གསལ་བསྒྲགས།

ཨ་མདོ་རྒྱ་བོའི་ཟ་ཁང་གི་ཉེ་འགྲམ་ཚོང་ཁང་བདག་པོ་ངེད་གཞིས་གྲོང་གཞི་བ་ཕ་བློ་བཟང་ཆོས་འབྱོར་ནང་མི་ཡོངས་ཀྱི་སྔོན་ནས་དོལ་རྒྱལ་བསྟེན་གསོལ་གྱི་འབྲེལ་བ་མེད་པ་མ་ཟད། སྔ་ལོ་བཙན་བྱོལ་བོད་མི་ཕལ་ཆེ་བ་སྤྱི་མཚུངས་ཀྱིས་༧གོང་ས་སྐྱ་མགོན་ཆེན་པོའི་སྐུ་དཔར་དང། སྲུང་མ་དམར་ནག་གཉིས་ཀྱི་མདུན་ནས་དོལ་རྒྱལ་ནམ་ཡང་བསྟེན་གསོལ་མི་བྱེད་པ་དང་། བསྟེན་གསོལ་བྱེད་མཁན་དང་མཉམ་དུ་ཆོས་དང་ཟང་ཟིང་གི་འབྲེལ་བ་མི་བྱེད་རྒྱུའི་ཁས་བླངས་དམ་འབུལ་གཙང་མ་ཞུས་ཟིན་ཀྱང་། ཟླ་ཤས་སྔོན་ལ་མོན་གྷོ་འདོད་རྒུ་གླིང་གཞིས་ཁོངས་ཁྱིམ་ཚང་ནང་གྲོང་སྡེ་༤ བའི་སྒོ་རྟགས་ཨང་༢༤ ནང་སྡོད་ཕ་བློ་བཟང་ཆོས་འབྱོར་གྱི་བཟའ་ཟླ་བསོད་ནམས་སྒྲོལ་མ་དང་བུ་སྐལ་བཟང་རྡོ་རྗེ་གཉིས་དོལ་རྒྱལ་བསྟེན་གསོལ་བྱེད་ཀྱི་ཡོད་པའི་ཁུངས་མེད་ལུང་མེད་ཀྱི་དཀྲོག་གཏམ་ཞིག་ཁྱབ་བརྡལ་དུ་འགྲོ་བཞིན་པར་སོང་། སྤྱིར་བཏང་བྱས་ན་སྲང་ལམ་བར་གྱི་འཆལ་གཏམ་ལ་བདག་པོ་བརྒྱབ་སྟེ་གསལ་བཤད་ཞུ་དགོས་དོན་མི་འདུག་ཀྱང་། རང་རེའི་གཞིས་ཁུངས་ནང་གནས་ཚུལ་གང་ཡང་རུང་བའི་ཐོག་ལེགས་ཉེས་ཀྱིས་བརྟག་དཔྱད་བྱེད་ཁོམ་མ་བྱུང་བར་མི་གཞན་གྱི་ཅི་ཟེར་ལ་ཡིད་ཆེས་བྱེད་མཁན་རེ་ཟུང་ཡོད་སྲིད་པར་བརྟེན། དེ་དག་གི་དོགས་པ་དང་རྣམ་རྟོག་གསལ་བཤད་ཆེད་དུ་ཟླ་ཤས་སྔོན་དོ་བདག་རང་ཉིད་ནས་གཞིས་གྲོང་གི་སྤྱི་མི་དང་ས་གནས་འགོ་འཛིན་གདན་ས་ཆོས་སྒར་གྱི་དགེ་བསྐོས་རྣམས་ཀྱི་སྐུ་མདུན་དུ་བཅར་ཏེ་རང་ཉིད་སྔར་ནས་དོལ་རྒྱལ་བསྟེན་གསོལ་བྱེད་ཀྱི་མེད་ཁར་མ་འོངས་པར་ཡང་བསྟེན་གསོལ་མི་བྱེད་རྒྱུའི་ཁས་ལེན་དམ་བཅའ་གཙང་མ་སྔ་ལོ་བོད་མི་སྤྱི་མཚུངས་བཞིན་ཞུས་ཟིན་པའི་སྐོར། སྙན་སྒྲོན་ཞུས་པར་བརྟེན་དེ་དག་སོ་སོ་ནས་དོ་བདག་རང་ཉིད་ཀྱི་ཞུས་དོན་ལ་བརྟག་དཔྱད་ལེགས་པར་གནང་སྟེ་བདེན་པ་ར་སྤྲོད་ཀྱི་རྒྱབ་གཉེར་དམ་ཕྲུག་ཡོད་པའི་ཡིག་ཆ་གནང་བྱུང