ཤམ་བྷ་ལ་ཡི་སྙན་དངགས།

རྒྱུགས་སྤྲོད་ཆེན་མོའི་བྲེལ་འཚུབ་ཅིག་གིས་དགོང་མོའི་གཉིད་ཀྱང་བརྗེད་ལ་ཁད།།

དྲྭ་རྒྱ་དང་ནི་ཁ་པར་རྣམས་ལ་བརྡ་ལན་ཙམ་ཡང་སྤྲད་མ་ཁོམ།།

ཉིན་མཚན་གཉིས་ཀྱི་གྲ་སྒྲིག་དེ་ཡིས་ཀླད་པའི་འཕྲུལ་འཁོར་ཚ་བོར་གྱུར།།

དབང་རྩའི་ཀླད་པར་ངལ་གསོ་དགོས་པའི་ངེས་པ་དེ་རིང་གཞི་ནས་རྙེད།།

གྲོགས་པོའི་ས་ནས་སྒོར་མོ་གཡར་ཏེ་ཉེ་འཁོར་དྲྭ་རྒྱའི་ཁང་དུ་འཛུལ།།

བང་ཆེན་དང་ནི་ཤམ་བྷ་ལ་ཡི་ཟིན་བྲིས་དྲོན་མོའི་ནང་དུ་ཉུལ།།

ཤམ་བྷ་ལ་ཡི་ཞིང་ཁམས་ནང་ནས་མཛེས་མ་ཞིག་གི་བརྙན་པར་མཐོང་།།

རྒྱུགས་སྤྲོད་ཆེན་མོའི་དངངས་འཚབ་དེ་ཉིད་ཡུད་ཙམ་ཞིག་ལ་ཡལ་ནས་ཐལ།།

མཛེས་མའི་བརྙན་པར་ཆེ་རུ་བཏང་ནས་ཞིབ་ཀྱིས་ཞིབ་ཀྱིས་ག་ལེར་བལྟས།།

དཀར་མཛེས་བཞིན་གྱི་མཛུམ་མདངས་ཆུང་ངུས་ཕོ་བརྒྱའི་ཡིད་ཀྱི་བརྟན་པ་འཕྲོག།

མཉེན་ལྕུག་ཕྱག་གི་སྟངས་སྟབས་རེ་རེས་བོད་ཀྱི་མཛེས་མར་སྐྱེངས་པ་སྟེར།།

ཤམ་བྷ་ལ་ཡི་མཛེས་མ་ཁྱེད་ཉིད་མགོ་ནག་མི་ཡུལ་ཕེབས་དོན་ཅི།།

ཛ་ཛོར་ལག་པས་མིག་ཟུང་ཕྱིས་ནས་ཡང་བསྐྱར་ཞིབ་ཏུ་བལྟས་པ་ན།།

འོས་འཚམས་གོས་ཀྱི་གྱོན་སྟངས་དེ་ནས་ཚུལ་མཐུན་བུ་མོའི་རང་གཤིས་གསལ།།

དྭངས་གསལ་སྤྱན་ཤེལ་དཀར་པོ་དེ་ཡིས་རྒྱང་རིང་ཤེས་བྱ་གཟིགས་པ་བཞིན།།

ཤམ་བྷ་ལ་ཡི་མཛེས་མ་ཁྱེད་ཉིད་དངོས་སུ་མཇལ་ན་དགའ་བ་ལ།།

མཛེས་མ་ཁྱེད་ཀྱི་ལོ་རྒྱུས་དང་ནི་མཚན་བཟང་ཙམ་ཡང་མི་ཤེས་པས།།

བརྡ་འཕྲིན་བརྒྱུད་ནས་མང་དུ་དྲིས་པས་ཁྱེད་ཀྱི་མཚན་སྙན་གཞི་ནས་ཤེས།།

ཤམ་བྷ་ལ་ཡི་མཛེས་མའི་ཡང་རྩེ་ཆོས་སྒྲོན་ཞེས་སུ་གྲགས་པ་གང་།།

ཁྱེད་ཀྱི་མཛེས་པའི་ཡོན་ཏན་རེ་རེ་ང་ཡི་སྙིང་ཁར་ཡོངས་སུ་སིམ།།

