མང་གཙོའི་གོམས་གཤིས་ཡར་རྒྱས་ཀྱི་མངོན་རྟཌ།

བཀའ་བློན་ཁྲི་པའི་འོས་གཞིའི་ནང་ཞུགས་མཁན་ཧ་ཅང་མང་པོ་ཡོད་པ་དང་སྤྱི་འཐུས་ཀྱི་འོས་གཞིའི་ནང་ཞུགས་མཁན་དེ་བས་ཀྱང་མང་བ་ནི་སྨྲོས་མི་དགོས་པ་རེད། གནས་ཚུལ་དེའི་འོག་ནས་མི་མང་པོ་ཞིག་གིས་རང་རང་གི་འགྲོ་སོང་བཏང་ནས་སྤྱི་འཐུས་དང་བཀའ་ཁྲིའི་འོས་གཞི་ཁྱབ་བསྒྲགས་བྱེད་པའི་འདུ་ལོང་དང་དྲ་རྒྱ་ཁག་ཏུ་བགྲོ་གླེང་འཚང་ཁ་ཤིག་ཤིག་ལྟ་བུ་བྱེད་བཞིན་པ་ནི་མང་གཙོ་ཡར་རྒྱས་ཀྱི་མངོན་རྟགས་སུ་ངོས་འཛིན་བྱེད་ཆོག་པ་ཞིག་རེད། སྤྱི་འཐུས་དང་བཀའ་ཁྲིའི་འོས་གཞི་འདྲ་མིན་སྣ་ཚོགས་ཁྱབ་བསྒྲགས་བྱེད་མཁན་མང་དྲགས་པས་སྐབས་རེ་མི་མང་འགོ་འཐོམས་པའི་གཞི་རྩ་ལྟ་བུར་འགྱུར་མི་སྲིད་པ་མིན་ཡང་། བཀའ་ཁྲིའི་འོས་གཞི་རྣམས་ལ་མི་མང་གི་མདུན་སར་བགྲོ་གླེང་སྣ་ཚོགས་གོ་སྒྲིག་བྱེད་བཞིན་པ་ནི་མི་མང་གི་སེམས་ལ་ཐད་ཀར་བག་ཆགས་ཐེབས་ཐུབ་པའི་ཆ་རྐྱེན་ལྟ་བུར་གྱུར་འདུག དེ་ལ་བརྟེན་ནས་བཀའ་ཁྲིའི་འོས་མི་དག་གི་ཆབ་སྲིད་ཀྱི་གོ་རྟོགས་ལངས་ཕྱོགས། སྤྱི་ཡོངས་ཀྱི་ལས་དོན་ལ་དགོངས་པ་བཞེས་སྟངས་དང་། བཀའ་མོལ་གནང་སྟངས། མི་བབས། ལས་དོན་དམིགས་བསལ་བ་གང་དང་གང་གི་ཐོག་ལ་ཤུགས་རྒྱག་རྒྱུ་ཡིན་པ་སོགས་གསལ་པོ་ཤེས་རྟོགས་བྱུང་བའི་རྗེས་སུ། མི་གཞན་གྱིས་དབང་བསྒྱུར་འོག་ཏུ་འགྲོ་མི་དགོས་པར་མི་རེ་ངོ་རེ་བཞིན། རང་ཉིད་ཀྱིས་སུ་ལ་འདོད་མོས་ཡོད་པ་དེ་ལ་རྒྱབ་སྐྱོར་བྱེད་ཐུབ་པའི་ཕན་རླབས་ཆེ་བར་མངོན་པ་དང་། བྱེད་སྟངས་འདི་དག་གི་ཐོག་ནས་གསལ་རྟོགས་ཐུབ་པ་ནི་བཙན་བྱོལ་བོད་པའི་སྤྱི་ཚོགས་ཀྱི་མང་གཙོའི་གོམས་གཤིས་དང།  མི་མང་གི་འགན་ཁུར་ལེན་ཕྱོགས་སྐོར་ཡར་རྒྱས་སུ་ཤུགས་ཆེན་འགྲོ་བཞིན་པའི་མཚོན་རྟགས་གང་མང་ཞིག་མངོན་གསལ་དུ་གྱུར་འདུག