་བ་རྣམས་གཞིས་གྲོང་ཁག་ཏུ་འགྲེམ་སྤེལ་ཞུས་པ་ཡིན། དེར་བརྟེན་ངེད་ནང་མི་ཚོས་ཡིག་ཆ་དེ་འགྲེམ་སྤེལ་བྱས་ཏེ། ནམ་མཁའ་གཡའ་དག་དང་། ས་གཞི་རྡུལ་དག་གི་དཔེ་ལྟར། ང་ཚོས་ཉིན་མོ་བཙལ་ནས་མ་རྙེད་པར། ཁོང་ཚོས་མཚན་མོ་བཙལ་ནས་རྙེད་པའི་ལོང་གཏམ་མམ་འཆལ་གཏམ་དང་ཡང་ན་དཀྲོག་གཏམ་གཞི་མེད་ཀྱི་ཉམ་ཆུང་ལ་ཐུབ་ཚོད།མདོར་ན་རྒྱ་དམར་ཀླ་ཀློའི་དཔུང་གི་རྒྱུག་ཁྱིའི་བྱེད་སྟངས་དེ་མེད་པར་ཆགས་རྒྱུའི་རེ་བ་བྱས་པ་ཡིན། འོན་ཀྱང་སྟབས་མ་ལེགས་པ་ཞིག་ལ་ངེད་ཚོས་འགྲེམ་སྤེལ་ཞུས་པའི་ཡིག་ཆ་ཞིག དབྱིན་ཇི་སྐད་དུ་བྱས་ན། ནུབ་ཕྱོགས་ཤུགས་ལྡན་ཚོགས་པའམ་<<wisdombuddhadorjeshugden.blogspot.com>>ཟེར་བ་དེ་བོད་སྐད་དུ་བསྒྱུར་ན་ལྷ་རང་མགོ་མ་ཐོན་པར་མི་སྲུང་སྐྱོབས་བྱེད་དགོས་པའི་ཚོགས་པ་ཞེས་པ་དེས་ཡིག་ཆ་དཔར་ལོག་བརྒྱབ་སྟེ་རྫུན་མ་བཟོས་ནས་ཁོ་པ་ཚོའི་དྲ་རྒྱའི་ནང་བཞག་པ་མ་ཟད། བོད་ཡིག་དེའི་ནང་དོན་དབྱིན་ཇིའི་སྐད་དུ་འགྲེལ་བཤད་ལོག་པར་བརྒྱབ་ནས་ནུབ་ཕྱོགས་པའི་མི་རིགས་རྣམས་མགོ་སྐོར་བསླུ་བྲིད་གཏོང་རྒྱུའི་བསམ་ངན་བཅང་བའི་ཐོག་༧གོང་ས་སྐྱབས་མགོན་ཆེན་པོ་མཆོག་དང་བཙན་བྱོལ་བོད་གཞུང་ལ་ཡང་མཚན་སྨོད་ཞུས་འདུག་པ་དེར། ངེད་ནང་མི་ཡོངས་ཀྱིས་བློ་ཕམ་ཆེན་པོས་ཁོང་ཚོའི་བྱེད་སྟངས་དེ་ནི་རྒྱ་དམར་ཀླ་ཀློའི་དཔུང་གིས་ཁ་དོན་མི་མཐུན་པའི་བྱེད་སྟངས་དང་གཅིག་མཚུངས་སུ་ངོས་འཛིན་ཐོག་སླར་ཡང་བརྗོད་འདོད་པ་ཞིག་ལ་ངེད་ནང་མི་ལྟོས་བཅས་ཀྱིས་ཤ་ཟད་རུས་ལ་ཐུག་ཀྱང་ལོག་ལྟ་ཅན་ཁྱོད་ཚོ་ལྟ་བུ་དང་མཉམ་དུ་ཆོས་དང་ཟང་ཟིང་གི་འབྲེལ་བ་མི་བྱེད་པ་ཙམ་དུ་མ་ཟད། ཇི་སྲིད་སྐྱེ་བ་ནས་ཚེ་རབས་ཐམས་ཅད་དུ་ཁྱེད་ཚོ་དང་འབྲེལ་བ་མི་ཡོང་བའི་སྨོན་ལམ་རྒྱག་རྒྱུ་བཅས།

རྒྱ་གར་ལྷོ་ཕྱོགས་མོན་གྷོ་གཞིས་གྲོང་༤ ཁང་ཨང་༢༤ ནང་སྡོད་ཕ་བློ་བཟང་ཆོས་འབྱོར་ནང་མི་ཟུང་ནས། ཕྱི་ལོ་༢༠༡༠ ཟླ་༧ ཚེས་༢༨ ཉིན་གུས་ཕུལ།