ཆབ་སྲིད་ཀྱིས་གདན་སར་བཙན་འཛུལ།

ཆོས་པས་སྲིད་བསྐྱངས་པ་མང་དུ་བྱུང་ཡོད་ཅིང། བོད་སིལ་བུའི་སྐབས་ལྷ་བླ་མ་ཡེ་ཤེས་འོད་དང། ས་སྐྱའི་སྐབས་འགྲོ་མགོན་འཕགས་པས་སྲིད་བསྐྱངས་པ་དང་། ལྷག་པར་༧རྒྱལ་དབང་བདུན་པའི་དུས་སུ་བཀའ་ཤག་གསར་འཛུགས་མཛད་པའི་སྐབས་བཀའ་བློན་བླ་མ་ཞེས་པའི་བཀའ་བློན་གྲྭ་པ་ཞིག་བསྐོས་པ་ནས་བཟུང་སྟེ། བོད་དུའང་གྲྭ་པ་བླ་མས་སྲིད་ཀྱི་དབང་ཆ་འཛིན་པའི་སྲོལ་ངན་དེ་དར་ནས་ད་བར་བོད་ཀྱི་ཆབ་སྲིད་ཀྱི་དབང་ཆ་ཡོངས་རྫོགས་གྲྭ་པ་བླ་རྒན་ཚོས་ཁ་ལོ་བསྒྱུར་ཡོད་ལ། ཀུན་བདེ་གླིང་ཕུད་པའི་སྲིད་ཚབ་དང་སྲིད་སྐྱོང་གི་བླ་མ་གཞན་ཀུན་གྱིས་ཁྲག་དྲི་བྲོ་བའི་ཕྱག་ལས་གང་གནང་ཡོད་པ་ནི་འདས་པའི་ལོ་རྒྱུས་རྙིང་པ་འཚོལ་མི་དགོས་པར་ཉེ་བའི་ལོ་རྒྱུས་ལ་གཟིགས་ན་ཤེས་ཐུབ་པ་ཞིག་རེད།    བཙན་བྱོལ་གྱི་ནང་དུའང་། དགོས་དབང་གིས་གྲྭ་པ་བླ་མ་མང་པོ་ཞིག་གིས་ཆབ་སྲིད་ཀྱི་རྐུབ་སྟེགས་འཛིན་དགོས་བྱུང་ཡོད་ལ། རྐུབ་སྟེགས་དེའི་སྟེང་ནས་མཛད་རྗེས་ཀྱང་མང་དུ་བཞག་གནང་མཛད་ཡོད།  འོན་ཀྱང། བཙན་བྱོལ་གྱི་མི་འབོར་ཆིག་འབུམ་ལྷག་ཡོད་པའི་ནང་ནས། ཕོན་ཆེན་པོ་གཅིག་ནི་ལྷོ་ཕྱོགས་ཀྱི་གདན་ས་ཁག་ཏུ་ཡོད་ཅིང། སྤྱི་འཐུས་ཀྱི་འོས་ཐོབ་འདོད་མཁན་ཚོས་གདན་ས་ཁག་གཙོ་བོར་དམིགས་འབེན་བཟུང་ནས་འབྲེལ་གཏུགས་བྱེད་པས། གདན་སའི་གྲྭ་བཙུན་ཚོའི་རྒྱབ་སྐྱོར་ཞིག་ཐོབ་ན་སྤྱི་འཐུས་ཐོབ་ངེས་པ་ཡིན་པས། གདན་ས་ལ་འོས་ཤོག་གི་བང་མཛོད་ཅེས་བརྗོད་པ་དེ་དངོས་ཡོད་དུ་གྱུར་ཡོད།