བློ་བཟང་དབང་རྒྱལ་ཞེས་སུ་གྲགས་པའི་སྐྲ་རིང་ཅན་གྱི་ཕོ་གསར་དེས།།

བོད་ཀྱི་མཛེས་མའི་འགྲན་སྟེགས་སྟེང་ལ་འཆལ་མོ་འགའ་ཤས་བསྡུ་རུབ་ཀྱིས།།

མཛེས་མའི་དབུ་རྒྱན་གཡོག་རྒྱུ་བཞག་ནས་ཤམ་བྷ་ལ་ཡི་གྲོང་ཁྱེར་ནས།།

ཆོས་སྒྲོན་ཞེས་པའི་མཛེས་མ་འདི་ཉིད་མི་འདེམས་རྒྱུ་མཚན་ཅི་ལགས་སམ།།

མན་ཇི་ཏྲི་ལའི་མཛེས་མ་དག་ནི་ཚོང་པ་ཕྱུག་པོའི་ཆུང་མ་ཡིན།།

མེག་ལོ་གྷན་ཇིའི་བོད་མོ་དག་ནི་ཨིན་ཇི་སྤོ་བོའི་གཡོག་མོ་ཡིན།།

དེ་སླད་བོད་ཀྱི་བུ་མོ་དག་ལ་ཡིད་སེམས་ནམ་ཡང་ཤོར་མྱོང་མེད།།

མི་ཚེ་ཐུང་ངུའི་གཏན་གྱི་གྲོགས་སུ་བསུ་བའི་འདོད་པ་ཡེ་ནས་མེད།།

ཆོས་སྒྲོན་ཞེས་བྱའི་མཛེས་མ་ཁྱེད་ནི་རྒྱ་གར་ཡུལ་དུ་སྐྱེས་ན་ཡང་།།

འཆལ་མོ་དེ་ཚོའི་དྲི་མས་མ་གོས་རང་བཞིན་བཟང་པོའི་སྤྱོད་པ་གཙང་།།

དེ་སླད་ཁོ་བོའི་ལུས་སེམས་ཡོངས་རྫོགས་མཛེས་མ་ཁྱེད་ལ་འབུལ་དགོས་དྲན།།

ང་ཡི་ཡོད་ཚད་ཁྱེད་ལ་ཕུལ་ཡང་འགྱོད་པའི་དབུགས་རིང་ནམ་ཡང་མེད།།

བེ་རི་སྨྱོན་ཕྲུག་ཅེས་སུ་འབོད་པའི་འཇིགས་མེད་སེང་གེའི་བུ་ཆུང་བདག།

ཆུང་ངུའི་དུས་ནས་དེབ་དང་སྨྱུ་གུས་མགོ་བསྐོར་བསླུ་བྲིད་བྱས་པའི་ཁྲོད།

ཨིན་བོད་ཧིན་གྱི་རིག་པའི་གནས་ལ་འཆད་རྩོད་རྩོམ་པའི་འདུ་འཛིའི་འོག།

སྨན་ཤར་བུ་མོ་འགུག་པའི་གཏམ་སྙན་བཤད་སྟངས་ཡེ་ནས་མི་ཤེས་སོ།།

དེ་སླད་མཛེས་མ་ཕུན་ཚོགས་ཆོས་སྒྲོན་བདག་ལ་ཐོབ་བསམ་གཏན་ནས་མེད།།

ཡིན་ཡང་བོད་ཀྱི་བུ་མོའི་ཁྲོད་ནས་ང་རང་དགའ་བའི་མཛེས་མ་རྙེད།།

ཁྱེད་ལ་བཅངས་པའི་བརྩེ་དུང་དྭངས་མ་ང་ཡི་སྙིང་ཁར་རུམ་བྱས་ནས།།

ཚེ་ཡི་འདུ་བྱེད་མ་རྫོགས་བར་དུ་སུ་ཞིག་ལ་ཡང་སྟེར་ནུས་མིན།།

བང་ཆེན་དྲ་ཐོག་གི་ཟིན་ལས་བཤུས།