སྤྱི་འཐུས་འོས་འདེམས་ནང་དྭངས་བླངས་ཀྱིས་ཞུགས་རྒྱུ་ཡིན།

གུས་པའི་ཡབ་ནི་མདོ་ཁམས་བསྟན་པའི་སྒྲོན་མེ་རྒྱལ་བ་འཕགས་པ་ལྷའི་རིགས་ཀྱི་ཅོད་པཎ་ཌི་ཏ་དམ་པ་ངེས་དོན་གྱི་རྡོ་རྗེ་འཆང་ཆེན་པོ་ཡོངས་འཛིན་ཐུབ་བསྟན་དམ་པ་དཔལ་བཟང་པོ་མཆོག་ཡིན། བླ་མ་འདི་ནི་བོད་མི་རིགས་ཀྱི་རིགས་གཞུང་མི་ཉམས་གོང་འཕེལ་དང་ཉམས་པ་སླར་གསོ་གནང་མཁན་དང་། ཁམས་ཁུལ་དུ་ཆོས་སྒོ་དང་པོ་སྤེལ་ཐུབ་མཁན་ཞིག་ཡིན་པ་མ་ཟད་མང་ཚོགས་དང་གྲལ་རིམ་བུ་ཕྲུག་རྣམས་དང་བླ་སྤྲུལ་རྣམས་ལ་སུམ་རྟགས་དང་སྙན་ངག་སློབ་ཁྲིད་ལོ་མང་གནང་ནས་སློབ་མ་གྲངས་ལས་འདས་པ་བོད་དུ་བྱུང་ཡོད།

གུས་པ་བློ་བཟང་དོན་གྲུབ། སྐྱེ་ཡུལ་ལྷ་ས། མི་ཁོངས་ཁྱུང་པོ་སྟེང་ཆེན། སྐྱེ་ཚེས་ ༡༩༦༤ ཟླ་༡༡ པའི་ཚེས་༡༨ ཉིན་སྐྱེས། དེ་ཡི་སྐབས་སུ་བོད་ནང་རིག་གནས་གསར་བརྗེ་ཆེན་མོའི་ལས་འགུལ་སྤེལ་འགོ་བཙུགས་ཙམ་ཡིན། རང་ཉིད་ལོ་ན་དྲུག་ཏུ་སླེབས་དུས་ལྷ་ས་གྲོང་ཁྱེར་སློབ་ཆུང་དང་པོ་༼དེ་སྔོན་གྱི་མིང་ཟས་ཞིང་༽ སློབ་གྲྭར་བསྐྱོད་པ་ཡིན། སློབ་ཆུང་ཐོན་རྗེས་ལྷ་ས་གྲོང་ཁྱེར་སློབ་འབྲིང་ཨང་དང་པོར་བསྐྱོད་པ་ཡིན། སློབ་འབྲིང་ཐོན་རྗེས་ང་ཚོའི་ཁྱིམ་གྱི་འཚོ་བ་ཧ་ཅང་ཞན་པས་ ༡༩༨༠ ལོར་བཅིངས་གྲོལ་དམག་ནང་འཛུལ་ནས་ལོ་བཞིའི་རིང་བསྡད་པ་ཡིན། རྗེས་སུ་ང་ཚོའི་ནང་མིའི་མངའ་བདག་གྲལ་རིམ་གྱི་ཞྭ་མོ་ཕུད་པ་རེད།  དེ་ནས་སླར་ཡང་ཡབ་དམ་པའི་བཀའ་དྲིན་གྱི་བོད་རང་སྐྱོངས་ལྗོངས་ཆབ་སྲིད་གྲོས་ཚོགས་ནང་ཞུགས་ནས་༡༩༨༨ ལོར་པེ་ཅིང་དུ་རྒྱལ་ཡོངས་མི་མང་འཐུས་མི་ཚོགས་ཆེན་སྐབས་གསུམ་པའི་ནང་ང་རང་གི་ཡབ་དམ་པ་མཉམ་དུ་ཞུགས་རྒྱུ་བྱུང་། དེ་ནས་༡༩༨༩ ཟླ་༡༢ པའི་ཚེས་༡༠ ཉིན་ལས་ཁུངས་ཀྱི་མི་རྣམས་བསྡུ་འཛོམས་བྱས་ནས་ ༧ གོང་ས་མཆོག་ལ་འཛམ་གླིང་ཞི་བདེའི་གཟེངས་རྟགས་ཕུལ་བ་དེ་ལ་རྟེན་འབྲེལ་ཞུ་རྒྱུ་བྱུང།   ༡༩༩༢ ལོར་ང་དང་གཟའ་ཟླ་བལ་ཡུལ་དུ་སྐྱབས་བཅོལ་དུ་མི་ཡོང་ཀ་མེད་བྱུང་། དེ་ནས་བལ་ཡུལ་སྣེ་ལེན་ཁང་བརྒྱུད་ནས་དྷ་རམ་ས་ལར་ཕྱིན་པ་ཡིན། ང་རང་གི་བསམ་དོན་དང་སྨོན་ལམ་རེ་སྒུག་བཅས་ལྷུན་གྱིས་འགྲུབ་ནས་༼བོད་ཀྱི་དབུ་ཁྲིད་བླ་ན་མེད་པ་༧ གོང་ས་ལྷ་མའི་རྣམ་འདྲེན་རྒྱལ་མཆོག་སྐུ་ཕྲེང་བཅུ་བཞི་པ་༽ ཞལ་མཇལ་དང་གསུང་ཐོས་བྱུང་ནས་སླར་ཡང་བལ་ཡུལ་དུ་ཕྱིར་ལོག་ཡོང་བ་ཡིན། ༡༩༩༢ ལོ་ནས་བཟུང་བལ་ཡུལ་གཞུང་གི་རྒྱལ་སྤྱིའི་སྐད་ཡིག་མཐོ་རིམ་སློབ་གྲྭ་ཆེན་མོའི་ནང་བོད་ཀྱི་སྐད་ཡིག་གི་དགེ་རྒན་བྱེད་དང་བྱེད་མུས་ཡིན།

