མཁས་དབང་བློ་བཟང་སེང་གེ་མཆོག་ལ་རེ་སྨོན།

རྒྱུ་མཚན་ནི་ཁོང་ལ་གཞི་རྩིའི་བཀའ་བློན་ཁྲི་པར་བཞེངས་རྒྱུའི་ཆ་རྐྱེན་ཡོངས་སུ་ཚང་བའི་ཁར་དམིགས་བསལ་ཆ་རྐྱེན་ཁ་ཤས་ལྡན་ཡོད།

དང་པོ། ང་ཚོའི་གཞུང་འདི་རང་ཡུལ་དགྲ་ལག་ཏུ་ཤོར་བའི་བཙན་བྱོལ་གཞུང་ཞིག་དང། རང་ཡུལ་ལ་ཕྱིར་ལོག་ཐུབ་ཐབས་ཀྱི་འབད་བརྩོན་བྱེད་མཁན་གྱི་ཆབ་སྲིད་སྐྱབས་བཅོལ་བ་ཞིག་ཡིན་པར་བརྟེན། གཙོ་ཆེ་རྒྱལ་སྤྱིའི་ཆབ་སྲིད་ཀྱི་དབུ་ཁྲིད་མི་སྣ་དང་འབྲེལ་ལམ་བྱེད་རྒྱུ་དེ་ནི་གལ་ཆེན་ནང་གི་དོན་ཆེན་ཞིག་ཡིན་པས། དེ་ཚོར་འབྲེལ་ལམ་བྱེད་རྒྱུར་མཁས་དབང་ཁོང་ལ་དམིགས་བསལ་ཆ་རྐྱེན་ལྡན་ཡོད་པ་ནི། ཁོང་རྒྱལ་སྤྱིའི་ངོས་འཛིན་ཡོད་པའི་ཨ་རིས་ཧ་ཝར་གཙུག་ལག་སློབ་གཉེར་ཁང་གི་ཁྲིམས་ལུགས་རིག་པའི་མཁས་དབང་གི་ཕྱག་ཁྱེར་བཞེས་མཁན་གྱི་མཁས་དབང་ཞིག་ཡིན་པས། རང་བཞིན་གྱི་ཆེ་མཐོང་མ་ཞུས་རང་ཞུས་ཆགས་རྒྱུ་དང། དེ་ལ་བརྟེན་ནས་བོད་དོན་ཆབ་སྲིད་ཀྱི་དོན་ཆེན་མང་པོ་སྒྲུབ་རྒྱུར་ནུས་པ་ལྡན་ཡོད།

གཉིས་པ། མཁས་དབང་ཁོང་གི་འདས་པའི་ལོ་རྒྱུས་ལ་སྐྱོན་གྱི་དྲི་ཙམ་མ་གོས་པའི་མི་རབས་གསར་པའི་གཞོན་སྐྱེས་ཤེས་འཇོན་གཉིས་ལྡན་གཙང་མ་ཞིག་ཡིན་པས། བཙན་བྱོལ་བཞུང་གི་དབུ་ཁྲིད་ལ་འདེམས་ཐོན་བྱེད་རྒྱུར་གཞིས་བྱེས་བོད་མིའི་ཡིད་ཆེས་ཀྱི་རྨང་གཞི་ལྡན་ཡོད།

གསུམ་པ། མཁས་དབང་ཁོང་གི་ད་བར་སྦྱང་བརྩོན་བྱས་པའི་ཤེས་ཡོན་དང་རྣམ་དཔྱོད་ཀྱི་ནུས་ཤུགས་གང་ཡོད་པ་དེ་ཡང་བོད་བསྟན་སྲིད་ཉག་ཕྲའི་སྐབས་དེར་སྡིངས་ཆ་དེའི་སྟེང་བེད་སྤྱོད་གཏོང་རྒྱུའི་སེམས་ཤུགས་ཀྱི་ལྐོག་གྱུར་ལྟ་བུ་མ་ཡིན་པར། ཡོངས་གྲགས་བཀའ་བློན་ཁྲི་པར་བཞེངས་རྒྱུ་ཞལ་བཞེས་གནང་བ་དེ་ནས་ཀྱང་ཁོང་ལ་བཙན་བྱོལ་བོད་གཞུང་གི་དབུ་ཁྲིད་གནང་རྒྱུའི་རྣམ་དཔྱོད་དང་བློ་སྟོབས་ཀྱི་ནུས་པ་ལྡན་ཡོད།

བཞི་པ། མཁས་དབང་ཁོང་འབྲེལ་བ་ཡོད་པའི་སློབ་ཕྲུག་རྒྱ་མི་རིགས་ཤེས་ཡོན་ཅན་མང་པོ་ཞིག་ད་ལྟ་ནས་འབྲེལ་ལམ་ཤུགས་ཆེ་ཡོད་པ་དེ་ཡིས་བཙན་བྱོལ་གཞུང་གི་མཛད་བྱུས་གཙོ་བོ་རྒྱ་བོད་ཕན་ཚུན་ཞི་འགྲིགས་གནང་ཐབས་དེར་ཡང་ནུས་པ་ངེས་ཅན་ལྡན་ཡོད།

ལྔ་པ། ༧གོང་ས་མཆོག་གིས་དབུ་ཁྲིད་འགན་ཁུར་མང་ཆེ་བའི་འབྱུང་འགྱུར་བཀའ་བློན་ཁྲི་པ་དེ་ལོ་ན་གཞོན་པ་ཤེས་འཇོན་དང་ནུས་པ་ཡོད་པ་ཞིག་སླེབས་ཐུབ་པའི་ཐུགས་རེ་གནང་བཞིན་པའི་ཆ་རྐྱེན་ཡང་ཚང་མ་ཁོང་ལ་ལྡན་ཡོད། དེར་བརྟེན། ད་རེས་ཀྱི་བཀའ་བློན་ཁྲི་པ་དེ་མཁས་དབང་བློ་བཟང་སེང་གེ་མཆོག་ལ་ཐོབ་པའི་རེ་སྨོན་ཞུ་བཞིན་མཆིས།།