བསྐྱར་དུ་འོས་བསྡུའི་དེབ་སྐྱེལ་གྱི་གོ་སྐབས་ཡོད་པ་རེད།

དྲི་བ། འོས་བསྡུའི་བརྒྱུད་རིམ་ཁྲོད་ནས་དཀའ་ངལ་ཆེ་ཤོས་གང་འཕྲད་ཡོད་པ་རེད།
ལན། དཀའ་ངལ་ཆེ་ཤོས་དེ་བལ་ཡུལ་དང་འབྲུག་ཡུལ་གཉིས་ཀྱི་སྐོར་དེ་རེད། དེ་མིན་ས་གནས་ཁག་ཏུ་སོང་སྐབས་མི་མང་ལ་གོ་བརྡ་ཅུང་ཟད་མ་འཕྲོད་པའི་རིགས་དང། དེ་བཞིན་སྐད་ཆ་ཤོད་ས་མི་མང་འཛོམས་མ་ཐུབ་པའི་རིགས་སོགས་ཡོང་གི་འདུག

དྲི་བ། མཐོ་རིམ་སློབ་མ་ཚོ་འོས་འཕེན་སྐབས་ཐག་རིང་ནས་ཡོང་དགོས་པའི་རིགས་ཅིག་འདུག་པས། དེའི་རིགས་ལ་རྗེས་མ་འོས་བླུགས་ས་གོ་སྒྲིག་ཐུབ་ཀྱི་རེད།
ལན། ད་ལྟའི་མཱ་ཌི་ར་སི་དང་མཱེ་ལོར། ཅ་དིན་གྷར་སོགས་མཐོ་སློབ་ཁག་༡༢ ལྷག་ཙམ་ཡོད་སར་འོས་འཕེན་གྱི་ས་ཚིགས་བཟོས་ཡོད་པ་རེད། ད་དུང་བོད་ཕྲུག་མང་པོ་ཡོད་སའི་མཐོ་རིམ་སློབ་གྲྭ་ཡོད་ན་འོས་འཕེན་གྱི་ས་ཚིགས་བཟོ་རྒྱུའི་འཆར་གཞི་ཡོད། ཡིན་ནའང་སློབ་མ་ཚོས་དེབ་སྐྱེས་བྱས་མེད་པའི་རིགས་དང། དེ་བཞིན་འོས་འཕེན་ལ་དོ་སྣང་མི་བྱེད་མཁན་མང་པོ་ཡོང་གི་འདུག

དྲི་བ། སྔོན་འགྲོའི་འོས་བསྡུའི་སྐབས་བལ་གོས་ཚོང་མཁན་མང་པོ་ཕྱིར་ཐོན་ཟིན་པས། འོས་འཕེན་ལ་ཤུགས་རྐྱེན་ཐེབས་ཀྱི་རེད་ཅེས་བརྗོད་མཁན་བྱུང་བས། དངོས་སུ་འོས་འཕེན་སྐབས་ཤུགས་རྐྱེན་ཐེབས་ཡོད་དམ།

ལན། བལ་གོས་ཚོང་ས་༨ ལྷག་ཙམ་ལ་འོས་འཕེན་སའི་ས་ཚིགས་བཟོས་ཡོད་པ་རེད། དེ་བཞིན་དེབ་སྐྱེལ་ཡོད་མཁན་ཚོ་འོས་འཕེན་སར་ཡོང་གི་འདུག་ལ། ཡང་འགའ་རེ་སྐབས་དེར་ཚོང་ལས་སོགས་ཀྱིས་ཡོང་མི་ཐུབ་པའང་བྱུང་ཡོད་པ་རེད། གང་ལྟར་མི་མང་གིས་བཤད་པ་ནང་བཞིན་ཆ་ཤས་ལེན་མི་ཐུབ་མཁན་ཕོན་ཆེན་དེ་འདྲ་ཡོད་པ་མ་རེད།

དྲི་བ། སྔོན་འགྲོའི་འོས་བསྡུའི་དེབ་སྐྱེལ་སྐབས་སྦེལ་ཀོབ་དང་གྷོ་པལ་པུར་བོད་ཁྱིམ་སོགས་སུ་དེབ་སྐྱེལ་འཐུས་ཚང་བྱུང་མེད་པའི་སྐོར་གསུང་མཁན་མང་པོ་བྱུང་སོང་བས། དེ་ཚོར་དེབ་སྐྱེལ་ཆེད་ཕྱག་ལས་གནང་འཆར་འདྲ་ཡོད་དམ།
ལན། སྔོན་འགྲོའི་སྐབས་སློབ་གྲྭ་དེ་དག་ནང་དེབ་སྐྱེལ་འཐུས་ཚང་བྱུང་མེད་པའི་སྐོར་ཐོས་པ་དང། ང་ཚོས་ས་གནས་སོ་སོར་སྐབས་འཕྲལ་འབྲེལ་བ་ཞུས་པས། སློབ་གྲྭའི་ལས་བྱེད་ཚོས་ང་ཚོས་མ་གོ་མ་ཐོས་མེད་པར་བྱས་ཡོད། དེ་དག་ནི་སློབ་མ་རང་ཉིད་ཀྱིས་འགན་མ་འཁུར་བ་རེད་ཅེས་ཡིག་ཐོག་ནས་ལན་འདེབས་བྱས་བྱུང།།

{jcomments on}