གིས་ཁྱབ་བསྒྲགས་ཡུན་རིང་བགྱིས་པའི་རང་མཚང་ཞིག་ཀྱང་དེ་རིང་དངོས་སུ་གསལ་རྗེན་དུ་བསྟན་པ་རེད། ད་ལྟ་ཤུལ་དུ་སྲ་ཞིང་མཁྲེགས་པའི་ཁང་རྩེག་སྐོར་ཞིག་མྱ་ངམ་ཐང་ལྟ་བུའི་སྐྱེ་དགུ་རུ་གེག་ཏུ་ལངས་པ་ནི་མི་དཔོན་སྐོར་ཞིག་གི་བཞུགས་གནས་རེད། ཁོ་ཚོའི་རྨི་ལམ་ལ་ས་ཡོམ་གྱིས་ཀྱང་བར་ཆད་གཏོང་མ་ཐུབ་པའི་ལྐོག་གྱུར་གྱི་གནས་ལུགས་འདིས་འདྲ་མཉམ་ཡིན་པ་ནས་འདྲ་མཉམ་མིན་པའི་གྲལ་རིམ་གྱི་བར་ཁྱད་ཅིག་ཀྱང་འགྲེལ་བཤད་ཡང་དག་པར་བརྒྱབ་ཡོད། ཉམ་ཆུང་བའི་མི་སེར་དག་ནི་འདི་ལྟར་ཤི་ཡང་ཆོག་ལ་གསོན་ཡང་ཆོག་པའི་སྲིད་དབང་སྒེར་འཛིན་ལམ་ལུགས་ཀྱི་ཡོ་བྱད་དམ་བཀོལ་སྤྱོད་ཀྱི་ལས་དབང་དཀྱུས་མ་འདིས་མཐའ་མཇུག་ལྡོག་ཏུ་མེད་པའི་ལམ་བུ་འདིར་ཞུགས་སུ་བཅུག་པ་རེད། འདི་ནི་མི་བོ་ཆེ་སུ་ཡང་བློ་ངོ་བདེ་ཐབས་མེད་པའི་ཟུག་གཟེར་གྱི་འབྱུང་རྩ་ཡང་ཡིན།

དྲུག་པ།
མིའི་རིགས་ཀྱི་སྙིང་རྗེ་ཡི་མིག་ཟུང་གིས་ཕྱོགས་ཡོངས་སུ་མཐོང་གི་ཡོད་ཀྱང༌། མིག་ཤེལ་དམར་བོ་ཅན་གྱི་སྲིད་གཞུང་གི་མིག་ཟུང་གིས་ཕྱོགས་གཅིག་ལས་མི་མཐོང་བའི་སྣང་ཚུལ་འདིས་ཕྱི་རྒྱལ་སོགས་ཕྱོགས་ཡོངས་ཀྱི་གཏོང་ཕོད་ཀྱི་ལྷག་བསམ་དང་རོགས་སྐྱོར་གྱི་ལས་འགུལ་མང་བོ་ཞིག་བཀག་སྡོམ་བྱས་ཤིང༌། ཕྱི་ཡི་གསར་འགོད་པ་དག་ཀྱང་བཀག་པར་མ་ཟད། ནང་གི་གསར་འགོད་པའི་འགྲོ་འདུག་རང་དབང་ལའང་ཚད་ཤིང་བཞག་སྟེ་མི་མངོན་པའི་ལྕགས་རི་ནག་པོ་ཞིག་གིས་མངོན་སུམ་གྱི་སྐྱེ་དགུའི་མི་མང་ཡོངས་སུ་བསྐོར་ཞིང་བསྡམས་ཡོད། འདི་ཙམ་དུ་མ་ཟད་བོད་ཆོལ་གསུམ་གྱི་ནང་ཚུན་དུའང་དྲིལ་སྒྲོག་གི་ཁྱབ་ཚད་ལ་ཚོད་འཛིན་བྱས་ཏེ་སྤུན་ཟླ་མི་མང་ཡོངས་ཀྱི་ལྷག་བསམ་ལ་ཆེ་ཆུང་མེད་ཀྱང༌། མངའ་སྡེ་ཞེས་པའི་ས་ཐིག་གིས་བཅད་པའི་མཐོང་ཐོས་ཀྱི་དབང་ནུས་ལ་བསམ་བཞིན་དུ་ཧེ་བག་ཡོད་པའི་གྲུབ་འབྲས་བྱུང་དུ་བཅུག་པས། ཞལ་འདེབས་ཀྱི་ཁ་ཕྱོགས་ཀྱང་དོ་མི་མཉམ་པའི་ན་ཟུག་གི་རྒྱུ་བ་ཞིག་ཀྱང་ད་ལྟ་ལྷག་ཡོད། དོན་དངོས་སུ་འཆམ་མཐུན་གྱི་སྲིད་ཇུས་ནི་ངག་སྒྲོས་ཙམ་ལས་ལག་ལེན་དུ་མི་མཁོ་བའི་མཆོད་རྫས་ཙམ་དུ་གྱུར་ཏེ། ཆོལ་ཁ་གསུམ་གྱི་གདུང་སེམས་མཉམ་བསྐྱེད་ཀྱི་ཆིག་སྒྲིལ་ལ་དངངས་སྐྲག་སྐྱེས་ཏེ། རྒྱ་གཞུང་གི་འུ་ཐུག་གི་ལས་དོན་སྒྲུབ་སྟངས་ཤིག་ཀྱང་ཚུར་མངོན་བྱས་བྱུང༌། མཐུན་པ་ནས་མི་མཐུན་པའི་ཕྱོགས་སུ་སྤོ་བའི་སྲིད་ཇུས་ཀྱི་ལམ་ལུགས་འདིས་མི་མང་གི་སེམས་སུ་གཏིང་ཟབ་པའི་རྨ་ཁའི་ས་བོན་གང་མང་མང་འདེབས་ཀྱི་ཡོད།

བདུན་པ།
ས་ཡོམ་གྱི་དངངས་སྐྲག་གིས་བོད་མིའི་སེམས་སུ་བག་ལ་ཉལ་བའི་རིག་གནས་ཀྱི་གསང་བ་ཞིག་ཀྱང་རང་དབང་མེད་པར་ཐོལ་གྱིས་འཕྱུར་དུ་བཅུག་བྱུང༌། དེ་ནི་དད་སེམས་ཀྱི་རིག་གནས་ཤིག ཆབ་སྲིད་ཀྱི་རིག་གནས་ཤིག བོད་མིའི་བདེན་པའི་རིག་གནས་ཤིག་སྟེ། རྒྱལ་བ་རིན་པོ་ཆེས་མཁྱེན་ཞེས་པའི་རིག་གནས་འདི་ཉིད་ཡིན། རིག་གནས་འདི་ནི་བོད་མིའི་ཉག་ཕྲ་བའི་ཚེ་སྲོག་དང་མཉམ་དུ་གནས་པས་དམག་མི་དང་ཏང་གི་དཔོན་རིགས་ཀྱི་ཛ་དྲག་སྟོབས་ཤུགས་ཀྱིས་ཀྱང་ལྡོག་ཏུ་མེད་པར། སྙིང་གི་འཕར་སྒྲ་དང་ལྷན་དུ་འཕྱུར་གྱི་འདུག་ལ། དེ་བས་ས་འོག་ནས་ཀྱང་ཡང་ཡང་འབྱུང་གི་འདུག བོད་མི་ཚོས་གསང་བའི་ངང་ཉར་བའི་རིག་གནས་ཀྱི་སྣང་ཚུལ་འདི་ཉིད་འདྲ་པར་རེ་རེ་ཡིས་གསལ་བཤད་བྱེད་དུས་ཧུའུ་དང་ཝིན་གཉིས་ཀྱི་ངོ་གདོང་ཡང་འགྱུར་བཞིན་ཡོད་ཀྱང༌། སྒམ་བརླིང་གི་འཁྲབ་ཡོལ་གྱི་ཕག་ན་རང་ཉིད་ཉེས་ཅན་པ་ཞིག་ཡིན་པ་སུས་མི་ཤེས། ཤེས་བཞིན་དུ་འདི་ལྟར་སྡོད་དགོས་པའང་ཏང་གིས་རང་ཉིད་ལ་བཅད་པའི་ཉེས་ཆད་རེད། ད་ལྟ་མང་ཚོགས་ཀྱིས་ཤི་གསོན་གྱི་སྡུག་བསྔལ་སེལ་བར་སྐྱབས་མགོན་རིན་པོ་ཆེ་བོད་དུ་གདན་འདྲེན་ཞུ་དགོས་པའི་སྙན་ཞུ་ཁོང་གཉིས་པ་སྤྲད་ཟིན་ཡང༌། གཉིད་མི་ཁུག་པའི་ཁོང་གཉིས་ལ་མཚོན་ན་མུ་མཐུད་དུ་སྒམ་བརླིང་གི་སྤམ་ཚིགས་དེ་ཤོར་མེད་ཁུལ་བགྱིད་པ་ཡང་ཏང་གིས་བཅད་པའི་ཉེས་ཆད་ཡིན།  

བརྒྱད་པ།
