བཀའ་ཁྲིའི་འོས་གཞི་བདེ་སྲུང་བཀའ་བློན་འབྲོང་ཆུང་དངོས་གྲུབ།
༄༅།། རྒྱ་བལ་འབྲུག་གསུམ་དང༌། ཕྱི་རྒྱལ་ཡུལ་གྲུ་ཁག་ཏུ་བཞུགས་པའི་བོད་མི་བཙན་བྱོལ་བ་ཡོངས་ཀྱི་སྙན་ལམ་དུ། ༼གླ་ཡོད་གསལ་བསྒྲགས།༽
ཆེད་གསོལ། དེང་སྐབས་བཙན་བྱོལ་བོད་མི་གནས་ཡུལ་ས་གནས་ཚང་མའི་ནང་སྐབས་གསུམ་པའི་བཀའ་བློན་ཁྲི་པ་འོས་བསྡུའི་སྐོར་ལ་སྔོན་མ་དང་མི་འདྲ་བར་གླེང་སློང་ཤུགས་ཆེ་ཙམ་ཡོང་བཞིན་འདུག་པ་
ནི་མང་གཙོའི་ཁེ་དབང་ལོངས་སུ་སྤྱོད་པའི་མཚོན་རྟགས་བཟང་པོ་ཞིག་ཡིན་པ་བརྗོད་མ་དགོས།
རང་ཅག་རྣམས་ལ་བཀའ་དྲིན་ཟླ་མེད་ྋསྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་དགུང་གྲངས་དོན་ལྔར་ཕེབས་ཟིན་པ་དང༌། རང་རེའི་ཕ་ཡུལ་བོད་གྱི་གནས་སྟངས་ཇེ་ཞན་ཇེ་སྡུག་ཏུ་འགྲོ་བཞིན་པ། བཙན་བྱོལ་སྤྱི་ཚོགས་ཀྱི་མི་རབས་རྙིང་པ་ཧ་ལམ་རྫོགས་ནས་མི་རབས་གསར་པ་འཚར་ལོངས་བྱེད་བཞིན་པའི་ཆེས་གཉན་འཕྲང་གི་དུས་སྐབས་འདིར་སྐབས་གསུམ་པའི་བཀའ་བློན་ཁྲི་པ་ཡག་པོ་ཞིག་འདེམས་ཐུབ་དགོས་རྒྱུ་ནི་ང་ཚོའི་སྐབས་བབ་ཀྱི་ལས་འགན་གལ་ཆེན་པོ་ཞིག་ཆགས་ཡོད།
ཨ་མི་རི་ཀའི་གྲོང་ཁྱེར་ནིའུ་ཡོག་དང༌། མངའ་སྡེ་ནིའུ་ཇར་སི་ནང་གནས་སྡོད་གཤམ་གྱི་བོད་མི་རྣམས་ནས་བདེ་སྲུང་བཀའ་བློན་ལས་ཐོག་འབྲོང་ཆུང་དངོས་གྲུབ་མཆོག་སྐབས་གསུམ་པའི་བཀའ་བློན་ཁྲི་པར་འོས་ཤོས་སུ་མཐོང་གི་འདུག་ན། ཚང་མས་ཁོང་ལ་རྒྱབ་སྐྱོར་ཡོང་བའི་གསལ་བསྒྲགས་འདི་སྤེལ་བ་དང་ཆབས་ཅིག་བཀའ་བློན་འབྲོང་ཆུང་དངོས་གྲུབ་བཀའ་ཁྲིར་འོས་ཤོས་སུ་མཐོང་བའི་རྒྱུ་མཚན་དང༌། ཁོང་ལ་ཁྱད་ཆོས་གང་དང་ཇི་ཡོད་དཔེ་མཚོན་ཁ་ཤས་ཞུས་ན།
