བོད་རིགས་མཐོ་རིམ་སློབ་གཉེར་བ་རྣམས་ལ་བཏང་བའི་གསལ་བསྒྲགས།

རང་གི་མི་རིགས་ལ་སྨན་པའི་སྲི་ཞུ་རྣམ་དག་ཅིག་བསྒྲུབ་འཆར་གཞིར་བཞག་ཐོག་ད་ལྟ་བར་དུ་ཚོགས་ཆེན་ཐེངས་བཞི་ཚོགས་གྲུབ་པ་མ་ཚད། གྲུབ་འབྲས་ཀྱང་མི་དམན་པ་ཐོན་ཡོད་པ་ནི་མངོན་གསལ་རེད། དེས་ན་ད་ཐེངས་མཐོ་རིམ་སློབ་མའི་ཚོགས་ཆེན་ཐེངས་ལྔ་པའི་ས་རཱ་ས་གནས་གོ་སྒྲིག་ཚོགས་ཆུང་གི་ངོས་ནས་དེ་སྔོན་ཚོགས་ཆེན་ཐེངས་བཞི་པའི་སྐབས་སུ་ཅི་ནའི་གྲོང་ཁྱེར་རྒྱལ་སྤྱི་གཙུག་ལག་སློབ་གཉེར་ཞབས་ཞུ་ལྟེ་གནས་ཁང་གི་ཚོགས་ཁང་དུ་མཐོ་སློབ་སྐུ་ཚབ་ཐུན་མོང་གིས་བཞག་པའི་དམ་བཅའ་འམ་གྲོས་ཆོད་རྣམས་མ་བརྗེད་དྲན་གསོའི་ཚུལ་ནས་འབོད་སྐུལ་ལམ་གསལ་བསྒྲགས་ཞུ་རྒྱུའི་གནད་དོན་གཉིས་ཏེ།

༡ མཐོ་རིམ་སློབ་གཉེར་བ་ཞིག་ཡིན་པའི་ཆ་ནས་མི་མང་དཀྱུས་མ་ལས་མཐོང་ཐོས་ཀྱི་གོ་རྟོགས་མཐོ་བས། ང་ཚོས་ངེས་པར་དུ་སྤྱི་དོན་སླད་འགན་མང་བ་ཁུར་དགོས་པ་དང༌། ས་གནས་སོ་སོ་ལ་འོས་བསྡུའི་ཚོགས་ཆུང་བཙུགས་ནས་༢༠༡༡ བཀའ་སྤྱི་འོས་འདེམས་སྐབས་སུ་འོས་མི་ཚད་ལྡན་ལ་འོས་ཤོག་བརྒྱ་ཆ་དགུ་བཅུ་ཡན་བླུགས་ཐུབ་པ་བྱེད་ཀྱི་ཡིན་ཞེས་གྲོས་ཆོད་བྱུང་བ་བཞིན། སྙིང་ཉེ་བའི་སྤུན་ཟླ་སློབ་གྲོགས་རྣམ་པ་ལ་ཞུ་རྒྱུ་ནི།  དབུས་འོས་བསྡུ་ལས་ཁུངས་ཀྱིས་ད་ལོ་དམིགས་བསལ་གྱིས་བཀའ་སྤྱིའི་འོས་འདེམས་དུས་ཚེས་གཅིག་ཡིན་ལུགས་ཀྱི་གསལ་བསྒྲགས་བརྒྱུད་ལམ་ཁག་ནས་མང་པོ་བཏང་དང་གཏོང་བཞིན་པ་ཡིན་རུང༌། གལ་པོ་ཆེ་ལ་ནན་ཏན་གྱི་ཚུལ་ནས་བསྐྱར་དུ་ཞུ་ན། བཀའ་སྤྱིའི་སྔོན་འགྲོ་འོས་དུས་ཕྱི་ལོ་༢༠༡༠ ཟླ༡༠ ཚེས་༣ ཉིན་ཡིན་པ་དང༌། དངོས་གཞིའི་འོས་དུས་ཕྱི་ལོ༢༠༡༡ ཟླ་༣ ཚེས་༢༠ ཉིན་ཡིན་འདུག  དེབ་སྐྱེལ་གྱི་དུས་ཡུན་ཟླ་གཉིས་བཞག་འདུག  དེ་ནི་ཕྱི་ལོ་༢༠༡༠ ཟླ་༦ ཚེས་༡༨ ནས་ཟླ་༨ ཚེས་༡༨ བར་གཏན་ཁེལ་འདུག་པས།  ས་གནས་སོ་སོ་ལ་འོས་བསྡུའི་ཚོགས་ཆུང་བཙུགས་ཐུབ་ཡོད་མིན་ལ་མ་ལྟོས་པར། དོ་བདག་རང་ཉིད་སོ་སོས་ས་གནས་གཞིས་ཆགས་གང་གི་ཁོངས་ཡིན་པ་དེ་ནས་དེབ་སྐྱེལ་གནང་དགོས་ཀྱི་འདུག་ན། དཀའ་ཚེགས་ཕྲན་བུ་ལ་མ་འཛེམས་ནས་རང་ངོ་རང་ཤེས་དང་རང་འགན་རང་ཁུར་གྱི་མན་ངག་ཡིད་ལ་བཟུང་ནས་དུས་ཐོག་དེབ་སྐྱེལ་བྱས་ཏེ། འོས་འདེམས་སྐབས་སུ་ཕྱོགས་ལྷུང་དང༌། རང་ལྟ་མཆོག་འཛིན་གྱི་འོས་མི་མ་ཡིན་པ། ཤེས་འཇོན་ལྷག་གསུམ་གྱིས་ཕྱུག་པའི་འོས་མི་ཕོ་མོ་དང་རིགས་རུས་དབྱེར་མེད་ཐོག་ནས་ཚད་ལྡན་ཞིག་ལ་འོས་བླུག་ཐུབ་པའི་གྲ་སྒྲིག་ཨང་གསར་བྱེད་རོགས་གནང་ཞུ་རྒྱུ་དང༌།