ད་ལྟ་ས་འོག་ཏུ་ཚེ་སྲོག་སྟོང་ཕྲག་མང་བོ་ལུས་ཡོད་ཀྱང༌། འདས་གྲོངས་སུ་ཕྱིན་པའི་གྲངས་ཚད་ཀྱང་ཚད་བཀག་བགྱིས་ཏེ་སྟོང་ཕྲག་རེ་གཉིས་ལས་བརྗོད་ཀྱི་མེད། དོན་དངོས་སུ་དམག་མི་མང་བོས་མི་མང་སྐྱོབ་པའི་ཚབ་ཏུ་མི་མང་གིས་དམག་མི་སྐྱོབ་ཀྱི་ཡོད། དམག་མི་ཚོ་རེ་རེ་བཞིན་མཐོ་སྒང་གི་མཁའ་དབུགས་ཀྱི་དཀའ་ངལ་འཕྲད་དེ་ལམ་སང་འགྱེལ་འགྲོ་བ་ནི་སྤྱིར་བཏང་གི་གནས་ཚུལ་ཞིག་རེད། སྣང་ཚུལ་འདི་ནི་ཆེས་རྨས་མ་མང་བའི་སྐྱེ་དགུ་ས་ཁུལ་གྱི་ལས་ཀ་ལྷག་མ་ཞིག་དང་འགྲོ་གྲོན་འཕར་མ་ཞིག་ཀྱང་རེད། འདི་དག་གིས་སོ་སོའི་བདེ་ཐང་གི་ཕྱིར་དུ་གུར་དང་ཁ་ཟས་མང་བོ་ཞིག་བག་ཕེབས་ངང་ལོངས་སུ་སྤྱོད་བཞིན་ཡོད་པས། གནད་འགག་གི་སྐབས་འདིར་མུ་གེའི་སྟེང་དུ་ཟླ་ལྷག་ཅེས་པ་འདྲ་ལ། ས་གནས་མི་མང་དང་དང་བླང་མང་ཚོགས་ཀྱི་ཁུར་བོ་གསར་བ་ཞིག་ཀྱང་ཡིན། ད་དུང་ཁོ་ཚོས་ཁྲིད་ཡོང་བའི་ཁྱི་དག་ལའང་རྫ་དུག་བརྒྱབ་སྟེ་མིའི་ཚེ་སྲོག་མྱུར་སྐྱོབ་ཀྱི་དུས་ཚོད་ཆེས་གལ་འགངས་ཅན་གྱི་ཁྲོད་དུ་ཁྱི་སྐྱོབ་པའི་ལས་འགུལ་ཞིག་ལའང་བྲེལ་བ་མི་བྱེད་ཐབས་མེད་དུ་གྱུར་ཡོད། འདི་ལྟར་སྟོབས་ཤུགས་མེད་པའི་དམག་མི་ཚོས་བེམ་རོའི་སྟེང་དུ་ངལ་གསོ་རྒྱག་པའི་གཏམ་རྒྱུད་ཀྱང་རླུང་ཡན་ཁྲོད་ནས་ཡང་ཡང་ཐོས་ཐུབ།

དགུ་བ།
བེམ་རོ་ཁུར་ལ་དགའ་བའི་དམག་མི་དག་ལ་རྒྱུ་མཚན་གཉིས་ཡོད་དེ། གཅིག་ནི་རང་ཉིད་བརྙན་འཕྲིན་མདུན་གྱི་མི་དཔེ་བཟང་ཞིག་ཏུ་འགྱུར་རྒྱུ་དང༌། གཞན་ནི་བེམ་པོའི་ལུས་སྟེང་ནས་རང་ཉིད་ཕྱུག་འགྱུར་གྱི་དངོས་གྲུབ་ཐོབ་རྒྱུ་དེའོ།། དམིགས་ཡུལ་དེ་ཁོ་ནའི་དབང་གིས་དམག་མི་ཚོ་རྐུན་མ་ཡིན་པའི་ནག་ཉེས་ཤིག་ཀྱང་བཀལ་བར་མ་ཟད། དྲ་ལམ་ཁག་ཏུ་དམག་མི་རེ་འགས་ཡུལ་ཤུལ་ཁུལ་གྱི་མིང་དུ་གྲགས་པའི་བོད་ཁྱི་ཨ་བོ་བརྐུས་པའི་དོན་རྐྱེན་ཡང་བྱུང་ཡོད། ངོ་གནོང་དགོས་པའི་ལས་དོན་འདི་ལྟ་བུ་ཞིག་ཆེས་དཀའ་སྡུག་དང་ཛ་དྲག་གི་གནས་ཚུལ་འདི་ལྟ་བུའི་ཁྲོད་ནས་སྒྲུབ་ཏུ་མི་འགབ་ཀྱང་གཞན་དབང་གི་བཀོད་སྒྲིག་དང་སྟངས་འཛིན