ཁོང་ལས་ལྷག་པའི་བཀའ་བློན་ཁྲི་པ་ཞིག་རྙེད་སོན་མ་བྱུང།

དེ་ན་དེ་ལས་ཀྱང་གལ་ཆེན་བ་ནི་འབྱུང་འགྱུར་བཀའ་བློན་ཁྲི་པའི་འོས་བསྡུའི་སྐབས་རང་ལོ་༡༨ ཡན་གྱིས་འོས་འཕེན་གྱི་ཆ་ཤས་ལེན་ཐབས་དང༌། ལྷག་དོན་རྒྱ་གཞུང་གིས་བཙན་བྱོལ་བོད་གཞུང་ཁྲིམས་མཐུན་མིན་པ་དང་མང་གཙོ་སྲ་བརྟན་མེད་ཚུལ་སོགས་ཀྱི་སྐྱོན་བརྗོད་ལ་ལན་འདེབས་གསལ་པོ་བྱེད་ཆེད་འོས་བསྡུར་འབད་བརྩོན་དགོས་པ་གལ་གནད་དུ་མཐོང།
དེ་ཡང་འདས་པའི་ནང་ཕྱིར་མིག་ཅིག་བལྟས་ན་ཕྱིའི་སྟོབས་ཆེན་རྒྱལ་ཁབ་དེ་ཚོའི་འོས་བསྡུའི་ཆ་ཤེས་ལེན་སྟངས་སོགས་ལ་བསྡུར་ཐབས་མེད་པ་སྨོས་མེད་ཡིན་ཡང། ང་ཚོ་དང་གཤིབ་བསྡུར་འོས་པའི་སྐྱབས་བཅོལ་གཞུང་དག་ལ་བསྡུར་ན་ཡང་འདྲ་མཉམ་ཕར་ཞོག་ལྡབ་འགྱུར་གྱི་ཁྱད་པར་ཡོད་པ་དེ་ནི་ང་ཚོ་ངོ་གནོངས་དགོས་པ་ཞིག་རེད། འབྱུང་འགྱུར་མི་མང་གིས་ཐད་ཀར་འོས་འདེམས་བྱ་རྒྱུའི་སྐབས་གསུམ་པའི་བཀའ་ཁྲིའི་འོས་བསྡུའི་བརྒྱ་ཆ་དེ་མཐོན་པོ་སླེབས་ཐབས་ལ་གཞུང་མང་གཉིས་ནས་སྟོབས་ཤུགས་གཅིག་སྡུད་ཐོག་འབད་བརྩོན་ལྷོད་མེད་བྱེད་དགོས་པ་ཞིག་དང། བཀའ་ཁྲིའི་འོས་དམིགས་བཀྲམ་སྟངས་དེ་ཡང་དེང་སང་གསར་ཤོག་སོགས་བརྒྱུད་ལམ་ཁག་ནས་ཤེས་གསལ་ལྟར་ན་ཕྱོགས་ཡོངས་ཀྱི་ཚོགས་སྡེ་དང་མི་མང་གིས་འབྱུང་འགྱུར་བཀའ་ཁྲིའི་འོས་དམིགས་ནང་འདས་ཟིན་པའི་ཁྲོད་ཆེས་མཐོའི་རྐུབ་སྟེགས་གང་མང་བཟུང་ནས་སྤྱི་སྒེར་གྱི་སྒྲིག་འཛུགས་གཞིར་བཞག་ཐོག་བོད་སྤྱི་པའི་རྩ་དོན་ཆེད་ཕྱག་ལས་དུས་ཡུན་རིང་པོར་གནང་མྱོང་མཁན་གྱི་དགུང་ལོ་བགྲེས་སོང་ཁག་ཅིག་ལ་ཡང་བསྐྱར་རེ་བ་བཅོལ་བཞིན་ཡོད་པ་མ་ཟད་བཀའ་ཁྲིའི་སྔོན་འགྲོའི་འོས་གཞིར་འདོན་བཞིན་ཡོད་པ་དེ་ཏོག་ཙམ་ནོར་འཁྲུལ་ཡིན་པར་སེམས། སྤྱིར་བཏང་མང་གཙོ་དང་རང་དབང་ཆ་ཚང་ཡོད་པ་ཡིན་པས། སོ་སོའི་འདོད་པ་གང་ཡོད་ཡིན་ཡང། བོད་ཤི་གསོན་དང་གལ་འགང་གཉན་འཕྲང་ཅན་གྱི་སྐབས་འདིར་འབྱུང་འགྱུར་བཀའ་ཁྲིའི་འོས་ཆོས་ཡོངས་རྫོགས་ཚང་མཁན་གྱི་མི་ཞིག་དང་ལྷག་པར་གཞིས་བྱེས་ས་ཡ་དྲུག་གིས་མངོན་འདོད་སྒྲུབ་ཐུབ་ངེས་ཀྱི་གཞོན་སྐྱེས་ཤིག་འཚོལ་སྒྲུབ་བྱེད་དགོས་པ་དེ་རེད། དེ་ཡང་དགུང་ལོ་བགྲེས་སོང་ཚོའི་ནུས་པ་དང་འཇོན་ཐང་སོགས་ཅི་ཡོད་དགྲ་གཉེན་གཉིས་ཀྱི་མིག་སྔར་དུ་བསྟར་ཟིན་པ་ཞིག་རེད་ལ་འབྱུང་འགྱུར་ཡང་དེ་སྔོན་ལས་ལྷག་པའི་ནུས་ཤུགས་དང་བྱེད་ཐབས་གཞན་ཞིག་འདོན་རྒྱུ་མེད་པ་ཧ་ལམ་ཚོད་དཔག་བྱེད་ཐུབ་ངེས་ཞིག་རེད། ལྷག་པར་༧གོང་ས་མཆོག་གིས་གཙོས་རང་རེའི་གནད་ཡོད་མི་སྣ་ཚོས་ཡང་ནས་ཡང་དུ་བཀའ་ཁྲི་འོས་འདེམས་སྐོར་ལ་བཀའ་སློབ་ལམ་སྟོན་གནང་དོན་ལ་གཞིག་ན་ཡང། འབྱུང་འགྱུར་བཀའ་བློན་ཁྲི་པར་གཞོན་སྐྱེས་ཤིག་བྱུང་ན་ཞེས་པའི་ཆ་རྐྱེན་དེ་ཡང་མ་ཚང་བ་རེད། དེ་ན་ཁོ་བོས་རང་རེའི་དབུ་ཁྲིད་གཉིས་པའམ་འབྱུང་འགྱུར་གྱི་བཀའ་ཁྲི་འཚོལ་སྒྲུབ་བྱས་པའི་ནང་ནས་༧གོང་ས་སྐྱབས་མགོན་ཆེན་པོའི་ཕྱག་རོགས་དང་བོད་རྒྱལ་ཁབ་ཀྱི་སྣེ་འཁྲིད་ཕྱོགས་ཡོངས་ནས་བྱེད་ཐུབ་ངེས་ཅན་ཞིག་ལ་མཁས་དབང་བློ་བཟང་སེང་གེ་ལས་ལྷག་ཅིག་རྙེད་སོན་མ་བྱུང་ལ། ཁོང་ནི་གང་ཅིའི་ཐད་ནས་ངེས་པ་དོན་གྱི་མཁས་དབང་ཞིག་ཡིན་པ་དང་འདས་ཟིན་པའི་ནང་ལོགས་སུ་ཡང་ཁོང་གིས་རླབས་ཆེན་གྱི་ཕྱག་ལས་གནང་ཕྱོགས་ཐད་མ་ལེགས་མ་འགྲིག་པའི་ཁ་སྙད་གཅིག་ཀྱང་མེད་པས་འབྱུང་འགྱུར་བཀའ་ཁྲིའི་ཆ་རྐྱེན་ཡོངས་རྫོགས་ཚང་ཡོད་མཁན་ཁོང་ལས་ལྷག་ཅིག་མེད་པར་ངོས་འཛིན་བྱེད་ཀྱི་ཡོད།

