འོས་ཤོག་རྩིས་མེད་འདི་ལྟར་གཏོང་མི་འོས།

དེ་ཡང་དབུས་འོས་བསྡུ་ལས་ཁང་གི་ལམ་སྟོན་ལྟར་རྩིས་མེད་བཏང་བ་ཞིག་ཡིན་འདུག དཔེར་ན་བཀའ་བློན་ཁྲི་པ་དང་སྤྱི་འཐུས་ཀྱི་འོས་ཤོག་འཕེན་སྐབས་རེའུ་མིག་བཞི་ཡོད་པ་དང་། མིང་དང་ཁྱད་མིང་། ཕ་ཡུལ། སྡོད་གནས། ད་ལྟའི་ལས་གནས་སམ་སྔོན་གྱི་ལས་གནས་བཅས་རེད། དེ་དག་ཚང་མ་བསྐངས་མེད་པའི་འོས་ཤོག་རྩིས་མེད་གཏོང་གི་ཡོད་པ་རེད། སྤྱིར་འོས་ཤོག་རྩིས་མེད་གཏོང་སྟངས་བཙན་བྱོལ་བོད་མིའི་འོས་བསྡུའི་སྒྲིག་གཞིའི་ནང་ཁ་གསལ་འཁོད་ཡོད་པ་དང་། རྩིས་མེད་གཏོང་སྟངས་ཀྱི་དོན་ཚན་དེ་དག་གི་ནང་དུ་གོང་གསལ་རེའུ་མིག་གི་ཚིག་དོན་བཞི་ཀ་མ་བསྐངས་ན་འོས་ཤོག་རྩིས་མེད་གཏོང་རྒྱུ་ཡིན་པ་ཚིག་དོན་གཉིས་ཐད་ནས་གསལ་མེད། དབུས་འོས་བསྡུ་ལས་ཁང་ནས་གནད་དོན་དེའི་ཐད་འོས་བསྡུའི་སྒྲིག་གཞིའི་ཟུར་རྒྱན། སྔོན་འགྲོའི་འོས་བསྡུའི་འགེང་ཤོག་དཔེ་རིས་འགྲེལ་བཤད་ནང་རེའུ་མིག་ཆ་ཚང་ངེས་པར་དུ་བསྐང་དགོས་ཞེས་འཁོད་ཡོད་པ་ལ་བརྟེན་ནས་རྩིས་མེད་གཏོང་རྒྱུ་ཡིན་ཚུལ་བརྗོད་བཞིན་ཡོད་ནའང་། དོན་དངོས་འགེང་ཤོག་རེའུ་མིག་ཆ་ཚང་བསྐང་དགོས་ཞེས་འཁོད་པ་དེ། འོས་མི་གང་ཡིན་པ་དེ་ངོ་སྤྲོད་གསལ་པོ་ཡོང་བའི་ཆེད་དུ་ཡིན་པ་ལས། མིང་གཅིག་པུ་བྲིས་ཀྱང་གཞན་དང་མི་ནོར་བར་ངོ་སྤྲོད་གསལ་པོ་ཆགས་ཡོད་ན། འགེང་ཤོག་ཆ་ཚང་མ་བསྐངས་ཀྱང་འོས་ཤོག་རྩིས་མེད་གཏོང་དགོས་དོན་གཏན་ནས་མེད། རེའུ་མིག་ཚང་མ་བསྐངས་ཡོད་ཀྱང་འོས་མི་དེ་སུ་ཡིན་ངོ་སྤྲོད་གསལ་པོ་ཆགས་མེད་ན་རྩིས་འགྲོ་གཏོང་དགོས་པའི་རྒྱུ་མཚན་གང་ཡང་བགྲང་རྒྱུ་མེད།

ཐེངས་འདིའི་བཀའ་ཁྲིའི་འོས་བསྡུ་ལ་དཔེ་བླངས་ནས་བཤད་ན། སྔོན་འགྲོའི་འོས་ཤོག་ནང་མི་གང་ཞིག་གིས་བཀའ་ཟུར་བཀྲས་མཐོང་བསྟན་འཛིན་རྣམ་རྒྱལ་གྱི་མཚན་གཅིག་པུའམ། ཡང་ན་མཁས་དབང་བློ་བཟང་སེང་གེའི་མཚན་གཅིག་པུ་ལས་གཞན་གང་ཡང་བྲིས་མེད་ཀྱང་། བཀའ་ཁྲིའི་འོས་འདེམས་སྐབས་ཁོང་གཉིས་གང་ཟག་གཞན་ཞིག་དང་ནོར་དགོས་དོན་གཏན་ནས་མེད་པར། རྩིས་འགྲོ་གཏོང་དགོས་པ་ལས། མིང་གཅིག་པུ་ལས་མེད་པར་བརྟེན་འོས་ཤོག་རྩིས་མེད་བཏང་ན་འོས་བླུག་མཁན་གྱི་མི་དེའི་མངོན་འདོད་དང་རྩ་ཆེ་བའི་ཐོབ་ཐང་རྩིས་མེད་དུ་བཏང་བ་རེད། ས་གནས་རེ་ཟུང་ཞིག་ནས་མཚན་དང་། བཞུགས་གནས། ལས་གནས་གསུམ་ཀ་མ་ནོར་བར་བསྐངས་ཡོད་ཀྱང་། ཕ་ཡུལ་འབྲི་ས་ལ་སྐྱེས་ཡུལ་བྲིས་པ་ཙམ་གྱིས་འོས་ཤོག་རྩིས་མེད་བཏང་བའང་བྱུང་འདུག འདི་དག་ཚང་མ་དོན་དངོས་ཐོག་རྒྱུ་མཚན་གང་ཡང་མེད་པར་འོས་ཤོག་རྩིས་མེད་དུ་བཏང་བ་ཉག་གཅིག་ཏུ་གྱུར་ཡོད་ལ། རེའུ་མིག་དེ་དག་བཟོ་དགོས་དོན་མི་དེ་ངོ་སྤྲོད་གསལ་པོ་ཡོང་ཆེད་ཁོ་ནར་དམིགས་པ་ཞིག་ལས། ངོ་སྤྲོད་གསལ་པོ་ཡོད་བཞིན་རེའུ་མིག་བཞི་ཀ་མ་བསྐངས་ན་ཡན་ལག་མ་ཚང་བ་ལྟ་བུ་ཞིག་གང་ཡང་མིན། དེར་བརྟེན་འོས་ཤོག་རྩིས་མེད་གཏོང་སྟངས་འདི་རིགས་ཁྲིམས་སྒྲིག་གི་དགོངས་དོན་གཏན་ནས་མིན་ལ། དངོས་ཡོད་གནས་ཚུལ་གྱི་ཐོག་ནས་རྒྱུ་མཚན་ལྡན་པ་ཞིག་ཀྱང་གཏན་ནས་མ་རེད། དེར་བརྟེན་དབུས་འོས་བསྡུ་ལས་ཁང་ནས་མཐའ་མའི་འོས་གྲངས་ཕྱོགས་བསྡོམས་སྐབས་གནད་དོན་འདི་རིགས་ལ་བསྐྱར་དུ་དགོངས་བཞེས་ཀྱིས་ཐག་གཅོད་ངེས་པར་དུ་གནང་དགོས་པ་གལ་ཆེ་བར་མཐོང།

དེ་བཞིན་སྤྱི་འཐུས་ཀྱི་འོས་འདེམས་ཀྱི་འགེང་ཤོག་རེའུ་མིག་ནང་བུད་མེད་གཉིས་བླུགས་སའི་རེའུ་མིག་ཟུར་དུ་བཀོད་པ་ལ་བརྟེན་འོས་ཤོག་རྩིས་མེད་གཏོང་དགོས་པའང་བྱུང་འདུག ཁག་ཅིག་གིས་གོང་གི་རེའུ་མིག་དྲུག་གི་ནང་དུ་བུད་མེད་རེ་ཟུང་གིི་མིང་བྲིས། རྗེས་མ་གཤམ་གྱི་རེའུ་མིག་གཉིས་ཀྱི་ནང་དུའང་བུད་མེད་ཀྱི་མིང་འབྲི་དུས་རང་འཇགས་གོང་དུ་བྲིས་ཟིན་པ་དེ་བསྐྱར་བཟློས་བྱས་པ་རྩིས་མེད་གཏོང་དགོས་སྲིད་ཀྱང། དཀའ་ངལ་ཆེ་ཤོས་དེ་རེའུ་མིག་ནང་ཟུར་བཅད་བྱས་པ་དེས་འཕྲད་པ་དང་། ཟུར་བཅད་བྱས་པའི་བུད་མེད་ཁོ་ནའི་ས་མིག་དེ་རེའུ་མིག་གི་ཐོག་མར་བཀོད་ཡོད་ནའང་ཅུང་ཙམ་ཕན་ཐོགས་ཡོད་པ་ལྟ་བུ་མངོན། སོ་སོའི་སེམས་ནང་དུ་གྲ་སྒྲིག་ཡོད་པའི་བང་རིམ་བཞིན་འོས་ཤོག་བླུགས་པའི་སྐབས་བུད་མེད་གོང་དུ་བྲིས་ཟིན་པ་དང་། གཤམ་གྱི་བུད་མེད་ཁོ་ནའི་རེའུ་མིག་ཏུ་སླེབས་དུས་བུད་མེད་གང་འབྲི་འདོད་པ་དེ་གོང་དུ་བྲིས་ཟིན་པས་མི་བཅུའི་གྲ་སྒྲིག་ཡོད་ཀྱང་མི་བརྒྱད་ལས་འོས་ཤོག་བླུགས་མ་ཐུབ་པའང་བྱུང་འདུག འདི་དག་ཚང་མ་དོ་བདག་འོས་བླུག་མཁན་ཚོས་ཐུགས་སྣང་ལ་རག་ལས་པ་ཞིག་ཡིན་ཡང་། འོས་བསྡུ་ལས་ཁང་ནས་ཀྱང་སྟབས་བདེ་རུ་གང་ཐུབ་ཐུབ་ཀྱིས་གཏོང་དགོས་པ་དེ་ཡང་ཧ་ཅང་གལ་ཆེ། སྤྱིར་ཉུང་མཐའ་བུད་མེད་གཉིས་དགོས་པའི་ཁྲིམས་སྒྲིག་གི་དགོངས་དོན་དང་། ལྷག་དོན་རེའུ་མིག་ནང་ཟུར་བཅད་བྱས་པ་འདིས་གྲོས་ཚོགས་ནང་བུད་མེད་ཉུང་དུ་འགྲོ་བར་ཤུགས་རྐྱེན་ཐེབས་ཀྱི་ཡོད་པ་ལྟ་བུའི་ཚོར་སྣང་ཡང་རང་བཞིན་གྱིས་ཡོང་གི་འདུག །