ངའི་སེམས་ཀྱི་བཀའ་ཁྲི་བློ་བཟང་སེང་གེ།

སྤྱི་འཐུས་ཀྱང་མི་མང་གིས་ཐད་ཀར་འོས་འདེམས་ཀྱིས་བསྐོ་བཞག་བྱེད་བཞིན་པའི་ལས་འཆར་རྣམས་ནི་དགའ་བ་དང་བསྟོད་བསྔགས་བྱེད་འོས་པའི་ལས་བྱ་བཟང་པོ་ཞིག་ཅིའི་མ་ཡིན། འོན་ཀྱང་མང་གཙོའི་གོ་རྟོགས་དམན་ཞིང་ཕྱོགས་ལྷུང་གི་བག་ཆགས་ཟབ་པའི་ང་ཚོས་དྲང་ཚུགས་དང་སྒམ་དཀྱེལ་གྱིས་མང་གཙོའི་ཁེ་དབང་ཡང་དག་པ་ཞིག་བེད་སྤྱོད་བྱེད་ཐུབ་མེད་པ་ནི་བློ་ཕམ་དགོས་པའི་གནས་ཚུལ་ཐབས་སྡུག་ཅིག་རེད།

ང་ཚོས་༢༠༡༡ ལོའི་བཀའ་ཁྲི་འཚོལ་ཞིབ་ཀྱི་གོ་རིམ་ཁྲོད་དུ་དྲང་ཚུགས་དང་ལྷག་བསམ་གྱིས་འགོ་བཙུགས་ཏེ་བཀའ་ཁྲི་འཚོལ་བའི་མིག་ཕྱེ་དགོས་པ་ནི་མ་འོངས་པའི་བཀའ་ཁྲི་ཡང་དག་པ་ཞིག་རྙེད་ཐུབ་མིན་གྱི་གནད་འགག་ངོ་མ་དེ་ཡིན། འདས་པའི་ཟླ་ཤས་ཀྱི་རིང་ང་ཚོས་བཀའ་ཁྲི་འཚོལ་ཞིབ་ཀྱི་ལས་རིམ་ལ་ཕྱིར་བལྟ་བྱེད་སྐབས་ཧ་ཅང་ཚད་མཐོ་བའི་ཆ་རྐྱེན་གང་མང་ཞིག་ཡིད་ངོར་བཀོད་དེ་ཆ་རྐྱེན་དེ་ཚང་བའི་གང་ཟག་ཅིག་མ་རྙེད་པར་ཨུ་ཐུག་གི་གནས་སུ་གྱར་བ་ལྟ་བུའི་ཚོར་སྣང་བསྟུད་མར་བྱུང། དེ་ནི་ང་ཚོས་བཀའ་ཁྲི་འཚོལ་ཞིབ་ཀྱི་གོམ་སྟབས་དང་པོ་དེ་ནོར་འཁྲུལ་གྱི་ཕྱོགས་སུ་སྤོས་པ་དང་ཀུན་ནས་མཚུངས། བཀའ་བློན་ཁྲི་པ་ནི་ཁྲིམས་བཟོ་ལྷན་ཚོགས་ཀྱིས་གཏན་འབེབས་བྱས་པའི་ལས་འཆར་རྣམས་ལག་བསྟར་བྱེད་མཁན་ཡིན་གྱི་ཆབ་སྲིད་དང་ཛ་དྲག་གི་གནས་ཚུལ་ཐག་གཅོད་བྱེད་མཁན་ཞིག་མིན། བོད་རྒྱའི་འབྲེལ་མོལ་དང་། རང་སྲིད་རང་སྐྱོང་གི་གནས་བབ། བོད་ཀྱི་མ་འོངས་པའི་ཆབ་སྲིད་ཀྱི་གནད་དོན་སོགས་ཀྱང་༸གོང་ས་མཆོག་གིས་བླང་དོར་སློབ་སྟོན་དང། ཁྲིམས་བཟོ་ལྷན་ཚོགས་ཀྱི་དགོངས་འཆར་ལ་བསྟུན་ནས། ཐག་གཅོད་བྱེད་དགོས་པས་བཀའ་ཁྲི་འཇོན་ཐང་ཅན་ཞིག་གི་སྒེར་གྱི་ལྟ་གྲུབ་དང་རྒྱ་སྐད་ཤེས་མིན། རྒྱ་མིའི་ཆབ་སྲིད་ཀྱི་གནས་བབ་ཤེས་མིན་ལ་དེ་ཙམ་གྱི་རག་ལས་པ་ཞིག་རྩ་བ་ནས་མ་རེད། དེས་ན་བཀའ་ཁྲི་གསར་པས་རྒྱ་སྐད་ཤེས་དགོས། རྒྱ་ནག་གི་ཆབ་སྲིད་གནས་བབ་ཤེས་དགོས། དབུ་མའི་ལམ་གྱི་ལྟ་གྲུབ་ལ་ཡིད་ཆེས་དང་མོས་པ་མཐའ་ཅིག་ཏུ་ཡོད་དགོས་ཞེས་ཆ་རྐྱེན་འདི་དག་བཀའ་ཁྲི་གསར་པར་ངེས་པར་དུ་ཡོད་དགོས་པའི་བསམ་ཚུལ་དེ་ཡང་རྒྱུ་མཚན་དང་གནད་འགག་ཡོད་པའི་བསམ་ཚུལ་ཡང་དག་པ་ཞིག་ཏུ་མ་མཐོང་།

བོད་རྒྱའི་འབྲེལ་མོལ་དང་། རང་སྲིད་རང་སྐྱོང་གི་དགོས་འདུན། གཞིས་བྱེས་མཉམ་འཛོམས་ཀྱི་ཕུགས་རེ་སོགས་མངོན་འགྱུར་ཡོང་མིན་ནི་རྒྱལ་སྤྱི་དང་རྒྱ་ནག་གི་ཆབ་སྲིད་འགྱུར་འགྲོས་དང་ང་ཚོའི་འབད་བརྩོན་ཐུན་མོང་ལ་ལྟོས་པ་ཡིན་གྱི། བཀའ་བློན་ཁྲི་པ་གཅིག་པུས་བྱེད་ཐུབ་པ་དང་བསྒྲུབ་ནུས་པའི་གནད་དོན་ཞིག་ག་ལ་ཡིན། ང་ཚོས་ངང་རྒྱུད་རིང་པོས་བཙན་བྱོལ་བོད་གཞུང་མང་གཙོ་ཡང་དག་པ་དང་ཁྲིམས་ལུགས་ཡང་དག་པ་ཞིག་གིས་དབང་བསྒྱུར་བའི་གཞུང་ཚད་ལྡན་ཞིག་ཏུ་བསྒྱུར་ཏེ་ཡུན་དུ་གནས་ཐབས་བྱ་རྒྱུ་དང་ཤེས་ཡོན་དང་ལ་རྒྱ་ཅན་གྱི་བཙན་བྱོལ་བའི་དཔུང་སྡེ་ཞིག་བསྐྲུན་ཏེ་འཐབ་རྩོད་ཀྱི་ནུས་ཤུགས་རྒྱུན་མཐུད་བྱེད་རྒྱུ་ནི་བཀའ་ཁྲི་གསར་པའི་མིག་མདུན་གྱི་ལས་འགན་ངོ་མ་དེ་ཡིན། དགོས་ངེས་ཀྱི་ཆ་རྐྱེན་གཅིག་ནི་བཀའ་ཁྲི་གསར་པ་དེ་ངེས་པར་དུ་གཞོན་སྐྱེས་ཤིག་ཡིན་དགོས། རྒྱུ་མཚན་ནི་བོད་ཀྱི་ཆབ་སྲིད་འཐབ་རྩོད་དེ་བོད་ཀྱི་གཞོན་སྐྱེས་ཚོར་རྩིས་སྤྲོད་བྱེད་པའི་དུས་ལ་བབ་ཡོད། ལྷག་བསམ་དང་ཤེས་འཇོན་ཅན་གྱི་རྒན་རབས་པ་ཚོས་ད་ལྟ་བར་དུ་ངལ་བ་ཁྱད་བསད་ཀྱིས་བོད་ཀྱི་བདེན་པའི་འཐབ་རྩོད་ཀྱི་ཕྱོགས་ལ་བྱས་རྗེས་རླབས་ཆེན་བཞག་དང་འཇོག་བཞིན་ཡོད་མོད། ཁོང་རྣམ་པ་སྐུ་འཚོ་བཞུགས་རིང་ཁོང་རྣམ་པའི་གཞི་རྩའི་སློབ་སྟོན་འོག་རྣམ་དཔྱོད་དང་ཤེས་འཇོན་ཅན་གྱི་གཞོན་སྐྱེས་ཚོར་ཉམས་མྱོང་དང་འཇོན་ཐང་ངོམ་དུ་བཅུག་དགོས་ལ་ཤེས་འཇོན་གཉིས་ལྡན་གྱི་གཞོན་སྐྱེས་ཚོས་ཉམས་མྱོང་དང་འཇོན་ཐང་ངོམ་སྟེ་བོད་ཀྱི་བདེན་པའི་འཐབ་རྩོད་ཀྱི་མཇུག་མཐུད་བྱེད་པའི་རྣམ་པ་དེ་ནི་རྒན་རབས་པ་ཁོང་ཚོས་ཡང་ཡང་རྨིས་མྱོང་བའི་རྨི་ལམ་དགའ་སྣང་ཅན་ཞིག་ཡིན། བོད་ཀྱི་གཞོན་སྐྱེས་ཚོས་ཆབ་སྲིད་ཀྱི་འགན་དབང་བླངས་ཏེ་ཆབ་སྲིད་འཐབ་རྩོད་ཀྱི་འགོ་ཁྲིད་པ་དེས་སྡུག་གྱོང་མནར་གཅོད་གང་ཞིག་ཕོག་པའི་མི་རབས་རྒན་པ་ཚོ་མཇུག་རྫོགས་རྗེས་ཕྱི་དངོས་པོའི་ཁྲ་ཁྲ་ཟང་ཟིང་ཅུང་ཙམ་ཞིག་གིས་གཞོན་སྐྱེས་ཚོ་བསླུ་ཐབས་བྱེད་ནུས་སྙམ་པའི་ཆབ་སྲིད་ཀྱི་བསམ་བློ་དང། ཏྭ་ལའི་བླ་མས་གཙོས་སྔོན་མ་བོད་གཞུང་གི་ལས་གནས་དང་རྐུབ་སྟེགས་ཅན་གྱི་རྒན་རབས་པ་ཚོར་གོ་གནས་དང་ཁེ་དབང་སླར་གསོ་བྱས་ན་བདེན་དོན་གྱིས་ཕྱུག་པའི་བོད་ཀྱི་རྒྱལ་རབས་ལོ་རྒྱུས་རྫུན་བཟོ་བྱེད་ཐུབ་པའི་རྨི་ལམ་སྒོམ་མཁན་ཚོར་མངོན་གསལ་མ་ཡིན་པའི་གོ་བརྡ་ཐེངས་གཅིག་སྤྲད་པའང་ཡིན། འདི་ནི་ལོ་རྒྱུས་དང་ཆབ་སྲིད་ཀྱི་ངོས་ནས་བཀའ་ཁྲི་གསར་པ་གཞོན་སྐྱེས་ཤིག་གིས་བྱེད་དགོས་པའི་གཏན་ཚིགས་ཡིན། སྐབས་གཉིས་པའི་བཀའ་བློན་ཁྲི་པའི་འོས་བསྡུའི་གྲུབ་འབྲས་གསལ་བསྒྲགས་བྱས་རྗེས་གསར་འགོད་པ་ཞིག་གི་དྲིས་ལན་དུ་༸གོང་ས་མཆོག་གིས་འདི་ལྟར་གསུང་མྱོང། ངས་བཀའ་ཁྲི་གསར་པ་དེ་གཞོོན་སྐྱེས་ཤེས་འཇོན་ཅན་ཞིག་ལ་རེ་བ་བྱས་ཀྱང་སྟབས་མ་ལེགས་པ་ཞིག་ལ་བླ་རྒན་མགོ་དཀར་དེ་ཡང་བསྐྱར་བདམས་འདུག ཅེས་བཀའ་ཁྲི་གསར་པ་དེ་གཞོན་སྐྱེས་ཤིག་ལ་ཐུགས་རེ་གནང་བའི་གསལ་ཁ་གནང་འདུག དེས་ན་བོད་ཀྱི་ཆབ་སྲིད་ཀྱི་དབུ་ཁྲིད་གཞོན་སྐྱེས་ཤེས་འཇོན་ཅན་ཞིག་གིས་བྱེད་རྒྱུ་ནི་བསམ་བློ་ཅན་གྱི་མི་རབས་རྒན་པ་ཚོའི་ཐུགས་རེ་ཡིན་ལ། ལྟ་གྲུབ་ཅན་གྱི་མི་རབས་གསར་པ་ཚོའི་བསམ་འདུན་ཡང་ཡིན། དེས་ན་ངའི་སེམས་ཀྱི་བཀའ་ཁྲི་ནི་དུས་རབས་གསར་པའི་གཞོན་སྐྱེས་ཤེས་ཡོན་ཅན་བློ་བཟང་སེང་གེ་ལགས་ཡིན་ལ། ཁོང་ལ་མ་འོངས་པའི་བོད་ཀྱི་ཆབ་སྲིད་དབུ་འཁྲིད་བྱེད་པའི་ཆ་རྐྱེན་ཡོངས་སུ་ཚང་ཡོད། བོད་རྒྱལ་ལོ། བོད་ཀྱི་བདེན་པའི་འཐབ་རྩོད་རྒྱལ་ལོ། སེམས་ཀྱི་བཀའ་ཁྲི་བློ་བཟང་སེང་གེ་རྒྱལ་ལོོ།།

སེར་ཤུལ་རིན་ཆེན་དོན་གྲུབ་ཀྱིས་ལྷོ་ཕྱོགས་ནས།

{jcomments on}