གཞི་རྩའི་བོད་གཞིས་བྱེས་གཉིས་ཀྱི་ངོ་ཚབ་མཚོན་ཐུབ་ངེས་ཀྱི་མི་ཞིག་བཀའ་བློན་ཁྲི་པར་རག་དགོས་པ་མ་ཟད། བོད་གཞིས་བྱེས་གཉིས་ཀྱི་མངོན་འདོད་དང་བཙན་བྱོལ་བོད་གཞུང་གི་སྒྲིག་འཛུགས་མ་ལག་དང་བཅས་པ་འཛིན་སྐྱོང་སྤེལ་གསུམ་ཚགས་ཚུད་བྱེད་ཐུབ་པའི་ཤེས་འཇོན་གཉིས་ལྡན་དང་ལྷག་བསམ་གྱིས་ཤིན་ཏུ་ཕྱུག་པ་ཞིག་ཡིན་དགོས་པ་སྨོས་མ་དགོས་པ་རེད། འོན་ཀྱང་བཀའ་ཁྲིར་འགྲོ་འོས་པའི་མི་སུ་ཞིག་བཙན་བྱོལ་བོད་མི་ཆིག་འབུམ་ལྔ་ཁྲི་ཡས་མས་ཤིག་གི་ནང་ནས། མཁས་དབང་བློ་བཟང་སེང་གེ་ལས་གཞན་ད་བར་མ་རྙེད། དེ་ལས་ལྷག་པའི་མི་ཞིག་བཙལ་རིན་ཡོད་མེད་གང་ལྟར་ཡང༌། སྔོན་ལ་བོད་རྒྱ་ཆེའི་མི་མང་གི་ཕྱོགས་རིས་མེད་པའི་སྒོ་ནས་བསམ་གཞིག་ནན་ཏན་གཏོང་དགོས་རྒྱུ་ཞིག་ལ། ད་ལྟའི་བཀའ་བློན་ཁྲི་པ་ཟམ་གདོང་རིན་པོ་ཆེས་དབུ་ཁྲིད་པའི་བཀའ་ཤག་སྐབས་གཉིས་ཀྱི་ལས་ཡུན་དེའི་རིང་ལ་བཙན་བྱོལ་བོད་གཞུང་གི་འཛིན་སྐྱོང་སྤྱི་དང་ལྷག་པར་བོད་རྒྱའི་དཀའ་རྙོག་སོགས་ཆབ་སྲིད་དང་འབྲེལ་བའི་ལས་དོན་དག་ཕྱོགས་ཡོངས་ནས་གཞིས་བྱེས་བོད་མི་མང་གིས་རེ་འདོད་ལྟར་བསྒྲུབ་ཐུབ་ཡོད་མེད་བསྐྱར་ཞིབ་ནན་ཏན་གནང་རྒྱུ་དེ་གལ་ཆེན་པོར་མཐོང་གི་འདུག གལ་ཏེ་བཀའ་བློན་ཁྲི་པ་ཟམ་གདོང་རིན་པོ་ཆེས་དབུ་ཁྲིད་པའི་ད་ལྟའི་བཀའ་ཤག་རྣམ་པས་ཆབ་སྲིད་དང། དཔལ་འབྱོར། ཤེས་ཡོན། འཕྲོད་བསྟེན། སྲོལ་རྒྱུན་སོ་ནམ་སོགས་ཁྱོན་ཡོངས་ནས་ཕྱག་བསྟར་གནང་དང་གནང་བཞིན་པ་དེ་དག་བོད་རྒྱ་ཆེའི་མི་མང་གི་ཐུགས་འདོད་དང་ལྷག་པར་༧གོང་ས་མཆོག་གི་བཀའ་དགོངས་ཀྱི་རྒྱ་ལས་མ་བརྒལ་བ་ཞིག་དང། དེ་བཞིན་བོད་རྒྱལ་ཁབ་ཀྱི་རྩ་དོན་ཐོག་འཕྲལ་ཕུགས་གཉིས་ལ་ཕན་ངེས་ཀྱི་གྲུབ་འབྲས་ཐོན་ཡོད་མེད། ཟམ་གདོང་རིན་པོ་ཆེ་ཐོག་མར་བཀའ་ཁྲིར་འོས་འདེམས་བྱེད་སྐབས་སོ་སོའི་རེ་བ་གང་བརྒྱབ་པ་ལྟར་བསྒྲུབ་ཐུབ་འདུག