ངའི་སེམས་ནང་གི་བཀའ་ཁྲི་ཐུབ་བསྟན་ལུང་རིགས།

ཡོན་ཏན་དེ་དག་དང་ལྡན་པའི་གནམ་གྲུའི་ཁ་ལོ་བ་ལྟ་བུའི་གང་ཟག་དེ་སྐྱེས་པ་དང་བུད་མེད། རབ་བྱུང་ངུར་སྨྲིག་སྡེ་གང་འདྲ་ཞིག་ཡོང་མིན་མི་མང་སྒེར་སོ་སོར་རང་ཉིད་ཀྱི་ཕུགས་བསམ་དང་རེ་འདུན་ལྟ་ཕྱོགས་སོགས་རྒྱུ་རྐྱེན་དུ་མ་ཞིག་ལ་བརྟེན་ནས། ཁག་ཅིག་གིས་ཁྲིམས་ལུགས་དང་རྒྱ་བོད་དབར་གྱི་འབྲེལ་བར་མཁས་པ་མཁས་དབང་བློ་བཟང་སེང་གེ་འདེམས་དགོས། ལ་ལས་ཤེས་ཡོན་དང་ལྷག་བསམ་གཞིར་བཅས་ས་ཞིང་སྟེང་དུ་རྨོ་དངོས་སུ་རྒྱག་མྱོང་བའི་ཉམས་མྱོང་ཚད་མ་རྒྱུད་ལ་ལྡན་པའི་བཀའ་ཟུར་བཀྲས་མཐོང་བསྟན་འཛིན་རྣམ་རྒྱལ་དགོས། འགའ་ཤས་ཀྱིས་ཡོན་ཏན་དང་ལྷག་བསམ་དྲང་བདེན་ཐེག་པ་རིམ་འཛེགས་ཀྱིས་ཉམས་མྱོང་ཚད་མ་རྒྱུད་ལ་ཡོད་པ་གཞིར་བཅས་ད་ལྟའི་བཀའ་ཁྲི་མཁས་དབང་ཟམ་གདོང་རིན་པོ་ཆེའི་ཐུགས་ཀྱི་དགོངས་གཞི་བརྒྱ་ཆ་དགུ་བཅུ་ལོན་ཐུབ་པ་དང། ལྷག་པར་དུ་༧རྒྱལ་དབང་ཐམས་ཅད་མཁྱེན་པའི་དགོངས་བཅུད་ཀྱི་སྙིང་པོ། གཉིས་ཕན་དབུ་མའི་ལམ་གྱི་སྲིད་ཇུས་ལ་མཁྱེན་རྒྱ་ཡངས་ལ་ཡིད་ཆེས་དང་བློས་གཏོང་མཐའ་གཅིག་ཏུ་བྱེད་ཐུབ་མཁན་གྱི་བཀའ་བློན་ལས་ཐོག་པ་ཐུབ་བསྟན་ལུང་རིགས་ལྟ་བུ་ཞིག་ངེས་པར་དུ་སླེབས་དགོས་པའི་རེ་བ་སྐོམ་པ་ཆུ་འདོད་ལྟར་བྱེད་མཁན་ནི་ཉིན་རེ་ནས་ཉིན་རེ་མང་དུ་འགྲོ་བཞིན་འདུག

དེ་དག་ནི་མང་གཙོའི་གཞུང་ཚད་དང་ལྡན་པ་ཞིག་ལ་ཆ་མཚོན་ན་ངེས་པར་དུ་ཡོད་དགོས་པའང་ཡིན་ལ། དེ་རྣམས་ནི་མ་འོངས་པའི་བཀའ་བློན་ཁྲི་པ་དེ་རྣམ་པར་དག་བྱེད་ཀྱི་ཐབས་སམ་རྒྱུ་བླ་ན་མེད་པ་ཞིག་ཀྱང་ཡིན་ལ། དེ་བཞིན་དུ་མ་འོངས་བཀའ་ཁྲི་དེ་གལ་འགངས་ཆེན་པོ་ཡིན་པ་ནི་བརྙན་འཕྲིན་དང་རླུང་འཕྲིན་ཚགས་པར་སོགས་བརྒྱུད་ལམ་མི་འདྲ་བ་དུ་མ་ཞིག་ནང་ཐོན་དང་འཐོན་བཞིན་ཡོད་ཀྱང། རྒྱུ་དང་རྐྱེན་གནས་བབས་གང་འདྲ་ཞིག་ལ་ལྟོས་ནས་གལ་ཆེན་ཡིན་པ་གླེང་མཁན་ནི་ཅུང་དཀོན་པར་བརྟེན། མཚམས་དེར་ཁོ་བོའི་གལ་ཆེན་པོ་དང་དོན་ཆེན་པོ་ཡིན་པའི་རྒྱུ་རྐྱེན་ཚན་པ་བཅུར་དབྱེ་ནས་འཆད་འདོད།

༡༽ རྒྱལ་དབང་ཐམས་ཅད་མཁྱེན་པའི་དགུང་ལོའི་བབ་དང་དུས་ཀྱི་འགྱུར་གྲོས། ༢༽ ཉིས་སྟོང་བརྒྱད་ལོར་དམིགས་བསལ་ཚོགས་ཆེན་སྐབས་བོད་གཞུང་མང་གཉིས་ཀྱིས་གྲོས་ཆོད་ཟིན་པ་ལྟར་བཙན་བྱོལ་བོད་གཞུང་གི་ཆབ་སྲིད་བཞེངས་ཕྱོགས་དང་༧གོང་ས་ཆེན་པོའི་ཐུགས་ཀྱི་བཞེད་དགོངས་མཐར་ཐུག་པ་བོད་དོན་བདེན་མཐའ་གསལ་བའི་ཐབས་བླ་ན་མེད་པ་གཉིས་ཕན་དབུ་མའི་ལམ་གྱི་ཁྱད་ཆོས་དང་ཡོན་ཏན་འཛམ་གླིང་གོ་ལ་ཧྲིལ་པོའི་ནང་འོད་སྟོང་འབར་བཞིན་པ། ༣༽ རྒྱ་བོད་འབྲེལ་མོལ་མཐུད་ཐུབ་པ་མ་ཟད་ཞི་མོལ་དབུ་ཚུགས་ནས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་དབང་འཛིན་པ་རྣམས་ཀྱི་སྒྲོ་འདོགས་དང་རྣམ་རྟོག་ཇི་སྙེད་ཅིག་རང་སར་ཞི་བ་དང་ལྷན་དུ་དེ་དག་དང་འབྲེལ་བའི་གྲུབ་འབྲས་མི་ཉུང་བ་ཞིག་ཐོབ་བཞིན་པ་དང༌། ༤༽ རྒྱ་ནག་སྐམ་ས་ཆེན་མོའི་རྒྱ་རིགས་གཙོ་བོར་གྱུར་པའི་རྒྱ་རིགས་རྩོམ་པ་པོ་དང་མང་གཙོ་དོན་གཉེར་བ། སྲིད་དོན་དབྱེ་ཞིབ་པ། ཕྱི་རྒྱལ་མཐོ་སློབ་ཁག་ཏུ་སློབ་གྲྭར་བསྐྱོད་བཞིན་པའི་སློབ་མ་དང་མི་མང་དཀྱུས་མ་རྣམས་ཀྱི་ཁྲོད་༧རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་ལ་དད་གུས་དང་ཡིད་ཆེས། ཁོང་གིས་འདོན་གནང་མཛད་པའི་རྒྱ་བོད་དཀའ་རྙོག་སེལ་བའི་ཐབས་བཟང་གཉིས་ཕན་དབུ་མའི་ལམ་ལ་ཤེས་ནས་དད་པ་དང་ཁ་ཞེ་གཉིས་མེད་ཀྱིས་རྒྱབ་སྐྱོར་ཐོབ་བཞིན་པའི་གནས་སྐབས་དང༌། ༥༽ ཨ་རི་གཙོ་བོར་གྱུར་པའི་ནུབ་ཕྱོགས་རྒྱལ་ཁབ་རྣམས་ཀྱིས་བོད་དོན་ལ་སེམས་ཁུར་དང་གཞིས་ལུས་རྒྱ་ཆེའི་མི་མང་བཟོད་པར་དཀའ་བའི་དཀའ་སྡུག་ལ་གདུང་སེམས་མཉམ་བསྐྱེད་དང། དྷ་ས་དང་པེ་ཅིང་བར་གྱི་ཞི་མོལ་ལ་མཚམས་སྦྱོར་ལམ་བཟང་འདོམས་པའི་དུས་དང་། ༦༽ གཞིས་ཆགས་སྲ་བརྟན་དང་མི་རིགས་མཉམ་གནས་ཡོང་ཐབས་ཀྱི་ལས་གཞི་སོ་ནམ་ཞིང་ལས་དང། དེ་ཙམ་མ་ཟད་སྲོལ་རྒྱུན་འདེབས་ལས་ད་ལྟ་ལྷོ་ཕྱོགས་གཞིས་ཆགས་ཁག་ནང་དངོས་སུ་ལག་བསྟར་བྱེད་བཞིན་པ་འདི་རྒྱུན་གནས་འཚོ་ཐབས། ༧༽    ཤེས་ཡོན་སྲིད་ཇུས་ཀྱི་སློབ་གསོའི་བྱ་གཞག་གཏན་འབེབས། ༨༽ བཙན་བྱོལ་བོད་གཞུང་གི་མ་དངུལ་གཅེས་སྤྲས་དང་ད་ལྟ་ཉམས་ལེན་བྱེད་བཞིན་པའི་དཔལ་འབྱོར་བསྲི་ཚགས་ལམ་ལུགས་རྒྱུན་རིང་གསོན་པོར་གནས་ཐབས། ༩༽ གཞིས་བཞུགས་བོད་རིགས་སྤུན་ཟླ་རྣམས་ཀྱི་བདེ་འཇགས་དང་ཁོར་ཡུག་སྲུང་སྐྱོབ། ༡༠༽ ད་ལྟའི་བཀའ་ཁྲི་ལས་ཐོག་པ་མཁས་དབང་ཟམ་གདོང་རིན་པོ་ཆེའི་དགོངས་གཞི་ལ་ཡོད་པ་ལྟར་དུས་ཚོད་ཀྱི་རྐྱེན་པས་བསྒྲུབ་མ་ཐུབ་པའི་ལས་དོན་ཆེ་ཕྲ་གང་མང་ཞིག་ལ་སོགས་པའི་གོང་སྨྲོས་ལས་དོན་གལ་ཆེན་ཁག་བདག་ཅག་གངས་ཅན་པ་རྣམས་ཀྱིས་ཡིད་ལ་བཅངས་ནས་ཆོལ་ཁའི་འཐེན་ཁྱེར་དང་ཆོས་ལུགས་རྨོངས་ཞེན་དོར་ནས་གོང་གསལ་ལས་དོན་དེ་དག་བསྒྲུབ་པ་ལ་མཁྱེན་རྒྱ་དང་ནུས་པ་ལྡན་པ། དུས་ནས་དུས་སུ་གོང་གསལ་ལས་དོན་དེ་དག་བསྒྲུབ་པ་ལ་མཁྱེན་རྒྱ་དང་ནུས་པ་ལྡན་པ་ཙམ་དུ་མ་ཟད། དུས་ནས་དུས་སུ་༧གོང་ས་མཆོག་ལ་སྙན་གསན་འབུལ་ཐུབ་མཁན་དང༌། ལྷག་པར་དུ་ད་ལྟའི་བཀའ་བློན་ཁྲི་པ་མཁས་དབང་ཟམ་གདོང་རིན་པོ་ཆེ་ལ་བཀའ་སློབ་ལམ་སྟོན་དུས་དང་རྣམ་པ་ཀུན་ཏུ་ཞུ་ཐུབ་མཁན་གྱི་མི་སྣ་ཞིག་བསྲེགས་བཅད་བརྡར་གསུམ་སྔོན་དུ་སོང་བའི་སྒོ་ནས་ད་ལྟ་ནས་འཚོལ་དགོས་ལ། དེ་ལྟར་བྱུང་ཚེ། གནའ་བོའི་གཏམ་དཔེར། བྱ་མ་དཀྲོགས་པར་སྒོ་ང་ལེན་ཞེས་པ་ལྟར། བཅའ་ཁྲིམས་ལ་བསྒྱུར་བཅོས་མི་དགོས་པར་ང་ཚོ་གངས་ཅན་པ་རྣམས་ཀྱི་འཕྲལ་ཕུགས་རྒྱང་གསུམ་གྱི་དོན་རྣམས་༧རྒྱལ་དབང་ཐམས་ཅད་མཁྱེན་པ་སྐུ་འཚོ་བཞུགས་སྐབས་འདིར་བསྒྲུབ་པ་ལ་ཐེ་ཚོམ་མེད་པ་དང་རྒྱལ་བ་དགྱེས་པའི་མཆོད་སྤྲིན་འབུལ་ཐུབ་པ་མ་ཟད་གཞིས་ལུས་སྤུན་ཟླ་རྣམས་བཟོད་པར་དཀའ་བའི་དམྱལ་བ་བོད་ཡུལ་དུ་འཕོས་པ་ལྟ་བུའི་དཀའ་སྡུག་ལས་མྱུར་དུ་སྐྱོབ་པའི་ལས་དོན་མང་པོ་ཞིག་མ་འོངས་བཀའ་བློན་ཁྲི་པའི་ཕྲག་སྟེང་དུ་ཡོད་པས་གལ་ཆེན་ལ་གལ་ཆེན་དང་དོན་ཆེན་ལ་དོན་ཆེན་དུ་གཟིགས་ནས་སླེབས་ལ་ཉེ་བའི་སྔོན་འགྲོའི་འོས་བསྡུ་སོགས་ལ་ཆེ་བཞག་ཆུང་བསྐྱུར་བྱས་ནས་མཉམ་ཞུགས་དང་རྒྱལ་དབང་ཡིད་བཞིན་ནོར་བུས་མང་གཙོའི་ཐོབ་ཐང་ཇི་ལྟར་བསྩལ་བ་བཞིན་ངེས་པར་དུ་ལོངས་སྤྱོད་ཡོང་བར་ཐུགས་རྗེས་གཟིགས། ཞར་བྱུང་དུ་ལེགས་བཤད་ལས། གཞན་ལ་ལྟ་བའི་མིག་ཡོད་ཀྱང༌། །རང་ཉིད་ལྟ་ན་མེ་ལོང་དགོས། ཞེས་གསུངས་པ་ལྟར། ཁྱོད་ལ་དེ་ལྟ་བུའི་ནུས་པ་ལྡན་པའི་མ་འོངས་བཀའ་བློན་ཁྲི་པ་གྲ་སྒྲིག་ཡོད་དམ་ཞེ་ན། ཁོ་བོའི་སེམས་ནང་གི་མ་འོངས་པའི་བཀའ་བློན་ཁྲི་པ་གོང་སྨྲོས་ཀྱི་ཁྱད་ཆོས་སམ་ཡོན་ཏན་ཡོངས་སུ་རྫོགས་པའི་མི་རྗེ་བཀའ་བློན་ཐུབ་བསྟན་ལུང་རིགས་མཆོག་ཡིན་ལ། ཁོང་ནི་ཤེས་ཡོན་དང་ལྷག་བསམ་ཉམས་མྱོང་སོགས་གཞོན་སྐྱེས་ཤེས་ཡོན་ཅན་རྣམས་ཀྱི་གཙུག་རྒྱན་དུ་གྱུར་པ་ཡིན་པས། ང་ཚོ་གངས་ཅན་པ་རྣམས་ཀྱི་དུས་ཚོད་དེ་ལྟ་བུ་ཞིག་ལ་ཁོང་ལ་ཡིད་ཆེས་དང་རེ་བ་མཐའ་གཅིག་ཏུ་བཅོལ་ནས་འོས་འཕེན་པའི་སྐབས་ནུས་པ་གཅིག་ཏུ་སྤུངས་ནས་ཁོང་བཀའ་ཁྲི་ཕེབས་ཐུབ་པའི་རེ་བ་ལན་བརྒྱར་ཞུ།
ཨེམ་རྗེ་བློ་བཟང་ཤེས་རབ་ཀྱིས་སེར་སྨད་ནས།

{jcomments on}