༡༽ འབྲོང་ཆུང་དངོས་གྲུབ་ཀྱིས་ྋགོང་ས་ྋསྐྱབས་མགོན་ཆེན་པོའི་ྋཞབས་འོག་ཏུ་མི་ལོ་ཧྲིལ་པོ་ ༣༣ འགྲོ་གི་ཡོད་པ་དང༌། དེའི་རིང་ཆབ་སྲིད་དང་དཔལ་འབྱོར་ཀུན་སྤྱོད་བཅས་གང་ཅིའི་ཐད་རྙོག་གླེང་གང་ཡང་མེད་པ།
༢༽ ཁོང་གིས་མི་ལོ་ ༣༣ བདེ་སྲུང་ལས་ཁུངས་སུ་སྐྱེལ་བའི་རིང་ྋགོང་ས་སྐྱབས་མགོན་ཆེན་པོའི་སྐུ་ཕྱྭ་སྲུང་སྐྱོབ་ཀྱི་ལས་འགན་ལེགས་གྲུབ་བྱུང་དང་འབྱུང་བཞིན་ཡོད་པ་མ་ཟད། ལས་དོན་དེའི་ཐད་ཁོང་ནི་ཉམས་མྱོང་ཆེ་ཤོས་ཡིན་པ།
༣༽ ཁོང་གི་ལས་འགན་གྱི་ངོ་བོའི་ཆ་ནས་བོད་ནང་གི་འགྱུར་འགྲོས་གནས་སྟངས་དང༌། གཞིས་ལུས་བོད་མི་སྤྱི་ཡོངས་ཀྱི་བསམ་ཚུལ་ཤེས་རྟོགས་གཏིང་ཟབ་ཡོད་པ་མ་ཟད། བཙན་བྱོལ་བོད་མིའི་སྤྱི་ཚོགས་ཀྱི་བཟང་ངན་གཉིས་ཀའི་གནས་སྟངས་ལའང་རྒྱུས་མངའ་ཆེན་པོ་ཡོད་པ།
༤༽ བཙན་བྱོལ་བོད་མི་མང་ཆེ་བ་རྒྱ་གར་དུ་ཡོད་པའི་རྒྱུ་མཚན་གྱིས་བཀའ་ཁྲི་དེ་ཡང་རྒྱ་གར་གཞུང་དང་འབྲེལ་བ་བཟང་ཞིང༌། རྒྱ་གར་གཞུང་གིས་ཆེ་མཐོང་ཞུ་ཡུལ་ཞིག་དགོས་པ་ལྟར་འབྲོང་དངོས་ལ་དེ་ལྟའི་ཆ་རྐྱེན་ཚང་ཡོད་པ།
༥༽ དོལ་རྒྱལ་གྱི་གནས་ཚུལ་དང༌། ས་གནས་ས་ཐོག་ཏུ་རྙོག་ཁྲ་འདྲ་མིན་འབྱུང་སྐབས་ྋགོང་ས་མཆོག་གི་དགོངས་གཞི་དང༌། རང་གཞུང་གི་ཁེ་ཕན་གཙོ་བཟུང་གིས་དཀའ་ངལ་ལ་གདོང་ལེན་བྱེད་མཁན་ཞིག་ཡིན་པ།
༦༽ ཁོང་འདི་ལོ་དགུང་ལོ་ ༥༥ ཡིན་པས་ལོ་ནའི་བབ་ནས་ཆུང་དྲགས་ཏེ་ཉམས་མྱོང་མེད་པ་མིན་ལ། ཆེ་དྲགས་ནས་གཟུགས་གཅོང་ཡང་མིན་ཞིང༌། བོད་དབྱིན་ཧིན་གསུམ་ལེགས་ལ་མི་བབ་བཟང་ཞིང་དྲང་ཚུགས་ལྡན་པའི་མང་བཀུར་གྱི་བཀའ་བློན་ལས་ཐོག་པ་ཞིག་ཡིན་པ།
