ཞི་བདེའི་གཟེངས་རྟགས་ཀྱི་ཤུགས་རྐྱེན།

ཁོང་གི་སྙིང་སྟོབས་དང་སེམས་ཤུགས་ལ་བསྔགས་བརྗོད་ཞུ་འོས་ཀྱི་གནས་ཚུལ་ཞིག་ཡིན་པ་དངོས་བདེན་དུ་གྱུར་ཡོད་པ་མ་ཟད། ནོ་སྦེལ་ཞི་བདེའི་གཟེངས་རྟགས་ཚོགས་ཆུང་གི་ཐག་གཅོད་དེ་ཡང་ཧ་ཅང་གཟི་བརྗིད་ཅན་གྱི་བྱུང་བ་ཞིག་ཏུ་གྱུར་ཡོད། འོན་ཀྱང་དེ་ལ་བརྟེན་ནས་རྒྱ་ནག་མང་གཙོ་རུ་འགྱུར་བར་ཤུགས་རྐྱེན་ཐེབས་པར་རེ་བ་རྒྱག་པ་ཅུང་ཙམ་སྔ་དྲགས་པའི་བསམ་ཚུལ་ཞིག་ཏུ་གྱུར་ཡོད་སྙམ། དཔེ་མཚོན་རེ་ཟུང་གི་ཐོག་ནས་བཤད་ན་འབར་མའི་མང་གཙོ་དོན་གཉེར་བ་སྐད་གྲགས་ཅན་ཨང་སན་སུ་ཅི་ལ་༡༩༩༡ ལོར་འཛམ་གླིང་ནོ་སྦེལ་ཞི་བདེའི་གཟེངས་རྟགས་ཐོབ་ནས་ད་བར་མི་ལོ་༢༠ ཙམ་འདས་ཟིན་ཀྱང་འབར་མ་དོན་གྱི་མང་གཙོ་ཅན་ཞིག་ཏུ་གཏན་ནས་འགྱུར་ཐུབ་མེད། འབར་མའི་གཞུང་ལས་རྒྱ་དམར་གཞུང་གདུག་རྩུབ་ཆེ་བ་དང་དོན་དམ་པར་འབར་མའི་གཞུང་གི་རྒྱབ་བསྙེས་ས་ཆེ་ཤོས་དེ་རྒྱ་དམར་གཞུང་ཡིན་པའང་རྒྱལ་སྤྱིའི་ཐོག་ནས་གསལ་པོ་ཤེས་རྟོགས་ཡོད་ཅིང། རྒྱ་དམར་གཞུང་གིས་གནས་ཚུལ་དེ་ལ་བརྟེན་ནས་མང་ཚོགས་ནང་ཤུགས་རྐྱེན་ཐེབས་སུ་མི་འཇུག་པ་ནི་ཟུར་བལྟས་ལེབ་མཐོང་ལྟ་བུར་ཡོད། ད་ལྟའི་ཆར་ལིའུ་ཞོ་པའོ་ཡིས་རྒྱ་དམར་གཞུང་གི་བཙོན་འོག་ཏུ་མནར་གཅོད་མྱོང་བཞིན་ཡོད་པས་ལོ་དུས་རྒྱས་བཅད་ཀྱི་དུས་བཀག་མ་ཚང་བར་གློད་གྲོལ་ཡང་གཏོང་གི་མ་རེད་བསམ་པ་དྲན་གྱི་འདུག རྒྱ་དམར་གཞུང་ལ་ངོ་ཚ་དང་ཁྲེལ་ཡོད། འདྲ་མཉམ་དང་དྲང་བདེན་གྱི་གནས་བབས་ཤིག་ཡོད་ན་རྒྱལ་སྤྱིའི་གནོན་ཤུགས་ལ་བརྩི་འཇོག་བྱེད་འོས་ཀྱང། འཛམ་གླིང་གི་ནང་རྒྱ་ནག་དེ་མི་འབོར་དང་ཁྲོམ་ར་ཆེ་ཤོས། དེ་བཞིན་རྒྱ་ནག་ནང་ནས་བཟོས་པའི་ཕྱིར་ཚོང་གི་བཅའ་ལག་རིན་གོང་ཡང་རྒྱལ་ཁབ་གཞན་ལས་ཆུང་བ་སོགས་ཀྱིས་འཛམ་གླིང་གི་རྒྱལ་ཁབ་མང་པོ་ཞིག་དཔལ་འབྱོར་གྱི་ཐོག་ནས་རྒྱ་གཞུང་ལ་བསྟུན་དགོས་པའི་གནས་ཚུལ་ལ་བསམ་བློ་བཏང་སྟེ། རྒྱལ་སྤྱིའི་ཆབ་སྲིད་ཀྱི་གནོན་ཤུགས་ལ་མགོ་མི་སྒུར་བའི་ལྟ་ཚུལ་དེ་རྒྱ་གཞུང་གིས་དམ་འཛིན་བྱེད་བཞིན་ཡོད། རྒྱ་དམར་གཞུང་ཙམ་དུ་མ་ཟད་རྒྱ་མི་རིགས་ལ་མཚོན་ནའང་གུ་དོག་པའི་མི་རིགས་རིང་ལུགས་ཀྱི་འཆིང་ཐག་དམ་པོ་ཞིག་གིས་བསྡམས་ཡོད་པ་དང།  འཆིང་རྒྱ་དེ་ལས་གྲོལ་ཐུབ་པའི་བློ་སྤོབས་ཡོད་མཁན་ནི་རྒྱ་མི་དུང་ཕྱུར་བཅུ་གསུམ་ཙམ་གྱི་ནང་མཛུབ་རྩེར་བགྲང་ཐུབ་པ་ལྟ་བུ་ལས་མེད་སྟབས། རྒྱ་རིགས་མི་མང་གི་ནང་ནས་ལིའུ་ཞོ་པའོ་ལ་ནོ་སྦེལ་ཞི་བདེའི་གཟེངས་རྟགས་ཐོབ་པའི་གནས་ཚུལ་དེ་ཤེས་རྟོགས་ཡོད་མཁན་ཅུང་ཉུང་ལ། ཤེས་ཀྱང་རྒྱ་གཞུང་གི་ལོག་པའི་དྲིལ་བསྒྲགས་ལ་བརྟེན་ནས་དེ་ལ་བདེན་ཁ་སྟེར་མཁན་དང་རྒྱབ་སྐྱོར་བྱེད་མཁན་ཡོད་མིན་ཡང་བཤད་དཀའ་བར་གྱུར་ཡོད།

ལིའུ་ཞོ་པའོ་ལ་ནོ་སྦེལ་ཞི་བདེའི་གཟེངས་རྟགས་ཐོབ་པ་དེ་དོན་དངོས་དང་ཕུགས་རྒྱང་རིང་པོའི་ཐོག་ནས་བསམ་བློ་བཏང་ན་རྒྱ་མི་རིགས་ཀྱི་རླབས་ཆེན་གཟི་བརྗིད་ཅིག་ཏུ་གྱུར་ཡོད་པ་དང། དེ་ལ་དགའ་བསུ་དང་བསྔགས་བརྗོད་བྱེད་དགོས་པའི་གནད་དོན་ཞིག་ཡིན་མོད། ད་ལྟའི་ཆར་རྒྱ་དམར་གཞུང་གི་དམ་དྲག་དང་གནོན་ཤུགས། བསླུ་བྲིད་དང་མགོ་སྐོར་བཅས་ཀྱི་འོག་རྒྱ་མི་རིགས་ཀྱི་བསམ་བློའི་གོ་རྟོགས་ཀྱི་ཚད་གཞི་དེ་ལྟ་བུ་ཞིག་ལ་སླེབས་མེད་པ་ནི་ཧ་ཅང་གསལ་པོ་རེད། དེར་བརྟེན་ད་དུང་རྒྱ་དམར་གཞུང་འཐོར་ཞིག་ཏུ་འགྲོ་བ་དང་ཆབ་སྲིད་ཀྱི་ལམ་ལུགས་མང་གཙོའི་ལམ་དུ་བགྲོད་ཐུབ་པར་བར་ཐག་ཧ་ཅང་རིང་པོ་ཞིག་ལྷག་ཡོད། གནད་དོན་ཡོངས་རྫོགས་ཀྱི་མདོ་རྩ་ནི་རྒྱ་དམར་གཞུང་གིས་དྲ་རྒྱའི་གནས་ཚུལ་ལ་དམ་དྲག་ཤུགས་ཆེ་བྱེད་བཞིན་པའི་ཐོག་ནས་རྒྱ་མི་རིགས་གཙོ་བོར་གྱུར་པའི་རྒྱ་གཞུང་གི་སྟངས་འཛིན་འོག་ཡོད་པའི་མི་རིགས་རྣམས་ལ་གནས་ཚུལ་ཤེས་རྟོགས་བྱ་རྒྱུའི་རང་དབང་མེད་པ་དང།  རང་དབང་གི་བསམ་ཚུལ་ལྷུག་པོར་བརྗོད་པའི་རང་དབང་མེད་པ་སོགས་ཀྱིས་ད་དུང་མང་གཙོ་དང་རང་དབང་གི་ཐོག་ལ་འགྱུར་བ་ཤུགས་ཆེན་པོ་ཞིག་འགྲོ་རྒྱུར་དཀའ་ངལ་འཕྲད་ཡོད། རྒྱལ་སྤྱིའི་དྲ་རྒྱའི་ཚོང་ལས་སྡེ་ཚན་དཔེར་ན་གྷུའུ་གྷལ་ལྟ་བུས་ཀྱང་གནས་སྐབས་ཀྱི་ཁེ་ཕན་ཙམ་ལ་བརྟེན་ནས་འགྲོ་བ་མིའི་ཐོབ་དང་རང་དབང་ལ་བརྩི་འཇོག་གཏན་ནས་མ་བྱས་པར། རྒྱ་གཞུང་གིས་མི་མང་གི་རང་དབང་བཀག་སྡོམ་བྱེད་པར་མཐུན་འགྱུར་དང་རོགས་རམ་ཤུགས་ཆེ་བྱས་ཡོད་ཀྱང། རྒྱུན་རིང་པོ་མ་འགོར་བར་དཔལ་འབྱོར་གྱི་ཁེ་ཕན་ཐོག་མའི་རེ་བ་ལྟར་མ་རག་པའི་རྒྱུ་མཚན་ལ་བརྟེན་གྷུའུ་གྷལ་དང་རྒྱ་དམར་གཞུང་གཉིས་འགལ་ཟླའི་རང་བཞིན་དུ་གྱུར་ཡོད། མདོར་ན་རྒྱ་དམར་གཞུང་གི་དྲ་རྒྱའི་རང་དབང་འགོག་སྡོམ་ཕྱིར་བསྡུ་མ་བྱས་པའི་བར་དུ་རྒྱ་ནག་ནང་དུ་རང་དབང་གི་ཉི་མ་འཆར་མི་ཐུབ་ལ། དོན་གྱིས་མང་གཙོ་ཅན་དུའང་རྩ་བ་ནས་འགྱུར་མི་སྲིད། རྒྱ་ནག་ནང་དྲ་རྒྱ་བརྒྱུད་ནས་གནས་ཚུལ་ཤེས་རྟོགས་དང་སྨ་བརྗོད་རང་དབང་དགོས་པ་དེ་གལ་ཆེན་པོ་ཡིན་པར་རྒྱལ་སྤྱིའི་ཐོག་ནས་སྣང་ཆུང་གཏན་ནས་གཏོང་མི་རུང་ལ། གནད་དོན་འདི་ནི་དོན་དངོས་ཐོག་འགྲོ་བ་མིའི་ཐོབ་ཐང་དང་ཞི་བདེའི་རྨང་གཞི་གལ་ཆེན་ཞིག་ཏུ་གྱུར་ཡོད་སྟབས་འདིའི་ཐོག་ལ་ཤུགས་སྣོན་རྒྱག་དགོས་པ་ནི་དེ་བས་ཀྱང་གལ་ཆེན་པོར་གྱུར་ཡོད་སྙམ།།