༢༠༠༨ ཕྱི་ཟླ་༡༡ ཚེས་༡༧ ནས་༢༢ བར་བཙན་བྱོལ་བོད་མིའི་བཅའ་ཁྲིམས་དོན་ཚན་ང་དགུ་པའི་འོག་དམིགས་བསལ་ཚོགས་ཆེན་ཐེངས་དང་པོའི་སྐབས་སུ་དགའ་སྤྲོའི་ངང་ནས་ཚོགས་ཞུགས་བྱ་རྒྱུ་བྱུང་བ་མ་ཟད། བལ་ཡུལ་དུ་ཕྱིར་འབྱོར་མ་ཐག་ཚོགས་ཆེན་གྱི་སྙིང་དོན་དང་གྲོས་འགོ་རྣམས་དྭངས་བླངས་ངང་ནས་མ་དངུལ་བཏོན་དེ་མང་ཚོགས་ལ་འགྲེམས་སྤེལ་དྲིལ་བསྒྲགས་བྱས་པ་ཡིན།  ༢༠༡༠ ལོར་སླར་ཡང་བལ་ཡུལ་གཞུང་གིས་ཆོག་མཆན་ཐོབ་ནས་ཧི་མ་ལ་ཡ་རིགས་གཞུང་སློབ་གསོ་ལྟེ་གནས་ཁང་བསྐྲུན་ནས་ཚོགས་པ་འདིའི་ཚོགས་གཙོའི་ལས་འགན་ཁུར་ཡོད་པར་མ་ཟད། བོད་ཡིག་དང་རྒྱ་ཡིག་བལ་ཡིག་བཅས་སློབ་སྦྱོང་བྱེད་ཡུལ་གྱི་སློབ་གྲྭ་ཆུང་ཆུང་ཞིག་ཀྱང་བཙུགས་ཡོད། དེ་འཛུགས་དགོས་པའི་དམིགས་ཡུལ་ནི། ཧི་མ་ལ་ཡ་རི་རྒྱུད་དུ་གནས་སྡོད་མི་རིགས་མང་པོ་ཞིག་གྲོང་ཁྱེར་ནང་གནས་སྤོ་བྱས་ནས་རང་མི་རིགས་ཀྱི་སྐད་ཡིག་ཉམས་ཆག་འགྲོ་བཞིན་ཡོད་པར་བརྟེན། དེའི་ཆེད་ཚོགས་པ་འདི་གསར་འཛུགས་བྱས་པ་ཡིན།  བོད་མི་རིགས་དང་ཧི་མ་ལ་ཡའི་མི་རིགས་རྣམས་ང་རང་གི་ངོས་ནས་ནང་པ་སངས་རྒྱས་པ་ཡིན་པ་ངོས་འཛིན་གཅིག་པ་བྱེད་བཞིན་ཡོད།

དང་པོ།  ང་རང་གི་ཆོད་སེམས་ནི། ལྷག་བསམ་རྣམ་དག་གི་སྒོ་ནས་མི་མང་གི་རེ་བ་སྟོང་ཟད་དུ་མི་འགྲོ་བ་བྱེད་རྒྱུ།  གཉིས་པ། ང་རང་གི་དམིགས་ཡུལ་ནི། བོད་ནང་དུ་ཡོད་པའི་བོད་མི་རྣམས་ཀྱི་རེ་བ་དང་བསམ་ཚུལ་ཤེས་ཐུབ་པ་བྱེད་རྒྱུ། གསུམ་པ། ང་རང་གི་ཕུགས་བསམ་ནི། བོད་མིའི་དྲང་བདེན་དང་དངོས་ཡོད་གནས་ཚུལ་རྣམས་རྒྱ་ནག་མི་མང་ལ་ངོ་སྤྲོད་བྱེད་ཐུབ་པ་མ་ཟད་ཕན་ཚུན་བསམ་ཚུལ་སྤེལ་རེས་ཀྱིས་ཟམ་བཟང་ཞིག་འཛུགས་ཐུབ་པ་བྱེད་རྒྱུ་དང་ཧི་མ་ལ་ཡའི་རི་རྒྱུད་ཀྱི་སྐད་ཡིག་ཐོག་ལ་རོགས་རམ་གང་མང་བྱེད་ཐུབ་རྒྱུའི་ལྷག་བསམ་དང་དམ་བཅའ་བརྟན་པོ་ཡོད། སྐབས་བཅོ་ལྔ་པའི་བོད་མི་མང་སྤྱི་འཐུས་འོས་འདེམས་ནང་དྭངས་བླངས་ངང་ནས་ཞུགས་རྒྱུའི་ཆེད་མི་མང་རྣམས་ལ་འོས་འདེམས་གནང་རོགས་ཞུ་རྒྱུའི་འབོད་སྐུལ་ཞུ་ཡིག་དུ་ཕུལ།། །
བློ་བཟང་དོན་གྲུབ།  ད་ལྟའི་སྡོད་གནས་བལ་ཡུལ་མཆོད་རྟེན་བྱ་རུང་ཁ་ཤོར།   ཕྱི་ལོ་༢༠༡༠ ཟླ་ཚེས་བཟང་པོར་ཕུལ།།