དཔལ་ས་སྐྱའི་དགོན་སྡེ་ཁག་ཏུ་བསྔོ་སྨོན་མཆོད་འབུལ།

ས་སྐྱ་བཙུན་དགོན་རིན་ཆེན་ཆོས་གླིང་གི་བཙུན་མ་རྣམས་ནས་སྔ་དྲོ་ཆུ་ཚོད་༧།༣༠ ནས་ཉིན་གུང་ཆུ་ཚོད་༡༢ བར་བོད་ཁམས་སྐྱེ་རྒུ་མདོའི་ཕྱོགས་སུ་ས་ཡོམ་གྱི་གོད་ཆག་ཚབས་ཆེའི་འོག་རྐྱེན་ལམ་དུ་སོང་བ་རྣམས་ཀྱི་ཞེ་དགུའི་ཉིན་ཀུན་རིག་ངན་སོང་སྦྱོང་རྒྱུད་ཀྱི་ཆོ་གའི་སྒོ་ནས་ལྷོ་སྒོ་དང་མཇུག་བསྔོ་སྨོན། མར་མེ་སྟོང་ཚར་བཅས་མཆོད་འབུལ་རྒྱ་གང་ཆེ་ཞུས། དེ་ཡང་སྤྱིར་བོད་པའི་ཞེ་དགུ་སྲུང་རྒྱུའི་ཐད་ལམ་ལུགས་མི་འདྲ་བ་གཉིས་ཙམ་ཡོད་པ་ལས་ད་རེས་ཀྱི་ཞེ་དགུ་འདི་ནི་ཞག་གསུམ་ཕུད་པའི་ཞེ་དགུ་བརྩི་སྲོལ་དེ་ཡིན། གཞན་ཡང་དེ་ཉིན་འདི་གའི་གོ་སྒྲིག་བཞིན་བདེ་སྐྱིད་གླིང་དང་རཱཇ་པུར་ས་གནས་མི་མང་གང་མཚམས་མ་ཎི་སོགས་བསྔོ་སྨོན་གསུང་རྒྱུར་འདུ་འཛོམས་གནང་བར་རྗེས་སུ་ཡི་རང་ཞུ་རྒྱུ་ཡིན།

མ་ཟད་བོད་ཁམས་སྐྱེ་རྒུ་མདོའི་ཕྱོགས་སུ་རྐྱེན་ངན་གོད་ཆག་གི་གནས་ཚུལ་ཐོས་མ་ཐག་༧སྐྱབས་མགོན་༧གོང་མ་རིན་པོ་ཆེའི་བཀའ་དགོངས་བཞིན་ཉིན་ལྟར་བསྔོ་སྨོན་དང། ལྷག་པར་དུ་ཕྱི་ཟླ་༤ ཚེས་༢༠ ནས་༢༢ བར་ཉིན་གྲངས་གསུམ་རིང་ངོར་མ་དགོན་དང་ངོར་གསང་ཆེན་རྒྱུད་གྲྭར་འཁོན་གདུང་རཏྣ་བཛྲ་རིན་པོ་ཆེ་དང་ཛྙ་ན་བཛྲ་རིན་པོ་ཆེ། ༧སྐྱབས་རྗེ་ངོར་ཀླུ་ལྡིང་མཁན་ཆེན་མཆོག་དང་ངོར་ཁྲི་པ་རྣམ་པས་དབུས་བླ་སྤྲུལ་དགེ་འདུན་ཉིས་བརྒྱ་བརྒལ་བ་ནས་ཀུན་རིག་གི་ཆོ་གའི་སྒོ་ནས་ལྷོ་སྒོ་གསུངས་གནང་བ་དང། དགེ་བཙུན་བརྒྱད་བརྒྱ་བརྒལ་བ་ནས་འཕགས་པ་བཟང་པོ་སྤྱོད་པའི་སྨོན་ལམ་གྱིས་གཙོས་སྨོན་ལམ་ཁག་གསོག་སྒྲུབ་དང། ཉིན་བཞི་པར་དཔལ་ས་སྐྱའི་བཙུན་མའི་བཤད་གྲྭར་ས་སྐྱ་མཐོ་སློབ་ཀྱི་སྐྱེ་རྒུའི་སློབ་ཕྲུག་ཁག་ནས་གོ་སྒྲིག་གིས་ཉིན་ཧྲིལ་པོར་བསྔོ་སྨོན་དང་མཆོད་འབུལ་གཟབ་རྒྱས་ཞུས། དེ་མཚུངས་རྒྱ་གར་བལ་ཡུལ་ཁུལ་གྱི་ས་སྐྱའི་དགོན་སྡེ་ཁག་ཏུའང་གདུང་སེམས་མཉམ་སྐྱེད་ཕྱིར་བསྔོ་སྨོན་དང་མཆོད་འབུལ་གཟབ་རྒྱས་ཞུས་ཡོད་པ་རེད།།