བཀའ་སྤྱིའི་འོས་བླུག་ལ་ཉེ་བའི་སྐབས་ཆབ་སྲིད་ཀྱི་འཁྲབ་སྟོན་པ་མང་པོ་གདན་སར་གཅིག་རྗེས་གཉིས་མཐུད་ཀྱིས་ལུད་ཡོང་ལ། འོས་མིའི་སྦྱར་ཡིག་སྟོང་ཕྲག་མང་པོ་དཔར་ཏེ་གདན་སའི་སྲང་ལམ་དང་གྱང་ངོས་སུ་སྦྱར་འགོ་བཙུགས་ཤིང་། གྲྭ་བཙུན་ཚོ་ལ་རོགས་རམ་སོགས་གང་དགོས་གནང་ཁུལ་གྱིས་གྲྭ་བཙུན་ཚོའི་བློ་འགུག་ཐབས་གང་མང་བྱེད།
གདན་སའི་ཇ་ཁང་དང་། སྲང་ལམ་ཁག་གི་ནང་དུའང་། ཆབ་སྲིད་ཀྱི་གནད་དོན་གླེང་མཁན་ཤ་སྟག་ཡིན་ལ། གྲྭ་བཙུན་གཉིས་གསུམ་ཞིག་འཛོམས་ནའང་མ་འོངས་པའི་བཀའ་ཁྲི་དང་སྤྱི་འཐུས་ཀྱི་སྐོར་རྐྱང་རྐྱང་ཡིན། དེ་སྔོན་གདན་སའི་གྲྭ་པ་ཁ་ཤས་ཤིག་འཛོམས་ན་དཔེ་ཆའི་དཀའ་གནད་དང་། དེ་མིན་སློབ་སྦྱོང་གི་སྐོར་བཀའ་མོལ་གནང་བ་ལས་ཆབ་སྲིད་ཀྱི་སྐོར་འཆད་མཁན་ཤིན་ཏུ་དཀོན་ཞིང། དེ་འདྲ་འཆད་མཁན་འགའ་ཤས་ཡོད་པ་དེ་ཚོ་ལ། ཆབ་སྲིད་པ་ཞེས་ཟུར་ཟ་བྱས་པ་ང་ཆུང་ཆུང་ཡིན་པའི་སྐབས་མཐོང་མྱོང་།  དེང་གི་ཆར་ཀུན་གྱིས་ཆབ་སྲིད་ཀྱི་སྐོར་ལ་བསམ་གཞིག་དང་བཀའ་མོལ་མང་དུ་གནང་ཞིང། གྱང་ངོས་སུ་སྦྱར་ཡོད་པའི་རང་ཉིད་ཀྱི་མཐུན་ཕྱོགས་མིན་པའི་འོས་མིའི་དཔར་སོགས་ལ་ནོར་རྟགས་རྒྱག་པ་དང་བཀོག་པ་སོགས་མདོར་ན། ལྷིང་འཇགས་ལྡན་པའི་ཆོས་ཀྱི་གདན་ས་འདི་ཉིད་ཆབ་སྲིད་ཀྱི་ཡོ་ལང་འཕྱུར་སའི་དྷ་རམ་ས་ལའི་གྲོང་པ་བཞིན་དུ་གྱུར་པ་ནི་དོན་དམ་པའི་བློ་འཚབ་སྐྱེས་དགོས་པ་ཞིག་རེད་སྙམ།

དེ་སྔོན་བོད་དུ་གདན་ས་ཁག་གི་ནང་དུ་ཆབ་སྲིད་པ་ཡོད་ཀྱང། ཁ་ཤས་ལས་མེད། དེང་གི་ཆར་གདན་ས་འདི་ཆབ་སྲིད་ཀྱི་དམག་འཁྲུག་རྒྱག་ས་ཞིག་ཏུ་འགྱུར་བཞིན་པ་ཡིན་པས། ངས་ཆབ་སྲིད་ཀྱིས་གདན་སར་བཙན་འཛུལ་བྱེད་པ་ཞེས་བརྗོད་པ་ཡིན་ལ། བཙན་འཛུལ་དེ་འགོག་ཐབས་གང་ཡོད་ཀུན་གྱིས་བསམ་གཞིག་གནང་དགོས་པ་ཞིག་རེད་སྙམ།།

{jcomments on}