་འོག་གི་དམག་མི་ཞིག་ལ་མཚོན་ན། འགོག་ཏུ་མེད་པའི་རང་གཤིས་ཤིག་དམར་རྗེན་དུ་བུད་པའི་རྟགས་མཚན་ཞིག་ཀྱང་ཡིན། གྲྭ་བ་དང་དམག་མིའི་ཐ་དད་པའི་རིག་གནས་ཀྱི་རང་གཤིས་འདིས་ཆེས་བསྒྱུར་དུ་མེད་པའི་རྣོ་ངར་གྱི་འགལ་བ་ཞིག་ཀྱང་ཉིན་རེ་ལས་ཉིན་རེར་ཛ་དྲག་གི་ངོ་བོར་བསྒྱུར་ཡོད།

བཅུ་བ།
ས་ཡོམ་ལས་མཐོང་བ་ནི་བོད་མི་ཚོའི་བྱམས་བརྩེ་དང་ལྷག་བསམ། སྙིང་སྟོབས་བཅས་ཡིན་ཏེ། ཨར་འདམ་གྱི་ཧྲིག་ཆག་ཁྲོད་ནས་རྙེད་པའི་ཨ་མ་དག་གིས་ཕྲུ་གུ་བཀབ་སྟེ་རང་ཉིད་ཀྱི་ཚེ་སྲོག་བཏང་བའི་བདེན་དཔང་མང་དུ་རྙེད་པར་མ་ཟད། བུ་ཕྲུག་སྐྱོབ་ཕྱིར་ཁང་བའི་ནང་དུ་མཆོངས་པའི་གཏམ་རྒྱུད་ཀྱང་ཧ་ཅང་མང༌། རང་གི་ནང་མིར་དོན་རྐྱེན་ཅི་བྱུང་ལ་ཁ་ཡ་མི་བྱེད་པར་གཞན་གྱི་ཚེ་སྲོག་མྱུར་སྐྱོབ་བྱེད་བཞིན་པའང་མང་དུ་མཆིས། ཡིད་འགུལ་ཐེབས་པའི་གནས་ཚུལ་འདི་དག་གི་དབང་གིས་བོད་མི་མང་བོ་ཉིན་མཚན་མེད་པར་སྐྱེ་དགུའི་ཕྱོགས་སུ་གཤར་གྱི་ཡོད། ཉིན་མཚན་མེད་པར་མར་རྩམ་དང་བག་ལེབ། དངུལ་འབོར་ཆེན་ཁྱེར་ཏེ་གཤར་གྱི་ཡོད། བོད་རིགས་སློབ་ཆེན་སློབ་གྲོགས་ཚོ་ནད་ཁྲི་རེ་རེའི་མཐའ་འཁོར་དུ་འདུས་ཏེ་སྤྱི་ཚོགས་ཞབས་ཞུའམ་མི་རིགས་ཤིག་གི་འགན་འཁྲི་དང་སྙིང་སྟོབས་དང་ལེན་བྱེད་བཞིན་མཆིས། ད་ལྟ་མུ་མཐུད་དུ་བོད་པ་ཚང་མས་སྐྱེ་དགུ་གྲོང་དུ་ཅེར་ཞིང་སྐྱེ་དགུ་གྲོང་དུ་གཤར་གྱི་ཡོད།

བཅུ་གཅིག་པ།
སྤྱིར་ཐེངས་འདིའི་ས་ཡོམ་གོད་ཆག་ཏུ་རྒྱ་གཞུང་གིས་རོགས་སྐྱོར་གང་འཚམ་བགྱིས་པ་སུས་ཀྱང་བསྒྲིབ་པར་འདོད་མི་སྲིད་ཀྱང༌། ཡོད་ཚད་ལེགས་པའི་ཆ་ཞིག་ཏུ་བརྩིས་ཏེ་བདེན་དོན་གྱི་ངོས་མང་བོ་གཡུགས་ཏེ་ཁུ་སིམ་སིམ་དུ་རང་ཉིད་ཀྱི་སྨྲ་སྒོ་བསྡམས་པའི་ལུགས་སྲོལ་དེ་ཡང་སྐྱོང་དཀའ་བས། གནས་ལུགས་ཀྱི་མདུན་དུ་ལངས་པའི་རང་ལ་དབང་བའི་སྨྲ་ལྕེ་འདི་ཡང་བདེན་པའི་སྟོབས་ཤུགས་ཀྱིས་ཅིས་ཀྱང་སྒུལ་བྱུང་བ་ནི་ས་ཡོམ་ལས་ཀྱང་ལྡོག་ཏུ་མེད་པ་ཞིག་རེད།
༢༠༡༠ ༤ ༢༡ ལ་བྲིས།