༢ ཐེངས་ལྔ་པའི་བོད་རིགས་མཐོ་རིམ་སློབ་མའི་ཚོགས་ཆེན་དེ་བཀའ་སྤྱིའི་སྔོན་འགྲོའི་འོས་བསྡུའི་གོང་དུ་རྒྱུ་མཚན་མང་པོ་ཞིག་ལ་བརྟེན་ནས་འཚོགས་འཆར་མེད་མོད། ངེད་གོ་སྒྲིག་ཚོགས་ཆུང་གི་རེ་སྐུལ་ནི་ད་ཐེངས་ཚོགས་ཆེན་ཐེངས་ལྔ་པ་དེ་བཀའ་སྤྱིའི་དངོས་གཞིའི་འོས་འདེམས་སྔོན་ལ་འཚོགས་པ་ནི་གཏན་ཁེལ་བས། དེའི་སྐབས་སུ་ས་གནས་སྐུ་ཚབ་ཚོགས་གཙོ་གཙོས་པའི་ཚོགས་བཅར་བ་རྣམས་ཀྱི་ངོས་ནས་ལས་འགུལ་དེ་དང་འདི་སྤེལ་གྱི་སྐོར་དང༌། མཐོ་རིམ་སློབ་གཉེར་བ་རྣམས་ཀྱིས་དེབ་སྐྱེལ་དང་འོས་ཤོག་འཕེན་མཁན་གྲངས་འབོར་འདི་བྱུང་གི་སྐོར་ས་གནས་སྙན་ཐོ་སྒྲོགས་སྦྱང་སྐབས་སུ་སྤོབས་པ་ཆེན་པོའི་ངང་ནས་སྒྲོགས་སྦྱང་གནང་ཐུབ་པ་ཞིག་ནི་ངེས་པར་དུ་བཟོ་རོགས་གནང་ཞེས་འབོད་སྐུལ་ཞུ་བཞིན་ཡོད།
རྒྱ་གར་རྒྱལ་ཡོངས་བོད་རིགས་མཐོ་རིམ་སློབ་མའི་ཚོགས་ཆེན་ཐེངས་ལྔ་པའི་ས་རཱ་ས་གནས་གོ་སྒྲིག་ཚོགས་ཆུང་གིས།
སྤྱི་ལོ་༢༠༡༠ ཟླ་༦ ཚེས་༢༩ ཉིན།