སོ་སོས་ཚོད་བཟུང་ནས་སྤྱི་འཐུས་བྱེད་རྒྱུ་མཚམས་འཇོག་འདོད།

དྲི་བ། སྐབས་རྗེས་མར་སྤྱི་འཐུས་སུ་བཞེངས་རྒྱུ་མིན་པ་དེའི་རྒྱུ་མཚན་གང་ཡིན་ནམ།

ལན། ང་རང་སྒེར་གྱི་ཐོག་ནས་ཁ་སང་རླུང་འཕྲིན་ནང་དུ་ཞུས་ཚར་བ་རེད། སྐབས་བཅོ་ལྔ་པའི་སྤྱི་འཐུས་ཀྱི་འོས་གཞིའི་ནང་ལང་གི་མིན་ཞུས་པའི་རྒྱུ་མཚན་གཙོ་བོ་དེ། རང་ཉིད་ཀྱིས་ཨ་རི་དང་ཁེ་ན་ཌར་ཡོད་བའི་བོད་མི་ཚང་མའི་ཚབ་ཞུས་ནས་བོད་ཀྱི་རྩ་དོན་ཐོག་ལ་ཡིན་ན་འདྲ། བོད་མི་ས་ཡ་དྲུག་དང་། ༧རྒྱལ་བ་རིན་པོ་ཆེའི་དབུ་ཁྲིད་འོག་ལ་བཙན་བྱོལ་བོད་ཀྱི་མང་གཙོའི་སྒྲིག་འཛུགས་ལ་ཐུགས་ཕན་གསོ་བའི་ཆེད་དུ་ཞབས་འདེགས་གང་ཐུབ་ཞུས་པ་ཡིན་ལ། ཞབས་འདེགས་ཞུ་བའི་སྐལ་པ་བཟང་པོ་ཞེ་དྲག་བྱུང་། ལོ་དུས་གཉིས་རིང་ལ་འབད་བརྩོན་གང་ཐུབ་ཞུས་པ་ཡིན། ཐུགས་ཕན་གསོས་པའི་གནས་ཚུལ་བྱུང་ཡོད་ཀྱི་རེད་ལ། ཕན་མ་ཐོགས་པའི་གནས་ཚུལ་བྱུང་ཡོད་ཀྱི་རེད། ད་སྐབས་སྤྱི་འཐུས་བྱེད་རྒྱུ་སོ་སོས་ཚོད་བཟུང་ནས་མཚམས་འཇོག་དགོས་བསམ་བྱུང་། འོན་ཀྱང་མུ་མཐུད་ནས་བོད་ཀྱི་རྩ་དོན་དང་བོད་མི་ས་ཡ་དྲུག་གི་རང་དབང་སླར་གསོ་དང་། ཐོབ་ཐང་གི་ཐོག་ལ་འབད་བརྩོན་སྔོན་མ་ནས་ཞུས་ཡོད་ལ། ད་ལྟའང་ཞུ་བཞིན་པ་ཡིན། མ་འོངས་པར་ཡང་ཞུ་རྒྱུའི་ཆོད་སེམས་བརྟན་པོ་ཡོད། འཐབ་རྩོད་པ་ཞིག་གི་ངོ་བོའི་ཐོག་ནས་ཞབས་འདེགས་ཞུ་རྒྱུའི་འདུན་པ་ཡོད།

དྲི་བ། ད་ལྟ་བར་སྤྱི་འཐུས་གནང་བའི་ཉམས་མྱོང་གི་ཐོག་ནས་སྤྱི་འཐུས་ལ་ཆ་རྐྱེན་ག་འདྲ་ཚང་དགོས་མིན་དང་། མི་མང་གི་ངོས་ནས་སྤྱི་འཐུས་དང་དེ་བཞིན་རྩ་དོན་ཐད་དོ་སྣང་བྱེད་ཕྱོགས་ག་འདྲ་དགོས་མིན་སྐོར་གསུང་རོགས།