༧༽ གལ་ཆེ་ཤོས་ནི་ཁོང་གིས་ྋགོང་ས་ྋསྐྱབས་མགོན་ཆེན་པོའི་དགོངས་གཞི་གསལ་རྟོགས་མཐིན་ཕྱིན་ཡོད་པ་མ་ཟད། དེའི་བཀའ་སློབ་ལམ་སྟོན་འོག་ཡིད་གཉིས་ཐེ་ཚོམ་མེད་པར་ཤར་བསྐྱོད་བྱེད་མཁན་ཞིག་ཡིན་པ་བཅས་ཀྱི་ཁྱད་ཆོས་ལྡན་པ་ལ་བརྟེན་ནས་སྔོན་འགྲོ་དང་དངོས་གཞིའི་སྐབས་བཀའ་ཁྲིའི་འོས་ཤོག་དེ་ད་ལྟའི་བདེ་སྲུང་བཀའ་བློན་འབྲོང་ཆུང་དངོས་གྲུབ་ལ་འཕེན་གནང་ཡོང་བའི་རེ་བ་དང་འབོད་སྐུལ་ཞུ་གི་ཡོད།
ཁོང་གི་ལོ་རྒྱུས་སྙིང་བསྡུས་ཤིག་ཞུས་ན། རང་ཡུལ་བོད་དུ་འཁྲུངས་པ་དང༌། ལྔ་དགུ་ལོར་བཙན་བྱོལ་དུ་ཕེབས། ཐོག་མར་ཌལ་ཧོར་གཏན་སློབ་ཏུ་སློབ་སྦྱོང་དང༌། དེ་ནས་རིམ་བཞིན་ལྡི་ལིར་ཆབ་སྲིད་དང༌། ཚན་རིག་གི་སློབ་གྲྭ་ཆེན་མོ་ཐོན། ༡༩༧༧ ལོར་རང་གཞུང་སྐུ་ངལ་ཆེ་བའི་སྐབས་རང་དོན་སྤངས་ནས་གཞུང་ཞབས་ནང་འཛུལ་བཞུགས་ཀྱིས་བདེ་སྲུང་ལས་ཁུངས་སུ་ཕྱག་ལས་གནང༌། བོད་ནང་དམ་བསྒྲགས་ཆེ་བའི་སྐབས་ཏེ་ལོ་རབས་བརྒྱད་བཅུའི་འགོ་སྟོད་དུ་དཀའ་ངལ་དང༌། ཉེན་ཁར་མ་འཛེམས་པར་བོད་ནང་ཕེབས། ཐེམ་པ་རིམ་འཛེགས་ཀྱིས་དྲུང་ཡིག་ཆེན་མོའི་གནས་རིམ་བར་ལས་འཁུར་ཞུ་མུས་སུ་བཀའ་བློན་དུ་བདམས་ཐོན་བྱུང་ནས་ད་ལྟ་བཙན་བྱོལ་གཞུང་གི་ཚན་པ་གལ་ཆེ་ཤོས་གྲས་བདེ་སྲུང་ལས་ཁུངས་ཀྱི་བཀའ་བློན་གྱི་ཐུགས་འགན་བཞེས་མུས་ཡིན།
ཁྱད་ཆོས་རྒྱུ་མཚན་དེ་ཚོ་ནི་རང་སྣང་གང་དྲན་གྱིས་བྲིས་པ་ཞིག་མིན་པར། གཞུང་ཞབས་ཟུར་པ་དང༌། ད་ལྟ་བཞུགས་སྒར་དུ་ཡོད་པའི་ཁོང་དང་ཡུན་རིང་མཉམ་གཤིབས་མྱོང་མཁན་ཁག་ཅིག་ལ་བཀའ་འདྲི་ཞུས་ནས་བྲིས་ཤིང༌། དམིགས་ཡུལ་གཙོ་བོ་ནི་དྲང་ཚུགས་ལྡན་ཞིང་ཉམས་མྱོང་ཕུན་སུམ་ཚོགས་པ་སོགས་ཀྱི་དགེ་མཚན་ཁྱད་ཆོས་ལྡན་པའི་བཀའ་ཁྲི་ཞིག་འདེམས་ཐུབ་པའི་ཆེད་དུ་ཡིན།
བོད་རྒྱལ་ལོ། ཕྱི་ལོ་ ༢༠༡༠ ཟླ་ ༨ ཚེས་ ༡ ལ།།
༡༽ གཞུང་ཞབས་ཟུར་པ་བསོད་ནམས་ཚེ་རིང༌། ནིའུ་འཇར་སི།
༢༽ ཤིང་བརྐོས་པ་རྡོ་ལགས། ནིའུ་ཇར་སི།
༣༽ ཆབ་སྲིད་བཙོན་ཟུར་ཚེ་སྨོན་གླིང་སྤེན་པ། ནིའུ་ཡོག
༤༽ ནིའུ་ཡོག་སྤྱི་མཐུན་ཚོགས་པའི་རྒྱུན་ལས་ཟུར་པ་ངག་དབང་ཚེ་རིང༌། ནིའུ་ཡོག
༥༽ གཞུང་ཞབས་ཟུར་པ་བུ་ཆུང་གོང་པ། ནིའུ་ཡོག
༦༽ ལས་བྱེད་ཟུར་པ་འཕྲིན་ལས་སྒྲོལ་དཀར། ནིའུ་འཇར་སི།
༧༽ བསྟན་འཛིན་དྲང་སྲོང༌། མི་ནི་སུད་ཀྲར།
༨༽ སྨན་རྩིས་ཁང་ལས་བྱེད་ཟུར་པ་ཚེ་རིང་སྒྲོལ་དཀར། ནིའུ་ཡོག
༩༽ ཆབ་སྲིད་བཙོན་ཟུར་ངག་དབང་གསང་སྒྲོན། ནིའུ་ཡོག
༡༠༽ ཧུན་སུར་གཞིས་ཆགས་བྱམས་པ་ཆོས་འཛོམས། ནིའུ་འཇར་སི།
༡༡༽ བལ་ཡུལ་ལྷ་མོ་དབྱངས་སྐྱིད། མི་ནི་སུད་ཀྲར།
༡༢༽ འཕྲོད་བསྟེན་སྨན་ཞབས་ཟུར་པ་བསོད་ནམས་ཆོས་སྐྱིད། ནིའུ་ཇར་སི།
༡༣༽ སྤེན་པ་འཇིགས་གྲགས། ཝ་ཤིང་ཀྲོན།
༡༤༽ སྤྱི་མཐུན་ཚོགས་པའི་རྒྱུན་ལས་ངག་དབང་འཆི་མེད། མི་ནི་སུད་ཀྲར།
༡༥༽ བསྟན་འཛིན་བྱང་ཆུབ། ནིའུ་འཇར་སི།
༡༦༽ ཤིང་བརྐོས་པ་ནོར་བུ། ནིའུ་ཡོག
༡༧༽ ངག་དབང་སྒྲོལ་མ། ནིའུ་འཇར་སི།
༡༨༽ གཞུང་ཞབས་ཟུར་པ་རྒྱལ་མཚན་ཆོས་ལྡན། ནིའུ་ཡོག
༡༩༽ ཤིང་བརྐོས་ཚུལ་ཁྲིམས་རྒྱལ་མཚན། ནིའུ་ཡོག
༢༠༽ སྤྱི་མཐུན་ཚོགས་པའི་ཚོགས་ཟུར་ཨེམ་རྗེ་ནོར་རྒྱས་ཚེ་རིང༌། ནིའུ་ཡོག
༢༡༽ སྐར་མ་ཚེ་རིང༌། ནིའུ་ཡོག
༢༢༽ སྤྱི་མཐུན་ཚོགས་པའི་རྒྱུན་ལས་ཟུར་པ་སྐལ་བཟང་ཕུན་ཚོགས། ནིའུ་ཡོག
༢༣༽ ངག་དབང་སྒྲོལ་མ། ནིའུ་ཡོག
༢༤༽ དཀར་མཛེས་པ་སྐལ་བཟང༌། ནིའུ་ཡོག
༢༥༽ ཅུང་ལགས། ནིའུ་ཡོག
༢༦༽ དགུ་བཅུ་གསུམ་ཚོགས་ཟུར་ཡེ་ཤེས་རྟོགས་ལྡན། སྦོ་སི་ཀྲོན།
{jcomments on}
