ཨི་ཊ་ལི་རུ་༧གོང་ས་མཆོག་གི་འཁྲུངས་སྐར་སྲུང་བརྩི།

སྐབས་འདིར་སྐུ་མགྲོན་གཙོ་བོ་དཔལ་ལྡན་སུད་སི་དོན་གཅོད་མཆོག་གི་གཙོས་གལ་ཆེའི་མི་སྣ་མང་པོ་ཕེབས་ཏེ་རབ་གནས་སོགས་མཛད་སྒོ་ལེགས་པར་སྒྲུབ། སྐུའི་འཁྲུངས་སྐར་མཛད་སྒོའི་སྐབས་ཨི་ཊ་ལི་རྒྱལ་ས་རོམ་གྱི་གྲོས་ཚོགས་ཁང་ནང་དཔལ་ལྡན་སུད་སི་དོན་གཅོད་མཆོག་དང་། ཨི་ཊ་ལི་བོད་མཛའ་སྦྲེལ་ཚོགས་པའི་ཚོགས་གཙོ། བོད་ཁང་གི་ཚོགས་གཙོ། དེ་བཞིན་ཚོགས་སྡེ་ཁག་མང་པོའི་ཚོགས་མི། དགའ་ལྡན་བྱང་རྩེ་ཡུ་རོབ་མཉམ་སྦྲེལ་ཚོགས་པའི་ཚོགས་གཙོ་དང་ཚོགས་མི་གཙོས་དད་ལྡན་དང་འབྲེལ་ཡོད་མང་པོའི་དབུས་༧གོས་ས་མཆོག་གི་སྐུ་པར་མཐོང་གྲོལ་རིན་པོ་ཆེ་སྤྱན་རྒྱ་སྤོས་སྣ་དང་བཅས་གཞུང་གི་གྲོས་ཚོགས་ཁང་ནང་གདན་ཞུ་གྲུབ་མཚམས་དགའ་ལྡན་བྱང་རྩེ་ཡུ་རོབ་མཉམ་སྤྲེལ་ཚོགས་པའི་ངེས་སྟོན་པ་དགེ་བཤེས་བློ་བཟང་ཤེས་རབ་མཆོག་གི་གཙོས་དགེ་འདུན་པ་རྣམས་ནས་རྒྱལ་བའི་ཞབས་བརྟན་དབྱངས་དང་བཅས་གསུངས།
དེ་རྗེས་ངེས་སྟོན་པ་དགེ་བཤེས་ལགས་ནས་གྲོས་ཚོགས་ཁང་ནང་མཛད་སྒོའི་ངོ་སྤྲོད་དང་འབྲེལ་༧གོང་ས་མཆོག་གི་བཀའ་དྲིན་དང་མཛད་འཕྲིན་སྐོར་སྙིང་བསྡུས་ཤིག་ངོ་སྤྲོད་གནང་རྗེས་སྐུ་མགྲོན་གཙོ་བོ་དཔལ་ལྡན་སུད་སི་དོན་གཅོད་མཆོག་ནས་བཀའ་སློབ་ཟབ་རྒྱས་བསྩལ་བ་སོགས་གལ་ཆེའི་མི་སྣ་ཁག་གི་གསུང་བཤད་གྲུབ་མཚམས་༧གོང་ས་མཆོག་གི་སྐུའི་འགལ་རྐྱེན་ཉེར་འཚེའི་རིགས་རྨེག་མེད་རྡུལ་དུ་བརླགས་ཆེད་ཞྭ་ནག་འཆམ་སྟེ་བཀྲ་ཤིས་དང་བཅས་མཛད་སྒོ་རྒྱལ་ཁའི་ངང་གྲོལ།  དེ་ནི་ཨི་ཊ་ལི་གྲོས་ཚོགས་ཁང་ནང་༧གོང་ས་མཆོག་གི་སྐུ་པར་མཐོང་གྲོལ་རིན་པོ་ཆེ་གདན་ཞུ་དང་། སྐུའི་འཁྲུངས་སྐར་སྲུང་བརྩི་ཞུས་པ་ཐེངས་དང་པོ་ཡིན་སྟབས་གསར་འགྱུར་བརྒྱུད་ལམ་ཁག་མང་པོས་དོ་སྣང་ཆེན་པོ་བྱུང་། དགའ་ལྡན་བྱང་རྩེ་ཡུ་རོབ་མཉམ་སྦྲེལ་ཚོགས་པས་༢༠༡༠ ། ༧ ། ༡༠ ནས་༧ ། ༢༥ བར་ཟླ་ཕྱེད་རིང་རྒྱལ་ས་རོམ་གྱི་ཡུལ་སྐོར་བསྟི་གནས་གྲས་(Galleria Spada, Rome)ལ་༧གོང་ས་མཆོག་གི་ཐུགས་རྗེའི་བཀའ་དྲིན་རྗེས་སུ་དྲན་ཆེད་འཕགས་མཆོག་སྤྱན་རས་གཟིགས་ཀྱི་དཀྱིལ་འཁོར་བཞེངས་ནས་ཉིན་རེར་སྤྲོ་འཆམ་པ་སྟོང་ཕྲག་བརྒལ་བར་༧བོད་ཀྱི་ཆོས་དང་རིག་གཞུང་གི་ངོ་སྤྲོད་དང་གོ་རྟོགས་སྤེལ་རེས། བོད་རྒྱལ་ཁབ་དང་མི་རིགས་ཀྱི་ཆེད་བོད་དོན་བདེན་མཐའ་མྱུར་དུ་གསལ་དགོས་པའི་རྒྱབ་སྐྱོར་འཚོལ་སྒྲུབ་དང་བོད་དོན་ངོ་སྤྲོད་ཞུས་དང་ཞུ་བཞིན་ཡོད་པ་དང་། ༢༠༡༠ ། ༧ ། ༢༥ ཉིན་དཀྱིལ་འཁོར་གཤེགས་སྟེ་བསྔོ་སྨོན་ཤིས་བརྗོད་དང་བཅས་༧གོང་ས་མཆོག་དགུང་གྲངས་༧༥ ཕེབས་པའི་སྐུའི་འཁྲུངས་སྐར་གྱི་མཛད་རིམ་ཁག་ལེགས་པར་བསྒྲུབ་རྒྱུ་དང་། ད་དུང་མ་འོངས་པར་ཨི་ཊ་ལི་གཙོས་ཡུ་རོབ་ཁུལ་དུ་བོད་དོན་ཐོག་ལས་འགུལ་མུ་མཐུད་རྒྱ་གང་ཆེ་སྤེལ་འཆར་ཡོད་སྐོར་བཅས་དགའ་ལྡན་བྱང་རྩེ་ཡུ་རོབ་མཉམ་སྤྲེལ་ཚོགས་པའི་ངེས་སྟོན་པ་དགེ་བཤེས་བློ་བཟང་ཤེས་རབ་མཆོག་ནས་འགྲེལ་བརྗོད་གནང་བྱུང་།  
དགའ་ལྡན་བྱང་རྩེ་ཤེས་རིག་མཐུན་སྦྱོར་ཚོགས་པ་ནས་ཕྱི་ལོ་ཟླ་ཚེས་༢༠༡༠། ༧།༡༣ ཉིན།