གནས་སྟངས་འདིའི་བར་གསེང་ནས་མཐོང་ཐུབ་པའི་གནས་ཚུལ་ཆུང་ཙག་རེ་ཟུང་ཞིག་ཡོད་པ་ནི། སྤྱི་ཚོགས་ནང་མངོན་གསལ་དོད་པོས་བཀའ་བློན་ཁྲི་པ་འདི་ཁོ་ན་ལ་འོས་ཤོག་བླུག་དགོས་པའི་འབོད་སྐུལ་སྐོར་སྐྱོད་བྱེད་བཞིན་པ་ཁག་ཅིག་གིས། མི་མང་ཚོགས་སར་བཀའ་ཁྲི་འདི་ལ་རྒྱབ་སྐྱོར་གནང་རོགས་ཞེས་བཤད་པ་དང་། ཟུར་དུ་གནད་ཡོད་མི་སྣ་དང། མི་རེ་རེ་བཞིན་དངོས་སུ་ཐུག་པའི་སྐབས་གོང་དུ་ཁྱབ་བསྒྲགས་བྱེད་བཞིན་པ་དེ་ལས་གཞན་པའི་གང་ཟག་ཅིག་ལ་དགོས་པ་དང་རྒྱུ་མཚན་གང་མང་བགྲང་ནས་བཀའ་ཁྲིར་འདེམས་དགོས་པའི་འབོད་སྐུལ་བྱེད་བཞིན་པའི་གནས་ཚུལ་ཡ་མཚན་ཅན་ཡང་གོ་རྒྱུ་འདུག ཧིན་སྒོར་སྟོང་ཕྲག་ཁ་ཤས་སམ་ཁྲི་ཕྲག་ཁ་ཤས་ཀྱིས་འགྲོ་སོང་བཏང་ནས་ཡིག་ཆ་སྦྱར་འགྲེམས་བྱེད་རྒྱུར་ཕངས་སེམས་མེད་ཀྱང།  རང་ཉིད་ཀྱི་རྩ་ཆེ་བའི་འོས་ཤོག་གཅིག་པུ་དེ་སུ་ལ་བླུག་མིན་བཤད་དཀའ་བ་ལྟ་བུར་གྱུར་ཡོད། གནས་ཚུལ་དང་བྱེད་སྟངས་འདི་ལྟ་བུའི་འོག་ནས་བཀའ་ཁྲིའི་འོས་འཐོབ་པའི་རེ་བ་ཡོད་མཁན་ཞིག་ལ་རྒྱབ་སྐྱོར་ཡོད་ཚུལ་གྱིས་ཡིག་ཆ་སྦྱར་འགྲེམས་དང་དྲིལ་བསྒྲགས་ཀྱི་བཟོ་ལྟ་བསྟན་ནས། མ་འོངས་པར་མི་དེར་བཀའ་ཁྲིའི་འོས་ཐོབ་སོང་ན་རང་ཉིད་ལ་ཁེ་ཕན་རག་ཐབས་ཀྱི་གྲ་སྒྲིག་དང། དོན་དངོས་རང་ཉིད་ཀྱི་མཐུན་ཕྱོགས་ཤིག་ལ་རྒྱབ་སྐྱོར་བྱེད་བཞིན་པའི་སྣང་ཚུལ་འདི་དག་ནི་ཁ་ཞེ་མི་མཚུངས་པའི་སྤྱོད་ཚུལ་ཞིག་མཐོང་ཐོས་སུ་ཡོད་པ་ནི་མང་གཙོའི་གོམས་གཤིས་ཞན་པའི་མངོན་རྟགས་སུ་ངོས་འཛིན་བྱེད་འོས། ༧གོང་ས་༧སྐྱབས་མགོན་ཆེན་པོ་མཆོག་གིས་བླ་ན་མེད་པའི་དགོངས་བཞེས་འོག  བཙན་བྱོལ་བོད་མི་རྣམས་ལ་མང་གཙོ་དང་འདྲ་མཉམ་གྱི་ཐོབ་ཐང་བཟང་པོ་འདི་ཉིད་གསོལ་སྩལ་གནང་ནས་མི་ལོ་༥༠ འདས་ཟིན་པས། རང་ཉིད་ཀྱིས་སུ་ལ་རྒྱབ་སྐྱོར་ཡོད་པ་དེ་ལ་ཁ་ཞེ་གཉིས་མེད་ཀྱིས་རྒྱབ་སྐྱོར་བྱ་རྒྱུར་སྤྱི་ཚོགས་འདིའི་ནང་དཀའ་ངལ་གང་ཡང་མེད་པས། མངོན་ལྐོག་དང་རྒྱབ་མདུན་གྱི་བྱེད་སྟངས་འདི་ལྟ་བུ་བྱེད་དགོས་དོན་གང་ཡང་མེད་པར་སྣང་།།