ལན། དྲི་བ་དེ་གལ་ཆེན་པོ་རེད། ང་རང་སྤྱི་འཐུས་བྱས་ནས་ད་བར་ལོ་དགུ་ལྷག་ཙམ་འགྲོ་ཡི་འདུག མང་གཙོ་ཀ་བ་གསུམ་དང་ལྡན་པའི་བཙན་བྱོལ་གཞུང་དེ་༧རྒྱལ་བ་རིན་པོ་ཆེའི་དབུ་ཁྲིད་འོག་ལ་བཀའ་བློན་ཁྲི་པ་ཐད་ཀར་མི་མང་གིས་འོས་འདེམས་བྱེད་ཀྱི་ཡོད་རེད། དེ་བཞིན་བཀའ་ཤག་གིས་འཛིན་སྐྱོང་གི་ཐུགས་འགན་ཆ་ཚང་བཞེས་ཀྱིས་ཡོད་རེད། ཁྲིམས་ཞིབ་ཁང་ནས་ཐུགས་འགན་བཞེས་ཀྱི་ཡོད་པ་ཁག་ཅིག་རེད། མི་མང་གི་ངོ་ཚབ་མཚོན་པའི་བོད་མི་མང་སྤྱི་འཐུས་ལྷན་ཚོགས་དེ་མི་མང་གི་མངོན་འདོད་དང་། མི་མང་གི་དཀའ་ངལ། ལྷག་པར་དུ་ཆབ་སྲིད་ཀྱི་ཐོག་ནས་ང་ཚོའི་དཀའ་ངལ་སེལ་བར་འཕྱར་གྲུ་མཉམ་འདེགས་གནང་དགོས་པ་དང་། ལམ་སྟོན་བྱེད་ཐུབ་མཁན། སྲིད་བྱུས་ཡོད་པ་དེ་ཚོ་ལ་བསྐྱར་ཞིབ་བྱས་ནས་མི་མང་ལ་ཕན་ག་རེ་ཐོགས་ཀྱི་འདུག་དེ་འདྲའི་དགོངས་པ་བཞེས་ཐུབ་མཁན་ཞིག་ཕེབས་དགོས་ཀྱི་ཡོད་རེད་དྲན་གྱི་འདུག

དེའི་ཐོག་ནས་གལ་ཆེ་ཤོས་དེ་སློབ་སྦྱོང་ཡིན་ན་འདྲ། ཉམས་མྱོང་ཡིན་ན་འདྲ། ཐབས་ཤེས་ཡོད་རྒུ་རྩལ་སྤྲུག་གནང་དགོས་པ་ཞིག་དང་། དུས་ཚོད་གཏོང་དགོས་པ། ཉམས་ཞིབ་གནང་དགོས་པ། དགོངས་པ་རྒྱ་ཆེན་པོ་བཞེས་ནས་ལུང་ཚན་དང་ཆོལ་ཁའི་འཐེན་འཁྱེར་དང། གནས་ཚུལ་ཆུང་ཙག་རིགས་ལ་མཁྲེགས་བཟུང་གིས་དེ་ཚོའི་སྒང་ལ་དུས་ཚོད་མང་པོ་གཏོང་བ་དེ་ང་ཚོའི་ནོར་འཁྲུལ་དང་འཐུས་ཤོར་ཆེན་པོ་ཆགས་ཀྱི་ཡོད་རེད་བསམ་གྱི་འདུག ང་ཚོ་བོད་སྤྱི་པའི་ཁེ་ཕན་ཐོག་ལ་ག་དུས་ཡིན་ཡང་དགོངས་པ་བཞེས་པ་དང། བློ་གཟུ་བོར་གནས་པའི་ཐོག་ནས་ཉམས་ཞིབ་གནང་ནས་སྲིད་བྱུས་གསར་པ་དེ་ཚོའི་ཐོག་ལ་ལམ་སྟོན་བྱེད་ཐུབ་པ་དང། རྙིང་པ་ལ་བསྐྱར་ཞིབ་གནང་མཁན་དགོས་ཀྱི་འདུག འགྲིག་དང་མ་འགྲིག་ཐོག་ལ་ཐག་གཅོད་གནང་ཐུབ་མཁན་དང་། དགོངས་པ་བཞེས་ཐུབ་མཁན་བྱུང་བ་ཡིན་ན་སྤྱི་འཐུས་ཚད་དང་ལྡན་པ་ཆགས་ཀྱི་ཡོད་རེད། དེ་འདྲ་བྱུང་ན་བོད་མི་མང་དང་རྩ་དོན་ཐོག་ལ་ཏན་ཏན་ཕན་ཐོགས་ཡོད་མཁན་ཞིག་ཆགས་ཀྱི་རེད་བསམ་གྱི་འདུག །

{jcomments on}