འགྲིག་འདུག་བསམས་ཚེ། འབྱུང་འགྱུར་གྱི་བཀའ་ཁྲི་དེ་ཡང་ཟམ་གདོང་རིན་པོ་ཆེའི་ལྟ་བ་དང་ལངས་ཕྱོགས་དམིགས་ཡུལ་བཅས་ཕྱོགས་ཡོངས་ཀྱི་སྲིད་བྱུས་ལ་མོས་མཐུན་དང་རྒྱབ་སྐྱོར་མཐའ་གཅིག་ཏུ་བྱེད་མཁན་ཞིག་དང། ཁོང་གིས་དགོངས་གཞི་གཞིར་བཟུང་གིས་ལམ་དེ་ལ་ཤར་བསྐྱོད་ཐུབ་མཁན་གྱི་མི་ཞིག་བཀའ་ཁྲིར་སླེབས་ཐབས་ལ་འབད་བརྩོན་བྱེད་རྒྱུ་དེ་རེད། གལ་སྲིད་ཟམ་གདོང་རིན་པོ་ཆེས་དབུ་ཁྲིད་པའི་ད་ལྟའི་བཀའ་ཤག་གི་ཕྱག་བསྟར་གནང་བཞིན་པའི་གོང་ཞུས་སྲིད་བྱུས་རྣམས་གཞིས་བྱེས་བོད་མི་ཡོངས་ཀྱི་མངོན་འདོད་ཇི་བཞིན་ཚད་ལྡན་ཞིག་བསྒྲུབ་ཐུབ་མེད་པ་མཐོང་གི་ཡོད་ཚེ། ཟམ་གདོང་རིན་པོ་ཆེའི་སྲིད་བྱུས་སམ་ད་ལྟའི་བཀའ་ཤག་གིས་ཕྱག་བསྟར་བྱེད་བཞིན་པའི་ལམ་ལུགས་དེ་ལ་ཕྱོགས་ཐམས་ཅད་ནས་ཁ་གཏད་དུ་ལངས་མཁན་ཞིག་གམ།  དེ་ལས་ལྡོག་ཕྱོགས་ཀྱི་མི་ཞིག་འཚོལ་ཞིབ་བྱེད་དགོས་པ་རེད། གང་ལྟར་གཙོ་བོ་བོད་པ་ཙམ་མ་ཟད་འཛམ་གླིང་མི་མང་གི་མིག་གིས་ལྟ་ཉན་བྱེད་ཡུལ་གྱི་རེ་བ་བཅོལ་ས་ཞིག་ཡིན་དགོས་པ་གལ་གནད་དུ་མཐོང༌།  དེ་བཞིན་མི་དེས་ཡང་ཁ་བཤད་དང་ལག་ལེན་གཉིས་མཚུངས་ཀྱི་ཕྱག་ལས་གནང་མཁན་ཞིག་དང༌། སྲོལ་རྒྱུན་གཞིར་བཟུང་ཐོག་གསར་གཏོད་རང་བཞིན་གྱི་ནུས་སྟོབས་ལྡན་པ། ཕྱོགས་སུ་མ་ལྷུང་བའི་མི་ཞིག་བཙལ་དགོས་རྒྱུ་དེ་རེད།  གཞན་ལོ་ན་རྒན་གཞོན་དང་ཕོ་མོའི་ཁྱད་པར་སོགས་ཁོ་བོས་མ་མཐོང། མི་ཞིག་བཀའ་ཁྲིར་སླེབས་ཐུབ་མིན་དང་ཆ་རྐྱེན་ཚང་མིན་སོགས་ལ་མ་བརྟག་མ་དཔྱད་པར་གང་བྱུང་དུ་འོས་བླུགས་ན་ཕན་འབྲས་གང་ཡང་ཡོད་པ་མ་རེད། དེར་བརྟེན་ད་ནས་བཟུང་བཀའ་ཁྲིའི་འོས་ཆོས་ཚང་མིན་སོགས་ཀྱི་ཐད་ལ་བཅའ་ཁྲིམས་རིན་པོ་ཆེའི་དགོངས་དོན་བཞིར་བཞག་ཐོག་བཀའ་ཁྲི་འོས་ངེས་ཀྱི་མི་ཞིག་འཚོལ་ཞིབ་བྱེད་དགོས་པ་དེ་གངས་ཅན་པ་ཡོངས་ཀྱི་ལས་འགན་ཉག་གཅིག་ཆགས་ཡོད་པ་རེད། དེས་ན་མ་འོངས་པའི་བཀའ་བློན་ཁྲི་པ་དེར། དང་པོ། ྋགོང་ས་མཆོག་གི་བཀའ་དགོངས་ལ་བརྩི་སྲུང་དང་ལེན་བྱེད་མཁན། གཉིས་པ། གཞིས་ལུས་བོད་མིའི་མངོན་འདོད་ལ་བརྩི་སྲུང་ལྷད་མེད་ཐོག་ཁྱོན་ཡོངས་ཀྱི་བོད་ཀྱི་ཆབ་སྲིད་ལངས་ཕྱོགས་མཁྲེགས་པོ་འཛིན་ཐུབ་མཁན། གསུམ་པ། མང་ཚོགས་ཀྱི་བསམ་ཚུལ་དང་ལེན་གྱིས་མང་གཙོའི་རིང་ལུགས་ཀྱི་ལྟ་གྲུབ་ལ་བརྩི་བཀུར་དངོས་འབྲེལ་བྱེད་ཐུབ་མཁན། བཞི་པ། ནང་ཁུལ་ལ་རང་ལྟ་མཁྲེགས་བཟུང་དང་ཕྱོགས་རིས་རྨོངས་ཞེན་སོགས་ཀྱི་བསམ་བློ་རྒྱང་དུ་དོར་ནས་སྤྱི་དོན་རང་ལ་དགོངས་བཞེས་རྒྱ་ཆེར་གནང་ཐུབ་མཁན་ཞིག། ལྔ་པ། རྒྱ་གཞུང་གིས་༧གོང་ས་མཆོག་དང་བཙན་བྱོལ་བོད་གཞུང་ལ་རྒྱལ་སྤྱིའི་ཐོག་དྲང་བདེན་མ་ཡིན་པའི་སྐྱོན་འཛུགས་བསྒྲགས་གཏམ་ཁག་ལ་དུས་ནས་དུས་སུ་ལན་འདེབས་ཁ་ཚ་དགོས་གཏུག་བྱེད་ཐུབ་མཁན་ཞིག དྲུག་པ། གལ་སྲིད་སྐྱོན་དང་ནོར་འཁྲུལ་སོགས་བྱུང་ཚེ་དེ་ག་རང་ལ་ངོས་ལེན་གཙང་བཞེས་བྱེད་ཐུབ་མཁན་གྱི་དབའ་བོ་ཞིག་བཀའ་ཁྲིར་སླེབས་ཐབས་ལ་བོད་མི་སྤྱི་བོ་གནམ་བསྟན་ཡོངས་ཀྱིས་རང་དོན་རང་གཅེས་ཀྱི་སྒོ་ནས་འོས་འཕེན་རྒྱལ་ཁ་ཐོབ་ཐབས་ལ་འབད་བརྩོན་ལྷོད་མེད་བྱེད་རྒྱུར་འབོད་སྐུལ་ཤུགས་དྲག་ཞུ་བཞིན་ཡོད་པ་མ་ཟད། ཤི་གསོན་གྱི་སོ་མཚམས་སུ་སླེབས་པའི་བོད་མི་རིགས་ཀྱི་རྩ་དོན་འདི། ད་ལྟའི་ཆར་ཡར་མར་གང་ཕྱོགས་སུ་སྐྱེལ་བ་དེ། བྱེས་སྡོད་བོད་མི་ཚོའི་ལག་པར་ཡོད་པ་ལ་ངོས་འཛིན་བྱེད་ཀྱི་ཡོད།།

རྒྱ་གར་ལྷོ་ཕྱོགས་མོན་གྷོ་ནས་ཐུབ་བསྟན་བཀྲ་ཤིས་ཀྱིས།