བསམ་ཚུལ་ཁ་རུ་ཁ་ཐུག་ཏུ་བཤད་པ།

ཀང་ར་རྫོང་གིས་ས་གནས་ཉེན་རྟོག་པ་ཁག་བགོས་ཀྱིས་བོད་པ་སྲང་ལམ་དུ་འཚོ་རྟེན་འཚོལ་མཁན་རྣམས་ལ་ཐང་ཁྲོམ་སྟོན་མི་ཆོག་པར་བཀག་སྡོམ་བྱས་པ་བཅས་ལས་བྱུང་བའི་བསམ་ཚུལ་ཞིག་ཡིན་ལ། བསམ་ཚུལ་དེ་ཁ་རུ་ཁ་ཐུག་ཏུ་བཤད་རྒྱུ། ང་ཚོའི་བཙན་བྱོལ་གཞུང་འདི་རྒྱ་གར་ནང་སྐྱབས་བཅོལ་དངོས་ཆགས་ཡོད་མེད་དང། མི་མང་ལ་སྐྱབས་བཅོལ་དངོས་ཀྱི་འཚོ་བའི་སྟངས་འཛིན་བྱེད་ཐུབ་དང་མི་ཐུབ་ཀྱི་ཐེ་ཚོམ་ལས་རང་འཚོར་གནས་མཁན་རྣམས་ལ་དཀའ་ངལ་འདི་འཕྲད་བཞིན་པ་རེད།

དེར་བརྟེན། ང་ཚོའི་གཞུང་གིས་ཐང་ཁྲོམ་སྟོན་མཁན་ཚོ་གཙོས་མི་མང་ཅི་ཐུབ་གང་ཐུབ་ཅིག་རྒྱལ་ཁབ་གཞན་ཡུ་རོབ་སོགས་སུ་སྐྱབས་བཅོལ་ལ་གཏོང་བའི་ཐབས་ལམ་ཞིག་འཚོལ་རྒྱུ་གལ་ཆེན་དུ་མཐོང། གལ་སྲིད་ཁོ་ཚོ་རྒྱལ་ཁབ་གཞན་དུ་བཏང་སྟེ་སྐྱབས་བཅོལ་བ་དངོས་ཀྱི་འཚོ་བ་རོལ་ཐུབ་པ་ཞིག་ཆགས་ན། རང་གི་རྒྱལ་ཁབ་དང་མི་རིགས་ལའང་ཕན་གང་འཚམ་ཐོགས་ལ། གལ་ཏེ་ཕན་མ་ཐོགས་ཀྱང། རང་གི་མི་ཚང་གི་འཚོ་བའི་ཐད་ནས་བོད་གཞུང་ལ་དཀའ་ངལ་འདོན་མི་དགོས་པ་ཞིག་ཆགས་ཐུབ་པ་གོར་མ་ཆག མཐའ་མའི་སྡོམ་ཚིག་ནི། ༧གོང་ས་མཆོག་སྐུ་འཚོ་བཞུགས་ཀྱི་སྐབས་འདིར་ང་ཚོ་གཞུང་མང་གཉིས་ལུས་སེམས་ལྷོད་ལྷོད་རེད། གལ་སྲིད་༧གོང་ས་མཆོག་སྐུ་འཚོ་བཞུགས་མ་གནང་བའི་སྐབས་དེ་ནས་རྒྱ་གར་གཞུང་གིས་རྒྱལ་སྤྱིའི་སྟེང་དུ་སྐྱབས་བཅོལ་བ་ལེན་པར་མཚན་རྟགས་བཀོད་མེད་པའི་རྐྱེན་གྱིས་བོད་པ་ཡོད་དོ་ཅོག་ཕྱིར་ཕུད་གཏོང་དགོས་པའི་ཐ་ཚིག་ཅིག་བསྒྲགས་ན། ང་ཚོའི་མི་རིགས་འདི་ཕྱིར་འཕུད་རྐྱང་ཡིན་སྟབས། རི་བོང་གནམ་རྡིབ་ཀྱི་སྐད་ཆ་འདི་བཤད་དགོས་བྱུང་ཞིང། གཞུང་ཞབས་དང་གཞུང་ཞབས་མ་ཡིན་པའི་ཚོགས་སྡེ་ཁག རྩོམ་པ་པོ་དང་ཤེས་ཡོན་ཅན་སོགས་ཀྱིས་མང་ཚོགས་ཡིག་རྨོངས་པ་དང། བསམ་བློ་ཅི་ཡང་གཏོང་མི་ཤེས་པའི་རིགས་ལ་ཁ་བདེ་བོས་ལུས་སེམས་ལྷོད་ལྷོད་དུ་བཏང་ན་ཡང། མཐར་གནད་འགག་ལ་སླེབས་དུས། གྱོང་ཁུར་མཁན་མང་ཚོགས་ཚོ་ཡིན་པས། འདི་ཡང་གྲ་སྒྲིག་སྡུག་ས་ནས་བྱེད་དགོས་པའི་གྲས་ཤིག་རེད་སྙམ་མོ།།